1. Baibal pek kan si caah zeicah kan i lawmh?

 BAIBAL a kan pek caah Jehovah Pathian cungah kan i lawm tuk. Baibal hmangin Pathian nih tuchan ah kan tonmi buaibainak hna tawnghtham khawh awkah a kan bawmmi ruahnak cheuhnak hna a kan pek. Cun a ṭha tukmi hmailei ruahchannak zong a kan pek. A biapi deuhmi cu Jehovah nih Baibal hmangin a ngeihmi sining tampi kha a langhter. Duh a nung tukmi a sining hna ṭha tein kan ruah tikah kan lung a kan suk tuk i amah he pehtlaihnak ṭha ngeih a kan duhter.—Salm 25:14.

2. Jehovah nih minung sinah zeiti lam hna in dah a kong kha a phuan?

² Jehovah nih a kong kha mi nih hngal hna seh ti a duh. Cucaah hlanlio ahcun mang, langhnak le vancungmi hna ti bantuk hmanh hmangin a kong kha a rak phuan. (Nam. 12:6; Lam. 10:3, 4) Asinain mah mang, langhnak asiloah vancungmi sinin a rami bia hna cu ṭial a si lo ahcun zeitindah hlathlai khawh a si lai? Cucaah Jehovah nih hngalhter a kan duhmi kong kha “cauk chungah ṭial” dingin pa pawl kha a rak fial hna. (Jer. 30:2) ‘Pathian thil tuahmi cu a tlingmi’ a si caah kanmah he pehtlaihnak caah a hmanmi lam cu a ṭha bikmi a si i mah nih a kan bawmh lai ti kha kan zumh khawh.—Salm 18:30.

3. Tuchan tiang Baibal a hmunh nakhnga Jehovah nih zeitindah a tuah? (Isaiah 40:8)

³ Isaiah 40:8 rel. Pathian Bia nih kum tampi chungah zumhfekmi nu le pa hna kha a ṭhami lamhruainak a pek hna. Mah cu zetindah a si khawh? Cathiang cu a luancia kum tampi lioah sau a nguh lomi thil cungah rak ṭial a si caah tuchan ah a hramthawk i rak ṭialmi ca hna cu an um ti lo. Asinain Jehovah nih mah a thiangmi ca hna kha mi pawl a tlenter hna. Mah ca a tlengtu hna cu mitlinglo an si ko nain ralring tein an tlen.  Tahchunhnak ah, Hebru Cathiang he aa tlaiin Baibal lei mifim pakhat nih hitin a ṭial: “Mah ca thlukin a hmaan ning tein tlenmi a dang hlanlio cauk pakhat hmanh a um lo tiah chim khawh a si.” Cucaah Baibal cu a luancia kum tampi lioah sau a nguh lomi thil hna cungah rak ṭial a si i Baibal a tlengtu hna zong mitlinglo an si ko nain tuchan ah kan ngeihmi Baibal nih A Ṭialtu Taktak a simi Jehovah ruahnak kha a langhter tiah kan zumh khawh.

4. Hi capar ah zei kong dah kan i ruah hna lai?

⁴ Jehovah cu “laksawng ṭha le laksawng tlamtling paohpaoh” kan hmuhnak Hrampi a si. (Jeim 1:17) Baibal cu Jehovah nih a kan pekmi, a ṭha bikmi laksawng lakah pakhat a si. Laksawng pakhat nih a kan petu nih zeitluk in dah kan kong le kan herhmi a hngalh ti kha a langhter. Baibal a kan Petu kong zongah cutin a si. Mah laksawng kha ṭha tein kan hlathlai tikah Jehovah kong tampi kan hun hngalh. Zeitluk in dah kanmah kong le kan herhmi kong hna a hngalh ti kha kan hun hngalh. Hi capar ah Baibal nih Jehovah sining pathum: a fimnak, a dinnak le a dawtnak a langhter ning kong kan i ruah hna lai. Baibal nih Pathian fimnak a langhter ning kha i ruah hmasa hna u sih.

5. Baibal nih Pathian fimnak a langhter ning lamkhat cu zeidah a si?

⁵ Jehovah nih a fimnak aa telmi, ruahnak cheuhnak kan herh ti kha a hngalh. A laksawng a simi Baibal cu a fimnak in a khat. Baibal ruahnak cheuhnak cu mi cungah a ṭhami huham a ngei. Baibal nih mi nunnak a thlen khawh. Moses nih Baibal a thawknaklei a ṭial lioah Pathian miphun Israel mi kha hitin a ti hna: “Mah hihi nannih caah thiltetuai a si lo, sihmanhsehlaw nan nunnak a si.” (Deut. 32:47) Cathiang bia a zulmi hna nih hlawhtlinnak le a nuammi nunnak an hmu kho. (Salm 1:2, 3) Pathian Bia cu ṭial a sinak sau tuk cang ko hmanh sehlaw mi nunnak ṭhatter khawhnak ṭhawnnak a ngei peng. Tahchunhnak ah, jw.org ah taarmi “Baibal Nih An Nunning A Thlen” timi aa tlaimi capar ah tuchan ah “a zummi hna lakah [Baibal] rian a ṭuan” ning a langhtermi hmuhtonnak tampi kha na hmuh khawh.—1 Thes. 2:13.

6. Baibal cu a dang zei bantuk cauk he hmanh an i lo lo tiah zeicah kan chim khawh?

⁶ Pathian Bia bantuk a dang cauk pakhat hmanh a um lo. Zeicah cutin a si? Baibal a Ṭialtu Jehovah Pathian cu a lianngan bikmi, zungzal in a nungmi le tluktu ngei lo fimnak a ngeimi a si caah a si. A dang cauk tampi zong a ṭialtu pawl an thih hnu hmanhah mi nih an rel peng rih ko, asinain caan a rauh tikah mah cauk i ruahnak cheuhnak hna cu hman awk an tlak ti lo. Asinain Baibal ah a ummi, fimnak aa telmi phunglam hna cu zungzal in an hmun i zeitik chan i a nungmi paoh caah ṭhatnak a chuahter ti kha a lang. Mah a thiangmi cauk kha kan rel i ṭha tein kan ruah tikah A Ṭialtu Taktak nih kan nunnak ah Baibal ruahnak cheuhnak zulh khawh ning kha kan hngalhthiam nakhnga a ṭhawngmi a thiang thlarau a hman. (Salm 119:27; Mal. 3:16; Heb. 4:12) A nungmi Baibal Ṭialtu cu nangmah bawmh awkah a lung a tho tuk. Mah nih Baibal kha hmaan tein rel a kan duhter awk a si!

7. Baibal nih hlanlio Pathian miphun kha zeitindah an lung a rualter hna?

⁷ Baibal ah Pathian fimnak aa tel ti a langhtermi a dang pakhat a um rih. Mah cu Baibal nih Pathian miphun kha an lung aa rual nakhnga a bawmhmi hna hi a si. Israel mi cu Biakammi Ram i an luh tikah hmun dangdang ah khua an rak sa. Mi cheukhat cu ngatlai an hung si, a cheu cu saṭil a zuami an hung si i a dang cu lothlo an hung si. Hmun pakhat ah a  ummi Israel mi hna cu cuka ram i a dang hmun ah a ummi, an miphun hawi Israel mi hna cungah an lungthawhnak fawi tein a tlau kho. Asinain Jehovah nih Israel mi kha a Bia relmi le fiantermi ngaih awkah hmunkhat ah i pumh dingin voi tampi a timhtuahpiak hna. (Deut. 31:10-13; Neh. 8:2, 8, 18) Zumhfekmi Israel mi pakhat cu Jerusalem a phanh tikah ram chung i hmun dangdang in a rami zumtukhat unau tampi a hmuh hna tikah zeitindah a um lai ti khi ruathmanh! Cuticun Jehovah nih a miphun kha lungrual tein um peng awkah a bawmh hna. A hnu i Khrihfabu dirh a si tikah holhphun tampi a hmangmi, zatlang nunning le hnulei sining aa lo lomi mi tampi cu Khrihfabu ah an hun i tel. Asinain Cathiang an sunsak caah lungrual tein a hmaanmi Pathian kha an bia. Zumtu a hung simi hna cu zumtukhat unau pawl bawmhnak in le anmah he an i pumhṭinak thawngin Pathian Bia kha an hngalhthiam khawh.—Lam. 2:42; 8:30, 31.

8. Baibal nih tuchan i Jehovah miphun kha zeitindah an lung a rualter hna?

⁸ Fimnak in a khatmi kan Pathian nih Baibal hmangin a miphun kha a cawnpiak peng hna i an lung a rualter hna. Baibal ah kan hngalh a herhmi Jehovah kong biatak vialte aa tel. Cathiang relmi, fiantermi le i ruahceihmi ngaih awkah Khrihfabu pumhnak, peng civui le pengkomh civui ah hmaan tein kan i pumṭi hna. Cucaah Baibal cu Jehovah a biami hna nih “lungkhat tein a rian an ṭuan”  nakhnga Jehovah tinhnak ah a biapi tukmi pakhat a si.—Zef. 3:9.

9. Baibal bia hngalhthiam awkah zei sining dah ngeih a herh? (Luka 10:21)

⁹ Jehovah fimnak a langhtermi a dang pakhat hi ruathmanh u. Aa toidormi careltu hna lawng nih an hngalhthiam dingmi lam in Cathiang cheubang tampi kha a ṭial. (Luka 10:21 rel.) Khoika hmun i a ummi paoh nih Baibal kha an rel khawh. Baibal lei mifim pakhat nih hitin a ti, “Mi tampi nih a dang zei bantuk cauk nakhmanh in Baibal kha an rel deuh i ṭha deuh zongin an rel.” Asinain aa toidormi lawng nih ṭha tein an hngalhthiam i an zulh. —2 Kor. 3:15, 16.

10. Baibal nih Jehovah fimnak a langhter ning a dang lam pakhat cu zeidah a si?

¹⁰ Baibal ah a ummi Jehovah fimnak kong kha a dang lam pakhat zongin kan hngalh khawh. Jehovah nih Cathiang kha phu pakhat in cawnpiaknak ca lawngah si loin pumpak pakhat cio cawnpiaknak le hnemhnak ca zongah a hman. Baibal kan rel tikah Jehovah cu kan dihlak cungah lungthawhnak a ngei ti kha kan hngalh. (Isa. 30:21) Buaibainak pakhat na ton tikah Cathiang kha na kau i nangmah caah ṭialmi a lomi Baibal caang kha voi zeizat dah na rel tawn? Asinain Baibal cu mi tampi nih an hngalhthiam khawh nakhnga caah ṭialmi a si. Baibal ah nangmah pumpak na herhmi he aa tlakmi mah a konglam thar hna cu zeitindah aa tel khawh? Baibal Ṭialtu Taktak cu van le vawlei ah a fim bikmi a si caah a si.—2 Tim. 3:16, 17.

11. Pathian nih duhdanhnak a ngeih lo kha Baibal ṭial a si lioah zeitindah a langhter?

¹¹ Dinnak cu Jehovah ngeihmi a dang sining pakhat a si. (Deut. 32:4) Dinnak cu duhdanhnak ngeih lonak he naih tein aa pehtlaimi a si i Jehovah cu duhdanhnak a ngei lo. (Lam. 10:34, 35; Rom 2:11) Pathian cu duhdanhnak a ngei lo ti kha Baibal ṭialnak ah an hmanmi holhphun hna nih a langhter. Baibal i a hmasalei uk 39 cu Hebru holh in ṭial a si, mah cu mah lio caan i Pathian miphun nih ṭha tein an hngalhthiammi holh a si. Asinain AD kumzabu pakhatnak a phanh tikah Greek holh cu mi tam deuh nih hmanmi holh a hung si. Cucaah Baibal a donghnaklei uk 27 cu mah holh in ṭial a si. Jehovah nih Baibal kha holhphun pakhat lawngin ṭial awkah bia a khiak lo. Tuchan i vawleicung mi nuai thong riat hrawng nih holhphun tampi kha an hman. Mi tampi nih Jehovah kong kha zeitindah an hun hngalh khawh?

12. Hi donghnak caan ah Daniel 12:4 bia a tlinnak lamkhat cu zeidah a si?

¹² Profet Daniel sinah Jehovah nih donghnak caan ah Baibal ah a ummi “a hmaanmi hngalhnak cu a karh lai” tiah bia aa kam. Mi tampi nih Baibal kha an hun hngalhthiam lai. (Daniel 12:4, NW rel.) b A hmaanmi hngalhnak a karhnak lamkhat cu Baibal le Baibal hrambunhmi cauk pawl holh lehnak, cauk chuahnak le phawtzamhnak thawngin a si. Baibal cu vawleicung ah holh leh bikmi le phawtzamh bikmi cauk a hung si. Chawlettu hna nih an chuahmi Baibal lehnak hna cu a caan ah a man an fak tuk. Jehovah miphun nih Pathian Bia kha uktling in asiloah a cheubang in holhphun 240 lengin an leh i ahopaoh nih a man pek hau loin i lak khawh a si. Cucaah vawleicung i miphun vialte nih donghnak a phanh hlanah “Pennak kong thawngṭha” kha an lehrulh khawh. (Matt. 24:14) Dinnak a ngeimi Pathian nih a  Bia relnak thawngin a kong hngalh awkah mi tam khawh chung tam kha caanṭha pek a duh hna. Mah cu kan dihlak in a kan dawt tuk caah a si.

13. Baibal nih Jehovah dawtnak a langhter tiah zeicah kan chim khawh? (Johan 21:25)

¹³ Baibal nih Baibal Ṭialtu Taktak i a lang bikmi a sining—dawtnak kha a langhter. (1 Johan 4:8) Baibal ah Jehovah cu zei ah dah aa tel i zei ah dah aa tel lo ti kha ruathmanh. Amah he pehtlaihnak ṭha ngeih awk, atu ah a nuammi nunnak hmuh awk le zungzal nunnak hmuh awkah kan herhmi kha a kan pek. Asinain Jehovah nih a kan dawt caah kan tawnghtham khawhmi lengin a neknok tiangin kan cungah huham ngeih a duh lo.—Johan 21:25 rel.

14. Baibal ah Pathian dawtnak kha a dang zei lam in dah a langhter?

¹⁴ Jehovah nih hmaizahnak he a kan pehtlaihnak thawng zongin a dawtnak kha a langhter. Baibal ah kan nunnak kip he aa tlaiin tuah dingmi le tuah lo dingmi kong a dikthliar in a kan chimhnak thawngin a dong kho lomi dingrep hna a kan pe lo. Mah canah a ṭhami biakhiahnak kan tuah khawh nakhnga hmuhtonnak taktak, lungthawh awk ngai a simi chimchungbia hna le ruahnak cheuhnak hna kha a hman. Cuticun Pathian kha kan lungthin dihlak in dawt awk le a nawl zulh awkah Baibal nih a kan forh.

15. (a) Jehovah nih a kan siaherh tuk ti kha Baibal nih zeitindah a langhter? (b) Hmanthlak ah ngakchianu, mino unaupa le kum upa unaunu hna nih zei Baibal tuanbia kong kha dah ṭha tein an ruah? (Gen. 39:1, 10-12; 2 Si. 5:1-3; Luka 2:25-38)

¹⁵ Jehovah nih a kan siaherh tuk ti kha Baibal nih a langhter. Zeitin in dah? A Bia  Baibal ah minung intuarnak a langhtermi a kong tampi in a khat. Baibal ah an kong ṭialmi hna cu ‘kanmah bantuk minung an si’ ve caah an intuar ning kha kan hngalhthiam khawh. (Jeim 5:17) A biapi deuhmi cu kanmah bantuk mi pawl a pehtlaih hna ning kan zohnak thawngin “Bawipa cu zaangfahnak le zawnruahnak in a khatmi a si” ti kha fiang tein kan hngalhthiam khawh.—Jeim 5:11.

16. Baibal chung i palhnak a tuahmi hna kong kan rel tikah Jehovah kong zeidah kan cawn khawh? (Isaiah 55:7)

¹⁶ Jehovah nih a kan dawtnak kha Baibal ah a dang lam pakhat in a langhter. Pathian nih palhnak kan tuah tikah a kan kaltak lai lo ti kha Cathiang nih a kan zumhter. Israel mi nih atu le atu Jehovah cungah sualnak an tuah nain lungtak in an i ngaihchih tikah Pathian nih a ngaihthiam hna. (Isaiah 55:7 rel.) Kumzabu pakhatnak i Khrihfa hna zong nih Pathian dawtnak kha ṭha tein an hngalh. Thiang thlarau forhfialnak in lamkaltu Paul nih zumtukhat unau pawl kha sualnak ngan a tuah nain aa ngaichihmi pa kha “nan ngaihthiam awk le thazaang nan pek awk a si” tiah a rak forh hna. (2 Kor. 2:6, 7; 1 Kor. 5:1-5) Jehovah nih amah a biami hna kha palhnak an tuah ruang men ah a hlawt hna lomi cu cinken awk tlak taktak a si! Mah canah dawtnak in a bawmh hna, a cawnpiak hna i a hawi si ṭhan awkah a sawm hna. Tuchan i aa ngaichihmi misual vialte cung zongah cutin tuah dingin bia aa kam.—Jeim 4:8-10.

17. Zeicah Baibal cu cinken awk tlak laksawng a si?

¹⁷ Jehovah nih a ṭha tukmi laksawng pakhat a kan pek. Baibal cu zeicah cinken awk tlak taktak a si? Kan hngalh cang bantukin Baibal nih Pathian fimnak, dinnak le dawtnak kha a langhter. Jehovah nih rak ka hngal hna seh ti a duh kha mah cauk nih a langhter. Pathian nih a hawi siter a kan duh.

18. Jehovah pekmi Baibal “laksawng ṭha” cung i kan i lawmhnak kha zeitindah kan langhter khawh?

¹⁸ Pathian Bia cu “laksawng ṭha” a si ti kha philh kan duh lo. (Jeim 1:17) Cucaah kan i lawmhnak kha langhter peng hna u sih. Mah a thiangmi bia hna kha thlacam buin kan rel i ṭha tein kan ruahnak thawngin cutin kan tuah khawh. Cutin kan tuah tikah Baibal Ṭialtu Taktak nih kan i zuamnak cungah thluachuah a kan pek lai i ‘Pathian hngalhnak cu kan hmuh lai.’—Ptb. 2:5.