YOMARA le a naule Marcelo le Hiver cu Guatemala i khua hmete pakhat ah a ummi an si. Yomara cu Jehovah Tehte Hna he Baibal a hun cawng i a hnuah a naupale zong an hun cawng ve. Asinain buaibainak pakhat a um. An unau pathum in an mit a caw i mitcaw ca zong an rel thiam lo. Cucaah Baibal a cawnpiaktu nih an cawnmi kong le Baibal caang hna kha a relpiak hna.

A dang zuamcawhnak pakhat cu Khrihfabu pumhnak kha a si. Minit 40 aa hlatnak, aa naih bikmi Biakinn kha anmah tein an kal kho lo. Asinain pumhnak dihlak ah an i pumh khawh nakhnga Khrihfabu i unau pawl nih an timhtuahpiak hna. An unau in zarhlai pumhnak i rian pek an si tikah an rian ṭha tein an ṭuan khawh nakhnga unau pawl nih an bawmh hna.

2019, May thla in an khua ah Khrihfabu pumhnak kha an hun tuah. Mah tikah an khua ah hmaanhmaan hmaikal nuva tuahkhat an rak i ṭhial. Mitcaw ca rel ning le ṭial ning kha an thiam lo nain Baibal a cawngmi mah mitcaw unau pathum kha cawnpiak an duh hna. Cucaah mitcaw ca cawn awkah library ah an kal i mitcaw ca midang cawnpiak ning cauk zong an hlathlai.

Thla tlawmpal a rauh tikah mah unau pathum nih mitcaw ca kha fawi tein an rel khawh i thlaraulei ah an ṭhangcho thluahmah. a Atu ah Yomara, Marcelo le Hiver cu hmaanhmaan hmaikal an ṭuan cang. Marcelo cu bu rianṭuantu a si. Nifatin Jehovah rianṭuannak ah an rian a tam tuk. An lungthawhnak nih midang zong an lung a thawhter ve hna.

Mah unau pathum cu Khrihfabu nih dawtnak in an bawmhmi hna cungah an i lawm tuk. Yomara nih “Jehovah Tehte Hna he a hmasa bik kan i ton in kan cungah Khrihfa dawtnak an langhter” tiah a ti. Marcelo zong nih “kan Khrihfabu ah hawikom ṭha kan ngei i dawtnak in a lung aa rualmi vawleicung pumpi chungkhar zong kan ngei” tiah a ti. Yomara le a naupale nih vawlei paradis i aa thlen lai caan kha hmuh lai an i ngaih tuk.—Salm 37:10, 11; Isa. 35:5.