1. Jesuh nih a zultu pawl kha donghnak caan he aa tlaiin zeidah a chimh hna i zei bantuk ralrinnak dah a pek hna?

 JESUH a thih hlan ni tlawmpal lioah a zultu pali nih hitin an rak hal: “Atu chan donghnak ding hmelchunhnak ah zei thil dah a um hna lai?” (Matt. 24:3) Mah zultu hna nih Jerusalem khua le biakinn hrawh a si lai caan kha zeitindah kan hngalh khawh lai tiah an halmi a si kho men. A bialehnak ah Jesuh nih Jerusalem le biakinn hrawh a si lainak kong lawng si loin kanmah chan i “atu chan donghnak” kong zong a chim. Donghnak caan he aa tlaiin Jesuh nih hitin a ti: “Cu ni le suimilam caan cu ahohmanh nih an hngal lo, vancung i a ummi vanmi zong nih an hngal lo, Fapa zong nih ka hngal lo, Pa lawnglawng nih a hngalh.” Cucaah a zultu vialte kha “ralring te le fimhring tein um” awk le ‘hngilh loin hngah’ awkah a rak forh hna.—Marka 13:32-37.

2. Kumzabu pakhatnak i Khrihfa hna caah ralring tein um peng cu zeicah a biapit?

² Kumzabu pakhatnak i Judah mi Khrihfa hna cu ralring tein an um peng a hau; zeicahtiah mah cungah an nunnak cu aa hngat caah a si. Jesuh nih a zultu pawl kha Jerusalem le biakinn hrawh a si lainak caan hngalh awkah an zoh a herhmi thil kha a chimh hna. Hitin a ti: “Nannih nih Jerusalem khua kha ralkap i an kulh nan hmuh tikah a rauhhlan ah a rawk cang lai ti kha nan hngalh lai.” Mah thil a can tikah Jesuh ralrin peknak kha an zulh a hau i ‘tlang ah an zaam’ a hau. (Luka 21:20, 21) Mah ralrin peknak a zulmi hna cu Rom mi nih Jerusalem khua an hrawh tikah an rak luat.

3. Hi capar ah zei kong dah kan i ruah hna lai?

 ³ Tuchan ah kannih zong hi chan ṭhalo donghnak caan ah kan nung. Cucaah fimhring tein le ralring tein kan um peng a hau. Hi capar ah vawlei thil sining hna zoh buin a tlarimi si khawh ning, kanmahle kanmah i ralrin khawh ning le a taangmi caan kha a ṭha bikmi lam in hman khawh ning kong kan i ruah hna lai.

4. Atu lio vawlei thil sining hna nih Baibal chimchungbia a tlinter ning hngalh kha zeicah kan duh awk a si?

⁴ Tuchan vawlei thil sining nih Baibal chimchungbia a tlinter ning zohnak thawngin lungthawh awk ngai a simi a ruang ṭha hna kan ngei. Tahchunhnak ah, Satan uknak a dong cang lai ti hngalh awkah a kan bawmmi cuset khaset timi thil sining hna kha Jesuh nih a langhter. (Matt. 24:3-14) Lamkaltu Peter nih kan zumhnak a feh peng nakhnga chimchungbia tlinnak ah lungthin pek dingin a kan forh. (2 Pet. 1:19-21) Baibal a donghnak cauk ah mah bia in aa thawk: “Hi cauk hi Jesuh Khrih nih a phuanmi thil kong a si. Cu a phuanmi cu a um zau dingmi thil, Pathian nih a sal hna hmuhsak awkah a pekmi kha a si.” (Biat. 1:1) Cucaah atu lio vawlei thil sining hna le mah nih Baibal chimchungbia zeitindah a tlinter lai ti kha hngalh kan duh tuk. Mah thil sining kong i ruah zong kan duh tuk ko lai.

5. Zeidah kan hrial awk a si nain zeidah kan tuah awk a si? (Hmanthlak zong zoh.)

⁵ Baibal chimchungbia kan i ruah tikah zeidah a cang lai ti ruahdamh kha kan hrial awk a si. Zeicah? Khrihfabu ah lungrualnak a rawhter khomi zei bia hmanh chim kan duh lo caah a si. Tahchunhnak ah, vawlei hruaitu hna nih dohdalnak pakhatkhat kha tawnghtham khawh ning le daihnak le himnak chuahter khawh ning an chimmi kha kan theih men lai. Mah cu 1 Thesalon 5:3 i chimchungbia tlinnak a si tiah ruahdamh canah hmanung bik chuahmi a konglam ningin kan zulh peng a hau. Jehovah bupi nih a kan chuahpiakmi cauk pawl cung hrambunh in kan i ruah tikah Khrihfabu ah “lungthin khat, ruahnak khat in um” peng awkah a kan bawmh.—1 Kor. 1:10; 4:6.

6. Kuathnih Peter 3:11-13 in zeidah kan cawn khawh?

⁶ Kuathnih Peter 3:11-13 rel. Lamkaltu Peter nih Baibal chimchungbia kong hlathlainak ah a tlarimi hmuhnak ngeih dingin a kan bawmh. “Pathian ni nan hngah lioah hin cu bantuk cu nan si awk a si” tiah a kan forh. Zeicah? Jehovah nih Armageddon kha zeitik ‘ni le caan’ ah dah a ratter lai ti kha hngalh awkah kan i zuam lo nain kan “nunning cu a thiangmi le Pathian sin i pekmi” a si nakhnga a taangmi caan kha hman kan duh. (Matt. 24:36; Luka 12:40) Phundang cun, a hmaanmi thil tuah peng le Jehovah caah kan tuahmi zeizong vialte hi amah kan dawt caah a si ti kha langhter kan duh. Mah kha biapi ah kan chiah peng khawh nakhnga kanmahle kanmah kan i ralrin a hau.

7. Kanmahle kanmah kan i ralring ti kha zeitindah kan langhter khawh? (Luka 21:34)

⁷ Jesuh nih a zultu pawl kha vawlei thil sining lawngah lungthin pek loin anmahle anmah i ralrin awk zongah a fial hna. Mah ralrin peknak cu Luka 21:34 ah fiang tein hmuh khawh a si. (Rel.) “I ralring tuah u” timi Jesuh bia kha i cinken. Amahle amah aa ralringmi pakhat cu Jehovah he an i pehtlaihnak a hnorsuang khomi zei bantuk thil  ṭihnung paoh kha hrial awkah aa zuam. Cuticun Pathian dawtnak chungah a hmun peng.—Ptb. 22:3; Judas 20, 21.

8. Lamkaltu Paul nih Khrihfa hna kha zei ruahnak dah a cheuh hna?

⁸ Lamkaltu Paul nih Khrihfa pawl kha anmahle anmah i ralrin dingin ruahnak a cheuh hna. Tahchunhnak ah, Efesa Khrihfa hna kha hitin a ti hna: “Zeitindah kan nuncan a si ti kha ṭha tein i zoh u. Mihrut bantukin um hlah u, mifim bantukin um u.” (Efe. 5:15, 16) Satan nih Jehovah he kan i pehtlaihnak kha hrawh awkah aa zuam peng, cucaah Baibal nih Satan dohnak vialte in kan i huhphenh khawh nakhnga “Bawipa nih tuah hna seh ti aan duhmi hna tu kha tuah i zuam u” tiah ruahnak a kan cheuh.—Efe. 5:17.

9. Jehovah nih tuahter a kan duhmi kha zeitindah kan hngalh khawh lai?

⁹ Baibal nih Jehovah he kan i pehtlaihnak a hrawk khomi thil ṭihnung vialte kha a langhter lo. Cathiang nih direct in a langhter lomi thil sining hna he aa tlaiin biakhiahnak kan tuah a hau tawn. A ṭhami thimnak tuah khawh awkah ‘Bawipa nih tuah hna seh ti a kan duhmi’ kha kan hngalh a hau. Baibal hmaan tein kan hlathlai i ṭha tein kan ruahnak thawngin cutin kan tuah khawh. Jehovah duhnak kha kan hngalhthiam i “Khrih lungthin” ngeih awkah kan i zuam deuhdeuh tikah kan tuahsernak he aa tlaiin cuset khaset timi lamhruainak a um lo tik hmanhah “mifim bantukin” thil kan tuah kho deuhdeuh ve lai. (1 Kor. 2:14-16) A caan ahcun kan hrial a haumi thil kha fawi tein kan hngalh men lai nain a caan ahcun a fawi men lai lo.

10. Kan hrial a herhmi thil ṭihnung cheukhat cu zeidah an si?

¹⁰ Kan hrial a herhmi thil ṭihnung cheukhat ah duh bantukin i umternak, zu tam tuk dinnak, rawl tam tuk einak, midang lung a fahtermi bia chimnak, zaangennak he aa tlaimi nuamhsaihnak, a thurhnawmmi hmanthlak le video zohnak hna aa tel. (Salm 101:3) Kan ral Satan nih Jehovah he kan i pehtlaihnak a rawh nakhnga caanṭha a kawl peng. (1 Pet. 5:8) Kan i ralrin lo ahcun Satan nih kan lungthin le kan ruahnak chungah nahchuahnak, dinfel lonak, hakkauhnak, huatnak, ruamkainak le thinhunnak thlaici a tuh khawh. (Gal. 5:19-21) A hmasa ahcun mah intuarnak hna cu ṭih a nung lo tiah na ruah men lai. Asinain mah kha a hram in kan phawi colh lo ahcun siivai a ngeimi thingkung in a ṭhang thluahmah lai i harnak a chuahter lai.—Jeim 1:14, 15.

11. Kan hrial a herhmi, aa thei tuk lomi thil ṭihnung pakhat cu zeidah a si, zeicah?

¹¹ Aa thei tuk lomi thil ṭihnung pakhat cu hawiṭhalo a si. Mah thil sining hi ruathmanh. Jehovah Tehte a si lomi pakhat he rian nan ṭuanṭi. Jehovah Tehte Hna kong he aa tlaiin a ṭhami hmuhnak ngeihter na duh caah nem tein na pehtlaih i na bawmh tawn. A caan ah mah pa he chuncaw hmanh nan eiṭi tawn. Caan tlawmpal a rauh tikah cun nan eiṭi lengmang cang. Mah pa nih ziaza rawhralnak he aa tlaimi kong hna a hun chim. A hmasa ahcun mah kha na duh lo. Asinain a hnuah cun mah bantuk bia hna kha na hun i ziak i na zei a poi ti lo. Nikhat cu na rianṭuanhawi nih rian in nan ṭin hnuah zu din aan sawm i na cohlan. A donghnak ah na rianṭuanhawi kha duh a nung tukmi in na hun hmuh. Mah tikah na hawipa nih a tuahmi thil hna kha na hun tuah ve cang lai. Mikip kha kan dawt hna i kan upat ko hna, asinain caan kan hmanṭi bikmi hna cu kan cungah huham an ngei tuk ti kha kan i cinken a hau. (1 Kor. 15:33) Jesuh nih a kan forh bantukin kanmahle kanmah kan  i ralrin ahcun Jehovah phunglam ningin a nung lomi hna he a herh loin i komh kha kan hrial khawh lai. (2 Kor. 6:15) Thil ṭihnung kha kan hngalh lai i kan hrial lai.

12. Jesuh zultu pawl nih hi chan ṭhalo donghnak an hngah lioah zei rian dah an ngeih?

¹² Jesuh nih a zultu pawl kha hi chan ṭhalo donghnak an hngah lioah an rian tamter a duh hna. Cucaah ṭuan awk rian a pek hna. “Jerusalem khua le Judea ram vialte le Samaria ram ah le vawleicung khuazakip ah” thawngṭha chim dingin nawl a pek hna. (Lam. 1:6-8) Jesuh zultu pawl caah mah cu rian ngan taktak a si! Mah rian kha lungthin dihlak in an ṭuannak thawngin an caan kha a ṭha bik in an hman.

13. Kan caan a ṭha bik in hman cu zeicah a herh? (Kolose 4:5)

¹³ Kolose 4:5 rel. Mahle mah i ralrin khawh awkah kan caan kan hman ning kha ṭha tein kan ruah a hau. Mi zei cung paohah “i ruahchan lomi thil” a tlung kho. (Pct. 9:11, NW) Kan nunnak cu ruahlopi in a dong kho.

14-15. Kan caan kha zeitindah a ṭha bik in kan hman khawh? (Hebru 6:11, 12) (Hmanthlak zong zoh.)

¹⁴ Jehovah duhnak kan tuahnak thawngin le amah he kan i pehtlaihnak kan fehternak thawngin kan caan kha a ṭha bik in kan hman  khawh. (Johan 14:21) “Fek tein dir u law zeihmanh nih in ṭhial kho hna hlah seh. Bawipa rian teimak tein nan ṭuannak ahcun i manh lo ngaiin um zungzal ko u” timi bia kha kan zulh a hau. (1 Kor. 15:58) Cutin kan tuah ahcun donghnak a rat tik—mah cu kan nunnak a dongh ah siseh asiloah hi chan ṭhalo a dongh ah siseh kan i ngaichih lai lo.—Matt. 24:13; Rom 14:8.

¹⁵ Tuchan zongah a zultu pawl nih vawleicung pumpi i Pathian Pennak kong an chim tikah Jesuh nih lam a hruai hna. Jesuh nih a biakam kha a tlinter. Jehovah bupi hmangin Jesuh nih phungchim ning kha a kan cawnpiak i thawngṭha karhternak ah kan herhmi hriamnam pawl zong a kan pek. (Matt. 28:18-20) Phungchimnak le cawnpiaknak ah fakpi in kan i zuamnak thawngin le Jehovah nih hi chan ṭhalo a donghter lai caan kan hngah lioah ralrin tein kan um pengnak thawngin kan rian kha kan ṭuan. Hebru 6:11, 12 i ruahnak cheuhnak kan zulhnak thawngin kan i ruahchannak kha “a dongh tiangin” fek tein i tlaih hna u sih.—Rel.

16. Zei tuah awkah dah bia kan khiah?

¹⁶ Jehovah nih Satan i hi chan ṭhalo a donghter lai ni le caan kha bia a khiah cang. Mah ni a phanh tikah Jehovah nih Baibal ah ṭialmi chimchungbia pawl kha tlinter loin a um lai lo. Asinain a caan ah hi chan donghnak cu a rau tukmi a lo men lai. Jehovah ni cu “pel loin a ra hrimhrim ko lai.” (Hab. 2:3) Cucaah ‘khamhtu Pathian kha kan hngahnak’ thawngin ‘BAWIPA kha kawl’ peng awkah biakhiak hna u sih.—Mik. 7:7.