CAWN AWK CAPAR 1
“Keimah Cu Na Pathian Ka Si, Zeihmanh Ṭih Hlah”
“Na thinphang hlah, na sinah ka um ko, Keimah cu na Pathian ka si, zeihmanh ṭih hlah. Kaan ṭhawnter lai i kaan bawmh lai.” —ISA. 41:10.
HLA 7 Jehovah Cu Kan Thazaang
LANGHTERNAK *
1-2. (a) Isaiah 41:10 i ṭialmi bia nih unaunu Yoshiko kha zeitindah ṭhatnak a pek? (b) Jehovah nih mah bia in ahote dah ṭhatnak hmu hna seh ti a duh?
ZUMHFEKMI unaunu Yoshiko nih thawngchia pakhat a theih. Siibawi nu nih thla tlawmpal lawng na nung cang lai tiah a ti. Mah tikah zeitindah a lehrulh? Yoshiko nih a duh bikmi Baibal caang a simi Isaiah 41:10 kha a hun ruat. (Rel.) Cun siibawi nu kha Jehovah nih a ka umpi caah ka ṭih lo tiah lungdai tein a ti. * Mah Baibal caang nih Jehovah kha lungthin dihlak in i bochan awkah a bawmh. Kannih zong a fakmi hneksaknak hna ton tikah lungdai tein um awkah mah Baibal caang nih a kan bawmh khawh ve. Mah bia kha Jehovah nih Isaiah a ṭialternak a ruang kha hlathlai hmasa hna u sih.
2 Babilon ah sal in kalpi a si hngami Judah mi hna hnemhnak caah Jehovah nih mah bia kha Isaiah a ṭialtermi a si. Asinain Jehovah nih sal tangmi Judah mi hna ca lawngah si loin Pathian miphun vialte ṭhatnak ca zongah a ṭialtermi a si. (Isa. 40:8; Rom 15:4) “Harnak caan” a simi tuchan ah kan nun caah Isaiah Baibal cauk i thazaang peknak kha kan herh chinchin.—2 Tim. 3:1.
3. (a) 2019, kumcaang Baibal caah thimmi Isaiah 41:10 ah zei biakamnak dah kan hmuh? (b) Mah biakam hna kha zeicah kan herh?
3 Hi capar ah Isaiah 41:10 ah ṭialmi bia nih kan zumhnak a fehtermi Jehovah biakam pathum kong kan i ruah hna lai: (1) Jehovah cu kan sinah a um lai. (2) Jehovah cu kan Pathian a si lai. (3) Jehovah nih a kan bawmh lai. Yoshiko bantukin kannih zong harnak kan ton ve caah cu bantuk biakamnak * kha kan herh. Vawlei thil sining ruangah harnak kan tong ve. Kan lak i cheukhat cu nawlngeitu cozah sinin hremnak hmanh an tong. Cucaah mah biakamnak pathum kong kha i ruah hna u sih.
“Na Sinah Ka Um Ko’’
4. (a) Zei biakam kong dah kan i ruah hmasa bik hna lai? (A tanglei fianternak zong zoh.) (b)Jehovah nih kanmah he aa tlaiin a intuarning kha zeiti lam in dah a langhter? (c) Pathian bia cu na cungah zeitindah huham a ngeih?
4 Jehovah nih “na thinphang hlah, na sinah ka um ko” timi bia in a hmasa bik bia aa kam. * Jehovah nih a kan siaherh i a kan dawtnak thawngin kan sinah a um kha a langhter. Jehovah nih a kan dawtning kha hitin a langhter: “Nangmah cu ka caah a sungmi na si i upatnak kaan pek i kaan dawtmi na si.” (Isa. 43:4) Zeithil hmanh nih Jehovah i a fekmi a dawtnak kha a kham kho lo. (Isa. 54:10) A dawtnak le a hawikom sinak nih ralṭhatnak a kan ngeihter. A hawikom a simi Abram (Abraham) a huhphenh bantukin tuchan zongah a kan huhphenh ve lai. Jehovah nih Abraham kha hitin a ti: “Abram, na thinphang hlah. Keimah cu phaw bantukin aan hupphengtu ka si.”—Gen. 15:1.
Jehovah bawmhnak thawngin tilian bantuk le mei bantuk a simi hneksaknak hna kha kan tei khawh (Catlangbu 5-6 zoh) *
5-6. (a) Hneksaknak hna kan ton tikah Jehovah nih bawmh a kan duh ti kha zeitindah kan hngalh khawh? (b) Yoshiko kong in zeidah kan cawn khawh?
5 Jehovah nih hneksaknak hna kan ton tikah pakhat cio kha bawmh a kan duh. Cucaah hitin bia aa kam: “Ti thuk na tan tikah na sinah ka um lai, harnak na inmi nih aan tei lai lo. Mei alh na tan tikah aan kangh lai lo, harnak na inmi nih aan hliam lai lo.” (Isa. 43:2) Mah cu zei sullam dah a si?
6 Jehovah nih kan tonnmi harnak hna kha kaan hlohpiak hna lai tiah bia aa kammi a si lo. Asinain “ti thuk” bantuk a simi buaibainak hna tangah a kan tlakter lai lo i “mei alh” bantuk a simi hneksaknak ruang zongah a zungzal in a kan rawhter lai lo. Jehovah nih nan sinah ka um lai i mah harnak hna “tan” khawh awkah kaan bawmh hna lai tiah bia aa kam. Jehovah nih zeidah a tuah lai? Thihnak kan ton hmanhah ṭihnak ngei loin lungdai tein le zumhfek tein um khawh awkah a kan bawmh lai. (Isa. 41:13) A hmasa ah langhter cangmi Yoshiko kong in mah bia a hmaan kha kan hngalh khawh. A fanu nih hitin a ti: “Ka Nu ngeihmi lungdaihnak nih kan lung a kan suk tuk. Jehovah nih lungdaihnak a pek. A thih tiang sayamah pawl le mizaw pawl kha Jehovah le a biakam kong kha a chimh hna.” Yoshiko kong in zeidah kan cawn khawh? “Na sinah ka um ko” timi Pathian biakam kha kan zumh ahcun hneksaknak hna kan ton tikah ralṭha tein kan in khawh lai.
“Keimah Cu Na Pathian Ka Si”
7-8. (a) A pahnihnak biakamnak cu zeidah a si, mah cu zei sullam dah a si? (b) Jehovah nih sal tangmi Judah mi kha zeicah ‘zeihmanh ṭih hlah u’ tiah a ti hna? (c) Isaiah 46:3, 4 i zei bia nih dah Pathian miphun kha lungdaihnak a pek hna?
7 Isaiah ṭialmi Jehovah biakam a pahnihnak cu mah hi a si: “Keimah cu na Pathian ka si. Zeihmanh ṭih hlah.” Mah cu zei sullam dah a si? Mah Baibal caang ah “ṭih” tiah lehmi biafang i a hrampi a sullam cu “thil pakhatkhat asiloah mi pakhatkhat nih harnak pek lai phan asiloah harnak ton bantukin lau” kha a si.
8 Jehovah nih Babilon ah sal a tang dingmi Judah mi hna kha zeicah “ṭih” hlah u tiah a ti hna? Cuka ah a ummi hna cu ṭihnak an hun ngei lai ti kha a hngalh caah a si. Zei ruangah dah ṭihnak an ngeih lai? Judah mi hna Babilon ah kum 70 chung sal an taan hnuah Babilon cu a ṭhawngmi Medo-Persia ralkap hna nih an doh hna lai. Jehovah nih mah ralkap hna kha hmangin Babilon ah sal a tangmi a miphun kha a luatter hna lai. (Isa. 41:2-4) Mah lio caan ah a nungmi Babilon mi le miphun dang hna nih an ral pawl an ratmi an hmuh tikah ‘pakhat le pakhat lung ṭhawnnak an i peknak’ thawngin ralṭhatnak ngeih awkah an i zuam. Huhphenhnak hmuh awkah siasal pathian tampi zong an ser. (Isa. 41:5-7) Jehovah nih cun sal tangmi Judah mi kha hitin a ti hnanak thawngin an lung a daihter: “Israel ka sal, . . . Keimah cu na Pathian ka si, zeihmanh ṭih hlah.” (Isa. 41:8-10) Jehovah nih “Keimah cu na Pathian ka si” tiah a timi kha i cinken. Jehovah nih zumhfek tein amah a biami hna kha a philh hna lo, anih cu an Pathian a si rih i nannih zong a miphun nan si rih ti kha mah bia in aamah a khaan. Hitin a ti: “Kaan zohkhenh hna lai, . . . kaan chuah hna lai.” Mah bia nih sal tangmi Judah mi hna kha thazaang a ngeihter tuk hna lai ti cu lunghrin awk a um lo.—Isaiah 46:3, 4 rel.
9-10. Zeicah ṭihnak kan ngeih awk a si lo? Tahchunhnak pe.
9 Vawleicung thil sining cu a chiat chin lengmang caah mi pawl cu ṭihnak in an khat. Kannih zong cu bantuk buaibainak hna kha kan tong ve. Asinain kan ṭih a hau lo. Jehovah nih “Keimah cu nan Pathian ka si” tiah a kan ti. Mah bia nih zeicah lungdaihnak a kan pek?
10 Mah tahchunhnak hi ruathmanh: Jim le Ben cu vanlawng in khual an tlawn lioah thlichia fakpi in a hrang i vanlawng cu aa lei. Mah lioah loudspeaker in “thlichia a hran caah nan taisawmh kha fek tein i sawmh u” timi aw kha an theih. Jim cu a thin a phang tuk. Asinain vanlawng mawngtu nih hitin a ti chap: “Nan thinphang hlah u. Keimah vanlawng mawngtu nih ka chimmi a si.” Mah tikah Jim nih a lu a thin i “mah pa cu aho ko dah a si i cutin a chim” tiah a ti. Asinain Ben cu a thin a phangmi a lo lo. Jim nih “Nang tah na ṭih lo ma?” tiah a hal. Ben nih a nih buin hitin a ti: “Vanlawng mawngtu hi ka pa pei a si cu. Anih cu mawngh a thiam tukmi a si. Ka pa kong ṭha tein na hngalh ahcun nang zong na thin a phang ve lai lo.”
11. Khualtlawngmi pahnih tahchunhnak in zeidah kan cawn khawh?
11 Mah tahchunhnak in zeidah kan cawn khawh? Ben bantukin vancung kan Pa Jehovah kha ṭha tein kan hngalh caah kan lung a dai ve. Hi chan donghnak caan i thlichia bantuk a simi buaibainak hna lakah lam a kan hruai lai ti kha kan hngalh. (Isa. 35:4) Jehovah kan i bochan caah ṭihnak in a khatmi hi vawlei ah lungdai tein kan um kho. (Isa. 30:15) Ben bantukin Pathian kan zumhnak kong kha midang kan chimh hna. Cucaah zei bantuk harnak an ton hmanhah Jehovah nih a kan bawmh lai ti kha an zumh khawh ve.
“Kaan Ṭhawnter lai i Kaan Bawmh lai”
12. (a) A pathumnak biakamnak cu zeidah a si? (b) Jehovah nih “ṭhawnnak in a uk hna lai” timi bia nih zeidah a kan hngalhter?
12 Isaiah ṭialmi a pathumnak biakamnak kong hi ruathmanh: “Kaan ṭhawnter lai i kaan bawmh lai.” Jehovah nih a miphun kha zeitindah a ṭhawnter hna lai ti kha Isaiah nih hitin a rak langhter cang: “BAWIPA nih ṭhawnnak in a uk hna lai.” (Isa. 40:10) Mah bia nih Jehovah cu a ṭhawng tukmi Siangpahrang a si kha a kan hngalhter. Jehovah nih hlanlio a salle bawmhnak le huhphenhnak caah tluktu ngei lomi a thazaang kha a hman bantukin tuchan i amah aa bochanmi hna thazaang peknak le huhphenhnak ca zongah a hman.—Deut. 1:30, 31; Isa. 43:10.
Jehovah huhphenhnak dohnak ah zei bantuk hriamnam hmanh a hlawh a tling lai lo (Catlangbu 12-16 zoh) *
13. (a) A hleiin zeitik caan ah dah kaan ṭhawnter hna lai tiah Jehovah nih bia a kan kamh? (b) Zei aamah khannak nih dah zumhnak le thazaang in a kan khahter?
13 A hleiin ral pawl nih an kan hrem tikah Jehovah nih “kaan ṭhawnter hna lai” tiah bia aa kam bantukin a tuah lai. Hmun cheukhat ah kan ral pawl nih phungchim rian ngolter awk le bupi kha khenkham awkah fakpi in an i zuam. Asinain a hleihluat tuk in kan lungre a thei lo. Jehovah nih thazaang le zumhnak in kaan khahter hna lai tiah aamah a khaan. Hitin bia a kan kamh: “Sermi hriamnam zeihmanh nih khan nangmah cu aan pem kho lai lo.” (Isa. 54:17) Mah bia nih a biapimi a kong pathum kha a kan hngalhter.
14. Pathian ral pawl nih an kan doh tikah zeicah kan khuaruah a har lo?
14 Pakhatnak, Khrih zultu a simi nih huatnak kan tong lai ti kha kan i ruahchan. (Matt. 10:22) Jesuh nih a zultu pawl cu ni hmanung bik caan ah a fakmi hremnak hna an tong lai tiah a rak chimchung. (Matt. 24:9; Johan 15:20) Pahnihnak, kan ral pawl nih a kan huat lawng si loin kanmah dohnak caah hriamnam a phunphun an hman lai tiah profet Isaiah nih a chimchung. An hmanmi hriamnam hna ah fimzer ngaiin hlennak, langhngan in hlennak le a fakmi hremnak hna aa tel. (Matt. 5:11) Jehovah nih kan ral pawl kha mah hriamnam hna hman lo awkah a thloh hna lai lo. (Efe. 6:12; Biat. 12:17) Asinain kan ṭih a hau lo. Zeicah?
15-16. (a) Kan i cinken a herhmi a pathumnak a kong cu zeidah a si, Isaiah 25:4, 5 nih mah kong kha zeitindah a bawmh? (b) A kan dotu nih zeidah an ton lai ti kha Isaiah 41:11, 12 nih zeitindah a langhter?
15 Kan i cinken a herhmi a pathumnak a kong kha ruathmanh. Jehovah nih kanmah dohnak caah ‘sermi hriamnam zeihmanh nih aan pem kho hna lai lo’ tiah a ti. Vanpang nih thlichia dennak in a kan huhphenh khawh bantukin Jehovah nih ‘mipuar mi hna dennak’ in a kan huhphenh. (Isaiah 25:4, 5 rel.) Kan ral pawl nih harnak pek dingin an i zuamnak cu a hlawh a tling lai lo.—Isa. 65:17.
16 Jehovah nih kan cung i “a thin a hungmi” hna nih zeidah an ton lai ti kha fiang tein a langhternak thawngin amah kan i bochannak kha a fehter. (Isaiah 41:11, 12 rel.) Kan ral pawl nih kanmah doh awkah zeitluk in an i zuam hmanhah a phichuak cu aa khat ko: Pathian ral vialte cu “vawlei in an lo lai.”
Jehovah Kan i Bochannak Fehter Khawh Ning
Baibal hmaan tein relnak thawngin Jehovah kan i bochannak cu a fek chinchin kho (Catlangbu 17-18 zoh) *
17-18. (a) Baibal relnak nih Pathian kan i bochannak kha zeitindah a fehter chin khawh? Tahchunhnak pe. (b) 2019 caah thimmi kumcaang Baibal kong ruahnak nih zeitindah a kan bawmh khawh?
17 Jehovah kong ṭha tein hngalh kan i zuamnak thawngin kan i bochannak a fek chinchin. Baibal ṭha tein relnak le kan relmi kong ruahnak thawng lawngin Pathian kong ṭha tein kan hngalh khawh. Jehovah nih hlanlio a mi pawl a huhphenh hnaning kha Baibal ah kan hmuh. Mah nih atu zongah Pathian nih a kan zohkhenh ti kha a kan zumhter.
18 Jehovah nih a kan zohkhenhning langhternak caah Isaiah nih a hmanmi aa dawh tukmi bia kha ruathmanh. Jehovah kha tuukhal in a langhter i a salle kha tuu in a langhter hna. Jehovah nih “tuufa tete kha a pumh hna lai i a kut in a cawi hna lai” tiah Isaiah nih a ti. (Isa. 40:11) Jehovah i a ṭhawngmi a kut in a kan huhphenhmi kan hmuh tikah himnak le lungdaihnak kan hmu lai. Harnak kan ton tikah lungdai tein um khawh awkah zumhawktlak le a fimmi sal nih “Keimah cu na Pathian ka si, zeihmanh ṭih hlah” timi Isaiah 41:10 kha 2019, kumcaang Baibal caah an thim. Mah hnemhnak a pemi bia kha ṭha tein ruat. Mah nih hmailei ah na ton khawhmi harnak hna inkhawh awkah thazaang aan pek lai.
HLA 38 Pathian nih Thazaang Aan Pek hna Lai
^ cat. 5 2019, kumcaang Baibal nih vawleicung asiloah kanmah pumpak nunnak ah harnak a um tik hmanhah lungdai tein um khawhnak a ruang pathum a langhter. Hi capar nih mah a ruang hna kha a fianter lai i mah nih lungretheihnak zorter awk le Jehovah i bochan awkah a kan bawmh lai. Kumcaang Baibal kha ṭha tein ruat. A si khawh ahcun i cinken awkah i zuam. Mah nih hmailei ah na ton khawhmi zuamcawhnak hna inkhawh awkah thazaang aan ngeihter lai.
^ cat. 1 2016, July, Vennak Innsang, cahmai 18 ah zoh.
^ cat. 3 BIAFANG FIANTERNAK: Biakam timi cu ka chimmi ningin ka tuah lai tinak caah aamah khaannak kha a si. Jehovah biakam nih kan nunnak ah kan ton khawhmi buaibainak hna he aa tlaiin kan lungretheihnak kha a zorter khawh.
^ cat. 4 A TANGLEI FIANTERNAK: “Na thinpang hlah” timi bia kha Isaiah 41:10, 13, le 14 ah voithum tiang a langhter. Mah Baibal caang hna ah “ka” (Jehovah kha a chim duhmi a si) timi bia kha atu le atu a hman. Jehovah nih Isaiah kha zeicah “ka” timi bia kha atu le atu a ṭialter? Jehovah kan i bochan lawnglawng ah lungdaihnak kan hmu lai ti langhternak caah a si.
^ cat. 52 HMANTHLAK FIANTERNAK: Chungkhar mi pakhat cio nih rian, ngandamnak, phungchim rian le sianginn ah hneksaknak an tong.
^ cat. 54 HMANTHLAK FIANTERNAK: Jehovah Tehte Hna nih inn ah pumhnak an tuah lioah palik nih an luh hnawh ko hna nain unau pawl cu an lau lo.
^ cat. 56 HMANTHLAK FIANTERNAK: Chungkhar Pumhnak hmaan tein tuahnak nih inkhawhnak ngeih awkah a kan bawmh.
