1-2. (a) Bawipa Zanriah ah mi tampi an i pumh tikah Jehovah nih zeidah a hmuh? (A phaw hmanthlak zoh.) (b) Hi capar ah zei kong dah kan i ruah hna lai?

BAWIPA Zanriah ah i pumh dingin vawleicung pumpi ah mi nuai tampi an i pumh tikah Jehovah nih zeidah a hmuh ti kha ruathmanh. Jehovah nih mah aa pummi hna kha mi tampi in a hmuh hna lawng si loin pumpak pakhat cio zongin a hmuh hna. Tahchunhnak ah, kum fatin a rak i pummi zumhfekmi hna kha a hmuh hna. An lakah hremnak fakpi a tongmi zong an um men lai. Cheukhat cu a dang pumhnak ahcun hmaan tein an i pum lo nain Ruahnolhnak ahcun an rak i pum. Hngalh duhnak lungput an ngeih ruangah a voikhatnak a rak i pummi zong kha Jehovah nih a hmuh hna.

² Ruahnolhnak ah mi tampi an i pumhmi kha Jehovah nih a hmuh tikah aa lawm lai ti cu a fiang ko. (Luka 22:19) Asinain Jehovah nih a rak i pummi milu kha biapi ah a chiahmi a si lo. An i pumhnak a ruang tu kha a caah a biapi deuh. Hi capar ah a biapi tukmi mah biahalnak hi kan i ruah hna lai: Kum fatin tuahmi Ruahnolhnak lawngah si loin amah a dawmi hna caah Jehovah nih a kan timhpiakmi zarh fatin tuahmi pumhnak zong ah zeicah kan i pumh?

3-4. (a) Zeicah kan i pumh? (b) Kan i pumhmi nih kan kong he aa tlaiin zeidah a langhter? (c) 1 Korin 11:23-26 ah langhtermi ningin Ruahnolhnak kha zeicah kan tlolh awk a si lo?

³ A biapi bikmi kan i pumhnak a ruang cu kan biaknak phunkhat a si caah a si. Pumhnak ah Jehovah nih a kan cawnpiak ca zongah kan i pumhmi a si. Aa porhlawmi nih  cun an herhmi cawnpiaknak vialte kha an cohlang duh lo. (3 Johan 9) Kannih tu cu Jehovah le bupi nih cawnpiak kha kan duh tuk.—Isa. 30:20; Johan 6:45.

⁴ Kan i pumhmi nih cawnpiaknak cohlan awkah timhcia a simi, aa toidormi kan si kha a langhter. A biapi tukmi Jesuh a thih Philhlonak ah kan i pumhmi cu kan rian a si caah ti men in si loin Jesuh nih “keimah philhlonak ah tuah u” tiah nawl a kan pekmi kha toidor tein zulh kan duh caah a si: (1 Korin 11:23-26 rel.) Mah pumhnak nih hmailei kan i ruahchannak kha a fehter i Jehovah nih zeitluk in dah a kan dawt ti zong a kan hngalhter. Asinain thapeknak le hnemhnak kha kumkhat ah voikhat nak tam kan herh ti kha Jehovah nih a hngalh. Cucaah zarh fatin pumhnak a kan timhtuahpiak i, i pumh dingin a kan forh. Toidornak nih nawlngaih awkah a kan forh. Mah pumhnak ca i timhtuah awk le i pumhnak caah zarh fatin suimilam tampi kan hman.

5. Aa toidormi hna nih Jehovah sawmnak kha zeicah an lehrulh?

⁵ Kum fatin aa toidormi mi tampi nih Jehovah cawnpiaknak cohlang u timi sawmnak kha an cohlan. (Isa. 50:4) Ruahnolhnak ah an i pum i a dang pumhnak zong ah an hun i pum. (Zek. 8:20-23) ‘A kan khamhtu le a kan bawmtu’ Jehovah thawngin cawnpiaknak le lamhruainak kha lunglawm tein kan cohlan. (Salm 40:17) Jehovah le a dawt tukmi a Fapa Jesuh nih cawnpiak dingin a kan sawmmi cohlannak nakin a biapi deuhmi le a ṭha deuhmi a um maw?—Matt. 17:5; 18:20; 28:20.

6. Toidornak nih pa pakhat kha Ruahnolhnak ah i pumh dingin zeitindah a bawmh?

⁶ Kum fatin Jesuh a thih Philhlonak puai ah mi tam khawh chung tam i pumh awkah kan si khawh chungin kan sawm hna. Mah sawmnak an cohlannak thawngin aa toidormi mi tampi cu ṭhatnak an hmu. Mah kong hi ruathmanh. A luancia kum tampi lioah pa pakhat nih Ruahnolhnak sawmnak catlap kha a hmuh ko nain unaupa kha kaa pum kho lai lo tiah a ti. Asinain Ruahnolhnak zan ah mah pa Biakinn ah a ratmi kha unaupa nih a hmuh tikah a khuaruah a har. Unau pawl nih panh tein an conglawmhmi nih a lung a suk tuk i mah pa cu zarh fatin tuahmi pumhnak zong ah a hun i pum. Mah kum chungah pumhnak voithum lawng a bau. Pumhnak dihlak ah i pumh dingin zeinihdah a bawmh? A lungthin thlen awkah toidornak a ngeih caah a si. A sawmtu unaupa nih “anih cu aa toidor tuk” tiah a ti. Jehovah nih mah pa kha amah biatu si awkah a hnuh i atu cu tipil a ingmi unaupa pakhat a si cang.—2 Sam. 22:28; Johan 6:44.

7. Pumhnak ah kan theihmi le Baibal in kan relmi nih toidornak ngeih awkah zeitindah a kan bawmh khawh?

⁷ Pumhnak ah kan theihmi le Baibal kan relmi nih toidornak ngeih awkah a kan bawmh khawh. Ruahnolhnak tuah hlan zarh hna i pumhnak ah Jesuh kong le tlanhnak man in a nunnak a peknak ah a langhtermi toidornak hna kha a hleiin langhter a si. Ruahnolhnak tuah hlan ni hna ah Jesuh a thihnak le a thawhṭhannak he aa tlaimi kong hna kha rel dingin forh kan si. Pumhnak ah kan hngalhmi le Baibal in kan relmi kong hna nih Jesuh tlanhnak man cungah kan i lawmhnak kha a karhter chin. Kan caah a har hmanhah Jesuh ngeihmi toidornak lungput i zohchunh awk le Jehovah duhnak tuah awkah a kan forh.—Luka 22:41, 42.

8. Jesuh nih zeitindah ralṭhatnak a langhter?

⁸ Jesuh langhtermi ralṭhatnak zong i zohchunh awkah kan i zuam. A thih lai ni ah a langhtermi ralṭhatnak kong kha ruathmanh. A rauhhlan ah a ral pawl nih nihchuak capo ah an ka saih lai, an ka tuk lai i an ka thah lai ti kha a hngalh. (Matt. 20:17-19) Asinain thah a si lai kha lungtho tein a cohlan. A caan a hun phanh tikah Gethsemane dum ah a ummi a zultu pawl kha hitin a ti hna: “Tho u law, kal u sih. A ka rawitu ding kan sin a phan cang hih.” (Matt. 26:36, 46) Hriamnam aa putmi phu an phanh tikah aho a si kha a chimh hna i a zultu pawl kha kalter awkah ralkap pawl kha a fial hna. (Johan 18:3-8) Jesuh nih ralṭhatnak taktak kha a langhter. Tuchan zongah chiti thuhmi Khrihfa hna le tuu dang nih Jesuh langhtermi ralṭhatnak kha an i zohchunh. Zeitindah?

9. (a) Hmaan tein i pumh awkah zeicah ralṭhatnak ngeih a herh men lai? (b) Kan tuahsernak cu an zumhnak ruangah thong a tlami unau pawl cungah zeitindah huham a ngeih?

⁹ Hmaan tein i pumh awkah a harmi thil sining hna ton tikah ralṭhatnak kan langhter a hau men lai. Unau cheukhat cu ngaihchiatnak, lungdonghnak asiloah ngandam lonak hna ruangah harnak an tong ko nain an i pum. Cheukhat cu innchungkhar le cozahlei nawlngeitu hna sinin ralchanhnak tampi an tong ko nain an i pum. Kan tuahsernak cu an zumhnak ruangah thong a tlami unau pawl cungah huham a ngeih ning kha ruathmanh. (Heb. 13:3) Harnak kan ton buin Jehovah kan biak zungzalmi kha an theih tikah an zumhnak, ralṭhatnak le zumhawktlak sinak cu a fek chin lai. Lamkaltu Paul zong cu bantuk hmuhtonnak a ngei ve. Rom khua i thong a tlak lioah unau pawl cu Pathian cungah zumhfek tein an um ti a theih tikah aa lawm. (Fil. 1:3-5, 12-14) Paul nih thonginn in a chuah hlante asiloah a chuah cangka ah Hebru Khrihfa hna sinah cakuat a ṭial. A cakuat ah zumhfekmi Khrihfa pawl kha “unau nan si bantukin pakhat le pakhat i daw zungzal ko u” tiah a forh hna.—Heb. 10:24, 25; 13:1.

10-11. (a) Ruahnolhnak ah ahote dah kan sawm hna awk a si? (b) Cutin tuah awkah Efesa 1:7 nih zei a ruang dah a kan pek?

¹⁰ Kan rualchan, kan rianṭuanṭi hawi le kan innpa pawl Ruahnolhnak ah i pumh dingin kan sawm hna tikah ralṭhatnak kan langhter. Zeicah kan sawm hna? Jehovah le Jesuh nih kan caah an kan tuahpiakmi cungah kan i lawmh tuk caah a si. Jehovah “vel” a simi tlanhnak man thawngin ṭhatnak an hmuh khawh ning kha hngalhter kan duh hna.—Efesa 1:7 rel; Biat. 22:17.

¹¹ Ralṭha tein hmunkhat ah kan i pumhṭinak thawngin Pathian le a Fapa nih an langhtermi a sunglawi tukmi a dang sining pakhat zong kan langhtermi a si.

12. (a) Pumhnak nih Jehovah le Jesuh kan dawt hnanak kha zeitindah a fehter chin? (b) 2 Korin 5:14, 15 nih Jesuh i zohchunh awkah zeitindah a kan forh?

¹² Jehovah le Jesuh kan dawt hnanak nih i pumh awkah a kan forh. Pumhnak in kan hngalhmi nih Jehovah le a Fapa kan dawt hnanak kha a fehter chin. Hmaan tein kan i pumhnak nih kan caah an tuahmi kha a kan hngalhter ṭhan. (Rom 5:8) Ruahnolhnak nih tlanhnak man a theithiam lomi hna hmanh kha Jehovah le Jesuh nih zeitluk in dah an dawt hna ti zong a kan hngalhter. Kan i lawmhnak nih nifa kan nunning ah Jesuh i zohchunh dingin a kan forh. (2 Korin 5:14, 15 rel.) Mah lengah tlanhnak man a kan timhpiaktu Jehovah kha thangṭhat dingin a kan forh. Pathian thangṭhat khawhnak lamkhat cu pumhnak ah lungtak tein a phi kan peknak thawngin a si.

13. Jehovah le a Fapa kan dawtnak kha zeitindah kan langhter khawh? Fianter.

¹³ Jehovah le Jesuh caah zeithil paoh lungtho tein pek kan duhnak thawngin kan dawtnak kha kan langhter khawh. A caan ah kan i pumh khawh nakhnga mahca ṭhatnak kan hlawt a hau men lai. Khrihfabu tampi ah pumhnak pakhat kha zarhlai ni khatkhat i zanlei, kan tha a bat caan ah tuah a si men lai. A dang pumhnak pakhat cu mi an i dinh caan zarhte, zarhpi ah tuah a si men lai. Kan tha a bat buin kan i pumhmi kha Jehovah nih a hmu maw? A hmuh ti cu a fiang ko. I pumh khawh awkah kan si khawh chungin kan i zuammi kha Jehovah nih a sunsak tuk.—Mar. 12:41-44.

14. Jesuh nih mahzawn ruat lo dawtnak a langhternak thawngin zeitindah zohchunh awk ṭha a chiah?

¹⁴ Jesuh nih mahzawn ruat lo dawtnak a langhternak thawngin kan caah zohchunh awk ṭha a chiah. A zultu pawl caah thih a duh lawng si loin amah ca ṭhatnak nakin a zultu pawl ṭhatnak kha biapi deuh ah a chiah. Tahchunhnak ah, a tha a bat i a lungre a theih lio caan hmanhah a zultu pawl kha a ton hna. (Luka 22:39-46) Midang sinin a hmuh khawhmi kha si loin a pek khawhmi hna cung tu ah a lungthin a chiah. (Matt. 20:28) Jehovah le unau pawl kan dawtnak a feh ahcun Bawipa Zanriah le  a dang pumhnak vialte zongah i pumh dingin kan si khawh chung kan i zuam lai.

15. Ahote dah a hleiin bawmh kan duh hna?

¹⁵ A hmaanmi Khrihfa unau rual kan ngei hna i mithar pawl zong kan sinah i tel ve dingin kan si khawh chungin kan sawm hna. “Zumhnak lei i kan rualchan” a si nain a cawlcang ti lomi hna zong bawmh kan duh hna. (Gal. 6:10) Pumhnak ah, a hleiin Ruahnolhnak ah i pumh dingin kan forh hnanak thawngin kan dawtnak kan langhter. Jehovah le Jesuh bantukin a cawlcang ti lomi pakhat cu dawtnak a ngeimi kan Pa le Tuukhal a simi Jehovah sin a kir tikah kan i lawm tuk hringhran.—Matt. 18:14.

16. (a) Pakhat le pakhat zeitindah thazaang kan i pek khawh, pumhnak nih zei tuah awkah dah a kan bawmh lai? (b) Johan 3:16 i Jesuh bia kha atu ah i cinken cu zeicah a ṭhat?

¹⁶ 2019, April 19, Ninga Ni zanlei ah tuah dingmi Ruahnolhnak ah mi tam khawh chung tam kha pumh awkah sawm hna. (“ Na Sawm Hna Lai Maw?” timi rinli kulh ah zoh.) A ra laimi kum hna ah Jehovah nih kan caah a kan timhpiakmi pumhnak dihlak ah hmaan tein kan i pumhnak thawngin pakhat le pakhat thazaang i pe hna u sih. Hi chan donghnak a naih chin lengmang bantukin pumhnak nih toidornak, ralṭhatnak le dawtnak ngeih awkah a kan bawmh lai. (1 Thes. 5:8-11) Jehovah le a Fapa nih a kan dawt tuk caah zeitindah kan um ti kha lungthin dihlak in langhter hna u sih.—Johan 3:16 rel.