2018, January 24, Nithum ni zing ah United States le Canada Bethel chungkhar hna nih lunglawmh awk ngai a simi thawngthanhnak pakhat an theih: Mah cu Unaupa Kenneth Cook, Jr. kha Jehovah Tehte Hna i Uktu Bu chungtel in rian an pekmi kha a si.

Unaupa Cook cu U.S.A, Pennsylvania ah a chuak i cuka ah a ṭhangmi a si. Siangsangruun a dih hlan deuhte ah a khaanhawi sinin biatak a rak theih i 1980, June 7 ah tipil a ing. 1982, September 1 thawkin hmaanhmaan hmaikal a rak ṭuan. Hmaikal kumhnih a ṭuan hnu, 1984, October 12 ah New York, Wallkill i Bethel ah rian ṭuan dingin sawm a si.

Unaupa Cook cu Canamnak department le Bethel Zung ah kum 25 chung rian a phunphun a ṭuan. 1996 ah Jamie he an i um i Wallkill Bethel ah rian an ṭuanṭi. 2009, December ah an nuva in New York, Patterson ah a ummi Vennak Innsang Fimcawnnak Sianginn (Watchtower Educationnak Center) ah an i ṭhial. Cuka ah Unaupa Cook cu Ca Cohlannak Le Kuatnak Department (Writing Correspondence Department) ah rianpek a si. 2016, April ah Wallkill ah chikkhat an i ṭhial i a hnuah New York, Brooklyn ah an i ṭhial ṭhan. Mah in thla nga hnuah New York, Warwick ah vawleicung pumpi zungpi cu ṭhial a si. 2017, January ah Uktu Bu i Caṭialnak Kawmiṭi bawmtu in rian pek a si.