CAWN AWK CAPAR 4
Zanriah Sawhsawh nih Vancung Siangpahrang kong Zeidah a Kan Cawnpiak?
“Hihi ka pum a si. . . . Hihi ka thi a si, biakam fehternak thisen . . a si.”—MATT. 26:26-28.
HLA 16 Chiti Thuhmi Fapa caah Jehovah kha Thangṭhat
LANGHTERNAK *
1-2. (a) Jesuh nih a thih philhlonak kha a sawhsawh tein a kan timhpiak lai ti kha zeicah kan i ruahchan khawh? (b) Jesuh ngeihmi zei sining hna dah kan i ruah lai?
KUM fatin tuahmi Khrih a thih Philhlonak ah zei hna dah an tuah ti kha na chim kho lai maw? Bawipa Zanriah i a hrampi a kong hna kan i cinken lai ti cu a fiang ko. Zeicah? Mah zanriah cu a sawhsawhte a si caah a si. Asinain mah cu a biapi tukmi a si. Cu a si ah ‘Zeicah mah zanriah cu a sawhsawhte a si kun?’ tiah kan ti khawh men.
2 Jesuh nih vawleicung i phungchim rian a ṭuan lioah a biapi tukmi biatak kha a fiangmi in le hngalh a fawimi lam in a cawnpiak hna. (Matt. 7:28, 29) Cu bantukin a thih philhlonak * zong kha a sawhsawh tein le sullam a ngei tukmi lam in a kan timhpiak. Bawipa zanriah ah hmanmi le Jesuh nih a chimmi, a tuahmi thil cheukhat kong kha i ruah hna u sih. Mah tikah Jesuh cu zeitluk in dah aa toidor, a ral a ṭhat i dawtnak a ngeih ti kha kan hun hngalhthiam chin lai i kan i zohchunh khawh chinchin lai.
Jesuh Cu Aa Toidor
Ruahnolhnak ah hmanmi mitsur zu le changreu nih Jesuh nih kan caah a nunnak a pek ti le atu ah vancung ah Siangpahrang in a kan uk cang ti kha a kan hngalhter (Catlangbu 3-5 zoh)
3. Matthai 26:26-28 ah ṭial a si bantukin Jesuh nih Bawipa Zanriah cu zeitindah a sawhsawh tein a rak thawk, a hmanmi thil pahnih nih zeidah a aiawh?
3 Jesuh nih a thih Philhlonak kha lamkaltu 11 he an umṭi lioah a rak tuah. Lanhtak Puai i a tangmi thilnu telh lo changreu le mitsur zu kha a hman i a thih philh lonak puai kha a tuahpi Matthai 26:26-28 rel.) Jesuh nih lamkaltu hna kha changreu le mitsur zu nih a rauhhlan ah an caah a pek dingmi, a tlingmi a pum le a thi kha a aiawh tiah a ti hna. A biapi tukmi mah puai kha a sawhsawh tein tuah a si caah lamkaltu pawl cu an khuaruah a har lo. Zeicah?
hna. (4. Jesuh nih Bawipa Zanriah a sawhsawh tein a tuahnak a ruang hngalhthiam awkah Martha a pekmi ruahnak cheuhnak nih zeitindah a kan bawmh?
4 Jesuh nih phungchim rian a ṭuan i a kum thumnak ah, a hawikom a simi Lazaruh, Martha, le Mary te sin a tlawn lioah a cangmi kong kha ruathmanh. Tlawmpal an i dinh hnuah Jesuh nih a cawnpiak colh hna. Martha cu a biapi tukmi khual caah rawl kha a hleihluat tuk in a timhtuah i a lung a vaivuan. Mah tikah Jesuh nih Martha kha a hleihluat tuk in timhtuah a herh lonak a ruang kha hngalhthiam awkah dawtnak he a rak chimh. (Luka 10:40-42) A hnuah a thih lai suimilam tlawmpal lawng aa duh lioah amah Jesuh theng nih mah ruahnak cheuhnak kha a rak zulh. Bawipa Zanriah kha a sawhsawh tein a rak tuahpi hna. Mah nih Jesuh kong zeidah a kan cawnpiak?
5. A sawhsawh te a simi mah zanriah nih Jesuh kong zeidah a langhter, mah cu Filipi 2:5-8 he zeitindah aa tlak?
5 Jesuh a biachimnak le a tuahsernak vialte ah toidornak kha kan hmuh khawh. Cucaah vawleicung a nunnak a donghnak ah toidornak a langhtermi cu khuaruahhar awk a si lo. (Matt. 11:29) Minung tuanbia ah a ngan bikmi raithawinak ka pek cang lai ti le Jehovah nih vancung ah siangpahrang rian pek dingin a ka thawhter lai ti kha a hngalh. Cutin a hngalh ko nain a thih philhlonak kha hlunghlai ngaiin a tuah lonak thawngin amahle amah kha aa tlak lomi lam in lungthin aa pe lo. Mah canah a zultu pawl kha zanriah sawhsawh in a thih philhlonak kha kumkhat ah voikhat tuah dingin a fial hna. (Johan 13:15; 1 Kor. 11:23-25) A sawhsawh te a si ko nain aa tlakmi mah zanriah nih Jesuh cu aa porhlaw lo ti kha a langhter. Vancung kan Siangpahrang nih toidornak a ngeih caah kan i lawm tuk.—Filipi 2:5-8 rel.
6. Harnak kan ton tikah Jesuh toidornak kha zeitindah kan i zohchunh khawh?
6 Jesuh toidornak kha zeitindah kan i zohchunh khawh? Kanmah nakin midang ca ṭhatnak kha biapi deuh ah kan chiahnak thawngin a si. (Fil. 2:3, 4) Jesuh vawleicung a nunnak hmanung bik zan kha ruathmanh. Tlawmpal ah fahnak in buin ka thi cang lai ti kha a hngalh ko nain a caah a ngaih a chia hnga dingmi zumhfekmi lamkaltu pawl caah a lungre a thei. Cucaah mah zan ah lamkaltu pawl kha lamhruainak, thapeknak le hnemhnak a pek hna. (Johan 14:25-31) Jesuh nih amah nakin midang ṭhatnak ca biapi deuh ah a chiahnak thawngin toidornak kha a langhter. Kan caah zeitluk zohchunh awk ṭha dah a si.
Jesuh Cu A Ral A Ṭha
7. Jesuh nih Bawipa Zanriah a tuahpi hna hnuah zeitindah ralṭhatnak a langhter?
7 Jesuh nih Bawipa Zanriah a tuahpi hna hnu hmanhah ralṭhatnak a rak langhter. Zeitindah? Jesuh nih Pathian thangchiattu in sualphawt ka si lai i ningzak ngaiin thah ka si lai ti kha a hngalh ko nain a Pa duhnak kha a cohlan. (Matt. 26:65, 66; Luka 22:41, 42) Jehovah min thangṭhatnak, Pathian Cungnung bik a sinak langhternak le mi nih zungzal nunnak an hmuh khawh nakhnga lam awnpiak awkah Jesuh cu zumhfek tein a um. Mah lengah a zultu hna kha a rauhhlan ah an ton laimi thil caah a timhtuah hna.
8. (a) Jesuh nih zumhfekmi lamkaltu hna kha zeidah a chimh hna? (b) Jesuh a thih hnu kum tlawmpal ah a zultu hna nih ralṭhatnak kha zeitindah an langhter ve?
8 Jesuh nih a ngeih khawhmi zei bantuk lungretheihnak kong hmanhah lungthin pek loin zumhfekmi lamkaltu pawl an herhmi cungah a lungthin a peknak thawng zongin ralṭhatnak a langhter. Judas a chuahter hnuah zanriah sawhsawh a tuahpi hna. Mah nih chiti thuhmi zultu a si dingmi hna kha Jesuh nih a thletmi a thi le biakam thar ah telnak in ṭhatnak an hmuh lai kha a hngalhter ṭhan hna. (1 Kor. 10:16, 17) Zumhfek tein an um nakhnga le vancung ah amah he an umṭi khawh nakhnga bawmh awkah Jesuh nih a zultu hna kha amah le a Pa nih an sinin an i ruahchanmi kha a chimh hna. (Johan 15:12-15) Cun an ton dingmi hneksaknak zong a chimh hna. Amah i zohchunh awkah tha a pek hna i “ṭih hlah u” tiah a forh hna. (Johan 16:1-4a, 33) Kum tampi a rauh hnu hmanhah Jesuh zultu pawl nih Jesuh nih mahca ṭhatnak a hlawtmi kha an i zohchunh rih i ralṭhatnak an langhter. Harnak a phunphun an ton bu hmanhin pakhat le pakhat an i bawm.—Heb. 10:33, 34.
9. Jesuh langhtermi ralṭhatnak kha zeitindah kan i zohchunh khawh?
9 Tuchan zongah Jesuh langhtermi ralṭhatnak kha kan langhter ve. Tahchunhnak ah, an zumhnak ruangah hremnak a tongmi unau pawl bawmh awkah ralṭhatnak a herh. A caan ah unau pawl cu a ding loin thong thlak an si men lai. Cutin a si tikah anmah huhphenhnak bia chim ti bantuk i telin kan tuah khawhmi paoh kha kan tuahpiak hna a hau lai. (Fil. 1:14; Heb. 13:19) “Ralṭha ngaingai in” phung kan chim zungzalnak thawng zongin ralṭhatnak kan langhter. (Lam. 14:3) Jesuh bantukin mi nih an kan ralchanh i an kan hrem hmanhah Pennak kong chim dingin bia kan khiah. Asinain a caan ah kan ral a chiat caan a um men lai. Mah tikah zeidah kan tuah khawh?
10. Ruahnolhnak aa thawk hlan zarh hna ah zeidah kan tuah awk a si, zeicah?
10 Khrih tlanhnak man nih a kan pekmi ruahchannak kong kan ruahnak thawngin kan ralṭhatnak kha kan fehter khawh. (Johan 3:16; Efe. 1:7) Ruahnolhnak puai hlan zarh hna ah tlanhnak man kan sunsaknak karhter chinnak caanṭha kan ngei. Mah caan chungah Ruahnolhnak Baibal rel ding kha rel law Jesuh a thih laite ah a cangmi thil sining hna kha thlacam buin ruat. Cun Bawipa Zanriah i kan i pumh tikah Ruahnolhnak ah hmanmi mitsur zu le changreu a biapitnak le mah nih a aiawhmi kha ṭha tein hngalhthiam chin awkah a kan bawmh lai. Jehovah le Jesuh nih kan caah an tuahmi thil kan sunsak tik le mah nih kanmah le kan dawtmi hna ṭhatnak a kan pekning kan hngalh tikah kan i ruahchannak cu a fek chin i a dongh tiang ralṭha tein inkhawh awkah a kan forh.—Heb. 12:3.
11-12. Atu tiangah zei kong hna dah kan hngalh cang?
11 Bawipa Zanriah in kan hngalhmi nih tlanhnak man a sunlawining lawng si loin Jesuh ngeihmi toidornak le ralṭhatnak zong a kan hngalhter ṭhan. Jesuh nih kan caah a kan nawlpiaktu, Tlangbawi Ngan in vancung i rian a ṭuannak zongah mah sining hna a langhter rihmi cu zeitluk lunglawmh awk dah a si. (Heb. 7:24, 25) Kan i lawmhnak langhter awkah Jesuh nih nawl a kan pek bantukin a thih philhlonak kha zumhfek tein kan tuah a hau. (Luka 22:19, 20) Nisan 14 he aa khatmi ni ah mah puai kha kan tuah. Mah ni cu kumkhat chungah a biapi bikmi ni a si.
12 Bawipa Zanriah a sawhsawh tein tuah a simi nih kan caah a nunnak pek awkah a forhmi Jesuh i a dang sining pakhat zong a kan hngalhter. Vawleicung a um lioah mah sining ruangah Jesuh cu mi nih an hngalh. Mah cu zeidah a si?
Jesuh Cu Dawtnak A Ngei
13. Johan 15:9 le 1 Johan 4:8-10 nih Jehovah le Jesuh nih an langhtermi dawtnak kha zeitindah a langhter, an dawtnak in ahote dah ṭhatnak a hmu?
13 Jehovah nih a tuahmi kip ah a kan dawtnak a langhtermi kha Jesuh nih tling tein aa zohchunh. (Johan 15:9; 1 Johan 4:8-10 rel.) A biapi bikmi cu Jesuh nih kan caah a nunnak a pek. Chiti thuhmi kan si ah, “tuu dang” kan si ah Jehovah le a Fapa nih raithawinak in an langhtermi dawtnak in ṭhatnak kan hmu. (Johan 10:16; 1 Johan 2:2) Mah lengah Ruahnolhnak ah hmanmi mitsur zu le changreu kong kha ruat. Mah nih Jesuh dawtnak le a zultu pawl an zawn a ruah hnanak kha a langhter. Zeitin in dah?
Jesuh nih Ruahnolhnak puai kha kumzabu tampi chung le thil sining a phunphun ah an tuah khawh nakhnga a sawhsawh tein dawtnak he a rak tuahpi hmasa hna (Catlangbu 14-16 zoh) *
14. Jesuh nih a zultu pawl a dawt hnanak kha zeiti lam in dah a langhter?
14 Jesuh nih chiti thuhmi a zultu pawl a dawt hnanak kha zulh awkah a harmi phunglam in si loin a sawhsawh te a simi zanriah in a tuahpi hnanak in a langhter. Caan a liam tikah mah chiti thuhmi zultu pawl nih kum fatin Ruahnolhnak kha an hman a hau. Thong tlaknak hna telin thil sining a dangdang zongah an hman a hau. (Biat. 2:10) Jesuh nawlpekmi kha an zul kho lai maw? An zulh khawh.
15-16. A harmi thil sining tangah mi cheukhat nih zeitindah Bawipa Zanriah an hman khawh?
15 Kumzabu pakhatnak in tuchan tiang a hmaanmi Khrihfa hna nih Jesuh a thih philhlonak kha an tuah. Thil sining a har tik caan zongah Bawipa Zanriah phunglam kha an si khawh chungin an zulh. A tanglei kong hna kha zohhmanh. Unaupa Harold King cu Tuluk thonginn ah amah te lawngin a um nain Ruahnolhnak tuah khawhnak lam a rak kawl. A ngeihmi thil hna kha hmangin Ruahnolhnak ah hmanmi mitsur zu le changreu kha a thli tein a rak timhtuah. Cun a si khawh tawk tein Ruahnolhnak caan kha a tuak. Ruahnolhnak caan a phanh tikah a khaan chungah amah te lawng in hla a sa, thla a cam i phung a chim.
16 A dang tahchunhnak pakhat zong a um rih. Vawlei Ralpi IInak lioah rianhrang ṭuannak thonginn ah a tlami unaunu phukhat cu an nunnak thap in Bawipa Zanriah an hmang. Asinain mitsur zu le changreu caah an hmanmi thil cu a sawhsawh te a si caah Ruahnolhnak kha a thli tein an tuah khawh. Hitin an chim: “Ṭhutdan pakhat kha puan rang in kan khuh, a cungah mitsur zu le changreu kha
kan chiah i mah kha kan kulh. Electric mei kan van ahcun an kan hngalh sual lai ti kan phan caah phazawngdaing kan van. . . . A min thiang thianternak caah kan thazaang dihlak in kan hman lai tiah kan Pa sinah lungtho tein bia kan i kam ṭhan.” An langhtermi zumhnak cu zeitluk in dah a feh. A harmi thil sining tang i kan um hmanhah Ruahnolhnak kan tuah khawh nakhnga Jesuh nih a kan bawmhnak thawngin a dawtnak a langhter.17. Zei biahalnak hna dah kan i hal awk a si?
17 Ruahnolhnak a naih tikah mah biahalnak hna hi kan i hal kho: ‘Jesuh langhtermi dawtnak kha naih tein zeitindah kaa zohchunh khawh lai? Keimah nakin zumtukhat unau pawl an herhmi kha biapi deuh ah ka chia maw? Unau pawl sinin an tuah khawhmi nakin tam deuh kaa ruahchan maw asiloah ri an ngeihnak kha ka hmu maw?’ Jesuh kha i zohchunh zungzal hna u sih law “lungthin khat in um u” sih.—1 Pet. 3:8.
Mah Kong Hna Hi I Cinken
18-19. (a) Zeidah kan zumh khawh? (b) Zei tuah awkah dah bia na khiah?
18 Khrih a thih Philhlonak tuah awkah fial kan simi cu a zungzal in a si lai lo. Harnak nganpi i Jesuh a “rat” tikah a tang rihmi “a mithim hna” kha vancung ah a pumh hna lai i Ruahnolhnak tuahnak cu a dong cang lai.—1 Kor. 11:26; Matt. 24:31.
19 Bawipa Zanriah tuah a um ti lo hnu hmanhah Jehovah miphun nih Jesuh langhtermi toidornak, ralṭhatnak le dawtnak nih a langhtermi zanriah sawhsawh kha an i cinken lai ti kan zumh khawh. Mah tikah Bawipa zanriah ah aa tel balmi hna nih a tho ṭhanmi hna kha mah kong cu an chimh te hna lai. Asinain mah zanriah in atu ah ṭhatnak hmuh awkah Jesuh langhtermi toidornak, ralṭhatnak le dawtnak i zohchunh awkah bia kan khiah a hau. Cutin kan tuah ahcun Jehovah sinin laksawng kan hmu lai ti kha kan zumh khawh.—2 Pet. 1:10, 11.
HLA 13 Zohchunh Awk Tlak Khrih
^ cat. 5 A rauhhlan ah Jesuh Khrih a thih philhlonak caah Bawipa Zanriah kan tuah cang lai. A sawhsawh tein tuahmi mah zanriah nih Jesuh i tangdornak, ralṭhatnak le dawtnak kong a kan cawnpiak. Hi capar ah mah a sunglawi tukmi sining hna zeitindah kan i zohchunh khawh ti kha kan i ruah hna lai.
^ cat. 2 BIAFANG FIANTERNAK: Philhlonak timi cu a biapi tukmi thil sining pakhat asiloah mi pakhat cinkennak ca le thangṭhatnak caah a hleikhunmi thil pakhatkhat tuah kha a si.
^ cat. 56 HMANTHLAK FIANTERNAK: Kumzabu pakhatnak ah, 1800 hnuah Nazi rianhrang ṭuannak thonginn ah le tuchan i Thlanglei American ṭhal caan ah vanpang a um lomi Biakinn ah zumhfekmi hna nih Ruahnolhnak an tuahmi langhternak hna a si.