CAWN AWK CAPAR 1
“BAWIPA Nawl A Zulmi Cu Zeihmanh An Baumi A Um Bal Lo”
2022 KUMCAANG BAIBAL: “BAWIPA nawl a zulmi cu zeihmanh an baumi a um bal lo.”—SALM 34:10.
HLA 4 “Jehovah Cu Ka Tuukhal”
LANGHTERNAK *
David nih harnak a ton chung hmanhah ‘ka baumi a um lo’ tiah a ruah (Catlangbu 1-3 zoh) *
1. David nih zei bantuk a harmi thil sining dah a ton?
DAVID cu a nunnak caah a rak zam. A ṭhawngmi Israel siangpahrang Saul nih thah a rak timh. David nih rawl a herh caah Nob khua ah a kal i changreu hlum nga in a hal hna. (1 Sam. 21:1, 3) A hnuah David le a mi hna cu lungkua ah an i dor. (1 Sam. 22:1) Zeicah David nih mah bantuk thil sining cu a ton?
2. Saul nih zei bantuk thilṭhalo dah a rak tuah? (1 Samuel 23:16, 17)
2 David cu a min a than ca le teinak tampi a hmuh caah Saul nih a rak nahchuah. Saul nih Jehovah nawl ka ngaih lo caah Pathian nih Israel siangpahrang in a ka hlawt i David a thim cang ti kha a hngalh. (1 Samuel 23:16, 17 rel.) Asinain Saul cu Israel siangpahrang a si rih i ralkap le bawmtu tampi a ngei, cucaah David cu a nunnak caah a rak zam. Pathian nih David caah aa tinhnak kha ka kham khawh lai tiah Saul nih a ruat taktak maw? (Isa. 55:11) Baibal nih mah kong cu a chim lo, asinain Saul nih thilṭhalo taktak a tuah ti cu kan hngalh. Pathian a ralchanhmi paoh cu an sung zungzal lai.
3. David cu harnak a tong ko nain zeitindah a rak um?
3 David cu aa toidormi a si. Israel siangpahrang si awkah amah nih aa thimmi a si lo. Jehovah nih mah rian kha a pekmi a si. (1 Sam. 16:1, 12, 13) Cucaah Saul nih David kha a huat tuk. Asinain David nih harnak a ton caah Jehovah kha a mawhchiat lo. Cun rawl ei awk tlawmpal lawng a ngeih ca le lungkua i aa thuh ca zongah a phunzai lo. Mah canah lungkua i aa thuh lioah a bik in lakmi mah Baibal caang bia i tein Pathian thangṭhatnak hla kha hitin a rak phuah: “BAWIPA nawl a zulmi cu zeihmanh an baumi a um bal lo.”—Salm 34:10.
4. Zei biahalnak dah kan i ruah hna lai, mah cu zeicah a biapit?
4 Tuchan Jehovah salle zong rawl ei awk le a dang a herhmi thil hna a za in a ngei lomi an um. * Mah cu a hleiin nai ah a cangmi pulrai chungah a si. “Harnak” nganpi kan naih chin bantukin thil sining zong a har chin lai. (Matt. 24:21) Mah kong kha i cinken in mah biahalnak pali hi i ruah hna u sih: Zeiti lam in dah David cu ‘zeihmanh bau bal loin’ a um? Lungsinak ngeih awkah zeicah cawn a herh? Jehovah nih a kan zohkhenh lai ti kha zeicah kan zumh khawh? Hmailei caah atu in zeitindah kan i timhtuah khawh?
“Ka Herhmi Vialte Kha A Ka Pek Dih”
5-6. David nih Pathian salle cu “zeihmanh an baumi a um bal lo” a ti tikah a chim duhmi hngalhthiam awkah Salm 23:1-6 nih zeitindah a kan bawmh?
5 David nih Jehovah salle cu “zeihmanh an baumi a um bal lo” a ti tikah zeidah a chim duhmi a si? David nih Salm 23 a ṭial tikah aa lomi biafang a hman. Mah nih a chim duhnak kha hngalhthiam awkah a kan bawmh. (Salm 23:1-6 rel.) David nih salm 23nak kha mah bia in a thawk: “BAWIPA cu tuukhal bantukin a ka vengtu a si, ka herhmi vialte kha a ka pek dih.” David nih Jehovah kha a Tuukhal in a cohlan caah Jehovah nih a pekmi thilṭha ti bantukin a biapi tukmi thil hna kha mah dal i a tanglei ah a langhter. Jehovah nih David kha “a hmaanmi lam ah” a hruai i ṭhatnak siseh, harnak siseh a ton tikah zumhawktlak tein a bawmh. Jehovah i “ram hring” ah David nih buaibainak ton loin ka um lai lo ti kha a hngalh. A caan ah ‘a thuk bikmi muihnak chungah’ kal bantukin ral a ngeih caah a lung a dong men lai. Asinain a Tuukhal Jehovah nih a umpi caah David nih ‘zeihmanh a ṭih lai lo.’
6 Mah cu mah biahalnak i a phi a si: David cu zeiti lam in dah ‘zeihmanh bau bal loin’ a um? Jehovah he naih tein um khawh peng awkah a herhmi thil vialte a ngei dih. Aa nuamhnak cu thilri chawva cungah aa hngat lo. Jehovah pekmi thil cungah lungsinak a ngei. A caah a biapi bikmi cu Pathian thluachuahnak le huhphenhnak kha a si.
7. Luka 21:20-24 ningin kumzabu pakhatnak i Judea Khrihfa hna nih zei zuamcawhnak dah an ton?
7 Thilri chawva he aa tlaiin a tlarimi hmuhnak ngeih cu zeitluk in dah a biapit ti kha David bia in kan hngalh khawh. Kan ngeihmi thilri chawva cungah kan i nuam kho, asinain mah kha kan nunnak ah biapi bik in kan chiah awk a si lo. Mah cu kumzabu pakhatnak i Judea ram ah a ummi Khrihfa hna caah hngalhthiam awkah a biapi tukmi biatak a si. (Luka 21:20-24 rel.) Jerusalem khua kha ‘ralkap nih an kulh’ caan a phan te lai tiah Jesuh nih ralrin a pek hna. Mah tikah ‘tlang ah an zam’ a hau lai. Khua kha an kaltak ahcun nunnak an hmu lai, asinain an ngeihmi thilri vialte kha an kaltak a hau lai. Vennak Innsang pakhat nih hitin a ti: “Inn ah an ngeihmi thilri chawva lawng si loin an lei le an inn zong an kaltak. Jehovah nih a kan huhphenh lai i a kan bawmh lai ti kha an zumh caah a biapimi a lomi a dang thil hna nakin Jehovah kha pakhatnak ah an chiah.”
8. Kumzabu pakhatnak i Judea Khrihfa hna nih an tonmi thil in zei a biapimi kong dah kan cawn khawh?
8 Kumzabu pakhatnak i Judea Khrihfa hna nih an tonmi thil in zeidah kan cawn khawh? Vennak Innsang nih hitin a ti: “Thilri chawva kan hmuh ning he aa tlaiin hneksak kan si kho men; mah cu kan caah a biapi bikmi maw an si asiloah Pathian cung zumhfek tein kan um caah khamh kan si lai dah a biapi deuh? Donghnak a phanh tikah harnak inkhawh le mahca ṭhatnak hlawt a hau men lai. Judea in a rak zammi kumzabu pakhatnak i Khrihfa hna bantukin a herhmi zeithil paoh tuah awkah timhcia kan si awk a si.” *
9. Paul nih Hebru mi a pekmi hna ruahnak cheuhnak nih zeitindah thazaang aan ngeihter?
9 Mah Khrihfa hna nih an ngeihmi thil vialte ti awk tluk kaltak in hmunthar ah nunnak thar thawk ding cu zeitluk in dah a har lai ti khi na mitthlam ah na cuanter kho maw? Kan herhmi thil hmuh awkah Jehovah nih a kan bawmh lai timi zumhnak ngeih an hau. Asinain anmah a bawm khomi thil pakhat a um. Rom mi nih Jerusalem an kulh hlan kum nga lioah lamkaltu Paul nih Hebru mi kha a ṭha tukmi ruahnak a rak cheuh hna: “Tangka hi duh tuk hlah u, nan ngeihmi ah khan nan lungawi ko u. Zeicahtiah Pathian nih ‘Kaan kaltak bal hna lai lo i kaan hlaw bal fawn hna lai lo’ a ti. Cucaah kannih cu kan ralṭha u sih law, ‘Bawipa cu a ka bawmtu a si, zeihmanh ka ṭih lai lo. Minung nih ka cungah zeidah an tuah khawh lai?’ tiah ti u sih.” (Heb. 13:5, 6) Paul ruahnak cheuhnak a zulmi hna caah hmunthar ah nunning sawhsawh tein nun kha an i fawih deuh lai ti cu a fiang ko. Jehovah nih a hrampi kan herhmi a kan bawmh lai ti kha an zumh. Paul chimmi bia nih kannih zong kan herhmi thil Jehovah nih a kan pek lai ti kha a kan zumhter.
“Cucu Kan I Zat Awk A Si Ko”
10. Paul nih zei a cawnmi kong dah a kan chimh?
10 Paul nih mah he aa lomi ruahnak cheuhnak kha Timote a pek i kanmah he zong aa pehtlai. Hitin a ti: “Cucaah cun rawl le fenh-aih kan ngeih ahcun cucu kan i zat awk a si ko.” (1 Tim. 6:8) Mah cu rawl thaw ei lo awk, inn ṭha ah um lo awk le thil thar i cawk lo awk a si a ti duhnak a si maw? Cutin Paul nih a chim duhnak a si lo. Kan ngeihmi thilri chawva ah kan i zat awk a si ko tiah a ti duhnak a si. (Fil. 4:12) Mah cu Paul nih a cawnmi a si. Kan ngeihmi lakah a sunglawi bikmi cu kan ngeihmi thilri chawva kha si loin Pathian he kan i pehtlaihnak kha a si.—Hab. 3:17, 18.
Israel mi cu kum 40 chung ramcar i an um lioah ‘zeihmanh an baumi a um lo.’ Atu ah kan ngeihmi thil in kan i lungsi kho maw? (Catlangbu 11 zoh) *
11. Moses nih Israel mi sin a chimmi bia in lungsinak he aa tlaiin zeidah kan cawn khawh?
11 Kan herhmi thil timi ah Jehovah hmuh ning le kanmah hmuh ning cu aa khat men lai lo. Kum 40 chung ramcar i an vah hnuah Moses nih Israel mi sin a chimmi mah bia hi ruathmanh: “BAWIPA nan Pathian nih nan kut rianṭuannak vialte ah thluachuah aan pek hna; hi ramlak kaupi chung i nan kalnak hi a hngalh ko; hi kum sawmli chung hi BAWIPA nan Pathian cu nan sinah a um i zeihmanh nan bau lo.” (Deut. 2:7) Mah kum 40 chung Jehovah nih Israel mi kha manna a rak dangh hna. Izipt ram in an chuah lioah an i hrukmi thilpuan cu a ṭet kho lo. (Deut. 8:3, 4) Mi cheukhat nih mah cu a za lo tiah an ruah nain Moses nih Israel mi kha nan herhmi vialte an ngei dih tiah a ti hna. Lungsinak ngeih dingin kan cawn ahcun Jehovah lung kan lawmhter lai. Pathian nih a kan pekmi cu thil sawhsawh te a si hmanhah sunsak hna sehlaw a sinin hmuhmi laksawng in hmu hna seh ti a kan duh.
Jehovah Nih Aan Zohkhenh Lai Kha Zum
12. David nih amahle amah si loin Jehovah aa bochan ti kha zeinihdah a langhter?
12 David nih Jehovah cu amah a dawmi hna cungah zumhawktlak tein a um i a zohkhenh hna ti kha a hngalh. David nih Salm 34nak a ṭial lioah a nunnak cu ṭihnung a rak si ko nain zumhnak mit in Jehovah ‘vancungmi nih a zohmi’ kha a hmuh. (Salm 34:7) David nih Jehovah vancungmi kha raldohnak ah hliphlau tein ral pawl a zoh lengmangmi ralkap pakhat he a tahchunhmi a si men lai. David cu a ral a ṭhami ralkap pakhat a si i Jehovah nih siangpahrang ṭuan awkah bia a kamh, asinain lungherhcheh a thiamnak asiloah raldohnak ah vainam hman a thiamnak kha aa bochan lo. (1 Sam. 16:13; 24:12) Pathian kha aa bochan i Jehovah vangcungmi nih Pathian a ṭihmi kha an khamh hna timi zumhnak a ngei. Tuchan ah khuaruahhar lam in huhphenhnak hmuh lai kha kan i ruahchan lo ti cu a hmaan ko. Asinain Jehovah aa bochanmi hna cu atu i an thih hmanhah zungzal nunnak an hmu lai ti kha kan hngalh.
Harnak nganpi chungah Magog ram i Gog nih kan inn ah doh dingin fakpi in aa zuam men lai. Asinain Jesuh le a vancungmi nih a cangmi thil hna kha an hmuh i a kan huhphenh lai timi hngalhnak nih hnemhnak a kan pek. (Catlangbu 13 zoh)
13. Magog ram i Gog nih a kan doh tikah fawi tein tei khawhmi zeicah kan lawh, asinain zeicah kan ṭih awk a si lo? (A phaw hmanthlak zoh.)
13 Hmailei ah Jehovah nih a kan huhphenh lai timi kan zumhnak cu hneksak a si lai. Pathian miphun doh awkah miphun vialte aa fonhmi phu pakhat, Magog ram i Gog nih a kan thah khawh tiah kan ruah men lai. Asinain Jehovah nih a kan khamh khawh ti le a kan khamh lai ti kha kan zumh a hau. Mah miphun hna caah kannih cu hupphengtu zeihmanh a ngei lomi tuu bantuk kan lo men lai. (Ezek. 38:10-12) Kannih cu hriamnam kan ngei lo i raldohnak ca zongah cawnpiak kan si lo. Cucaah fawi tein tei khawhmi in an kan hmuh ko lai. Kanmah huhphenh awkah Jehovah vancungmi pawl timhcia in an ummi kha an hngal lo, asinain kannih cu zumhnak kan ngeih caah mah kha kan hngalh. Miphun pawl nih Pathian an zumh lo caah mah kha an hngalthiam lo. Vancung ralkapbu nih kan caah an doh hna tikah an khuaruah a har tuk lai.—Biat. 19:11, 14, 15.
Hmailei Caah Atu In I Timtuah
14. Hmailei ca i timhtuah awkah atu in zeidah kan tuah khawh?
14 Hmailei ca i timhtuah awkah atu in zeidah kan tuah khawh? A hmasa bik ah thilri chawva he aa tlaiin a tlarimi hmuhnak ngeih a hau. Nikhatkhat ah mah thil hna cu kan kaltak a hau te dingmi an si. Cun kan ngeihmi thilri ah lungsinak ngeih in Jehovah he pehtlaihnak ṭha kan ngeihmi ah kan i lawmh awk a si. Pathian kong tam deuh in kan hngalh ahcun Magog ram i Gog nih a kan doh tikah Pathian nih a kan huhphenh khawh ti kha kan zumh deuhdeuh ve lai.
15. David cu a no lio i a tonmi zei thil sining nih dah Jehovah nih a ka bawmh zungzal lai timi zumhnak a ngeihter?
15 Harnak ca i timtuah awkah zeinihdah David kha a bawmh i kanmah zong a kan bawmh khawh timi kong kha ruathmanh. David nih hitin a ti: “BAWIPA hi zeitluk in dah a ṭhat ti kha nanmah tein va kawl cio hmanh u, amah chungah him tein a ummi cu a lung aa lawm.” (Salm 34:8) David nih Jehovah bawmhnak kaa bochan khawh ti a hngalhnak a ruang kha mah bia nih a langhter. David nih Jehovah kha aa bochan peng i Pathian nih zeitikhmanh ah a lung a donghter bal lo. David nih a no lioah Filistin mi minganpi Goliath kha a doh i a ṭhawng tukmi mah ralkappa kha hitin a ti: “Nihin ni ah hin BAWIPA nih nangmah cu keimah kut chungah a ka pek lai.” (1 Sam. 17:46) A hnuah Saul nih David kha a rian a ṭuan lioah voi tampi thah a rak timh. Asinain David “sinah khan BAWIPA a um.” (1 Sam. 18:12) Jehovah nih hlanlio ah a rak bawmh caah atu i buaibainak a ngeih tik zongah a ka bawmh lai ti kha David nih a hngalh.
16. Jehovah ṭhatnak kha zeiti lam hna in dah kan “kawl” khawh?
16 Atu in Jehovah lamhruainak kha kan i bochan deuhdeuh ahcun hmailei ah a kan bawmh lai ti kha kan zumh deuhdeuh ve lai. Peng civui le pengkomh civui ah kan i tel khawh nakhnga rian-ngeitu sin khunh kan hal tik asiloah zarhtin pumhnak le phungchim rian ah tam deuh in kan i tel khawh nakhnga rianṭuan caan thlen awkah rian-ngeitu kan hal tikah zumhnak ngeih le Jehovah i bochan a hau. Rian-ngeitu nih khunh kan halmi kha a duh lo i rian in phuah kan si tiah hei ruathmanh. Jehovah nih zeitikhmanh ah a kan kaltak lai lo i kan herhmi thil kha a kan pek zungzal lai tiah na zum maw? (Heb. 13:5) Caantling rian a ṭuanmi unau tampi i an hmuhtonnak nih an herh tuk lio caan ah Jehovah nih a bawmhmi hna kha a langhter. Jehovah cu zumhfekmi a si.
17. 2022 kumcaang Baibal cu zeidah a si, mah cu zeicah aa tlak?
17 Jehovah kan lei ah a um ahcun hmailei caah ṭihnak kan ngei lai lo. Kan nunnak ah Pathian duhnak kha pakhatnak ah kan chiah ahcun zeitikhmanh ah a kan kaltak lai lo. Hmailei kan ton dingmi harnak ca atu in i timhtuah awk le Jehovah nih zeitikhmanh ah a kan kaltak lai lo timi zumh awkah Uktu Bu nih 2022 kumcaang Baibal caah Salm 34:10 kha a kan thimpiak: “BAWIPA nawl a zulmi cu zeihmanh an baumi a um bal lo.”
HLA 38 Pathian nih Thazaang Aan Pek hna Lai
^ cat. 5 2022 kumcaang Baibal cu Salm 34:10 in lakmi a si: “BAWIPA nawl a zulmi cu zeihmanh an baumi a um bal lo.” Zumhfekmi Jehovah salle tam deuh cu thilri chawva tlawmpal lawng an ngei. Cu a si ah, “zeihmanh an baumi a um bal lo” tiah zeitindah kan chim khawh? Mah Baibal caang sullam hngalhthiamnak nih a ra dingmi harnak caan caah i timhtuah dingin zeitindah a kan bawmh khawh?
^ cat. 4 2014, September 15, Vennak Innsang [English], “Careltu Hna Sinin Biahalnak” ah zoh.
