VAWLEI Thar Lehnak Baibal ah an lehmi “rangleng” timi a hrampi biafang nih rangleng a phunphun kha a chim duhmi a si kho men. (Lam. 8:28, 29, 38) Asinain Ethiopia bawipa nih aa citmi rangleng cu raltuknak asiloah rang tlik zuamnak caah an hmanmi rangleng nakin a ngan deuhmi rangleng si dawh a si. A ruang cheukhat kha ruathmanh.

Ethiopia bawipa cu lamhlapi ah khual a tlawngmi bawi pakhat a si. Anih cu “bawi upa pakhat a si i Kandeis ti zong ah ti a simi Ethiopia Siangpahrangnu tangka bawi kha a si.” (Lam. 8:27) Hlan lio Ethiopia ram ah tuchan i Sudan ram le Izipt ram thlanglei tiang aa tel. Mah rangleng nganpi cu khualtlawnnak kip ah an i citmi rangleng a si lo. Khual lamhla a si caah a herhmi thilri tampi phorhnak caah aa citmi a si. AD kumzabu pakhatnak ah an rak hmanmi rangleng cheukhat cu khual a tlawngmi pawl phorhnak caah a si i ke pali a ngei i a cung khuh zong a um. Lamkaltu Baibal—Fianternak timi cauk ah “mah bantuk rangleng hna ah thil tampi aa tlum, khual a tlawngmi zong an sia a rem deuh i caan saupi khualtlawnnak caah a ṭha deuh” tiah a ti.

Filip nih a fuhpanh lioah Ethiopia bawipa cu ca a rel lio a si. Baibal ah “Filip cu a va tli i [Ethiopia bawipa nih] a relmi cu Isaiah cauk chung bia a si kha a theih” tiah a ti. (Lam. 8:30) Khualtlawnnak rangleng cu rang tein mawngh khawh a si lo. Duhsa tein a mawngh caah mah Ethiopia bawipa nih ca a rel khawhmi le Fillip nih a ke in a phanh khawhmi a si.

Ethiopia bawipa nih “Filip kha rangleng cung ah hin hung kai law ka sinah ṭhu tuah tiah a sawm.” (Lam. 8:31) Tlik zuamnak caah hmanmi rangleng cu a mawngtu hna nih dir bu in an mawngh. Asinain khualtlawnnak caah hmanmi rangleng a si caah amah he Fillip he ṭhutnak hmun an ngei.

Lamkaltu dal 8 le langhtermi tuanbia hna ning in nai ah chuahmi bupi cauk hna ah Ethiopia bawipa nih aa citmi rangleng an langhter tikah raltuknak le tlik zuamnak rangleng caah an hmanmi rangleng hmemi si loin rangleng nganmi tu kha an hman.