1-2. Zumhfekmi Jehovah salle cu zei zuamcawhnak hna dah an ton?

 KAN tonmi thil ṭha lo ruang ah kan nunnak cu zankhat kar ah aa thleng kho. Tahchunhnak ah zumhfekmi unaupa Luis a nih a zual tukmi cancer zawtnak ka ngei ti kha a hun i hngalh. Siibawi nih thla tlawmpal lawng na nung cang lai tiah a ti. Monika le a vapa cu i manh lo ngaiin Jehovah rian a ṭuanmi an si. Nikhat cu Monika nih Khrihfa upa a simi a vapa nih kum tampi chung a thli tein sualnak a tuah ti kha a theih. Nungak a simi unaunu Olivia cu hurricane thilchia ruang ah inn in a zam. A rak kir ṭhan tikah thilchia nih a inn a hrawhpiak dihmi kha a hmuh. Chikkhat kar ah Luis, Monika le Olivia nunnak cu aa thleng dih. Nangtah ruahlopi in na nunnak a thlenter kho dihmi thil sining na tong bal maw?

² Jehovah i zumhfekmi salle zong vawleicung mi hna bantuk in harnak le zawtnak kan tong ve. Cun Pathian miphun pawl a huami hna i ralchanhnak le hremnak zong kan tong kho. Cu bantuk harnak hna in Jehovah nih a kan huhphenh lo nain kaan bawmh hna lai tiah bia a kan kamh. (Isa. 41:10) Jehovah bawmhnak thawng in a har bikmi caan hmanh ah kan i nuam kho, a ṭhami biakhiahnak kan tuah kho i a cung ah zumhfek tein kan um kho. Hi capar ah kan nunnak ah a har bikmi thil kan ton lioah Jehovah nih a kan bawmh ning lam pali kha kan i ruah hna lai. Pathian bawmhnak hmuh awkah kanmahlei in zeidah kan tuah a hau timi kong zong kan i ruah hna lai.

 Jehovah Nih Aan Kilven Lai

3. Thil ṭha lo kan ton tikah zei tuah awkah dah a har khawh?

³ Zuamcawhnak. Thil ṭha lo kan ton tikah ṭha tein khuaruah le biakhiahnak tuah kha kan i harh men lai. Zeicah? Kan lung a fak tuk kho men i lungretheihnak nih zei tuah awk hmanh hngal loin a kan umter khawh caah a si. Minmei cung ah a kalmi bantuk in khoikalei ah kal ding ti hngalh loin kan um kho. A hmasa ah langhtermi unaunu pahnih kong kha ruathmanh. Olivia nih hitin a ti: “Hurricane thlichia nih ka inn a hrawh dih tikah ka sung dih timi ruahnak ka ngei i ka lung a rawk tuk.” A vapa zumhawktlak loin a ummi kong he aa tlaiin Monika nih hitin a ti: “Ka lung a fak tuk ti leng cu ka chim thiam lo. Ka hnulei in nam in an ka chunhmi bantuk a si. Ni fatin ka tuah tawnmi thil hmanh ka tuah kho ti lo. Cu bantuk thil ka tong lai tiah zeitikhmanh ah ka ruat bal lo.” Kan lung a dongh tikah Jehovah nih zeitindah a kan bawmh?

4. Filipi 4:6, 7 ning in Jehovah nih zei bia dah a kan kamh?

⁴ Jehovah nih a kan bawmh ning. Baibal nih “Pathian daihnak” tiah a auhmi kha kaan pek hna lai tiah bia a kan kamh. (Fillipi 4:6, 7 rel.) Mah daihnak nih amah he a sunglawimi pehtlaihnak ngeih ruang ah hmuhmi lungdaihnak kha a chim duhmi a si. Mah daihnak cu “minung hngalhnak a lonhtu” a si i kan ruah khawh leng tiang a si. Jehovah sinah lungtak tein thla na cam hnu ah khuaruahhar in lungdaihnak na hmu bal maw? Mah cu “Pathian daihnak” a si.

5. Kan lungthin le kan ruahnak kha Pathian daihnak nih zeitindah a kilven?

⁵ Filipi 4:7 ah Pathian daihnak nih “nan lungthin le nan ruahnak cu him tein a chiah lai” ti zong in a ti. “Him tein” timi a hrampi biafang cu raldohnak he aa pehtlaihmi biafang a si i an khua doh a si nakhnga lo a hngakmi ralkap pawl langhternak caah hmanmi biafang a si. Ralkap pawl nih an khua kutka an cawngh ti an hngalh caah khuami pawl cu lungdai tein an it kho. Cu bantuk in Pathian daihnak nih kan lungthin le kan ruahnak a kilven caah kan him timi hngalhnak nih lungdai tein a kan umter khawh. (Salm 4:8) Hannah bantuk in kan sining cu aa thlen colh lo hmanh ah lungdaihnak kan ngei kho. (1 Sam. 1:16-18) Kan lung a daih ahcun ṭha tein khuaruah awk le a ṭhami biakhiahnak tuah awkah kan i fawih deuh lai.

6. Pathian daihnak in ṭhathnemnak hmuh awkah zeidah kan tuah khawh? (Hmanthlak zong zoh.)

⁶ Kan tuah a herhmi. Thil ṭha lo na ton tikah ral vengtu kha au. Zeitindah? Pathian daihnak na hmuh tiang thla na camnak thawng in  a si (Luka 11:9; 1 Thes. 5:17) Luis cu thla tlawmpal lawng a nung cang lai ti an theih tikah a hmasa ah langhtermi Luis le a nupi nih zeidah an tuah? Luis nih hitin a ti: “Cu bantuk caan ah ngandamnak i zohkhenhnak le a dang kongkau ah biakhiahnak tuah cu a har tuk. Asinain thlacamnak lawng nih cu bantuk a har tukmi caan ah lungdaihnak a kan pek khawh.” Luis le a nupi nih lungdaihnak ngeih awk le a ṭhami biakhiahnak tuah awkah fimnak pek ding in Jehovah sin ah atu le atu lungtak tein thla kan cam tiah an ti. Mah tikah Jehovah bawmhnak kan hmu tiah an ruah. Harnak na ton tikah teima tein thla na cam ahcun na lungthin le na ruahnak cu Pathian daihnak nih an kilven lai.—Rom 12:12.

Jehovah Nih Fek Tein An Umter Lai

7. Harnak kan ton tikah zeitindah kan ruah khawh?

⁷ Zuamcawhnak. A harmi hneksaknak kan ton tikah a hlan bantuk in intuarnak, khuaruahnak le thil tuah kha kan i harh men lai. Thlichia nih a denmi tilawng cu tilet pakhat hnu pakhat nih a choih bantuk in kannih zong ngaihchiatnak phunkhat hnu phunkhat kan tong kho. A hmasa ah langhtermi Ana nih Luis a thih hnuah harnak tampi ka tong tiah a ti. Hitin a ti: “A caan ah ka lung a dong tuk i keimah le keimah kaa zaangfak. A caan ahcun a ka thih tak caah ka thin zong a hung. Caan dang ah a vapa Luis nih a rak tuah tawnmi thil hna kha amah tein a tuah caah a lung a buai. Cucaah a caan ah rili i tilet cung ah a phanmi bantuk in aa ruat. Cu bantuk lungretheihnak kan ton tikah Jehovah nih zeitindah a kan bawmh?

8. Isaiah 33:6 ah a langhter bantuk in Jehovah nih zeitindah bia a kan kamh?

⁸ Jehovah nih a kan bawmh ning. Jehovah nih kaan fehter hna lai tiah bia a kan kamh. (Isaiah 33:6 rel.) Thlichia a hran tikah tilawng cu fakpi in a hun i hin kho. Asinain tilawng tanglei i khatlei le khatlei ah a ke zah a um. Mah a ke zah nih tilawng kha aa hninh tuk nakhnga lo a bawmh khawh. Cun aa citmi pawl zong a himter hna i siarem tein a umter hna. Asinain tilawng cu hmailei i a kal lawng ah a ke zah cu ṭha tein rian a ṭuan kho lai. Cu bantuk in hneksaknak kan ton lioah zumhfek tein hmailei ah kan kal peng ahcun Jehovah nih a kan fehter ve lai.

9. Hlathlainak hriamnam hna nih a tlarimi si peng awkah zeitindah a kan bawmh khawh? (Hmanthlak zong zoh.)

⁹ Kan tuah a herhmi. Na lungre a theih tikah na si khawh chung in thlaraulei na tuah tawnmi thil kha tuah peng. A hlan bantuk in cun na tuah kho lai lo nain Jehovah cu a tlarimi a si ti kha philhhlah. (Luka 21:1-4 he tahchunh.) Pumpak hlathlainak tuah awk le ṭha tein ruah awkah a caan pe. Zeicah? Jehovah nih a bupi  hmang in a tlarimi si awkah a kan bawm khomi a ṭha tukmi capar le video hna a kan timhtuahpiak. JW Library^® app i Jehovah Tehte Hna i Baibal Hlathlainak Ca Lamhruainak ti bantuk nan holh in hmuh khawh a simi hlathlainak hriamnam hna kha kawl law hlathlai. A hmasa ah langhtermi Monika nih a lung a dongh tuk tikah hlathlainak hriamnam hna hmang in ruahnak cheuhnak ka kawl tiah a ti. Tahchunhnak ah, “thinhunnak” timi biafang kha a kawl. A dang caan ah “zumhawk tlak loin umnak” asiloah “zumhawktlakmi sinak” timi kong kha a kawl. Cun a lung a daih hlan tiang mah capar hna kha a rel. Hitin a ti: “Hlathlainak ka tuahka ahcun ka lungre a thei tuk. Asinain ka rel deuhdeuh tikah Jehovah nih a ka kuhmi bantuk in ka ruah. Jehovah nih ka intuarnak vialte kha a hngalh i a ka bawmh ti kha ka hun hngalhthiam.” Jehovah sinin a rami cu bantuk bawmhnak nih na lung a daih tiang a thlarimi si peng awkah aan bawmh khawh.—Salm 119:143, 144.

Jehovah Nih Aan Bawmh Lai

10. Thil ṭha lo kan ton hnuah zeitindah kan ruah khawh men?

¹⁰ Zuamcawhnak. Thil ṭha lo kan ton tikah pumsalei he lungthinlei he kan tha a hun der kho. Hma a put ruang ah a hlan bantuk in a tli kho ti lo i a kal ah a beimi zaang lentecelh a thiammi bantuk in kan i ruat kho. A hlan ah fawi tein kan tuahmi thil hna kha tuah awkah kan i harh kho men asiloah hlan ah a kan nuamhtermi thil hna kha tuah huam ti loin kan um kho men. Elijah bantuk in thawh kha kan i harh khawh men i ih lawng kan duh khawh men. (1 Si. 19:5-7) Kan tha a der tikah Jehovah nih zeitindah a kan bawmh?

11. Jehovah nih a kan bawmh ning a dang lamkhat cu zeidah a si? (Salm 94:18)

¹¹ Jehovah nih a kan bawmh ning. Jehovah nih kaan bawmh hna lai tiah bia a kan kamh. (Salm 94:18 rel.) Hma a pumi zaang lentecelh a thiammi pakhat cu a cawlcangh khawh nakhnga bawmhnak a herh bantuk in Jehovah rianṭuannak ah lungtho tein kan i tel peng khawh nakhnga bawmhnak kan herh ve. Cu bantuk caan ah Jehovah nih hitin aamah a khaan: “Keimah cu BAWIPA nan Pathian ka si i ṭhawnnak kan pek hna; ‘Nan thinphang hlah u, kan bawmh hna lai’ tiah keimah nih ka ti.” (Isa. 41:13) Siangpahrang David kha Jehovah nih cutin a rak bawmh. Hneksaknak a ton lio le ral nih an kulh lioah Jehovah kha hitin a ti: “Na ṭhawnnak nih him tein a ka umter.” (Salm  18:35) Asinain Jehovah nih zeitindah a kan bawmh?

12. Kan tha a der tikah kanmah bawmh awkah Jehovah nih ahote dah a hman khawh hna?

¹² Jehovah nih kanmah bawmh awkah midang a forh hnanak thawng in a kan bawmh. Tahchunhnak ah, David cu a tha a der tikah a hawi Jonathan nih lungthinlei in a bawmh i thazaang a pek. (1 Sam. 23:16, 17) Cu bantuk in Elijah bawmh awkah Jehovah nih Elisha kha a thim. (1 Si. 19:16, 21; 2 Si. 2:2) Tuchan zong ah kanmah bawmh awkah Jehovah nih kan innchungkhar, kan hawile le Khrihfa upa pawl kha a hman khawh hna. Asinain kan lung a fah caan ah kanmah lawng in um kan duh men lai. Mah cu a phung si ko. Jehovah bawmhnak hmuh awkah zeidah kan tuah khawh?

13. Jehovah bawmhnak in ṭhathnemnak hmuh awkah zeidah kan tuah a herh? (Hmanthlak zong zoh.)

¹³ Kan tuah a herhmi. Nangmah lawng in um kha hrial. Kanmah lawng in kan um ahcun kan hmuhnak a bi lai i kanmah le kan buaibainak kong lawngte kha kan hun ruah lai. Cu bantuk ruahnak nih a ṭha lomi biakhiahnak a kan tuahter khawh. (Ptb. 18:1) A hleiin thil ṭha lo kan ton tikah kanmahte lawng in um kan duh caan a um lai ti cu a fiang ko. Asinain caan saupi chung kanmah lawng in kan um peng ahcun Jehovah nih kanmah bawmh awkah a hmanmi hna kha zei rel hna loin kan um kho. Cucaah harnak na ton tikah na innchungkhar, na hawile le Khrihfa upa pawl bawmhnak kha cohlang. Cun Jehovah nih nangmah bawmh awkah a hmanmi hna in hmu hna.—Ptb. 17:17; Isa. 32:1, 2.

Jehovah Nih Aan Hnemh Lai

14. Zei ṭih a nungmi thil sining hna dah kan ton khawh?

¹⁴ Zuamcawhnak. Ṭihnak kan ngeih caan a um kho men. Baibal ah zumhfekmi Pathian salle zong an ral asiloah midang hneknak ruang ah lungrethei in an umnak kong kha a langhter. (Salm 18:4; 55:1, 5) Cu bantuk in kannih zong sianginn, rianṭuannak le kan chungkharmi asiloah cozah sin in ralchanhnak hna kan tong kho men. Kan ngandam lonak ruang ah thih lai kha kan ṭih men lai. Cun bawmtu a ngei lomi ngakchia bantuk in kan i ruat men lai. Cu bantuk caan ah Jehovah nih zeitindah a kan bawmh?

15. Salm 94:19 ning in kan caah Jehovah nih zeidah a kan tuahpiak lai?

¹⁵ Jehovah nih a kan bawmh ning. Jehovah nih a kan hnemh i kan lung a daihter. (Salm 94:19 rel.) Salm caṭialtupa nih thlichia fakpi  in a hran ruang ah a ṭih i aa hngilh kho lomi ngakchianu pakhat kong kha a kan ruahter. A pa cu a sinah a kal, a cawi i aa hngilh tiang a pom tiah kan mitthlam ah kan cuanter khawh. Thlichia cu a hrang rih ko nain a pa nih a hnemh caah ka him timi ruahnak a ngei. Kannih zong ṭih a nungmi thil sining kan ton tikah kan ṭihnak a tlau tiang vancung kan Pa nih kan pom seh ti kan duh. Jehovah sin in cu bantuk hnemnak kha zeitindah kan hmuh khawh?

16. Jehovah hnemhnak in ṭhathnemnak hmuh awkah zeidah kan tuah khawh? (Hmanthlak zong zoh.)

¹⁶ Kan tuah a herhmi. Thlacamnak le Baibal relnak thawng in Jehovah he hmaan tein a caan hmangṭi u. (Salm 77:1, 12-14) Cutin na tuah peng ahcun lungretheihnak na ton tikah a hmasa bik ah vancung na Pa sinah bawmhnak hal na duh lai. Na ṭihnak le na lungretheinak kong kha Jehovah sinah chim. Baibal na relnak thawng in Jehovah kha biachimnak caan pe. (Salm 119:28) Cheukhat Baibal caang hna nih ṭihnak na ngei tikah hnemhnak aan pek khawh. Tahchunhnak ah, Job, Salm le Phungthukbia Baibal hna kha na rel khawh. Cun Matthai dal 6 ah a langhtermi Jesuh bia hna zong na rel khawh. Thla na cam i Baibal na rel ahcun Jehovah hnemhnak na hmuh lai.

17. Zeidah kan zumh khawh?

¹⁷ Kan nunnak i a har bikmi caan hna ah Jehovah nih a kan umpi lai ti kha kan zumh khawh. Zeitikhmanh ah kanmah lawng kan si bal lai lo. (Salm 23:4; 94:14) Jehovah nih kaan ven hna lai, kaan fehter hna lai, kaan bawmh hna lai i kaan hnemhnak hna lai tiah bia aa kam. Jehovah kong he aa tlaiin Isaiah 26:3 ah hitin a ti: “BAWIPA, nangmah nih an i tinhmi kha fek tein aa tlaih i nangmah an bochanmi cu a tlingmi daihnak kha na pek hna.” Cucaah Jehovah kha i bochan law a bawmhnak in ṭhathnemnak hmuh awkah na tuah khawhmi paoh kha tuah. Cutin na tuah ahcun harnak caan chung ah thazaang na hmuh ṭhan lai.