CAWN AWK CAPAR 4
HLA 30 Ka Pa, Ka Pathian le Ka Hawi
Jehovah Cu Na Cung Ah Zawnruahnak A Ngei
“Bawipa cu . . . zawnruahnak in a khatmi a si.”—JEIM 5:11.
A BIK IN LANGHTERMI
Jehovah dawtnak nih amah he i naih awkah a kan hnuh, kan him timi ruahnak a kan ngeihter, a kan zohkhenh i hrimhnak a kan pek.
1. Jehovah kong na ruah tikah na lung ah zeidah a chuak?
JEHOVAH cu zei bantuk Pathian dah a si tiah na ruat bal maw? A sin ah thla na cam tikah na lung ah zeidah a chuak? Jehovah cu hmuh khawh a si lo nain Baibal nih lam tampi in a kong kha a langhter. Jehovah cu “nika le phaw” cun “mi kangh a hmangmi mei” tiah auh a si. (Salm 84:11, NWT; Heb. 12:29) Ezekiel nih Jehovah cu safir lungvar, dar tleu le chuncha bantuk a si tiah a ti. (Ezek. 1:26-28) Jehovah kong he aa tlaiin cutin langhter a simi nih kan lung a kan suk tuk men lai asiloah ṭihnak hmanh a kan ngeihter men lai.
2. Mi cheukhat nih Jehovah nih a kan dawt ti kha zeicah zumh awkah an i harh khawh men?
2 Hmuh khawh a si lo caah Jehovah nih a kan dawt ti kha zumh awkah kan i harh khawh men. Mi cheukhat nih hlanlio i an hmuhtonnak ruang ah Jehovah nih zeitik hmanh ah a kan daw lo tiah an ruah. Asiloah zeitik hmanh ah dawtu pa kan ngei lo tiah an ruah. Jehovah nih kan intuarnak le mah nih a kan hnorsuan ning kha a hngalhthiam. Cucaah kanmah bawmh awkah a ṭha tukmi a sining hna kha Baibal ah a langhter.
3. Jehovah dawtnak kong kha zeicah ṭha tein kan ruah awk a si?
3 Jehovah kong langhter awkah a ṭha bikmi biafang pakhat cu dawtnak a si. (1 Johan 4:8) Jehovah cu dawtnak a si. A tuahmi thil kip ah dawtnak aa tel. Amah a daw lomi hna cung hmanh ah dawtnak a langhter caah Pathian dawtnak cu a ngan i a ṭhawng tuk. (Matt. 5:44, 45) Hi capar ah Jehovah kong le a dawtnak kong kha ṭha tein kan i ruah hna lai. Pathian kong kha tam deuh kan hngalh ahcun kan dawt deuh ve lai.
Jehovah Nih A Kan Dawt Tuk
4. Jehovah dawt zawnruahnak nih zeitindah aan umter? (Hmanthlak zong zoh.)
4 “Bawipa cu zaangfahnak le zawnruahnak in a khatmi a si.” (Jeim 5:11) Baibal ah Jehovah nih amah le amah kha dawtnak a ngeimi nu pakhat he aa tahchunh. (Isa. 66:12, 13) A fa dawtnak he a pehtlaimi nu pakhat kha nan mitthlam ah cuanter hmanh u. A fa kha a pom, nem tein a chawnhbiak i a awih. A fa a ṭah asiloah aa khon tikah a zeidah a ti, ti kha hngalh awkah aa zuam i a herhmi kha a tuahpiak. Kannih zong kan lungre a theih tikah Jehovah nih a kan dawt ti kha kan zumh khawh. Salm caṭialtu pa nih hitin a ti: “Khuaruahhar vansang au in ka um tikah na ka hnemh i ka lung na ka lawmhter.”—Salm 94:19.
“Nu nih a fa a hnemh bantuk in . . . kaan hnemh hna lai” (Catlangbu 4 zoh)
5. Jehovah i a fekmi dawtnak nih zeitindah aan ṭhathnemh?
5 Jehovah cu a fekmi dawtnak a ngei. (Salm 103:8) Palhnak kan tuah hmanh ah a kan dawt peng. Israel mi nih voi tampi a lung an donghter ko. Asinain an i ngaichih tikah an cung ah a fekmi dawtnak a langhter ti kha mah bia nih a langhter: “Nangmah cu ka caah a sungmi na si i upatnak kaan pek i kaan dawtmi na si.” (Isa. 43:4, 5) Pathian dawtnak cu aa thleng bal lo. Cucaah amah kha kan i bochan peng khawh. Jehovah nih sualnak ngan kan tuah sual hmanh ah a kan hlaw lo. Kan i ngaihchih i a sinah kan kir ahcun a kan dawt peng rih ti kha kan hmuh lai. ‘Khulrang in kaan ngaihthiam’ hna lai tiah bia a kan kamh. (Isa. 55:7) Baibal ah ‘Jehovah sinin hrimhnak caan a ra lai’ tiah a ti.—Lam. 3:19, NWT.
6. Zekhariah 2:8 nih Jehovah kong zeidah a kan cawnpiak?
6 Zekhariah 2:8 rel. Jehovah nih a kan dawt caah kan intuarnak kha a hngalh colh i huhphenh a kan duh tuk. Fahnak kan ton tikah a lung a fak ve. Cucaah hitin thla kan cam tikah a kan leh lai ti kha kan zumh khawh: “Na mitfang na ven bantuk in ka huppheng tuah.” (Salm 17:8) Mit cu a nem i tawngh a khaang lomi le a sunglawimi pum cheubang a si. Cucaah Jehovah nih a mit fa lai he a kan tahchunh tikah ‘nanmah, ka miphun aan tawngtu hna paoh cu ka caah a sunglawimi thil a tawngmi a si’ tiah a timi bantuk a si.—Salm 17:8.
7. Jehovah nih a kan dawt ti zumh awkah zeidah kan tuah a hau?
7 Jehovah nih a kan dawt ti kha zum hna seh ti a kan duh. Asinain hlanlio i kan hmuhtonnak ruang ah a kan daw hnga maw tiah kan ruah khawh men. Asiloah atu lio i kan tonmi thil sining ruang ah Jehovah kan dawtnak cu hneksak a si kho men. Cucaah Jehovah nih a kan dawt ti kha kan zumh a hau. Mah kan zumhnak kha zeinihdah a fehter khawh? Jehovah nih Jesuh, chiti thuhmi le kan dihlak cung ah zeitindah dawtnak a langhter timi kong kan hlathlainak thawng in a si.
Jehovah Nih Dawtnak A Langhter Ning
8. A Pa nih a ka dawt ti kha Jesuh nih zeicah a zumh?
8 Jehovah le a Fapa cu vancung ah kum nuai thong tampi chung an umṭi caah pakhat le pakhat an i naih chin i an i dawtnak zong a fek tuk. Matthai 17:5 ah Jehovah nih Jesuh a dawtnak kong kha fiang tein a langhter. Jehovah nih ‘amah hi ka lung a ka tong ngaingaimi a si’ tiah a sawhsawh tein a chim. Asinain zei tluk in dah a dawt ti kha hngal hna seh ti a kan duh caah Jesuh kha “ka dawtmi ka Fapa” tiah a auh. Jehovah cu Jesuh tuahmi thil kong ah aa uangthlar tuk. (Efe. 1:7) Cun Jesuh zong nih a Pa nih a dawtnak cung ah lunghrinnak a ngei lo. A Pa nih a ka dawt ti kha tling tein a zumh. Cucaah a Pa nih a dawt ti kha Jesuh nih zumhnak he atu le atu a langhter.—Johan 3:35; 10:17; 17:24.
9. Jehovah nih chiti thuhmi hna a dawt hna ti kha zei biafang nih dah a langhter? Fianter. (Rom 5:5)
9 Jehovah nih chiti thuhmi pawl a dawt hna zong kha a langhter. (Rom 5:5 rel.) “Toih” timi biafang kha zohhmanh hna u sih. Baibal cherhchanhmi cauk pakhat ah mah biafang kha “tiva bantuk in kan cung ah a luang” tiah a ti. Mah nih chiti thuhmi pawl Jehovah nih zeitluk in dah a dawt hna ti kha a langhter. Chiti thuhmi hna nih ‘Pathian nih a kan dawt’ ti kha an hngalh. (Judas 1) Lamkaltu Johan nih mah ca a ṭial lioah an intuarnak kha hitin a langhter: “Pathian nih zeitluk in dah a kan dawt hi ruat hmanh u! A kan dawtnak kha a ngan tuk caah Pathian fa tiah ti kan si.” (1 Johan 3:1) Jehovah nih chiti thuhmi lawng maw a dawt hna? A si lo, kan dihlak in a kan dawt.
10. Jehovah nih aan dawt ti a langhtermi a ngan bikmi thil cu zeidah a si?
10 Jehovah nih a kan dawt ti a langhtermi a ngan bikmi thil cu zeidah a si? Tlanhnak man a si. Mah cu vawleicung ah a ngan bikmi dawtnak langhternak a si. (Johan 3:16; Rom 5:8) Jehovah nih kan sualnak ngaihthiam kan si khawh nakhnga le a hawikom kan si khawh nakhnga a sunglawi tukmi a Fapa kha minung caah thihnak nawl a pek. (1 Johan 4:10) Jehovah le Jesuh nih an kan pekmi kong kan ruah deuhdeuh tikah pakhat cio in zeitluk in dah an kan dawt ti kha kan hngalhthiam deuhdeuh ve. (Gal. 2:20) Jehovah nih a dinnak phunglam ruang ah tlanhnak man a kan pekmi a si lo. A kan dawt caah a si. Jehovah nih a kan dawtnak kha a caah a sunglawi bikmi Jesuh kan caah raithawinak a peknak thawng in a langhter. Cucaah Jehovah nih a Fapa kha sifah harnak in buin kanmah canah thihnak nawl a pek.
11. Jeremiah 31:3 in zeidah kan cawn khawh?
11 Kan theih cang bantuk in Jehovah nih a kan dawtnak kha a thup lo i a langhter. (Jeremiah 31:3 rel.) Jehovah nih a kan dawt caah a sinah a kan hnuh. (Deuteronomi 7:7, 8 he tahchunh.) A dawtnak he zeihmanh nih a kan ṭhen kho lo. (Rom 8:38, 39) Mah dawtnak nih zeitindah aan umter? Salm 23 kha rel law David nih Jehovah dawtnak kong he aa tlaiin zeitindah a ruah i mah nih zeitindah aan umter ti kha hlathlai.
Jehovah Dawtnak Nih Zeitindah Aan Umter?
12. Salm 23 kha a tawinak in zeitindah na fianter khawh?
12 Salm 23:1-6 rel. David nih Salm 23 ah Jehovah nih a dawt i a zohkhenh ti a zumhnak kong kha a langhter. Jehovah he an kar ah pehtlaihnak ṭha an ngeihmi kong kha a langhter i Jehovah kha ka tuukhal tiah a auh. Jehovah kha lam aa hruaiter i tling tein aa bochan caah ka him timi ruahnak a ngei. Jehovah nih a nun chung a cung ah dawtnak a langhter lai ti kha a hngalh. Zeinihdah cu bantuk zumhnak a ngeihter?
13. Jehovah nih a ka zohkhenh lai ti kha David nih zeicah a zumh?
13 “Ka herhmi vialte kha a ka pek dih.” A herhmi a pek zungzal caah David nih Jehovah nih a ka zohkhenh timi ruahnak a ngei. Jehovah he a ṭhami pehtlaihnak a ngei i a mithmai ṭha zong a hmu. Cucaah hmailei ah zei thil a ton hmanh ah Jehovah nih ka herhmi vialte a ka pek dih lai ti kha a zumh. Jehovah nih a ka dawt i a ka zohkhenh lai ti kha a zumh caah mah nih thinphan canah nuam te le lungsi hnangam tein um awkah a bawmh.—Salm 16:11.
14. Jehovah nih dawtnak he zeitindah a kan zohkhenh?
14 A hleiin harnak kan ton tikah Jehovah nih dawtnak he a kan zohkhenh. Bethel ah kum 20 leng rian a ṭuanmi Claire a kong kha ruathmanh. A chungkhar nih a nganmi buaibainak an ton tikah zeitindah ka bawmh hna lai ti kha a hngal lo. A pa cu a zeng, a naunu cu buchung in chuah a si, a chungkhar cu tangkalei in harnak an tong i an inn zong an sung. Jehovah nih an cung ah zeitindah dawtnak a langhter? Claire nih hitin a ti: “Ka chungkhar nih nikhat caah an herhmi thil kha an ngeih nakhnga Jehovah nih a timhtuahpiak hna. Jehovah nih kan herhmi leng hmanh in a kan pek lengmang. Jehovah nih a kan bawmh ning kong ka ruah tikah zeitik hmanh ah ka philh bal lai lo. Mah nih ka tonmi harnak hna kha inkhawh peng awkah a ka bawmh.”
15. David cu zeicah thazaang thar a ngeih ṭhan? (Hmanthlak zong zoh.)
15 “Thazaang thar kha a ka pek.” A caan ah David cu buaibainak le harnak tam tuk a ton caah a lung a dong. (Salm 18:4-6) Asinain Jehovah dawtnak le zohkhenhnak nih thazaang thar a ngeihter ṭhan. Jehovah nih a tha a ba tukmi a hawi David kha “ram hring” le “dinh hmun ti pawng ah” a hruai. Cucaah David cu thazaang a hun ngei ṭhan i lunglawm tein Jehovah rian kha a ṭuan ṭhan khawh.—Salm 18:28-32.
David cu a lungre a theih tuk lio hmanh ah Jehovah dawtnak le zohkhenhnak nih thazaang thar a ngeihter (Catlangbu 15 zoh)
16. Jehovah dawtnak nih zeitindah thazaang thar aan ngeihter?
16 Tuchan zong ah harnak kan ton tikah “BAWIPA dawtnak a fekmi cu a dong hrimhrim lai lo.” (Ṭah. 3:22; Kol. 1:11) Rachel kong kha ruathmanh u. COVID-19 pul rai chung ah a vapa nih amah he Jehovah he a kaltak hna caah a ngaih a chia tuk. Jehovah nih zeidah a tuahpiak? Hitin a ti: “Jehovah nih a ka dawt ti kha a ka hngalhter. Keimah he caan a hmangṭi kho dingmi hawikom hna kha a ka pek, annih nih rawl an ka put, thazaang a pemi ca le Baibal caang hna an ka kuat, panh tein an ka nih i Jehovah nih a ka dawt ti kha an ka hngalhter ṭhan lengmang. Dawtnak a ngeimi chungkhar nganpi a ka pek caah Jehovah cung ah kaa lawm tuk.”
17. David nih zeicah ‘zeihmanh a ṭih lo’?
17 “Zeihmanh ka ṭih lai lo, zeicahtiah nangmah nih na ka umpi ko.” David cu a nunnak caah ṭih a nungmi thil a tong lengmang i a ṭhawng tukmi ral tampi zong a ngei. Asinain Jehovah dawtnak nih a kilven i ka him timi ruahnak a ngeihter. Jehovah nih zei bantuk thil sining paoh ah a ka umpi tiah a ruah caah thazaang a ngei. Cucaah hitin hla a sak khawh: “[Jehovah nih] ka ṭihmi thil vialte in a ka luatter.” (Salm 34:4) A caan ah David tonmi thil cu ṭih a nung tukmi an si ko nain a ṭihnak nakin Jehovah a dawtnak cu a ṭhawng deuh.
18. Ṭihnak na ngeih tikah Jehovah dawtnak nih zeitindah thazaang aan ngeihter khawh?
18 Ṭih a nungmi thil kan ton tikah Jehovah nih a kan dawt ti hngalhnak nih zeitindah thazaang a kan ngeihter? An fapa amah tein aa thah lioah a vapa he zeitindah an intuar ti kha Susi timi hmaikal unaunu nih hitin a chim: “Ruahlopi in cu bantuk thil ṭha lo kan ton caah kan lung a fak tuk i bawmtu kan ngei lo timi ruahnak kan ngei. Cun mah nakin a ṭha lo deuhmi a dang zei thil dah kan ton rih lai tiah kan thin a phang. Asinain Jehovah dawt zaangfahnak nih kan him i kilven kan si timi ruahnak a kan ngeihter.” A hmasa ah langhtermi Rachel zong nih hitin a ti: “Zankhat cu ka ngaih a chia tuk, ka thin a phang i ṭihnak ka ngeih caah Jehovah sinah ka mitthli he aw thangpi in thla ka cam. Mah tikah nu pakhat nih a fa a awih bantuk in ka lung a daih nakhnga Jehovah nih a ka awih bantuk in ka ruah i ṭha tein kaa hngilh ṭhan. Mah caan cu zeitik hmanh ah ka philh bal lai lo.” Tasos timi Khrihfa upa cu ralkap tlak a duh lo caah kumli chung thongthlak a si. Jehovah dawtnak le zohkhenhnak kha zeitindah a hmuh? Hitin a ti: “Jehovah nih ka herhmi leng tiang hmanh in a ka pek. Mah nih Jehovah cu tling tein i bochan khawh a si ti kha a ka zumhter chinchin. Cun thonginn cu lungdong awk ngai a simi hmun a si ko nain Jehovah nih a thlarau hmang in lawmhnak a ka pek. Mah nih Jehovah kha kaa bochan deuh ahcun a dawtnak zong ka hmuh deuh ve lai ti kha hngalh awkah a ka bawmh. Cucaah thong ka tlak lioah hmaanhmaan hmaikal ka hun ṭuan khawh.”
Dawtnak A Ngeimi Pathian Kha Naih
19. (a) Pathian nih a kan dawt ti kan hngalh ahcun zeitindah thla kan cam lai? (b) Jehovah i zei bantuk in langhtermi a dawtnak nih dah na lung aan suk bik? (“ Jehovah Dawtnak Hmuh Awkah A Kan Bawmmi Biafang Hna” timi rinli kulh ah zoh.)
19 Kan i ruahmi hmuhtonnak dihlak nih “dawtnak” Pathian Jehovah cu kan sinah a um ti kha a langhter. (2 Kor. 13:11) Jehovah cu pumpak pakhat cio kan cung ah siaherhnak a ngei. Pathian i ‘a fekmi a dawtnak nih a kan huhphenh’ ti kha kan zumh. (Salm 32:10) Kan cung ah a langhtermi a dawtnak kong kan ruah deuhdeuh tikah zeitluk in dah a kan zohkhenh ti kha kan hmuh lai i amah he kan i naih deuh lai. A sinah ṭihnak ngei lo tein thla kan cam khawh i a dawtnak zei tluk in dah kan herh ti zong kan chimh khawh. Cun a kan theihthiam i bawmh a kan duh tuk ti kha kan hngalh caah kan lungretheihnak kong vialte kha a sin ah kan chimh khawh.—Salm 145:18, 19.
20. Jehovah dawtnak nih a sinah zeitindah a kan hnuh?
20 Khua sik caan ah mei phu pawng lawng ah um kan duh bantuk in Jehovah i a lummi dawtnak cu a sinah kan hnuh. Jehovah dawtnak cu a ṭhawn leng ah zawnruahnak zong a ngei. Cu bantuk dawtnak a ngeimi Jehovah nih aan dawt caah i lawm. “[Jehovah] cu ka dawt” tiah kan chimnak thawng in a dawtnak kha kan lehrulh khawh.—Salm 116:1.
ZEITINDAH NA LEH LAI?
-
Jehovah dawtnak kha zeitindah na langhter lai?
-
Jehovah nih aan dawt tuk ti kha zeitindah na zumh khawh?
-
Jehovah dawtnak nih zeitindah aan umter?
HLA 108 A Fekmi Pathian Dawtnak
a An min cheukhat thlen a si.