Hmualngei Deuh in le a Nuammi in Baibal Hlathlainak Tuah Khawh Ning

AWNG

JOSHUA cu Israel mi hna Biakammi Ram an luh lioah hruaitu a si. Mah rian cu a har tukmi a si. Asinain Jehovah nih “ṭhawng ngai le ralṭha ngaiin um ko” tiah a tinak thawngin thazaang a rak pek. Nawlbia kha na rel i na zulh ahcun a ṭhami biakhiahnak na tuah khawh lai i na hlawh a tling lai tiah Jehovah nih a ti.—Josh. 1:7, 8.

“Harnak caan” ah kan nun caah kan nunnak cu a har tuk. (2 Tim. 3:1) Joshua bantukin hlawhtlinnak hmuh kan duh ahcun Jehovah nih a pekmi ruahnak cheuhnak kha kan zulh a hau. A ṭhami biakhiahnak tuah khawh awkah Baibal kha hmaan tein rel le kan nunnak ah hman a hau.

Asinain cheukhat cu zeitindah kan hlathlai lai ti kha kan hngal men lai lo asiloah hlathlainak tuah kha kan huam men lai lo. Asinain pumpak Baibal hlathlainak cu a biapi tukmi a si. “ Mah Ruahnak Cheuhnak hi Zul” timi rinli kulh na zoh tikah hlathlainak in ṭhatnak hmuh awk le a nuammi siter awkah aan bawm hngami a konglam pawl na hmuh lai.

Salm caṭialtu nih hitin a ti: “Na nawlbia chungah khan lunglawmhnak ka hmuh caah na nawlbia lam cu ka zulhter ko.” (Salm 119:35) Nang zong Baibal hlathlainak ah naa nuam kho ve. Baibal na hlathlai lengmang ahcun a ṭhami ruahnak tampi na hmuh lai.

Joshua bantukin miphun pakhat kha hruai na hau lai lo nain na caah a harmi rian na ngei ko lai. Cucaah Joshua bantukin Pathian Bia kha hlathlai le zulh a hau. Cutin na tuah ahcun a ṭhami biakhiahnak na tuah khawh lai i na hlawh a tling lai.

MAH RUAHNAK CHEUHNAK HI ZUL

Hlathlainak na tuah hlanah thlacam. Baibal ah Jehovah ruahnak hna a um i mah cu nangmah ṭhatnak caah ṭial an si. Cucaah Baibal na rel tikah na relmi kong hngalhthiam awk, i cinken awk le mah kha hmangin a ṭhami biakhiahnak tuah khawh awkah Jehovah sinah bawmhnak hal.—Ezra 7:10.
Nangmahle nangmah biahalnak i tuah. Baibal asiloah Baibal hrambunhmi cauk pawl na rel tikah hitin i hal: ‘Mah nih Jehovah kong zeidah a ka cawnpiak? Mah hi Baibal i a biatlangpi he zeitindah aa pehtlaih? Mah ruahnak hi midang bawmhnak ah zeitindah ka hman khawh?’
Na hlathlaimi kong kha ṭha tein ruat. Chikkhat i din ta law na relmi kong kha ruat. Hitin i hal: ‘Mah nih zeitindah a ka umter? Zeicah hitin a ka umter? Mah hi a hlanlio ka tonmi, atu ka tonmi le hmailei i ka ton khawhmi thil he zeitindah aa pehtlaih? Mah Baibal phunglam asiloah ruahnak cheuhnak hna hi ka nunnak ah zeitindah ka hman khawh?’ (Job 23:5; Salm 49:3) Mah kong na ruah tikah Jehovah nih a miphun pawl thil sining cheukhat hrial awkah a thlauh hnanak a ruang kha ka fianter kho lai maw tiah ruat. Asiloah na relmi ningin a tuah lomi hna nih zeidah an ton lai timi kong kha ruat.—Deut. 32:28, 29.
Mitthlam ah cuanter khawhnak kha hmang. Tahchunhnak ah, Josef cu a ule nih Ishmael mi hna sinah an zuarmi kha na mitthlam ah na cuanter kho maw? (Gen. 37:18-28) Zeidah na hmuh i na theih? Mah thil sining ah khan nangmahle nangmah i umter hmanh. An ruahnak le an intuarnak cu zeidah a si? Cutin na tuah ahcun hlathlainak na tuahmi cu sullam a ngei deuh lai.
Hlathlainak hriamnam pawl kha hmang. Bupi nih a kan timhpiakmi hriamnam nih lungtho tein hlathlainak tuah khawh awkah aan bawmh lai. Online le ca in chuahmi nan holh in a ummi hriamnam pawl hmanning kha hlathlai. Mah hriamnam pawl hmualngei tein hman khawh ning cawn awkah midang sin bawmhnak hal kha i cungcang hlah. Tahchunhnak ah, a kong cheukhat le Baibal cacaang fiantermi hna hmuh awkah Vennak Innsang Cauk Index asiloah Jehovah Tehte Hna caah Baibal Hlathlainak nih aan bawmh lai. Na rel khawhmi holh in a um ahcun Vawlei Thar Lehnak Baibal i Thlaihhlei kha hmang. Mah ah man a ngei tukmi khuaram hmanthlak, caan tuaknak, a rihzan, tahnak le a dang kong hna a um.
A Biapimi a konglam hna kha a tawinak in tuah. Mah nih na hlathlaimi kong kha i cinken awkah aan bawmh lai. Na hngalhmi kong kha midang sin chim. Phungchimnak ah hman khawhmi a kong pakhatkhat a um maw? Cutin na tuahnak nih a biapimi kong kha i cinken awkah aan bawmh lai i midang zong ṭhatnak a hmuhter hna lai.

VENNAK INNSANG (CAWN AWK CAUK)