“Mi Vialte” Cungah Zaangfahnak Langhter
JESUH nih a zultu pawl thawngṭha chimning a cawnpiak hna lioah mi nih a zungzal in cun ngaih an duh lai lo tiah ralrin a pek hna. (Luka 10:3, 5, 6) Tuchan zongah cutin a si ve. A puarhrangmi le a kan domi hmanh kan ton men hna lai. Cu bantuk lehrulhnak kan ton tikah an cungah zaangfahnak langhter le phungchim duhnak ngeih cu a har ko lai.
Zaangfah a hmangmi pakhat nih midang herhbaunak le buaibainak hna a hmuh tikah a lung a ṭha lo i bawmh a duh hna. Phungchimnak i kan tonmi hna cungah zaangfahnak kan langhter lo ahcun zeidah a cang lai? Kan lungthawhnak a tlau lai, mah cu lungtho tein phung kan chim ti lai lo i kan bawm kho ti hna lai lo tinak a si. Lungthawhnak kha mei he tahchunh khawh a si. Mei ṭha tein a alh nakhnga oxygen tampi a hau. Cu bantukin kan lungthawhnak a ṭhawn nakhnga zaangfahnak kan ngeih a hau.—1 Thes. 5:19.
A har tik caan hmanhah zaangfahnak ngeih awkah zeitindah kan cawn khawh? Kan i zohchunh khawhmi Jehovah, Jesuh le lamkaltu Paul kong kha i ruah hna u sih.
Jehovah Zaangfahnak Kha I Zohchunh
Kum thong tampi chung mi nih Jehovah kong kha lih in an chim. Asinain Jehovah cu “miṭhalo mi hna le lawmh hmanh a duh lomi hna cung hmanhah a ṭha.” (Luka 6:35) Jehovah nih zeitindah zaangfahnak a langhter? Mikip cungah a lung a sau. Jehovah nih “mi vialte” nih khamhnak hmu hna seh ti a duh. (1 Tim. 2:3, 4) Pathian nih ṭhatlonak kha a huat ko nain mi pawl kha a sunsak hna i ahohmanh an thih lai kha a duh lo.—2 Pet. 3:9.
Jehovah nih Satan cu mi hlennak ah a thiam tuk ti kha a hngalh. (2 Kor. 4:3, 4) Mi tampi cu an ngakchiat lio tein Pathian kong lihbia in cawnpiak an si. Cucaah an ruahning le an intuarning nih biatak kha cohlan awkah a harter. Asinain Jehovah cu anmah bawmh awkah a lung a tho. Zeitindah kan hngalh khawh?
Tahchunhnak ah, Nineveh khua mi hna he aa tlaiin Jehovah intuarning kha ruathmanh. Ṭhatlonak in an khat ko nain Jehovah nih Jonah kha hitin a ti: “Hi Nineveh khua, a chung i keh le orh hmanh a hngal rih lomi ngakchia thong zakhat le thong kul an umnak le saṭil rel cawk lo an umnak hi, zaangfah loin ka um awk a si hnga maw?” (Jonah 4:11) Jehovah nih amah kong a hngal lomi, mah mi hna kha a zaangfah hna. Cucaah anmah ralrin pek awkah Jonah kha a thlah.
Jehovah nih mi a hmuh hnaning in kan hmuh ve hna. Annih cu a sunglawi tukmi an si. Biatak a cohlang lo ding an lawh hmanhah Jehovah bantukin a kong cawnpiak ding kha kan lung a tho.
Jesuh Zaangfahnak Kha I Zohchunh
A Pa bantukin Jesuh nih mi cu “khaltu a ngei lomi tuu bantukin lungrethei le awlokchong in an um kha a hmuh hna caah a zaang an fak ngaingai.” (Matt. 9:36) Jesuh nih an sining kha a hngalhthiam. Mah cu biaknaklei hruaitu pawl nih a ding loin an pehtlaih hna i a hmaan lomi an cawnpiak hna caah a si. Jesuh nih a cawnpiaknak ngaih awkah a rami tampi cu a ruang a phunphun ruangah a zultu an si lai lo ti kha a hngalh ko nain annih kha thil tampi a cawnpiak hna.—Mar. 4:1-9.
A hmasa ah mi nih an ngaih duh lo hmanhah na lung dong hlah
Thil sining aa thlen tikah mi nih biatak an lehrulhning cu aa dang kho men
Mi nih kan chimmi thawngṭha kha a ṭhatlonak leiin an lehrulh tikah zeicah cutin an lehrulh ti kha hngalhthiam awkah kan i zuam a hau. Khrihfa ka si tiah aa timi mi cheukhat nih ṭhatlonak an tuahmi kha an hmuh caah Baibal le Khrihfa kong he aa tlaiin a ṭhalomi ruahnak an ngei men lai. A dang cu kan zumhnak kong he aa tlaiin a hmaan loin an theih men lai. Cheukhat cu kanmah he bia kan i ruah ahcun an chungkhat asiloah an bu pawl nih an kan nihsawh lai ti kha an phang men lai.
Mi cheukhat nih mi a thlentermi le ṭih a nungmi in an kan hmuh men lai. Missionary a ṭuanmi Kim nih an phungchimnak sang ah a ummi mi tampi cu raltuknak ruangah an thilri vialte an sung dih tiah a ti. Hmailei ruahchannak an ngei lo. An lung a dong i ahohmanh an zum hna lo. Mah sang ah a ummi hna nih Jehovah Tehte Hna i an phungchimnak kha ngolter awkah an i zuam. Voikhat cu phung a chim lioah doh hmanh a tong.
Mi nih puarhrangpi in an pehtlaih hmanhah Kim nih zeitindah zaangfahnak a langhter? Phungthlukbia 19:11 i “lungsau thinfual hi fim a si” timi bia kha i cinken awkah aa zuam. Phung a chimnak sang i a ummi mi hna nih an ton laimi kong a ruah tikah mah nih an cungah zaangfahnak ngeih awkah a bawmh. Sang ah a tonmi mi vialte nih a ṭhalomi lam in an lehrulh lo. Mah sang ah a ṭhami lennolh cheukhat hna a ngei.
Hitin kan i hal kho: ‘Biatak hngal hlah ning law Jehovah Tehte Hna nih phungchim dingin ka sin an rat tikah zeitindah ka lehrulh hna hnga?’ Tahchunhnak ah, Jehovah Tehte Hna kong he aa tlaiin lihbia tampi kan theih ah dah zeitin? A ṭhalomi lam in kan lehrulh men hna lai i an cungah zaangfahnak kan ngei men lai lo. Jesuh nih midang nih rak kan pehtlaih hna seh ti kan duh bantukin midang kan pehtlaih hna awk a si tiah a ti. Cucaah a har tik caan hmanhah midang intuarnak hngalhthiam kan i zuam awk a si i an cungah kan lung a sau awk a si.
Paul Zaangfahnak Kha I Zohchunh
Lamkaltu Paul nih a phungchimnak ah puarhrangpi in a lehrulhmi cung hmanhah zaangfahnak a langhter. Zeicah? A rak tuah tawnmi kha aa cinken caah a si. Hitin a ti: “Hlanah cun ka rak thangchiat i ka rak hrem i ka rak serhsat, asinain Pathian cu ka cungah zaangfahnak a ngei; cu bantukin ka rak tuah cu amah kha ka rak zumh lo i ka tuahmi cu zeidah a si ti awk ka rak hngalh lo caah a si.” (1 Tim. 1:13) Paul nih Jehovah le Jesuh cu a cungah zaangfahnak a ngeimi an si ti kha a hngalh. Mi nih a phungchimnak ngolter an duhmi kha a hngalhthiam. Zeicahtiah anmah bantukin hlanah cutin a rak tuah ve.
A caan ah Paul cu a hmaan lomi cawnpiaknak cungah a fekmi zumhnak a ngeimi he an i tong. Mah nih zeitindah a umter? Lamkaltu 17:16 ah Athens “khua cu siasal in a khah kha a hmuh i a awlok a chong” tiah kan hmuh. Asinain Paul nih mah kha mi pawl cawnpiaknak lam ah a hman. (Lam. 17:22, 23) “Zei maw ti tal in ka khamh kho hna hnga maw” tiah a phungchimning lam kha a thlen i hnulei sining aa khat lomi hna kha aa lo lomi lam in a cawnpiak hna.—1 Kor. 9:20-23.
A ṭhalomi lam in a kan lehrulhmi asiloah a hmaan lomi zumhnak a ngeimi hna sin phung kan chim tikah Paul bantukin kan tuah khawh ve. “Thawngṭha” an hngalh nakhnga bawmh awkah an kong kan hngalhmi kha kan hman khawh. (Isa. 52:7) Dorothy timi unaunu nih hitin a ti: “Kan sang ah a ummi mi tampi cu Pathian cu a puarhrangpi in bia a ceihmi a si tiah cawnpiak an si. Pathian cungah a fekmi zumhnak a ngeimi cu bantuk mi hna kha ka thangṭhat hna i Jehovah dawtnak le hmailei kong he aa tlaimi Baibal chimmi kha ka hngalhter hna.”
“Ṭhatnak Tu in Ṭhatlonak kha Tei i Zuam U”
Donghnak kan naih chin lengmang bantukin mi cheukhat i an lungput cu “a ṭha lo chin lengmang” lai ti kha kan i ruahchan khawh. (2 Tim. 3:1, 13) Asinain an kan lehrulhning ruangah zaangfahnak le lawmhnak kan ngeihmi kha kan tlauter awk a si lo. Jehovah nih “ṭhatnak tu in ṭhatlonak kha tei i zuam” awkah thazaang a kan pek. (Rom 12:21) Hmaikal a ṭuanmi Jessica nih aa porhlawmi le kanmah le kan chimmi thawngṭha a kan nihsawhtu hna he kan i tong tawn tiah a ti. Cun hitin a ti chap: “Mah nih kan ing a puanter khawh. Biaruahnak ka thawk tikah ka lungthli in Jehovah sinah thla ka cam i amah bantukin mi ka hmuh hna nakhnga ka nawl.” Mah nih amah intuarnak lawngah lungthin chiah loin mi pawl bawmh khawhning kong tu ruah awkah a bawmh.
Biatak a duhmi hna kha kan kawl peng hna
Mi cheukhat nih kan bawmhmi hna le biatak kan cawnpiakmi hna kha a hnuah an cohlan lai
Unau pawl he phungchim kan kalṭi tikah tha kan pek hna awk a si. Jessica nih unau pawl he phungchim kan kal i kan lak i pakhat nih a ṭhalomi hmuhtonnak a ngeih tikah mah ah lungthin chiah lo awkah kaa zuam tiah a ti. Mi cheukhat nih a ṭhalomi lam in a kan lehrulh hmanhah phungchimnak in kan hmuhmi ṭhatnak ti bantuk a ṭhami kong hna kha Jessica nih a chim.
Jehovah nih a caan ah phungchim kan i harhmi kha ṭha tein a hngalh. Asinain a zaangfahnak kan i zohchunh tikah aa nuam tuk. (Luka 6:36) Asinain Jehovah nih hi vawlei mi pawl cungah zaangfahnak le lungsaunak kha a zungzal in a langhter lai lo. Hi vawlei donghter awkah aa tlakmi caan a hngalh ti kha kan zumh khawh. Mah caan a phanh hlan tiang kan phungchim rian cu a biapi tuk. (2 Tim. 4:2) Cucaah lungtho tein phungchim zungzal hna u sih law “mi vialte” cungah zaangfahnak langhter zungzal hna u sih.
