“KHRIHFA unau pawl langhtermi zaangfahnak cu ka cungah huham a ngei tuk” tiah Lisa nih a ti. * Mah cu biatak ah a hnuk hmasa bikmi kong a chimmi a si. Anne zong nih “biatak ah a ka hnuktu cu Jehovah Tehte Hna i an cawnpiaknak nakin an langhtermi zaangfahnak ruangah a si deuh” tiah a ti ve. Mah unaunu pahnih cu Baibal relnak le ruahnak ah an i nuam, asinain unau pawl langhtermi zaangfahnak cu an cungah hmual a ngei deuh.

Kan pawngkam mi hna an lungthin suk awkah zeitindah zaangfahnak kan langhter khawh? Lam hnih in i ruah hna u sih: Kan lei le kan tuahsernak in a si. Cun ahote cungah dah zaangfahnak kan langhter awk a si timi kong zong kan i ruah hna lai.

Phungthlukbia dal 31 ah langhtermi, nupi ṭha cu a lei cungah ‘zaangfahnak’ a um. (Ptb. 31:26) Zaangfahnak cu a chimmi bia le a chim ning cungah huham a ngei. Pale zong nih an lei in zaangfahnak kha an langhter ve awk a si. Nulepa tam deuh nih biahrang an hman tikah an fale kha a hnorsuan hna i an chimmi zong ṭha tein ngaih an duh lo ti kha an hngalh. Cucaah nulepa nih an bia cu ngaih a nuammi le hmual a ngeimi a si nakhnga zaangfahnak he biachim dingin an i zuam awk a si.

Nang cu nulepa na si zong, si lo zongah na lei kha zeitindah zaangfahnak naa ukter khawh? Phungthlukbia 31:26 i a thawknaklei ah mah kong he aa tlaimi a kong pakhat hmuh khawh a si: “A kaa cu fimnak in a pau.” Mah ah kan hmanmi biafang le kan awcawi kha fimkhur tein thimnak zong aa tel. Hitin i halnak nih a kan bawmh lai: ‘Ka chim dingmi bia nih thinhunnak maw a zualter chin lai asiloah daihnak dah a ser lai?’ (Ptb. 15:1) Cucaah bia kan chim hlanah ruah hmasa cu fim a si.

A dang phungthlukbia pakhat nih hitin a ti: “Ruah set loin chimmi bia nih cun nam chunh bangin mi a chunh.” (Ptb. 12:18) Kan chimmi bia le kan awcawi nih midang a hnorsuan khawh hna ning kan ruah ahcun kan lei kha kan i uk kho deuh lai. ‘Zaangfahnak’ kan langhtermi nih bia ṭhalo le awhrangpi in chim lo awkah a kan bawmh lai. (Efe. 4:31, 32) A ṭhalomi ruahnak le bia chim canah a ṭhami le zaangfahnak bia tu nem tein chim awkah a kan bawmh lai. Jehovah nih ṭihnak in a khatmi a sal Elijah a bawmhnak thawngin zohchunh awk ṭha a chiah. Jehovah aiawhtu vancungmi cu “aw ṭhia, aw dinte” in bia a chim. (1 Si. 19:12) Asinain zaangfahnak a ngeimi sinak ah nem tein biachimnak lawngin a za lo. Zaangfahnak a langhtermi tuahsernak zong a hau. Zeitin in dah?

Zaangfahnak he bia kan chim i thil kan tuahnak thawngin Jehovah kha kan i zohchunh. (Efe. 4:32; 5:1, 2) A hmasa ah langhtermi Lisa nih Jehovah Tehte Hna langhtermi zaangfahnak kong kha a rak chim. “Kan chungkhar cu ruahlopi in i ṭhial kan hauh tikah Khrihfabu i nuva tuahhnih cu kan thil fimmi bawmh awkah rian in khunh an la. Mah lioah Baibal hmanh ka cawng rih lo!” Cutin zaangfahnak an langhtermi nih Lisa kha biatak hlathlai awkah a forh.

 A thawknak ah langhtermi Anne zong Jehovah Tehte Hna nih a cungah an langhtermi zaangfahnak kha a sunsak tuk. Hitin a ti: “Vawleicung thil sining ruangah lunghrinnak a ngei tukmi ka hung si. Mi cungah zumhnak ka ngei kho lo. Jehovah Tehte Hna he kan i ton tikah ka zum hna lo. ‘Zei ruangah dah ka cungah siaherhnak an langhter?’ tiah khua ka ruat. Asinain Baibal a ka cawnpiaktu nih a langhtermi dawt-zaangfahnak taktak nih amah kha zumh awkah a ka forh.” A phi chuak cu zeidah a si? “A hnuah ka cawnmi kong cungah lungthin ka hun pek.”

Lisa le Anne cu Khrihfabu chungmi pakhat cio sinin an hmuhmi dawt-zaangfahnak nih an lungthin a suk i mah nih biatak cawn duhnak a ngeihter hna. Cun Khrihfabu langhtermi zaangfahnak nih Jehovah le a miphun zumh awkah a bawmh hna.

Mi cheukhat cu an nunphung ruangah bia nem chim awk le panh tein um awkah an i fawih deuh men lai. An nunphung asiloah anmah pumpak sining ruangah an nun a nemmi  cu a ṭha tukmi a si. Asinain cu bantuk ruang lawngah a si ahcun Pathian langhtermi zaangfahnak kan i zohchunhmi a si lai lo.—Lamkaltu 28:2 he tahchunh.

Zaangfahnak taktak cu Pathian thiang thlarau theitlai ah aa telmi a si. (Gal. 5:22, 23) Cucaah zaangfahnak taktak langhter awkah kan ruahnak le kan tuahsernak ah Pathian thiang thlarau i ukter kan herh. Cutin kan tuah tikah Jehovah le Jesuh kan i zohchunhmi hna a si. Cun Jesuh bantukin midang cungah siaherhnak taktak kan ngei. Jehovah Pathian le kan minunghawi kan dawt hnanak nih cutin tuah awkah a kan forh. Mah tikah kan langhtermi zaangfahnak cu lungthin in a rami, Pathian cohlanmi a ṭhawngmi sining pakhat a hung si.

Kan cungah zaangfahnak a langhtermi asiloah kan hngalhmi hna cungah zaangfahnak langhter cu a fawi men ko lai. (2 Sam. 2:6) Zaangfahnak langhter khawhnak lamkhat cu lawmhnak bia chimnak thawngin a si. (Kol. 3:15) Asinain mi pakhat cu a cungah zaangfahnak langhter awkah aa tlak lo tiah kan ruah tikah tah zeitin?

Mah kong hi ruathmanh: Jehovah nih a liannganmi a vel langhternak ah zohchunh awk ṭha bik a chiah i mah sining langhternak he aa tlaiin a biapimi kong kha Baibal in a kan cawnpiak. “A liannganmi a vel” timi biafang kha Khrihfa Greek Baibal ah voi tampi a hman. Pathian nih kan cungah a vel kha zeitindah a langhter?

Jehovah nih mi vialte kha an nunnak caah a herhmi thil a pek hnanak thawngin a vel kha a langhter. (Matt. 5:45) Jehovah nih a kong kan hngalh hlan hmanhin kan cungah zaangfahnak a langhter. (Efe. 2:4, 5, 8) Tahchunhnak ah, mi vialte caah a Fapa ngeihchunh te kha a pek. Jehovah nih ‘a lianngan hringhranmi a vel’ thawngin tlanhnak man a kan pek tiah lamkaltu Paul nih a ti. (Efe. 1:7) Sualnak kan tuah i a ngaih kan chiatter bu hmanhin Jehovah nih lam a kan hruai i a kan cawnpiak. A cawnpiaknak le a bia cu ‘ruah ti bantuk’ a si. (Deut. 32:2) Kan cungah a langhtermi a zaangfahnak vialte kha tling tein kan cham kho lai lo. Kan hmailei cu Jehovah zaangfahnak cungah aa hngatmi a si ti kha kan hngalh.—1 Peter 1:13 he tahchunh.

Jehovah zaangfahnak cu dawtnak le forhfialnak in a rami a si ti cu lunghrin awk a um lo. Cucaah mi cheukhat cung lawngah zaangfahnak langhter loin nitin kan nunnak ah zaangfahnak kan langhter pengnak thawngin Jehovah i zohchunh awkah kan i zuam awk a si. (1 Thes. 5:15) Zaangfahnak kan langhter peng ahcun khuasik ni i a lummi mei bantuk kan si lai. Chungkhar ca, zumtukhat unau ca, rianṭuanṭi hawi ca, sianginn kaiṭi hawi ca le innpa caah hnemtu kan si lai.

Zaangfahnak he na chimmi le na tuahmi thil ruangah ṭhatnak a hmumi na chungkharmi le Khrihfabu chungmi hna kong kha ruat. Nan Khrihfabu chungah inn le dum zohkhenhpiak a herhmi asiloah dawr kal ti bantuk hmaan tein tuah tawnmi thil hna bawmh a herhmi pakhatkhat an um men lai. Mah lengah phungchimnak ah bawmh a herhmi na hmuh hna tikah a herhmi bawmhnak pakhatkhat na pe kho hna lai maw?

Jehovah i zohchunh in kan biachim le kan tuahsernak ah ‘zaangfahnak’ kha i ukter peng hna u sih.