Na Hngal Maw?
Rom mi nih Jesuh bantukin tung cungah thah a simi mi pakhatkhat kha zapi thlan ah vuinak nawl an pe hna maw?
MI TAMPI nih misual mi pahnih lakah thingtung cungah thlai in thah a simi Jesuh kong kha an hngalh. (Matt. 27:35-38) Asinain Jesuh ruak vuinak le thlan ah phumnak caah timhtuah a si timi Baibal chimmi cu a si kho lo tiah mi cheukhat nih an zumh.—Marka 15:42-46.
Thawngṭha Cauk a soimi mi cheukhat nih thah a simi pakhat cu thlan ti bantuk ah ṭha tein vui a simi kha an lung a hring. Mah canah misual bantukin thah a simi hna cu i thleidang deuh in phum an si lai tiah an ruah. Journalist Ariel Sabar nih Smithsonian mekazin ah mi cheukhat nih cutin an ruahnak a ruang kha hitin a fianter: “Thingtung cung i thahnak cu minung tuanbia ah a sual bikmi an pekmi hna dantatnak a si i cu bantuk mi hna cu Rom mi nih ṭha tein le upatnak he vuinak nawl an pe hna lai lo tiah mifim cheukhat nih an ti.” Rom mi nih misual pawl kha a si khawh chungin ningzah thlaih an duh hna caah an ruak kha saram pawl ei awkah tung cungah an chiah tawn. Mah hnuah a taangmi an ruak kha thlan sawhsawh ah an hlonh men lai.
Asinain thilhlun hlathlaitu hna nih thah a simi Judah mi cheukhat i an ruak a taangmi kong he aa tlaiin aa phundangmi thil pakhat kha an langhter. 1968 ah kumzabu pakhatnak ah thah a rak simi pa pakhat i a ruh kha an hmuh. Jerusalem khua pawng i Judah mi chungkhar thlan pakhat ah an hmuh. A ruh pawl cu ruh chiahnak um asiloah kuang chungah a um. Mah ah a kedil ruh pakhat zong aa tel. A kedil kha thingpheng cungah lehmah 4.5 (11.5 cm) a saumi thirkhenh in an khenh. “Yehochanan timi pa i a kedil ruh nih Jesuh cu thlan ah vui a si ti a langhtermi Thawngṭha cauk a hmaan kha a langhter” tiah Sabar nih a chim. “Yehochanan a kedil nih Jesuh chan ah thingtung i thah a simi, Judah mi hna cu Rom mi nih vuinak nawl an pek hna ti kha a langhter.”
Mah kedil ruh nih Jesuh tung cungah thlai a sining he aa tlaiin ruahnak a phunphun a umter. Asinain thah a simi misual cheukhat cu vui an si i thlan ah hlonh sawhsawh an si lo ti cu a fiang. Cucaah Jesuh ruak cu thlan ah ṭha tein vui a si timi Baibal chimmi cu zumh awk a tlakmi a si. Mah langhtertu thil nih Baibal chimmi a hmaan ti kha a bawmh.
A biapi deuhmi cu Jehovah nih Jesuh cu mirum mi hna sinah vui a si lai tiah a rak chimchung cang i Pathian bia tlin lo awkah ahohmanh nih an kham kho lo.—Isa. 53:9; 55:11.