Mah tuanbia kong khulrang in a relmi cheukhat nih cutin an ruah. Asinain mah cacaang hna ah Mephibosheth ti min a ngeimi pa pahnih an i tel i thil sining kong hlathlainak thawngin kan hngalh khawhmi kong a um.

Israel Siangpahrang Saul cu fapa pasarih le fanu pahnih a ngei. Saul i a fater cu Jonathan a si. A hnuah siangpahrang nih a nuchun Rizpah he Mephibosheth ti min a ngeimi fapa pakhat a ngei. Jonathan zong nih Mephibosheth ti min a ngeimi fapa pakhat a ngei ve. Cucaah Siangpahrang Saul nih Mephibosheth timi fapa pakhat le tupa pakhat a ngeih hna.

Siangpahrang Saul nih Israel ram ah khua a sami, Gibeon mi kha a rem hna lo i hloh dih awkah aa zuam. An lak i tampi cu thah an rak si. Mah cu a palh tukmi a si. Zeicah? Joshua chan ah Israel mi upa pawl nih Gibeon mi he daihnak ser awkah biakamnak an rak tuah caah a si.—Josh. 9:3-27.

Mah biakamnak cu Siangpahrang Saul chan ah a hmun rih. Siangpahrang nih mah biakamnak kha zei rel loin Gibeon mi kha hloh dih awkah aa zuam. Mah ruangah “Saul le a innchungkhar cungah thisen chuah mawhnak” a rak tlung. (2 Sam. 21:1) A donghnak ah David cu siangpahrang a hung si. A taangmi Gibeon mi hna nih a hmaan loin an tonmi ngaihchiatnak kong kha a sinah an chimh. David nih Saul tuahmi thilṭhalo caah zeitindah remnak ka ser awk a si tiah a hal hna, cuticun an ram chungah Jehovah thluachuah hmuh dingin lam a awnter. Gibeon mi nih tangka hal canah anmah “hrawh awkah khua a rak khangtu” i fapa pasarih kha thlai in thah awkah an rak hal. (Nam. 35:30, 31) Cucaah David nih an halmi kha a pek hna.—2 Sam. 21:2-6.

A hnuah Saul le Jonathan cu raltuknak ah an thi nain Jonathan fapa Mephibosheth cu a rak nung. Anih cu a ngakchiat lioah khawnden sual ruangah a ke a beimi a si i a pu nih Gibeon mi a doh hnanak ah aa tel lo. Jonathan fapa Mephibosheth i telin a tefa pawl ṭhatnak a pe hngami hawikomhnak kha David le Jonathan nih biakamnak in an rak ser. (1 Sam. 18:1; 20:42) Baibal nih hitin a ti: “Saul fapa Jonathan i fapa Mephibosheth kha cu [David nih] a zuah, zeicahtiah annih karlak ah . . . khan BAWIPA chiatserhnak a rak um.”—2 Sam. 21:7.

Asinain David nih Gibeon mi hna halmi kha a hna a tla. Mephibosheth i telin Saul fapale pahnih le a tule panga kha thlai awkah a pek hna. (2 Sam. 21:8, 9) David tuahsernak nih an ram chung i thisen chuahnak kha a donghter.

Mah kong hi tuanbia sawhsawh men a si lo. Pathian nawlbia cu a fiang tuk. Hitin a ti: “Pale ruangah fale zong thah an si lai lo.” (Deut. 24:16) Saul fapa pahnih le a tule panga cu sualnak a ngei lomi an si ahcun an cung i an tuahmi thil kha Jehovah a hna a tla lai lo. Mah nawlbia ah hitin a ti chap: “Mah le sual ruang cio ah thah cu an si lai.” A thimi Saul hrinsor pasarih cu Gibeon mi hna an miphun ningin thahnak ah lamkhatkhat in rak i tel dawh an si. Cucaah a ṭha lomi an tuahsernak ruangah an zunmi a si.

Mi pakhat nih lamhruainak ningin ka zulhmi men a si tiah a ruahnak asiloah a chimnak thawngin palhnak a tuahmi caah aa silhnalh kho lo ti kha mah kong nih a langhter. Phungthlukbia nih hitin a ti: “Na ke nih a lamhmi lam kha ṭha tein zoh law cuticun him tein na kal kho lai.”—Ptb. 4:24-27; Efe. 5:15.