“Ka kawi” tiah auhmi pa nih Ruth ka ṭhit ahcun keimah ro tu ka “hrawh” sual lai tiah zeicah a chim? (Ruth 4:1, 6)

Baibal chan ah innchunghawi a ngeimi pa pakhat nih fa ngeih loin a thih ahcun biahalnak cheukhat a chuak: A ngeihmi ro hna cu zeitindah tuah a si lai? A chungkhar min cu zungzal in a tlau lai maw? Moses Nawlbia nih mah biahalnak hna i a phi kha hngalh awkah a kan bawmh.

Mithi pa i a ram asiloah a si a fah ruangah a ram a zuarmi pa i a ram cu zeitindah a si lai? A unaupa asiloah aa naihmi a rualchanpa nih mah ram kha a tlanh khawh asiloah a cawk khawh. Cuticun a chungkhar nih mah ram kha an kilven khawh lai.—Lev. 25:23-28; Nam. 27:8-11.

Mithi pa i chungkhar min cu zeitindah kilven a si? Vale unau rian a simi ṭhitumnak thawngin a si, mah kha Ruth kong zongah hmuh khawh a si. Mithi pa i a min le a ro cotu ding a um nakhnga pa pakhat nih a unau nupi kha a ṭhit lai. Dawtnak aa telmi mah timhtuahnak cu nuhmei pawl zohkhenhnak ca zongah a si.—Deut. 25:5-7; Matt. 22:23-28.

Naomi kong kha ruathmanh. Naomi cu Elimelek timi pa he an i um. A vapa le a fapale pahnih nih an thihtak caah amah a zohkhenhtu ding an um ti lo. (Ruth 1:1-5) Naomi nih a monu Ruth he Judah ram an kir ṭhan tikah an ram cawk ṭhan awkah Boaz kha hal dingin Ruth kha a fial. Boaz cu Elimelek he aa naih tukmi rualchan pakhat a si. (Ruth 2:1, 19, 20; 3:1-4) Asinain amah nakin aa naih deuhmi, Baibal ah “Ka kawi” tiah auhmi rualchan pakhat a um rih ti kha Boaz nih a hngalh. Cucaah aa naihmi rualchan kha a tuah awk a simi rian tuah awkah a fial hmasa.—Ruth 3:9, 12, 13.

A hmasa ah cun “Ka kawi” timi pa nih tlanh a duh. (Ruth 4:1-4) Mah ram cawk awkah tangka tlawmpal a dih lai ti kha a hngalh, asinain Naomi cu Elimelek ro cotu ding fa ngeih awkah a tar tuk cang ti zong a hngalh. Mah ram cu Ka kawi timi pa i ro ah fonh chih a si lai i mah cu a ṭha tukmi chawva hrampi a si kho.

Asinain Ka kawi timi pa nih Ruth kha ka ṭhit a hau ti a hngalh tikah a lung aa thleng ṭhan. Hitin a ti: “Keimah ro tu kha ka hrawh sual lai caah keimah caah cun ka tlan kho lai lo.” (Ruth 4:5, 6) Zeicah a lung aa thlen?

Ka kawi timi pa asiloah pakhatkhat nih Ruth kha a ṭhit i fapa a hrin ahcun mah fapa nih Elimelek ro kha a co lai. Mah nih zeitindah Ka kawi timi pa i a “ro” kha a “hrawh” sual khawh? Mah kong kha Baibal nih cun a chim lo nain a si khomi lam cheukhat a um.

• Pakhatnak, a tangka a sawksammi a lo lai, zeicahtiah a donghnak ah Elimelek i ram cu amah ta a si lai lo. Ruth fapa nih a co lai.

• Pahnihnak, Naomi le Ruth kha an pahnih in cawm awk le zohkhenh awkah rian a ngei lai.

• Pathumnak, Ruth nih Ka kawi timi pa he fa dang a ngeih rih ahcun ro kha a dang a fale he an i ṭhen lai.

• Palinak, Ka kawi timi pa nih a dang amah fale a ngeih hna lo ahcun Ruth fapa nih Elimelek ro he, Ka kawi timi pa i ro he conak nawl a ngei lai. Cucaah amah min si loin Elimelek min aa lakmi fapa sinah a ro kha a sung lai. Ka kawi timi pa nih Naomi bawmh ruangah a ro sungh lai kha a duh lo. Mah rian lak awkah amah a changtu Boaz kha pek a duh deuh. Mah tikah Boaz nih “mithi pa min cu a ro chung i hmunhter” kha a duh caah cutin a rak tuah.—Ruth 4:10.

Ka kawi timi pa nih amah min le amah ro kha kilven a duh deuh. Anih cu amah zawn lawng aa ruatmi a si. Ka kawi timi pa nih amah min kilven awkah fakpi in aa zuam ko nain atu ah a min cu ahodah a si ti hmanh kan hngal lo. Boaz a hmuhmi Messiah, Jesuh Khrih i hringsortu sinak a sunglawi tukmi tinvo sung kha a rak sung. A chambaumi hna bawmh awkah caanṭha a hmuhmi kha amah zawn lawng i ruat in a hlawmi Ka kawi timi pa caah cun ngaihchiat awk ngai a si!—Matt. 1:5; Luka 3:23, 32.