1-2. Tipil in dingin timhcia na si rih lo ahcun zeicah na lung a dongh awk a si lo? (A phaw hmanthlak zoh.)

 TIPIL in na duh ahcun na caah a ṭha tukmi hmuitinh na chiahmi a si. Atu ah mah kehlan hlan dingin timhcia na si cang maw? Ka si cang tiah na zumh i Khrihfa upa pawl zong an hna a tlak ahcun a dang caanṭha hmuh awkah i cungcang hlah. Cutin na tuah ahcun Jehovah rianṭuannak ah thluachuah na hmu lai.

² Asinain tipil na in hlanah ṭhancho na herhmi a um tiah pakhatkhat nih an in ti maw? Asiloah nangmahle nangmah ṭha tein naa hngal maw? Cutin a si ahcun na lung dong hlah. Mino na si ah, upa na si ah a biamipi mah kehlan hlan dingin na ṭhangcho kho ko.

3. Ethiopia bawipa nih Filip kha zeidah a hal, zei biahalnak dah a chuak? (Lamkaltu 8:36, 38)

³ Lamkaltu 8:36, 38 rel. Ethiopia bawipa nih thawngṭha chimtu Filip kha hitin a hal: “Zeinihdah tipil in a ka dawnh lai?” Ethiopia bawipa nih tipil in kha a duh tuk, asinain a biapimi mah kehlan hlan awkah timhcia a si taktak maw?

4. Ethiopia mipa nih cawn peng dingin bia a khiah kha zeitindah a langhter?

⁴ Ethiopia mipa cu “Pathian biak awkah khan Jerusalem khua ah a va kal.” (Lam. 8:28) Cucaah anih cu Judah biaknak a cohlangmi si dawh a si. Hebru Cathiang chungin Jehovah kong kha a cawn lai ti cu a fiang ko. Asinain tam deuh in  cawn rih a rak duh. Filip nih lam cung i a ton lioah zeidah a hmuh? Profet Isaiah cazual a relmi kha a hmuh. (Lam. 8:28) Mah cu a thuk tukmi Baibal biatak a si. Mah bawipa nih a hrampi Baibal cawnpiaknak cawn lawngin aa lungsi lo; cawn chap lengmang a duh.

5. Ethiopia mipa nih a cawnmi kong he aa tlaiin zeidah a tuah?

⁵ Ethiopia bawipa cu Ethiopia Siangpahrangnu Kandeis kut tangah rian a ṭuanmi a si i “tangka bawi” zong a si. (Lam. 8:27) Cucaah anih cu rian tampi a ngei i aa manh lo tukmi a si. Asinain Jehovah biak awkah a caan a pek. Biatak cawnnak lawngin aa lungsi lo i a cawnmi ningin a tuah. Cucaah Jerusalem biakinn ah Jehovah biak dingin Ethiopia ram in aa thawh. Mah khualtlawnnak caah a caan le tangka tampi a dih ko lai nain Jehovah biak a duh caah mah kha biapi ah a chia lo.

6-7. Ethiopia mipa nih Jehovah a dawtnak kha zeitindah a ṭhanter peng?

⁶ Ethiopia mipa nih Filip sinin a biapimi biatak cheukhat kong kha a hun hngalh. Mah lakah pakhat cu Jesuh cu Messiah a si timi kong a si. (Lam. 8:34, 35) Mah bawipa nih a caah Jesuh nih a tuahpiakmi kong a theih tikah a lung a suk tuk. Mah tikah zeitindah a lehrulh? Anih cu upat awk a tlakmi Judah biaknak a cohlangmi pakhat a si rih kho men. Asinain Jehovah le a Fapa a dawt hnanak cu a ṭhang chin. Mah nih Jesuh Khrih zultu pakhat in tipil in ding timi a nunnak a thlentermi biakhiahnak tuah awkah a forh. Filip nih tipil in awkah timhcia a si ti kha a hmuh i tipil a rak pek.

⁷ Nang zong Ethiopia mipa kha naa zohchunh ahcun tipil in awkah timhcia na si kho ve. Cun zumhnak he “zeinihdah tipil in a ka dawnh lai?” tiah na chim khawh ve lai. Ethiopia mipa bantukin zeitindah tuah khawh a si ti kha zohhmanh hna u sih: A cawn peng, a cawnmi ningin a tuah i Pathian a dawtnak kha a ṭhanter peng.

8. Johan 17:3 kha zeitindah na zulh khawh?

⁸ Johan 17:3 rel. Jesuh chimmi mah bia nih Baibal hlathlai awkah biakhiahnak tuah dingin aan bawm maw? Kan lak i mi tampi cu a kan bawmh. Asinain cawn peng cu a hau maw? A Hau. Zeitikhmanh ah ‘Pathian nih a tuahmi kha tling tein kan hngal’ kho bal lai lo. (Pct. 3:11) Cucaah zungzal in kan cawn peng lai. Kan cawn deuhdeuh tikah Jehovah he kan i naih deuhdeuh ve lai.—Salm 73:28.

9. A hrampi Baibal cawnpiaknak kan hlathlai hnuah zeidah kan tuah a hau?

⁹ Jehovah kong cawn hram kan thawk lioah a hrampi Baibal cawnpiaknak lawng kha kan hngalh. Lamkaltu Paul nih Hebru mi hna  sin a cakuat ah a hrampi cawnpiaknak kha “cawnnak hmasa bik” in a langhter. Mah cu “Khrihfa cawnpiaknak a hram kan i domhnak” kha a biapi lo a ti duhnak a si lo. Mah canah ngakchia caah vitamin a pemi cawhnuk in a langhter. (Heb. 5:12; 6:1) Asinain Khrihfa dihlak kha mah a hrampi cawnpiaknak lawng si loin a thukmi Baibal biatak kha hlathlai peng ding zongin a kan forh. A hrampi Baibal cawnpiaknak kha hlathlai na duh maw? Ṭhancho peng le Jehovah kong le aa tinhnak kong kha cawn peng na duh maw?

10. Mi cheukhat nih hlathlainak tuah awkah zeicah zuamcawhnak an ton khawh men?

¹⁰ Asinain kan lak i mi tampi caah hlathlainak tuah cu zuamcawhnak a si. Nangtah zeitin? Sianginn ah carelnak le hlathlainak tuahnak ah ṭha tein naa zuam maw? Hlathlainak tuahnak ah nuamhnak le lungsinak na hmu maw? Asiloah cauk in cawnnak kha kaa harh tiah na ruat maw? Cutin na ruah ahcun nangmah lawng na si lo. Asinain Jehovah nih aan bawmh khawh. Anih cu a tlingmi le a ṭha bikmi Cawnpiaktu a si.

11. Jehovah nih “A Liannganmi Cawnpiaktu” a si kha zeitindah a langhter?

¹¹ Jehovah nih amahle amah kha “A Liannganmi Cawnpiaktu” tiah aa ti. (Isa. 30:20, 21, NW) Anih cu a lung a sau, zaangfahnak a ngei i mi a hngalthiammi Cawnpiaktu a si. A cawnpiakmi hna i an ṭhatnak kha a kawl. (Salm 130:3) Cun kan sinin kan tuah khawhmi lengin aa ruahchan bal lo. Na thluak cu amah nih a sermi, a ṭha tukmi laksawng a si ti kha philhhlah. (Salm 139:14) Kokek in cawn duhnak kan ngei. A kan Sertu nih cawng zungzal hna sehlaw mah kha i nuamhpi hna seh ti a kan duh. Cucaah atu ah Baibal biatak kan ‘duhmi’ cu fim a si. (1 Pet. 2:2) Na phanh khawhmi hmuitinh kha chia law Baibal kha hmaan tein rel awk le hlathlai awkah cazin tuah. (Josh. 1:8) Jehovah bawmhnak thawngin a kong kha tam deuh in relnak le cawnnak ah nuamhnak na hun hmu lai.

12. Jesuh nunning le phungchim rian kong kha zeicah kan hlathlai awk a si?

¹² Jesuh nunning le a phungchim rian kong ruah awkah hmaan tein a caan pe. Jesuh keneh naih tein zulh cu Jehovah rianṭuannak caah tawhfung a si. A hleiin hi harnak caan chungah a si. (1 Pet. 2:21) Jesuh nih a zultu pawl kha harnak nan tong lai tiah hlangfang tein a ti hna. (Luka 14:27, 28) Asinain amah bantukin a zultu pawl zong hlawhtlinnak an hmu kho ti kha a zumh. (Johan 16:33) Jesuh nunning kha a dikthliar in hlathlai law nifatin na nunnak ah amah i zohchunh dingin hmuitinh chia.

13. Jehovah kha zeidah na hal peng awk a si, zeicah?

¹³ Hngalhnak lawngin a za lo. Hngalhnak a biapitnak a ruang cu Jehovah kong tam deuh in na cawn khawh nakhnga le amah dawtnak le zumhnak ti bantuk sining hna na ngeih khawh nakhnga caah a si. (1 Kor. 8:1-3) Na cawn lengmang lioah zumhnak tam deuh na ngeih nakhnga Jehovah sinah bawmhnak hal peng. (Luka 17:5) Cu bantuk thlacamnak kha Jehovah nih siang ngaiin a leh. A hmaanmi Pathian hngalhnak cungah hram aa bunhmi zumhnak taktak nih ṭhancho peng awkah aan bawmh lai.—Jeim 2:26.

14. Lamkatu Peter nih kan cawnmi ningin zulh a biapitnak kha a hleiin zeitindah a langhter? (Hmanthlak zong zoh.)

¹⁴ Lamkaltu Peter nih Khrih zultu hna nih an cawnmi ningin zulh peng cu zeitluk in dah a biapit ti kha a hleiin a langhter. Baibal chung i Noah kong kha a cherhchan. Jehovah  nih Noah sinah buanchukcho hmangin mah chan lio i miṭhalo pawl kha ka hrawh hna lai tiah a ti. Noah le a chungkhar khamh awkah buanchukcho a tlung ti hngalh sawhsawhnak lawngin a za lo. Peter nih Buanchukcho hlan le “Noah nih tilawng a ser lio” caan kong a chimmi kha i cinken. (1 Pet. 3:20) Noah le a chungkhar nih tilawng nganpi an saknak thawngin Pathian sinin an hngalhmi ningin an tuah. (Heb. 11:7) Cucaah Noah nih a tuahmi kha Peter nih tipil innak he a tahchunh i hitin a ti: “Nanmah aan khamhtu hna tipil innak a rak sawhtu hi a si.” (1 Pet. 3:21) Cucaah tipil in dingin i timhtuah awkah atu ah na tuahmi thil le Noah le a chungkhar nih tilawng sak awkah kum tampi chung an rak ṭuanmi rian kha kan tahchunh khawh. Tipil in awkah timhcia na si nakhnga zei rian dah na ṭuan a hau?

15. Lungtak tein i ngaihchihnak ah zeidah aa tel?

¹⁵ A hmasa bik ah kan tuah dingmi thil pakhat cu kan sualnak lungtak tein i ngaihchih kha a si. (Lam. 2:37, 38) Lungtak tein i ngaihchihnak nih thlennak tuah awkah a forh. Ziaza rawhralnak, khuhsi hmawmnak asiloah a thurhnawmmi holh le volhpamh ti bantuk Jehovah lung a lawmhter lomi thil tuah hna kha na ngol kho lai maw? (1 Kor. 6:9, 10; 2 Kor. 7:1; Efe. 4:29) Cutin na tuah khawh rih lo hmanhah thlennak tuah awkah i zuam peng. Baibal aan cawnpiaktu kha biaruah asiloah Khrihfa upa sinah bawmhnak le lamhruainak hal hna. Nang cu mino na si i inn ah na um rih ahcun tipil in awkah aan dawnkhan khotu zei bantuk ziaza ṭhalo paoh kha hloh awkah na nu le na pa sinah bawmhnak hal hna.

16. Thlaraulei ah tuah tawnmi thil tuahnak ah zeidah aa tel?

¹⁶ Thlaraulei ah tuah tawnmi thil tuah zong a biapi tukmi a si. Mah ah Khrihfabu ah i pumhnak le a phi peknak zong aa tel. (Heb. 10:24, 25) Phungchim dingin sining na tlinh tikah hmaan tein i tel peng. Phungchimnak ah tam deuh in naa tel tikah naa nuam deuhdeuh ve lai. (2 Tim. 4:5) Nang cu mino na si i inn ah a ummi na si rih ahcun hitin i hal: ‘Ka nu le ka pa nih i pumh awk asiloah phungchim vah awkah an ka hnek maw? Asiloah keimah lungtho tein dah ka tuah?’ Nangmah lungtho tein cutin na tuah ahcun na zumhnak na langhtermi a si i Jehovah Pathian cungah naa  lawmhnak le na dawtnak na langhtermi zong a si. Mah cu “Pathian sin i pekmi” na laksawng a si. (2 Pet. 3:11; Heb. 13:15) Hnekchom si loin mah lungtho tein pekmi laksawng dihlak nih kan Pathian lung a lawmhter. (2 Korin 9:7 he tahchunh.) Jehovah sinah a ṭha bikmi pek kan duh caah cutin kan tuahmi a si.

17-18. Zei a biapimi sining nih dah tipil in awkah ṭhancho dingin aan bawmh lai, zeicah? (Phungthlukbia 3:3-6)

¹⁷ Tipil in awkah ṭhancho dingin naa zuam lioah zuamcawhnak na tong ko lai. Cheukhat nih na zumhnak thar kha an in nihsawh men lai, cun hremnak le ralchanhnak hmanh na tong men lai. (2 Tim. 3:12) A ṭhalomi ziaza pakhat tei dingin naa zuam lioah a caan ahcun mah kha na tuah ṭhan men lai. Asiloah na hmuitinh phanh khawh dawh a lawh lo caah na lung a sau men lai lo i san a tlai lo tiah na ruah men lai. Inkhawhnak ngeih awkah zeinihdah aan bawmh lai? A biapi bikmi sining cu Jehovah dawt kha a si.

¹⁸ Jehovah na dawtmi cu na ngeihmi lakah a ṭha bikmi sining pakhat a si. (Phungthlukbia 3:3-6 rel.) A fekmi Pathian na dawtnak nih zuamcawhnak na tonmi kha tei awkah aan bawmh khawh. Baibal nih a salle cungah Jehovah nih a ngeihmi, a fekmi dawtnak kong kha a langhter tawn. A fekmi dawtnak timi cu Jehovah nih a salle kha a hlaw bal hna lai lo asiloah a kaltak bal hna lai lo tinak a si. (Salm 100:5) Nang cu Pathian mui keng in sermi na si. (Gen. 1:26) Cu bantuk dawtnak phun kha zeitindah na langhter khawh?

19. Jehovah nih na caah aan tuahpiakmi thil dihlak cungah naa lawmhnak kha zeitindah na karhter khawh? (Galati 2:20)

¹⁹ Lunglawmhnak langternak in thawk. (1 Thes. 5:18) Nifatin ‘Jehovah nih ka cungah zeitindah dawtnak a langhter?’ tiah i hal. Cun na thlacamnak ah Jehovah nih aan tuahpiakmi cuset khaset timi kong kha chim law a cungah naa lawmhnak kha langhter. Lamkaltu Paul nih Jehovah kong he aa tlaiin mah kha a hun hngalh bantukin nang zong Jehovah nih aan dawt caah na caah a tuahmi thilṭha hna kha hngalh i zuam. (Galati 2:20 rel.) ‘Jehovah ka dawtnak kha langhter ka duh ve maw?’ tiah i hal. Jehovah dawtnak nih lemsoinak hna al awk le zuamcawhnak hna kha inkhawh awkah aan bawmh lai. Mah nih thlaraulei ah tuah pengmi thil hna tuah awk le nifatin na Pa na dawtnak kha langhter peng awkah aan forh lai.

20. Jehovah sin i pumpeknak ah zeidah aa tel, mah biakhiahnak cu zeitluk in dah a biapit?

 ²⁰ A caan a phanh tikah Jehovah na dawtnak nih a hleikhunmi thlacamnak pakhat tuah awkah aan forh lai. Pathian sinah nangmahle nangmah naa pumpe lai. Jehovah sin i naa pumpek tikah a ṭha tukmi mah ruahchannak hi na ngei ti kha philhhlah: A zungzal in Jehovah ta na si kho. Jehovah sin i naa pumpek tikah a ṭhat caan ah siseh, a chiat caan ah siseh nangmah kaan biak lai tiah bia naa kammi a si. Mah biakamnak cu atu le atu tuah ṭhan a haumi a si lo. Kan pum kan i pek tikah a biapi tukmi kehlan kan hlanmi a si ti cu a hmaan ko. Asinain mah kong hi ruathmanh: Na nunnak ah biakhiahnak tampi na tuah men lai, cheukhat cu an ṭha tuk ko nain Jehovah sinah naa pumpekmi nakin a ṭha deuhmi biakhiahnak a um ti lo. (Salm 50:14) Satan nih na zumhnak a hlawt lai timi ruahchannak he na Pa na dawtnak kha zorter awkah aa zuam peng lai. Satan kha zeitikhmanh ah i teiter hlah! (Job 27:5) A fekmi Jehovah na dawtnak nih naa pumpekmi ningin nun awk le vancung na Pa he i naih chin awkah aan bawmh lai.

21. Tipil innak cu a donghnak si loin a hramthawknak a si tiah zeicah kan chim khawh?

²¹ Jehovah sin naa pumpek hnuah a dang a biapimi kehlan hlan dingin nan Khrihfabu i Khrihfa upa kha biaruah hna. Cun tipil innak cu a donghnak si loin a hramthawknak a si ti kha i cinken peng. Mah cu a dong lomi Jehovah rianṭuannak i a thawknak a si. Cucaah atu in na Pa na dawtnak kha fehter. Nikhat hnu nikhat na dawtnak a feh chin nakhnga hmuitinh chia. Mah nih tipil in awkah aan forh lai. Mah ni cu a sunglawi tukmi ni a si lai. Asinain mah cu a hramthawknak lawng a si rih. Jehovah le a Fapa na dawt hnanak kha a zungzal in ṭhanter peng.