1-2. Mi nih tipil an in tikah zei thil sining dah a um tawn, zeidah na ruah awk a si?

 TIPIL a ing dingmi phu pakhat kha na zoh bal hna maw? Tipil an in hlanah zumhnak in biahalnak pahnih a phi an pekmi kha na theih. An chungkhar pawl le an hawile pawl an caah an i uanthlarmi kha na hmuh. Ti chungin an hun chuah tikah kutbengh thawng kha na theih i an hmai ah lawmhnak in a khahmi zong na hmuh. Buaktlak in zarhkhat ah Jehovah Tehte pakhat in Jehovah Pathian sinah a pum aa pe i tipil a ingmi a thong leng an um.

² Nang tah zeitin? Tipil in dingin na ruah ahcun “Jehovah a kawlmi” na si caah hi vawlei ṭhalo ah a hleikhunmi pakhat na si. (Salm 14:1, 2, NW) Mino na si ah, upa na si ah mah capar hi nangmah caah ṭialmi a si. Asinain tipil a ing cangmi kan si ahcun a zungzal in Jehovah biak ding timi kan biakhiahnak kha fehter kan duh. Cucaah Jehovah biak kan duhnak a ruang tampi lakah pathum kha i ruah hna u sih.

3. Jehovah salle nih biatak le dinnak kha zeicah an duh? (Salm 119:128, 163)

³ Jehovah nih a miphun kha ‘biatak duh’ awkah nawl a pek hna. (Zek. 8:19) Jesuh nih a zultu pawl kha dinnak a duhmi si awkah a forh hna. (Matt. 5:6) Mah cu mi pakhat nih Pathian mithmuh ah a hmaanmi, a ṭhami le a thiangmi thil tuah duhnak taktak a ngeih a hau tinak a si. Biatak le dinnak kha na duh maw? Na duh lai tiah kan zumh. Lihbia kha na huat i a hmaanlomi le a ṭhalomi thil vialte zong na huat. (Salm 119:128, 163 rel.) Lihbia nih hi vawlei uktu Satan i a sining kha a langhter. (Johan 8:44; 12:31) Satan i aa tinhnak pakhat cu a thiangmi  Jehovah Pathian min thangchiat kha a si. Eden dum i ralchanhnak thawkin Satan nih Pathian kong he aa tlaiin lihbia a karhter. Jehovah kha amah zawn lawng aa ruat i minung sinin thilṭha a thupkanhmi, a ding lomi Uktu in a langhter. (Gen. 3:1, 4, 5) Jehovah kong he aa tlaiin Satan chimmi lihbia nih mi pawl kha Pathian cungah a ṭhalomi ruahnak a ngeihter hna. Mi nih ‘biatak an duh’ lo tikah Satan nih a ding lomi le a ṭhalomi tuahsernak vialte tuah awkah a hruai khawh hna.—Rom 1:25-31.

4. Jehovah nih “zumhawktlakmi Pathian” a si kha zeitindah a langhter? (Hmanthlak zong zoh.)

⁴ Jehovah cu “zumhawktlakmi Pathian” a si i amah a dawmi hna kha siang ngaiin biatak a cawnpiak hna. (Salm 31:5) Cutin a tuahnak thawngin Satan lihbia in a luatter hna. Cun Jehovah nih a salle kha a dingmi le a felmi si awk zongah a cawnpiak hna. Mah nih mahle mah i upat deuh awk le daihnak ngeih awkah a bawmh hna. (Ptb. 13:5, 6) Baibal na hlathlai tikah na caah Jehovah nih cutin a tuah maw? Jehovah phunglam cu mi vialte caah le nangmah caah a ṭha bikmi a si ti kha na hun hngalh. (Salm 77:13) Cucaah Pathian dinnak kha fek tein i tlaih na duh. (Matt. 6:33) Biatak kha kilven na duh i Jehovah Pathian kong he aa tlaimi thangchiatnak bia hna cu a hmaan lo ti langhternak ah bawmh na duh. Cutin zeitindah na tuah khawh?

5. Biatak le dinnak kha zeitindah naa tlaih khawh?

⁵ Hitin na chimnak thawngin mah nunning hi naa thim khawh: “Satan lihbia hna kha ka cohlang lo i biatak kha kaa tlaih. Jehovah kha keimah Uktu siter ka duh i a hmaan tiah a timi thil kha tuah ka duh.” Cutin zeitindah na tuah khawh? Thlacamnak in Jehovah sinah nangmahle nangmah i pumpe law tipil innak in mah naa pumpeknak kha mi vialte hmaiah langhter. A hmaanmi le a dingmi thil duhnak cu tipil in awkah hmual a ngei tukmi forhfialtu pakhat a si.

6. Jesuh Khirh dawt awkah Salm 45:4 nih zei bantuk a ruang ṭha hna dah aan ngeihter?

⁶ Zeicah Jesuh Khrih kha na dawt? Salm 45:4 ah hmuhmi a ṭha tukmi a ruang cheukhat hi zohhmanh. (Rel.) Jesuh nih biatak, toidornak le dinnak kha a duh. Biatak le dinnak kha na duh ahcun Jesuh Khrih zong na dawt ti kha hngalh khawh a si. Jesuh nih a  hmaanmi le a dingmi thil ralṭha tein a kilven ning kha ruathmanh. (Johan 18:37) Cu a si ah Jesuh nih toidornak kha zeitindah a langhter?

7. Jesuh toidornak he aa tlaiin zeinihdah na lung aan suk?

⁷ Jesuh nih a nunning in toidornak kha a langhter. Tahchunhnak ah, amahle amah si loin a Pa sinah thangṭhatnak vialte kha a pek dih. (Marka 10:17, 18; Johan 5:19) Cu bantuk toidornak na hmuh tikah zeitindah na um? Pathian Fapa dawt awk le a hnu zulh awkah aan forh maw? Aan forh lai ti cu a fiang ko. Jesuh cu zeicah aa toidor? Aa toidormi a Pa kha a dawt ca le aa zohchunh caah a si. (Salm 18:35; Heb. 1:3) Mah nih Jehovah sining hna tling tein a langhtermi Jesuh sinah aan hnuk ko lo maw?

8. Kan Siangpahrang Jesuh kha zeicah kan dawt?

⁸ Jesuh cu a ṭha bikmi kan Uktu a si caah kan dawt. Jehovah theng nih a Fapa kha a cawnpiak i uktu in rian a pek. (Isa. 50:4, 5) Jesuh nih a langhtermi mahzawn ruat lo dawtnak zong kha ruathmanh. (Johan 13:1) Jesuh cu na Siangpahrang a si caah na sinin dawtnak hmuh awkah aa tlak. Jesuh nih amah a daw taktakmi—ka hawile tiah a auhmi hna nih a nawlbia an zulhnak thawngin an dawtnak kha an langhter tiah a ti. (Johan 14:15; 15:14, 15) Jehovah Fapa i a hawi si cu zeitluk tinvo sung dah a si!

9. Khrih tipil innak le Khrihfa pawl tipil innak cu zeitindah aa lawh?

⁹ Jesuh nih a zultu pawl sin a pekmi hna nawlbia pakhat cu tipil in kha a si. (Matt. 28:19, 20) Jesuh nih zohchunh awk ṭha a chiah. Jesuh tipil innak cu a zultu pawl tipil innak he lam cheukhat in aa dang. (“ Jesuh Tipil Innak Le A Zultu Pawl Tipil Innak—Aa Dan Ning” timi rinli kulh ah zoh.) Asinain an i lawhnak lam cheukhat zong a um. Tipil a innak thawngin a Pa duhnak a tuah kha amah theng nih a langhter. (Heb. 10:7) Cu bantukin Khrih zultu pawl nih Jehovah Pathian sin an i pumpeknak kha zapi hmai i langhter awkah tipil an ing. Atu ah an nunnak i a biapi bikmi cu anmah duhnak si loin Pathian duhnak tuah kha a si. Cucaah an Bawipa kha an i zohchunh.

10. Jesuh na dawtnak nih tipil in awkah zeicah aan forh awk a si?

¹⁰ Jesuh cu Jehovah i Fapa ngeihchunh a si i kanmah uk awkah Pathian nih Siangpahrang in rian a pekmi a si ti kha na cohlan. Jesuh cu aa toidormi le tling tein a Pa aa zohchunhmi a si ti kha na hngalh. A paw a ṭammi kha rawl a dangh hna, a lung a dongmi kha a hnemh hna i a zawmi kha a damter hna ti zong na hngalh. (Matt. 14:14-21) Tuchan ah Khrihfabu lam a hruai ning zong na hmuh. (Matt. 23:10) Hmailei ah Pathian Pennak Siangpahrang pakhat in thil tam deuh a tuah lai ti kha na hngalh. Amah na dawtnak kha zeitindah na langhter khawh? Naa zohchunhnak thawngin a si. (Johan 14:21) Jehovah sinah i pumpek in tipil na innak thawngin na hun i zohchunh khawh.

11. Tipil innak ah a biapi bikmi a ruang pakhat cu zeidah a si, zeicah cutin a si?

¹¹ Tipil innak ah a biapi bikmi a ruang pakhat cu zeidah a si? Jesuh nih Pathian nawlbia lakah a ngan bikmi kha hitin a langhter: “Bawipa nan Pathian cu nan lungthin dihlak le nan nunnak dihlak le nan ruahnak dihlak le nan thazaang dihlak in nan dawt lai.” (Marka 12:30) Mah bia nih Pathian na dawtnak kha a langhter maw?

12. Zeicah Jehovah kha na dawt? (Hmanthlak zong zoh.)

¹² Jehovah dawt awkah a ruang tampi a um. Tahchunhnak ah, Pathian cu “nunnak vialte hram” a si ti le “laksawng ṭha le laksawng  tlamtling paohpaoh” a kan petu a si ti kha na hun hngalhthiam. (Salm 36:9; Jeim 1:17) Na hmuhmi thilṭha vialte hi dawtnak a ngei i a siang tukmi Pathian sinin a rami an si.

13. Tlanhnak man cu zeicah a ṭha tukmi laksawng a si?

¹³ Tlanhnak man cu Jehovah nih a kan pekmi, a ṭha tukmi laksawng a si. Zeicah cutin kan chim khawh? Jehovah le a Fapa karah a ummi dawtnak kha ruathmanh. Jesuh nih hitin a ti: “Ka Pa nih a ka dawt” i ‘ka Pa kha ka dawt’ tiah a ti. (Johan 10:17; 14:31) Kum nuai tampi an umṭi caah an i dawtnak cu a fek chinchin. (Ptb. 8:22, 23, 30) Pathian nih a Fapa kha fahnak in buin thihnak nawl a awnh tikah zeitluk in dah a lung a fah lai ti khi ruathmanh. Jehovah nih nangmah i telin mi vialte kha a kan dawt tuk caah zungzal nunnak kan hmuh khawh nakhnga a dawt tukmi a Fapa kha raithawinak caah pek a siang. (Johan 3:16; Gal. 2:20) Pathian dawt awkah mah nakin a ngan deuhmi a ruang a um kho ti lo.

14. Na nunnak ah a ṭha bikmi hmuitinh cu zeidah a si?

¹⁴ Jehovah kong na hngalh deuhdeuh tikah amah na dawtnak cu a fek chinchin. Atu ah siseh, zungzal in siseh Jehovah he naih tein um na duh ti cu a fiang ko. A um zong na um kho. A lung lawmhter awkah Pathian nih dawtnak in aan forh. (Ptb. 23:15, 16) Bia lawngin si loin  tuahsernak zongin a lung na lawmhter khawh. Na nunning nih Jehovah na dawt taktak kha a langhter lai. (1 Johan 5:3) Mah cu na nunnak ah a ṭha bikmi hmuitinh a si.

15. Jehovah na dawtnak kha zeitindah na langhter khawh?

¹⁵ Jehovah na dawtnak kha zeitindah na langhter khawh? Pakhatnak ah, a hmaanmi Pathian sinah thlacamnak in nangmahle nangmah naa pumpeknak thawngin a si. (Salm 40:8) Mah hnuah naa pumpeknak kha mi vialte hmaiah tipilnak thawngin na langhter. Hi capar a thawknaklei ah kan i ruah cang bantukin tipil innak cu na nunnak ah lunglawmh awk ngai le a biapi bikmi khantung pakhat a si. Nangmah caah si loin Jehovah caah nunnak thar na thawkmi a si. (Rom 14:8; 1 Pet. 4:1, 2) Mah cu a biapimi biakhiahnak pakhat a si kho men i a si zong a si. Mah nih a ṭha bikmi nunnak lam kha a awnter. Zeitin in dah?

16. Salm 41:12 ningin Jehovah nih amah rian ṭuan awkah a nunnak aa pemi kha zeitindah laksawng a pek hna lai?

¹⁶ Jehovah cu a siang bikmi a si. Na pekmi cu zei a si hmanhah tam deuhpi in aan pek ṭhan zungzal lai. (Marka 10:29, 30) Atu hi chan ṭhalo hmanhah lungthawh awk ngai a simi, a ṭha bikmi le hnangamnak a pe bikmi nunning kha aan pek lai. Mah cu a thawknak lawng a si rih. Tipil innak in aa thawkmi na khuallam cu donghter a hau lo. Na dawt tukmi na Pa rian kha zungzal in na ṭuan khawh. Nangmah le na Pa karah a ummi dawtnak cu a fek chin lengmang lai i a nun chung vialte zungzal in na nung ve lai.—Salm 41:12 rel.

17. Jehovah kha a ngeih rih lomi zeidah na pek khawh?

¹⁷ Pumpeknak le tipil innak kehlan na hlan tikah na Pa sinah a sunglawi tukmi thil pakhat peknak caanṭha na ngei. Na hmuhmi thilṭha vialte le lawmhnak vialte hi Jehovah nih aan pekmi a si. Cucaah van le vawlei Ngeitu Pathian kha a ngeih rih lomi thil pakhat na pek khawh, mah cu zumhawktlak tein a rian na ṭuanmi kha a si. (Job 1:8; 41:11; Ptb. 27:11) Mah cu a ṭha bikmi nunning a si ti cu a fiang! Jehovah dawtnak cu tipil in awkah a ṭha bikmi a ruang a si ti cu lunghrin awk a um lo.

18. Zei biahalnak hna dah naa hal khawh?

¹⁸ Tipil na ing lai maw timi biahalnak kha zeitindah na leh lai? Mah cu nangmah lawng nih na leh khawhmi a si. Asinain ‘Tipil in awkah zeicah ka hngah?’ tiah nangmahle nangmah naa halmi nih aan bawmh lai. (Lam. 8:36) Kan i ruah cangmi a kong pathum kha i cinken. Pakhatnak, biatak le dinnak kha na duh. ‘Mikip nih biatak an chim i a hmaanmi thil an tuah lai caan kha hmuh ka duh maw?’ tiah i hal. Pahnihnak, Jesuh Khrih kha na dawt. ‘Pathian Fapa kha ka Siangpahrang in cohlan le a nunning i zohchunh ka duh maw?’ tiah i hal. Pathumnak, a biapi bikmi cu Jehovah kha na dawt. ‘Jehovah rian ka ṭuannak thawngin a lung lawmhter ka duh maw?’ tiah i hal. Mah biahalnak hna kha ka duh tiah na leh ahcun zeicah tipil na in rih lo? Zeicah na hngah?—Lam. 16:33.

19. Tipil in awkah zeicah naa cungcang awk a si lo? Tahchunhnak pe. (Johan 4:34)

¹⁹ Tipil in dingin naa cungcang a si ahcun Jesuh hmanmi mah tahchunhnak hi ruathmanh. (Johan 4:34 rel.) Jesuh nih a Pa duhnak tuah kha rawl he a tahchunh. Zeicah? Rawl cu kan caah a ṭhami a si. Jehovah nih tuah awkah a kan fialmi vialte cu kan caah a ṭhami a si ti kha Jesuh nih a hngalh. Jehovah nih ṭhatlonak a kan tonter khomi zeithil hmanh tuahter a kan duh lo. Jehovah nih tuahter aan duhmi thil ah tipil innak aa tel maw? Aa tel. (Lam. 2:38) Cucaah tipil in ding timi nawlbia zulhnak nih ṭhatnak aan pek lai kha na zumh khawh. Rawl thawmi ei awkah naa cungcang lo a si ahcun zeicah tipil in awkah naa cungcang?

20. A hnu capar ah zei kong dah kan i ruah hna lai?

²⁰ Zeicah mi cheukhat nih tipil in awkah aan hngah? Mi tampi nih “Timhcia ka si rih lo” tiah an ti men lai. A tak ti ahcun Jehovah sinah i pumpek in tipil in awkah biakhiahnak na tuahmi cu na tuahmi biakhiahnak lakah a biapi bikmi a si. Cucaah mah biakhiahnak kong kha ṭha tein na ruah a hau i sining tlinh awkah a caan pek le teima tein i zuam a hau. Asinain tipil in na duh taktak ahcun i timhtuah awkah atu in zeidah na tuah khawh? A changtu capar ah mah biahalnak kong kha kan i ruah hna lai.