LUNGRETHEIHNAK in a khatmi vawlei ah kan nun caah daihnak hmuh cu a har tuk kho men. Daihnak tlawmpal kan hmuh hmanhah fawi tein kan sung ṭhan kho. A hmaanmi le a hmunmi daihnak hmuh khawh awkah a kan bawm khomi Baibal chimmi cu zeidah a si? Midang zong cutin tuah ve awkah zeitindah kan bawmh khawh hna?

Daihnak taktak hmuh awkah himnak le huhphenhnak kan hmuh a herh. Hawikom ṭha kan herh i a biapi bikmi cu Jehovah he pehtlaihnak ṭha ngeih kan herh. Zeitindah kan tuah khawh?

Jehovah nawlbia le phunglam hna cu a zungzal in kanmah ṭhatnak caah a si. Mah kha kan zulh tikah Jehovah kan i bochan le amah he pehtlaihnak ṭha ngeih kan duh kan langhtermi a si. (Jer. 17:7, 8; Jeim 2:22, 23) Mah tikah Jehovah nih a kan naih ve lai i lungdaihnak a kan pek lai. Isaiah 32:17 nih hitin a ti: “Mikip nih a dingmi thil kha an tuah cio caah daihnak le himnak zungzal in a um lai.” Lungtho tein Jehovah nawl kan ngaih tikah daihnak taktak kan hmu kho.—Isa. 48:18, 19.

Jehovah nih a hmunmi daihnak ngeih zungzal awkah a bawmmi, a sunglawi tukmi laksawng a kan pek. Mah laksawng cu thiang thlarau a si.—Lam. 9:31.

Lamkaltu Paul nih daihnak cu “thlarau nih a chuahtermi” ziaza ah aa tel tiah a ti. (Gal. 5:22, 23) Pathian thlarau nih daihnak a chuahter caah daihnak hmuh kan duh ahcun thiang thlarau lam kan i hruaiter a herh. Cutin zeitindah kan tuah khawh?

 Pakhatnak, Baibal kha hmaan tein kan rel a hau. (Salm 1:2, 3) Kan relmi kong kha thukpi in kan ruah tikah thil sining kip ah Jehovah ruahning hngalhthiam awkah thiang thlarau nih a kan bawmh lai. Tahchunhnak ah, Jehovah nih daihnak a kilven ning le a caah daihnak a biapitnak a ruang kha kan hngalh. Baibal in kan hngalhmi kong hna kan zulh tikah kan nunnak ah daihnak tam deuh in kan hmuh lai.—Ptb. 3:1, 2.

Pahnihnak, Pathian thiang thlarau kan hmuh nakhnga thla kan cam a hau. (Luka 11:13) Jehovah nih a sinah bawmhnak a halmi hna kha hitin bia a kamh hna: “Pathian daihnak, minung hngalhnak a lonhtu nih cun, Khrih Jesuh chungah nan lungthin le nan ruahnak cu him tein a chiah lai.” (Fil. 4:6, 7) Jehovah kan naih i thiang thlarau kan i bochan ahcun lungthin daihnak taktak a kan pek lai.—Rom 15:13.

Baibal nih mi tampi kha an nunnak thlen awkah a bawmh hna i atu cu lungdaihnak, Jehovah le midang he daihnak a hmuhter hna. Zeitindah an i thlen?

Unau cheukhat cu biatak an hngalh hlanah a thin hun a fawimi le a puarhrangmi hmanh an si. Asinain i thlen awkah fakpi in an i zuam i atu ahcun nemnak, lungsaunak a langhter i midang he daihnak a sermi an si cang. (Ptb. 29: 22) Unaupa David le unaunu Rachel nih zeitindah an ziaza an i thlen ti kha zohhmanh.

David cu biatak a hngalh hlanah midang kha sual a kawl peng hna i a chungkhar zong kha puarhrangpi in a pehtlaih hna. Asinain thlennak tuah ka hau ti kha a hun hngalh. Zeitindah daihnak a hmuh? David nih “Ka nunnak ah Baibal phunglam ka hun zulh tikah keimah le ka chungkhar karlak ah upatnak a hung um” tiah a ti.

 Rachel cu a ṭhannak pawngkam i mi nih an iap tuk. Hitin a ti: “A puarmi chungkhar in ka chuah caah atu hmanhah thinhunnak lungput kha ka doh rih.” Daihnak hmuh awkah Rachel cu zeinihdah a bawmh? “Jehovah sin thlacamnak nih” tiah a ti.

David le Rachel cu Baibal phunglam an zulh ca le thiang thlarau an i bochan caah daihnak a hmumi hna lakah pahnih lawng an si rih. Thinhunnak in a khatmi vawlei ah kan um ko nain lungdaihnak kan hmu kho. Mah nih kan innchungkhar mi le Khrihfabu i unau pawl he rem tein a kan umter khawh lai. Asinain Jehovah nih “mi vialte he i rem” awkah a kan fial. (Rom 12:18) Mah cu a si kho taktak maw? Midang he daihnak ser awkah zeicah kan i zuam awk a si?

Phungchimnak ah Pathian Pennak kong a simi daihnak kong kha kan chim. (Isa. 9:6, 7; Matt. 24:14) Mi tampi nih mah thawngṭha kha an duh i an cohlan. Cucaah vawlei thil sining ruangah bawmtu kan ngei lo timi ruahnak an ngei ti lo i thinhun in an um ti lo. Atu cu hmailei ruahchannak taktak kha an ngei cang i mah nih ‘daihnak’ kha a duhter hna.—Salm 34:14.

Kan chimmi thawngṭha kha ahohmanh nih an duh lo nain mah cu atu lawngah a si lo. (Johan 3:19) Mi nih zeitin an lehrulh hmanhah Pathian nih a thiang thlarau a kan pek. Mah nih phung kan chim tikah daihnak le upatnak tein chim zungzal awkah a kan bawmh. Cuticun Jesuh pekmi mah ruahnak cheuhnak hi kan zulh: “Inn pakhatkhat ah nan luh tikah, ‘Nan cungah daihnak um ko seh,’ nan ti lai. Cuka inn i a ummi nih tluninn an in awnh hna ahcun daihnak in nan biakchawnh hnanak cu an cungah hmun ko seh; sihmanhsehlaw an in awnh hna lo ahcun nan biakchawnh hnanak cu i lak ṭhan u.” (Matt. 10:11-13) Mah lungput kan ngeih ahcun midang nih zeitin an chim, an tuah hmanhah dai tein kan um zungzal kho lai. Hmailei ah cu bantuk mi hna bawmhnak caanṭha kan hmu kho rih ti kha kan i cinken.

Cozah nih kan rianṭuannak kha an kan khenkham hmanhah nawlngeitu hna kha upatnak tein kan chawnhbiak hnanak thawngin daihnak kan ser. Tahchunhnak ah, Africa ram pakhat ah cozah nih Biakinn saknak nawl a kan pe lo. Unau pawl nih mah buaibainak hi daihnak lam in kan tawnghtham awk a si ti kha an hngalh. Cucaah mah ram ah missionary a rak ṭuan balmi unaupa pakhat kha England ram, London khua i Mangki Bawi sinah an thlah. Mah unaupa nih Jehovah Tehte Hna cu dai tein rian a ṭuanmi kan si ti kha a va chimh.

Unaupa nih hitin a ti: “Khual donnak hmun ka va phanh tikah cuka i a hngakmi nu a thilhruk aihning cu ka thiammi holh a hmangmi miphun a si lai tiah ka ruah. Cucaah anmah holh in ka chawnh. Mah tikah a khuaruah a har i ‘Na herhmi a um ma?’ tiah a ka hal. Upat tein le nem tein Mangki Bawi ton ka duh tiah ka ti. Cucaah mah bawipa kha phone a ka chawnhpiak i anmah holh tein a ka chawnh. Jehovah Tehte Hna nih daihnak in rian kan ṭuannak kong ka chimh tikah mah bawipa nih ṭha tein a ka ngaihpiak.”

Mangki Bawi nih unaupa chimmi kha ṭha tein a ngaih dih tikah kan rianṭuan ning kha a hun hngalhthiam i a hlan bantuk thleidannak a ngei ti lo. Tlawmpal hnuah cozah nih an biakhiahnak kha an thlen ṭhan i Jehovah Tehte Hna kha Biakinn saknak nawl an pek hna. Mah tikah unau pawl cu an i lawm tuk. Midang kha upatnak he kan pehtlaih hna tikah daihnak kan sermi a si ti cu a fiang ko.

Tuchan ah Jehovah miphun nih dai tein Jehovah an biak tikah thlaraulei paradis an i nuamhpimi a si. Kan dihlak in daihnak ser awkah kan i zuamnak thawngin mah daihnak kha kan karhter. Mah tikah Jehovah lung kan tong ti kha kan zumh khawh. Cun vawlei thar ah Jehovah nih a hmunmi daihnak a kan pek lai. —2 Pet. 3:13, 14.