1, 2. Kan hun ṭhancho thluahmah tikah zeidah kan hngalh lai? Tahchunhnak pe.

MI PAKHAT nih ngakchia pakhat kha laksawng a pek hei ti u sih. Mah tikah a nu le a pa nih “kaa lawm hei ti” tiah an ti. A nu le a pa nih an fial caah cutin a ti. Asinain a hun upat deuh tikah midang nih laksawng an kan pek tikah lawmhnak bia chim a biapi tiah a nu le a pa nih an ruahnak a ruang kha a hun hngalhthiam. Lawmh a hngalmi si dingin a cawn caah amah lung te nih midang sin lawmhnak bia chim awkah a forh ko lai.

² Kannih zong cutin kan si ve. Biatak kan hun hngalh hmasa lioah a hrampi Jehovah nawlbia zulh cu a biapi ti kha kan hngalh. Asinain kan hun ṭhancho thluahmah tikah a ruahnak, phundang cun a duhmi thil, a duh lomi thil le thil sining hna a hmuhning kha kan hun hngalhthiam chin. Kan i thimnak le kan tuahsernak ah Jehovah ruahnak kan i iapter tikah a ruahnak kha kan ruahnak kan sitermi a si lai.

3. Jehovah bantuk ruahnak ngeih cu zeicah a har khawh?

³ Jehovah bantuk ruahnak ngeih awkah kan i zuam bu hmanhin mitlinglo kan si caah amah bantuk ruahnak ngeih cu  a caan ah a har. Tahchunhnak ah, ziazalei thiannak, thilri chawva duh tuknak, phungchim rian, thi ningcang loin hmannak le a dang thil hna he aa tlaiin Jehovah hmuh ning kha kan hngalh. Asinain Jehovah nih cutin a hmuhnak a ruang kha hngalhthiam awkah kan i harh men lai. Cu a si ah Jehovah bantuk ruahnak ngeih chinchin awkah zeitindah kan cawn khawh? Mah nih atu ah le hmailei ah a hmaanmi thil tuah dingin zeitindah a kan bawmh lai?

4. Kan lungthin i uk ti cu zei sullam dah a si?

⁴ Rom 12:2 rel. Hi cacaang ah lamkaltu Paul nih Jehovah bantuk ruahnak ngeih awkah kan tuah a herhmi thil kha a langhter. “Hi vawlei kalning hin kal ve lengmang ti hlah u” tiah a ti. A hmasa capar ah kan cawn cang bantukin mah cu vawlei ruahnak le lungput hna kha kan hrial a hau tinak a si. Asinain Paul nih kanmah kan lungthin zong kan i uk a hau tiah a ti. Mah cu Baibal hlathlai, Pathian ruahnak hngalhthiam, mah kha ṭha tein ruah le amah bantuk ruahnak ngeih ve awkah fakpi in i zuam a hau tinak a si.

5. Relnak le hlathlainak aa dannak kha fianter.

⁵ Hlathlainak timi cu a konglam pawl khulrang in rel asiloah cawn dingmi biahalnak i a phi hna rin lawng kha a si lo. Hlathlainak kan tuah tikah mah nih Jehovah cu ahodah a si, zeidah a tuah i zeitindah a ruah ti a kan cawnpiakmi kong hna kha kan ruah. Jehovah nih thil pakhat kha tuah awk le hrial awkah a kan fialnak a ruang kha hngalhthiam awkah kan i zuam. Kan nunnak le kan ruahnak ah thlennak tuah a herhmi kong zong kan ruah. Asinain hlathlainak kan tuah fatin mah kong vialte ṭha tein ruah cu a si kho men lai lo. Hlathlainak kan tuah tikah caan cheu kha kan relmi kong ṭha tein ruahnak caah hman cu a ṭha.—Salm 119:97; 1 Tim. 4:15.

6. Baibal ṭha tein kan ruah tikah zeidah a cang?

⁶ Baibal kha hmaan tein kan ruah tikah khuaruahhar lam in ṭhatnak kan hmu. Jehovah ruahnak cu a tlingmi a si ti kha kanmah theng nih ‘kan hngalh khawh.’ Jehovah nih thil sining a hmuhning kha kan hun hngalhthiam i a donghnak ah mah a hmuhning kha kan cohlan. Cucaah kan lungthin kha kan uk i ruahnak thar kan hun ngei. Cuticun duhsah duhsah in Jehovah ruahnak kha kan ruahnak kan siter.

7, 8. (a) Jehovah nih thilri chawva kha zeitindah a hmuh? (A hramthawknak hmanthlak zoh.) (b) Jehovah bantukin thilri chawva kha kan hmuh ahcun kan caah a zungzal in a biapi bikmi cu zeidah a si lai?

⁷ Kan ruahnak cu kan tuahsernak cungah huham a ngei. (Mar. 7:21-23; Jeim 2:17) Mah kha fiang tein a langhtermi tahchunhnak tlawmpal in zohhmanh hna u sih. Pakhatnak ah, Jesuh chuahnak kong langhtermi nih thilri chawva he aa tlaiin Jehovah hmuhning kha fiang tein a langhter. Josef le Mary cu tangka tampi a ngeimi an si lo nain Pathian nih a Fapa zohkhenh awkah a thim hna. (Lev. 12:8; Luka 2:24) Jesuh a chuah lioah Mary nih “caw rawl einak kuang chungah khan a thlim, riahnak khualbuk ah khan an caah hmun a um lo.” (Luka 2:7) Jehovah nih a duh ahcun Jesuh  kha a ṭha tukmi hmun ah chuah dingin a tuah khawh ko. Asinain Pathian pakhatnak ah a chiami innchungkhar ah Jesuh kha ṭhanter a duh. Mah cu Jehovah caah a biapi bikmi a si.

⁸ Jehovah nih thilri chawva a hmuhning kha Jesuh chuahnak kong langhtermi nih a kan cawnpiak. Nulepa cheukhat nih thilri chawva cu Jehovah le an fale an i pehtlaihnak ah ṭihnung a si hmanhah an fale kha thilri chawva a ṭha bik ngeihter an duh hna. Asinain Jehovah nih amah he pehtlaihnak kha a biapi bikmi in a hmuh. Mah kong he aa tlaiin nangtah Jehovah hmuhnak kha na cohlang maw? Na tuahsernak nih zeidah a langhter?—Hebru 13:5 rel.

9, 10. Midang tlukrilhternak he aa tlaiin Jehovah bantukin kan hmuh kha zeitindah kan langhter khawh?

⁹ A dang tahchunhnak pakhat cu Jehovah nih midang a tlukrilhtertu, phungdang cun midang kha sualnak a tuahtertu asiloah Jehovah biaknak in a ngoltertu kha zeitindah a hmuh hna timi kong a si. Jesuh nih hitin a ti: “Keimah a ka zummi, hi ngakchia tete hna lak i pakhat hmanh hi, ka lam in a pialtertu cu, a hngawng ah facang rialnak lung tumpi thlaih i rili chung i thlak kha a caah a ṭha deuh.” (Mar. 9:42) Mah cu a fak tukmi bia a si. Jesuh cu a Pa he an i lo ti kha kan hngalh. Cucaah mi pakhat nih Jesuh zultu pakhat a tlukrilhter tikah Jehovah cu a ngaih a chia tuk ti kha kan zumh khawh.—Johan 14:9.

¹⁰ Midang tlukrilhter kha Jehovah le Jesuh bantukin kan hmu ve maw? Kan tuahsernak nih zeidah a langhter? Tahchunhnak ah, hruk-aihnak le ṭamhnak he aa tlaiin kan uarmi phun a um men lai. Asinain kan i thimmi nih unau cheukhat kha a hnorsuan hna asiloah midang kha a ṭha lomi ruahnak a ngeihter hna ahcun zeidah kan tuah lai? Unau dawtnak nih kan uarmi thil kha hlawt a kan forh maw?—1 Tim. 2:9, 10.

11, 12. Jehovah huatmi thil hna huat awk le mahle mah i uk khawh awk kan cawn tikah kanmahle kanmah zeitindah kan i huhphenh khawh?

¹¹ A pathumnak tahchunhnak cu Jehovah nih thil ṭhalo tuahnak kha a huat. (Isa. 61:8) Mitlinglo kan si caah a caan ah a hmaanmi thil tuah kan i harh ti kha a hngalh. Asinain amah bantukin thil ṭhalo kha hua ve hna seh ti a kan duh. (Salm 97:10 rel.) Jehovah nih thil ṭhalo a huatnak a ruang kha ṭha tein kan ruah ahcun mah nih a hmuhning kha kan hmuhning siter awkah a kan bawmh lai. Cun thil ṭhalo kha doh khawh awk zongah thazaang a kan pek lai.

¹² Thil ṭhalo kha huat awkah kan cawn ahcun mah nih Baibal nih fiang tein a chim lomi kong hmanhah mah hi cu a palh ti kha hngalh awkah a kan bawmh lai. Tahchunhnak ah, aa dawhcah lo ngaimi laam (Lap dancing) phunkhat cu tuchan ah a hung laar ngaingai. Mi cheukhat nih mah cu mi pakhatkhat he nupa sualnak tuah a si lo  caah thil ṭhalo a si lo tiah an ruah. * Asinain Jehovah nih mah kha zeitindah a hmuh lai? Jehovah nih thil ṭhalo vialte a huat ti kha i cinken. Cucaah mahle mah i uk khawh awkah cawnnak thawngin le Jehovah huatmi thil hna huatnak thawngin thil ṭhalo vialte kha hrial hna u sih.—Rom 12:9.

13. Hmailei ah a ṭhami biakhiahnak tuah khawh awkah thil sining he aa tlaiin Jehovah hmuhning kha atu ah zeicah kan ruah awk a si?

¹³ Hlathlainak kan tuah tikah thil sining he aa tlaiin Jehovah hmuhning kha kan ruah awk a si, zeicatiah mah nih a ṭhami biakhiahnak tuah awkah a kan bawmh khawh. Cun khulrang in biakhiahnak tuah colh a haumi thil sining kan ton tikah khuaruahhar in kan um lai lo. (Ptb. 22:3) Baibal in tahchunhnak cheukhat kha i ruah hna u sih.

14. Josef nih Potifar nupi a lehrulhnak in zeidah kan cawn khawh?

¹⁴ Potifar nupi nih Josef kha nupa sualnak tuah dingin a lem tikah Josef nih a al colh. Josef nih ṭhit-umnak he aa tlaiin Jehovah hmuhning kha ṭha tein a ruah ti cu a fiang ko. (Genesis 39:8, 9 rel.) Josef nih Potifar nupi kha “cu bantuk thil ṭhalo cu zeitindah ka tuah khawh lai i Pathian cungah ka sual lai?” tiah a ti. Mah nih Pathian hmuhning kha amah hmuhning ah a siter ti kha a langhter. Kannih tah zeitin? Na rianṭuanṭi hawi nih na cungah velhle dawtnak a langhter ahcun zeidah na tuah lai? Asiloah mi pakhat nih na phone ah nupu sualnak kong fiang tein a langhtermi ca asiloah hmanthlak hna aan kuat ah tah zeitin? * Cu bantuk thil sining he aa tlaiin Jehovah hmuhning kha kan hngalh, kan cohlan i zeidah kan tuah lai timi biakhiahnak hna kan tuahcia a si ahcun Jehovah cung zumhawktlak tein um awkah a fawi deuh lai.

15. Hebru mi pathum bantukin Jehovah cungah zeitindah zumhfek tein kan um khawh?

¹⁵ Shadrak, Meshak le Abednego tiah hngalh a simi, Hebru mi pathum kong zong ruat. Siangpahrang Nebukhadnezzar nih a sermi sui milem kha biak awkah nawl a pek hna tikah ralṭha tein an rak al. Siangpahrang an lehnak bia nih Jehovah cung zumhfek tein umnak ah a cang khomi thil kong kha an rak ruah chung ti a lang. (Ex. 20:4, 5; Dan. 3:4-6, 12, 16-18) Tuchan ah tah zeitin? A hmaan lomi biaknak he aa pehtlaimi puai caah thawhlawm pek dingin na rian bawi nih aan fial ahcun zeidah na tuah lai? Cu bantuk thil sining a phanh tiang hngah loin mah kong he aa tlaiin Jehovah hmuhning kha atu in ṭha tein kan ruah chung ahcun kan caah a ṭha lai. Cu bantuk thil sining kan ton tikah Hebru mi pathum bantukin a hmaanmi thil tuah awk le chim awkah kan i fawih deuh lai.

16. Jehovah ruahnak ṭha tein hngalhthiamnak nih ruahlopi in siithlopnak caah i timhtuah chung dingin zeitindah a kan bawmh khawh?

 ¹⁶ Jehovah ruahnak kong ṭha tein tuaktannak nih ruahlopi in siithlop kan hauh tik zongah Jehovah cung zumhawktlak tein um awkah a kan bawmh lai. Thi asiloah thi cheubang phunli kha i rawnh lo awkah bia kan khiah ti cu a hmaan ko. (Lam. 15:28, 29) Asinain thi tlawmpal aa telmi siithlopning cheukhat ah Khrihfa pakhat cio nih Baibal phunglam cungah hrambunh in mah tein biakhiahnak tuah a hau. Zeitik ah dah biakhiahnak tuah cu a ṭhat bik? Kan zawt i siizung kan um lio le khulrang in biakhiahnak tuah awkah hnek kan si lioah maw kan tuah lai? A si lo. Atu ah hlathlainak kan tuah lai i kan duhnak fiang tein a langhtermi, upadi nih a awnhmi siilei ca ah tling tein kan phih lai, cun siibawi he bia kan i ruah lai. *

17-19. Thil sining he aa tlaiin Jehovah ruahnak kha atu in cawn cu zeicah a biapit? Tahchunhnak pe.

¹⁷ A donghnak ah, Jesuh nih Peter i a ṭha lomi mah ruahnak cheuhnak a al colhmi hi ruat: “Bawipa, hi thil cu Pathian nih na cungah tlunter sawh hlah seh.” Jesuh nih Pathian nih tuahter a duhmi, vawleicung i a nunnak kong le a thihnak kong he aa tlaimi chimchungbia hna kha ṭha tein a ruah lai ti cu a fiang ko. Mah hngalhnak nih Jehovah cungah zumhawktlak tein um awk le kan caah a nunnak pek awkah thazaang a ngeihter.—Matthai 16:21-23 rel.

¹⁸ Pathian nih a hawikom siter a kan duh i thawngṭha chimnak ah a si khawh chungin i tel hna seh ti a kan duh. (Matt. 6:33; 28:19, 20; Jeim 4:8) Asinain Peter nih Jesuh cungah a tuah bantukin mi cheukhat nih a ṭhami tinhnak he kan lung donghter awkah an i zuam men lai. Tahchunhnak ah, na rian bawi nih na rian le na lahkhah aan kaih hei ti u sih. Asinain suimilam tam deuh in rian ṭuan na hau lai i pumhnak le phungchimnak ah a caan ka ngei tuk ti lai  lo ti kha na hngalh. Asiloah sianginn a kaimi na si ahcun na sayale nih inn in aa hlatnak hmun ah i ṭhial in fimnak cawn chap awkah i ṭhial dingin tinvo sung an in pek hei ti u sih. Cutin a si ahcun biakhiahnak na tuah hlanah thlacam, hlathlainak tuah le na chungkhar asiloah Khrihfa upa he nan i ruahceih hmasa a hau lai maw? Mah thil sining he aa tlaiin Jehovah hmuhning kha atu in na cawn i Jehovah ruahnak kha na ruahnak na siter ahcun a ṭha lai. Mah tikah cu bantuk lemsoinak hna cu na caah tukforhnak a si lai lo. Jehovah biaknak kha biapi bik ah chiah dingin biakhiahnak na tuah cang caah na tuah dingmi kha ṭha tein na hngalh.

¹⁹ Jehovah cung na zumhfeknak a hneksakmi a dang thil sining hna kha na ruah khawh. A si khomi thil sining kip caah kan i timtuah chung kho lo ti cu a hmaan ko. Asinain pumpak hlathlainak kan tuah lioah Jehovah ruahnak kong ṭha tein kan ruah ahcun kan hngalhmi kong kha kan i cinken deuh lai i thil sining kip ah mah kha zeitindah kan hman lai ti zong kan hngalh lai. Cucaah hlathlainak kan tuah tikah Jehovah hmuhning hngalh awk, a ruahnak kha kan ruahnak siter awkah i zuam hna u sih. Cun mah nih atu ah le hmailei ah a ṭhami biakhiahnak tuah khawh awkah zeitindah a kan bawmh lai ti kha ruat hna u sih.

20, 21. (a) Vawlei thar ah kan zalonnak nih zeicah a kan nuamhter lai? (b) Atu ah tah zeitindah kan i nuamh khawh?

²⁰ Kan dihlak in vawlei thar kha kan i ngaih tuk. Kan lak i tam deuh cu vawlei Paradis ah zungzal in nun dingin kan i ruahchan. Pathian Pennak ahcun hi vawlei ah kan tonmi sifah harnak vialte in kan luat cang lai. Cun kan uarmi le kan duhmi cungah i hngat in zalong tein thimnak kan ngei rih lai.

²¹ Asinain kan zalonnak cu ri a ngei lai lo tinak a si lo. Aa toidormi hna nih Jehovah nawlbia le a ruahnak cungah hrambunh in biakhiahnak an tuah lai. Mah nih lunglawmhnak le daihnak tampi a chuahter lai. (Salm 37:11) Mah caan a phanh hlan tiang Jehovah ruahnak kha kan ruahnak siternak in atu ah kan i nuam kho.