1-2. (a) Zei biahalnak hna dah kan i ruah lai? (b) Jehovah cu kanmah bawmh awkah a lung a tho tuk ti kha zeinihdah a langhter?

 JEHOVAH nih kan tonmi zuamcawhnak hna tei awk le a rian thiang ah lawmhnak hmuh awkah a kan bawmh khawh. Zeiti lam hna in dah a kan bawmh? Jehovah pekmi bawmhnak in zeitindah ṭhatnak tling kan hmuh khawh? Mah kong kha hi capar ah kan i ruah hna lai. Asinain mah kong kan i ruah hlanah mah he aa tlaimi biahalnak pakhat i ruah ta hna u sih: Jehovah nih bawmh a kan duh taktak maw?

² Lamkaltu Paul nih Hebru Khrihfa hna sin a cakuat ah a hmanmi biafang nih a phi hngalh awkah a kan bawmh khawh. Paul nih hitin a ṭial: “Bawipa cu a ka bawmtu a si, zeihmanh ka ṭih lai lo. Minung nih ka cungah zeidah an tuah khawh lai?” (Heb. 13:6) Baibal cherhchannak pakhat nih mah cacaang ah hmanmi “bawmtu” timi biafang nih bawmh a herh tukmi pakhat khulrang in a va bawmmi mi pakhat kha a chim duhmi a si tiah a ti. Jehovah nih harnak a tongmi pakhat khulrang in a va khamhmi kha na mitthlam ah cuanter hmanh. Mah nih Jehovah cu kanmah bawmh awkah a lung a tho tukmi in a langhter ti kha na hna a tla ve ko lai. Jehovah bawmhnak thawngin kan tonmi harnak kha lawmhnak he kan inkhawh.

3. Lawmhnak he harnak inkhawh awkah Jehovah nih a kan bawmh ning lam pathum cu zeidah an si?

³ Lawmhnak he harnak inkhawh awkah Jehovah nih a kan bawmh ning lam cheukhat cu zeidah an si? A phi hngalh awkah Isaiah cauk kha rel hna u sih. Zeicah? Isaiah chimchungbia  tampi cu tuchan Pathian salle he aa pehtlaimi a si. Cun fawi tein kan hngalhthiam khawhmi biafang hna in Jehovah kong kha a langhter. Isaiah dal 30 ah tahchunhnak cheukhat aa tel. Mah dal ah Jehovah nih a miphun a bawmh hna ning langhter awkah Isaiah nih aa dawh tukmi tahchunhnak hna a hman. (1) Kan thlacamnak ṭha tein a kan ngaihpiak i a kan lehnak thawngin, (2) lamhruainak a kan peknak thawngin, (3) atu le hmailei thluachuah a kan peknak thawngin Jehovah nih a kan bawmh tiah a ṭial. Jehovah nih a kan bawmh ning mah lam pathum kha kan i ruah hna lai.

4. (a) Jehovah nih Isaiah chan i Judah mi kha zeitindah a langhter hna, a donghnak ah zei thil dah umnak nawl a awnh? (b) Jehovah nih zumhfekmi hna kha zei ruahchannak dah a pek hna? (Isaiah 30:18, 19)

⁴ Isaiah dal 30 a thawknak ah Jehovah nih Judah mi kha ‘sualnak aa chap chin lengmangmi,’ “a lung a khongmi fale” in a langhter hna. Hitin a ti chap: “Annih cu a zungzal in Pathian kha an doh, . . . a zungzal in Pathian cawnpiaknak kha an al.” (Isa. 30:1, NW, 9) Pathian bia ngaih kha an al caah Jehovah nih harnak tonnak nawl a awnh hna lai tiah Isaiah nih a chimchung. (Isa. 30:5, 17; Jer. 25:8-11) Babilon mi nih sal in an kalpi taktak hna. Asinain Judah mi lakah zumhfekmi cheukhat an um i an caah Isaiah cu ruahchannak thawngpang pakhat a ngei. Nikhatkhat ah Jehovah nih Jerusalem ah a kirter hna lai i umnak nawl a pek ṭhan hna lai tiah a ti. (Isaiah 30:18, 19 rel.) Cutin a si taktak. Jehovah nih Babilon in a luatter hna. Asinain an luatnak cu khulrang in a rami a si lo. “Nan cungah a velngeihnak langhter duh ah BAWIPA nih aan hngah ko hna” timi bia nih zumhfekmi pawl khamh an si hlanah caan cheukhat a rau lai ti kha a langhter. A tak ti ahcun Jerusalem ah kirnak nawl an hmuh hlanah Israel mi cu Babilon ah kum 70 sal ah an rak taang. (Isa. 10:21; Jer. 29:10) Israel mi an ram i an kir tikah sal an taan lio i an ngaihchiatnak mitthli cu lawmhnak mitthli nih a airolh cang.

5. Isaiah 30:19 nih zeidah a kan zumhter?

⁵ “BAWIPA nih bawmhnak na hal tikah mithmai ṭha aan pek lai” timi bia in hnemhnak kan hmu kho. (Isa. 30:19, NW) Jehovah nih a sinah bawmhnak kan hal tikah ṭha tein a kan ngaihpiak lai i khulrang in a kan leh lai ti kha Isaiah nih a kan zumhter. Isaiah nih hitin a ti chap: “Na aw a theihle cangka in aan leh lai.” Mah bia nih kan Pa cu a sinah bawmhnak a halmi hna bawmh a duh tukmi a si ti kha a kan zumhter ṭhan. Mah hngalhnak nih lawmhnak he inkhawh awkah a kan bawmh.

6. Jehovah nih a salle pakhat cio i an thlacamnak a ngaih ti kha Isaiah bia nih zeitindah a langhter?

⁶ Mah cacaang nih thlacamnak he aa tlaiin zeidah a kan zumhter rih? Jehovah nih pakhat cio i kan thlacamnak kha ṭha tein a ngaih. Zeicah cutin kan chim khawh? Isaiah dal 30 a thawklei ah Jehovah nih a miphun kha phu pakhat in a langhter hna caah “nan” timi mi tam caah hmanmi biafang kha a hman. Asinain caang 19 ah mi pakhat caah hmanmi “na” timi biafang a hman; cucaah mah thawngpang cu mi pakhat cio caah chimmi a si. Isaiah nih hitin a ṭial: “Na ṭap ti lai lo”; “bawmhnak na hal tikah mithmai ṭha aan pek lai”; “na aw a theihle cangka in aan leh lai.” Dawtnak a ngeimi Pa pakhat in Jehovah nih a lung a dongmi a fapa asiloah a fanu pakhat kha “Na unau hna bantukin na ṭhawn awk a si” tiah a ti lai lo. Mah canah pakhat cio kha a kan zoh i kan thlacamnak kha ṭha tein a kan ngaihpiak.—Salm 116:1; Isa. 57:15.

7. Isaiah le Jesuh nih thlacam peng a herhnak kha zeitindah an langhter?

⁷ Pathian sin thla kan cam i kan lungretheihnak kong kan chimh tikah Jehovah nih  inkhawhnak ngeih awkah a herhmi thazaang a kan pek hmasa men lai. Kan i ruahchan bantukin kan harnak cu a dongh colh lo ahcun inkhawhnak thazaang ngeih awkah Jehovah sinah atu le atu kan hal a hau men lai. Pathian zong nih cutin tuah awkah a kan sawm. Mah kha Isaiah chimmi ‘[Jehovah kha] a dinh in ka dinhter lai lo’ timi bia nih a langhter. (Isa. 62:7) Mah cu zei sullam dah a si? Jehovah sin kan thlacamnak cu Jehovah kha dinhnak nawl pek lo bantukin atu le atu kan cam awk a si. Isaiah bia nih Luka 11:8-10, 13 ah langhtermi thlacamnak he aa tlaiin Jesuh chimmi tahchunhnak kha a kan hngalhter ṭhan. Mah ah Jesuh nih ‘ningzah loin hal peng’ awk le thiang thlarau “hal” peng awkah a kan forh. Cun a ṭhami biakhiahnak hna tuah awkah a herhmi lamhruainak zong Jehovah sinah kan hal khawh.

8. Hlanlio chan ah Isaiah 30:20, 21 bia cu zeitindah a tlin?

⁸ Isaiah 30:20, NW,  21, rel. b Babilon ralkap nih Jerusalem khua kha kumkhat le cheu an kulh tikah Israel mi nih an tonmi harnak cu changreu le ti bantukin zaraan nih hngalhmi, tonmi a hung si. Asinain caang 20 le 21 ah Jehovah nih Judah mi kha nan i ngaihchih i nan ziaza nan i thlen ahcun kaan khamh hna lai tiah bia aa kam. Isaiah nih Jehovah kha “Liannganmi Cawnpiaktu” tiah a auh i Jehovah nih a miphun kha a duhmi lam in amah biak ning zong a cawnpiak hna lai tiah bia a kamh hna. Mah bia cu Judah mi pawl sal sinak in an luat tikah a rak tling. An caah Liannganmi Cawnpiaktu a si kha Jehovah nih a langhter i a lamhruainak tangah a miphun nih a thiangmi biaknak dirh ṭhannak ah hlawhtlinnak an hmu. Tuchan zongah Jehovah cu Liannganmi Cawnpiaktu a si caah kan i lawm tuk.

9. Tuchan ah Jehovah lamhruainak kan hmuhnak lamkhat cu zeidah a si?

⁹ Isaiah nih mah Baibal caang hna ah Jehovah nih lamhnih in a cawnpiakmi siangngakchia bantuk kan si tiah a ti. Pakhatnak, Isaiah nih hitin a ti: “Liannganmi Cawnpiaktu kha na mit hrimhrim in na hmuh lai.” Mah ah Cawnpiaktu cu a siangngakchia hna hmaiah a dirmi in a langhter. Tuchan ah a cawnpiaknak in ṭhatnak hmuhnak caanṭha kan ngei. Jehovah nih zeitindah a kan cawnpiak? A bupi hmangin a kan cawnpiak. Jehovah bupi sinin a fiangmi lamhruainak hna kan hmuh caah kan i lawm tuk! Khrihfabu pumhnak, civui,  cauk, JW Broadcasting^® le a dang lam tampi in cawnpiaknak kan hmuhmi nih harnak caan chungah lawmhnak he inkhawhnak ngeih awkah a kan bawmh.

10. ‘Kan hnulei in aw’ kha zeitindah kan theih?

¹⁰ Jehovah nih a kan cawnpiaknak a pahnihnak lam kha Isaiah nih hitin a ti: “Nan hnulei in a aw kha nan theih lai.” Isaiah nih Jehovah kha a siangngakchia pawl an hnulei in a kal i zei lam dah zulh ding ti a chimmi cawnpiaktu in a langhter. Tuchan zongah Pathian aw kha kan hnulei in kan theih. Zeitin in dah? Kan hnulei, a luancia kum tampi lioin Baibal ah Pathian thawchuah hnawhmi bia hna cu ṭial an si. Cucaah Baibal kan rel tikah kan hnulei in Pathian aw kan theihmi bantuk a si.—Isa. 51:4.

11. Lawmhnak he inkhawh awkah zei kehlan dah a herh, zeicah?

¹¹ Jehovah nih a bupi le a Bia in a kan pekmi lamhruainak in ṭhatnak tling zeitindah kan hmuh khawh? Isaiah chimmi a kong pahnih hi i cinken u. Pakhatnak, “lam cu hika leiah hin a si.” Pahnihnak, “lam kha zul u.” (Isa. 30:21) Cucaah “lam” hngalhnak lawngin a za lo. ‘Lam kha kan zulh’ a hau. Jehovah Bia le a bupi sinin a rami fianternak hna thawngin Jehovah nih a kan halmi kha kan hngalh khawh. Kan hngalhmi kong hman khawh ning zong kan cawn. Jehovah rian ah lawmhnak he inkhawhnak ngeih awkah mah kehlan pahnih kha kan hlan a herh. Mah lawngah Jehovah thluachuah kan hmu kho lai.

12. Isaiah 30:23-26 ningin Jehovah nih a miphun kha zeitindah thluachuah a pek hna?

¹² Isaiah 30:23-26 rel. Babilon saltaannak in Israel ram ah a kirmi Judah mi hna caah mah chimchungbia cu zeitindah a tlin? Pumsalei he, thlaraulei he thluachuah tampi an hmu. Jehovah nih a miphun kha tirawl tampi in thluachuah a pek hna. Asinain a biapi deuhmi cu a thiangmi biaknak dirh ṭhannak caah thlarau rawl tampi in a pekmi hna hi a si. Mah lioah Pathian miphun nih an hmuhmi thlaraulei thluachuah hna cu a hlan i an rak hmuhmi nakin a tam deuh tuk. Caang 26nak ah kan hmuh bantukin Jehovah nih thlaraulei ceunak kha a ceuter chin. (Isa. 60:2) Jehovah thluachuah nih a salle kha “lunglawm” tein a rian ṭuan peng awk le thazaang ngeih awkah a bawmh hna.—Isa. 65:14.

13. Tuchan ah dirh ṭhannak he aa tlaimi chimchungbia cu zeitindah a tlin?

¹³ A thiangmi biaknak dirh ṭhannak kong chimchungbia cu tuchan kanmah he aa pehtlai maw? Aa pehtlai! Zeiti lam in dah?  AD 1919 thawkin mi nuai tampi cu vawleicung i a hmaan lomi biaknak, A Liannganmi Babilon saltaannak in an luat. Annih cu Israel mi Biakammi Ram nakin a ṭha deuhmi hmun ah hruai an si. Thlaraulei paradis ah hruai an si. (Isa. 51:3; 66:8) Thlaraulei paradis cu zeidah a si?

14. Thlaraulei paradis timi cu zeidah a si, tuchan ah cuka i a ummi cu ahote dah an si? (Biafang Fianternak ah zoh.)

¹⁴ AD 1919 thawkin chiti thuhmi hna cu thlaraulei paradis ah khua an sa. c Caan a liam bantukin vawlei ruahchannak a ngeimi “tuudang” pawl zong mah thlaraulei hmun ah khua an sa ve i Jehovah thluachuah tampi an hmu ve.—Johan 10:16; Isa. 25:6; 65:13.

15. Thlaraulei paradis a umnak hmun cu khoika ah dah a si?

¹⁵ Tuchan ah thlaraulei hmun asiloah paradis a umnak hmun cu khoika ah dah a si? Jehovah a biami cu vawleicung pumpi ah hmuh khawh an si. Cucaah thlaraulei paradis cu anmah an umnak vawleicung pumpi zongah a si. Cucaah vawleicung khoika hmun i kan um hmanhah a hmaanmi biaknak kha lungtho tein kan bawmh chung paoh cu thlaraulei paradis ah kan i tel kho lai.

16. Thlaraulei paradis aa dawhnak kha zeitindah kan hmuh khawh peng?

¹⁶ Thlaraulei paradis i um peng awkah vawleicung pumpi Khrihfabu kan sunsaknak kha kilven peng a hau. Cutin zeitindah kan tuah khawh? Cuka ah a ummi hna i an tlinlonak kha si loin an i dawhnak cungah lungthin kan peknak thawngin a si. (Johan 17:20, 21) Mah cu zeicah a biapit tuk? Mah tahchunhnak hi ruathmanh u. Aa dawh tukmi tupi ah thingkung a phunphun hmuh lai kha kan i ruahchan. Cu bantukin tuchan Khrihfabu hna ah a ummi thlaraulei paradis cu thingkung he tahchunhmi mi a phunphun in ṭamh a si. (Isa. 44:4; 61:3) Kan pawngkam ah a ummi “thingkung” pakhat cio i an chambaunak ah si loin mah “tupi” i aa dawhnak cungah lungthin kan pek peng a hau. Kanmah tlinlonak asiloah Khrihfabu i unau pawl tlinlonak ruangah lung aa rualmi vawleicung pumpi Khrihfabu i aa  dawhnak kha lungthin pek loin kan um awk a si lo.

17. Khrihfabu lungrualnak karhter awkah pakhat cio nih zeidah kan tuah khawh?

¹⁷ Khrihfabu ah lungrualnak a um peng nakhnga pakhat cio nih zeidah kan tuah khawh? Daihnak kan ser khawh. (Matt. 5:9; Rom 12:18) Khrihfabu i midang he daihnak karhternak ah kanmahlei in kan thawk fatin thlaraulei paradis aa dawhnak kha kan chapmi a si. Thlaraulei paradis ah a ummi pakhat cio cu Jehovah nih a thiangmi biaknak ah a hnuhmi hna a si ti kha kan i cinken peng. (Johan 6:44) Jehovah nih a sunglawi tukmi in a hmuhmi—a salle lakah daihnak le lungrualnak fehter dingin kan i zuammi kha Jehovah nih a hmuh tikah zeitluk in dah aa lawmh lai ti khi ruathmanh!—Isa. 26:3; Hag. 2:7.

18. Zeidah thukpi in kan ruah peng awk a si, zeicah?

¹⁸ Pathian salle nih kan hmuhmi thluachuah in zeitindah ṭhatnak tling kan hmuh khawh? Baibal le Baibal hrambunhmi ca in kan hlathlaimi kong hna kha thukpi in kan ruah khawh. Cu bantuk hlathlainak le ṭha tein ruahnak nih Khrihfabu ah pakhat le pakhat ‘u le nau bantukin i dawt’ awkah a kan forhmi, Khrihfa ziaza pawl ngeih dingin a kan bawmh lai. (Rom 12:10) Atu ah kan hmuhmi thluachuah pawl ruahnak nih Jehovah he kan i pehtlaihnak kha a fehter chin. Jehovah nih a kan chiahpiakmi hmailei thluachuah kong ruahnak nih a zungzal in amah biak ding timi ruahchannak kha a taktak a siter lai. Mah nih atu ah Jehovah rianṭuannak i kan i lawmhnak kha a karhter lai.

19. (a) Isaiah 30:18 ningin zeidah kan zumh khawh? (b) Lawmhnak he inkhawh awkah zeinihdah a kan bawmh lai?

¹⁹ Jehovah nih hi chan ṭhalo a donghter tikah kanmah ṭhatnak ca kha “aa tim.” (Isa. 30:18) Jehovah nih “a dingmi thil kha a tuah zungzal” caah Satan vawlei hi a herhmi lengin umnak nawl a awnh ti lai lo ti kha kan zumh khawh. (Isa. 25:9) Mah khamhnak ni a phanh lai kha Jehovah he lungsau tein kan hngah. Mah caan chungah thlacamnak tinvo sung kha sunsak awk, Baibal hlathlai in zulh awk le kan hmuhmi thluachuah kong ruah awkah bia kan khiah. Cutin kan tuah tikah Jehovah nih amah biaknak ah lawmhnak he inkhawhnak ngeih awkah a kan bawmh lai.