1. Zeidah kan i ruahchan khawh i zeidah kan zumh khawh?

 PHUNGCHIM rian kan ṭuan tikah ralchanhnak kan tong lai ti kha kan i ruahchan khawh. Mah ralchanhnak cu hmailei ah a fak chinchin men lai. (Dan. 11:44; 2 Tim. 3:12; Biat. 16:21) Asinain Jehovah nih kan herhmi bawmhnak a kan pek lai ti kha kan zumh khawh. Zeicah? Zeitluk in a harmi rian a si hmanhah Jehovah nih a salle kha an rian liim khawh awkah a bawmh zungzal hna. Tahchunhnak ah, Babilon i sal taangmi Judah mi hna sinah phung a chimmi profet Ezekiel tonmi thil sining cheukhat kha zohhmanh hna u sih.

2. Ezekiel nih phung a chimhmi hna kong he aa tlaiin Jehovah nih zeitindah a chim, hi capar ah zei kong dah kan i ruah lai? (Ezekiel 2:3-6)

² Ezekiel nih zei bantuk mi hna sinah dah phung a chim? Annih cu “mi lungṭhawng,” “mi lungkhong” le “ral thawh hmang” an si tiah Jehovah nih a ti. Annih cu hling le “tlangngaikuang” bantukin ṭih a nungmi an si. Cucaah Jehovah nih Ezekiel kha “ṭih hna hlah” tiah voi tampi a ti. (Ezekiel 2:3-6 rel.) Ezekiel cu (1) Jehovah nih a thlahmi a si caah, (2) Pathian thiang thlarau nih a herhmi thazaang a pek caah le (3) Pathian Bia nih a zumhnak a fehter caah phungchim rian kha a liim khawh. Mah a kong pathum nih Ezekiel kha zeitindah a bawmh? Mah nih kannih tah zeitindah a kan bawmh?

3. Zei bia nih dah Ezekiel kha thazaang a pek, a bawmhnak he aa tlaiin Jehovah nih zeitindah a zumhter?

³ Jehovah nih Ezekiel kha “kaan thlah lai” tiah a ti. (Ezek. 2: 3, 4) Mah bia nih Ezekiel kha thazaang a ngeihter ko lai. Zeicah? Jehovah nih a profet Moses le Isaiah rian a pek hna lioah mah bantuk bia a rak hmanmi kha aa cinken ko lai. (Ex. 3:10; Isa. 6:8) Cun mah profet pahnih kha an tonmi zuamcawhnak hna tei khawh awkah Jehovah nih a bawmh hna ning zong Ezekiel nih a hngalh. Jehovah nih Ezekiel kha voihnih tiang “Kaan thlah lai” tiah a ti caah Ezekiel nih Jehovah bawmhnak i bochan dingin a ruang ṭha a ngei. Ezekiel nih hitin voi tampi a ṭial: “BAWIPA bia cu ka sinah a ra phan.” (Ezek. 3:16) Cun hiti zongin voi tampi a ṭial: “BAWIPA nih ka sin i a chimmi bia a si.” (Ezek. 6:1) Jehovah nih a thlahmi a si kha Ezekiel nih a zumh. Ezekiel cu tlangbawi fapa pakhat in Jehovah nih kum tampi chungah a profet pawl a bawmh hna ning kha a pa nih a cawnpiak men ko lai. Jehovah nih Isak, Jakob le Jeremiah sinah mah bia hi a chim: “Keimah nih kaan umpi ko.”—Gen. 26:24; 28:15; Jer. 1:8.

4. Zei bantuk hnemhnak bia nih dah Ezekiel kha thazaang a pek?

⁴ Ezekiel phungchimmi kha Israel mi tam deuh nih zeitindah an lehrulh lai? Jehovah nih hitin a ti: “Israel mi nih cun na bia ngaih kha an duh lai lo, zeicahtiah keimah ka bia ngaih kha an duh lo.” (Ezek. 3:7) Ezekiel an cohlan lonak thawngin Jehovah kha an hlawt. Mi nih an cohlan lo ruangah profet pakhat in a rian a hlawh a tling lo tinak a si lo ti kha mah bia hna nih Ezekiel kha a hngalhter. Ezekiel nih a thanhmi biaceihnak cu a tlin tikah mi nih “an lakah profet pakhat an ngeih kha an hngalh lai” tiah Jehovah nih a ti. (Ezek. 2:5; 33:33) Mah hnemhnak bia nih Ezekiel kha a phungchim rian liim khawh awkah a herhmi thazaang a pek lai ti cu lunghrin awk a um lo.

5. Isaiah 44:8 ningin zeinihdah thazaang a kan ngeihter?

⁵ Kannih zong Jehovah nih a kan thlahmi a si timi hngalhnak nih thazaang a kan ngeihter ve. Jehovah nih ka “tehte” tiah a kan auhnak thawngin upatnak a kan pek. (Isa. 43:10) Mah cu a sunglawi tukmi tinvo sung a si! Jehovah nih Ezekiel kha “Ṭih hna hlah” tiah a rak ti bantukin kannih zong “Nan thinphang hlah u” tiah a kan ti. Ralchanhtu pawl ṭih awkah zeicah a ruang a um lo? Ezekiel bantukin kannih zong Jehovah thlahmi kan si i Jehovah bawmhnak kan hmu lai.—Isaiah 44:8 rel.

6. (a) Jehovah nih a kan bawmh lai ti kha zeitindah kan zumh khawh? (b) Zeinihdah hnemhnak le thazaang a kan pek?

⁶ Jehovah nih kaan bawmh hna lai tiah bia a kan kamh. Tahchunhnak ah, Jehovah nih “Ka tehte cu nanmah hi nan si” timi bia a chim hlanah hitin a ti: “Ti thuk na tan tikah na sinah ka um lai, harnak na inmi nih aan tei lai lo. Mei alh na tan tikah aan kangh lai lo, harnak na inmi nih aan hliam lai lo.” (Isa. 43:2) Phung kan chim tikah a caan ah tilian bantuk a simi dawnkhantu thil le mei bantuk a simi harnak hna kan tong. Asinain Jehovah bawmhnak thawngin phung kan chim peng ko. (Isa. 41:13) Ezekiel chan bantukin tuchan zongah mi tam deuh nih thawngṭha kha an cohlang lo. Asinain mah cu ṭha tein phung kan chim lo ruangah a si lo. Zumhfek tein thawngṭha kan chim peng tikah Jehovah lung kan lawmhter timi hngalhnak nih hnemhnak le thazaang a kan pek. Lamkaltu Paul nih hitin a ti: “An ṭuan ning cio khan Pathian nih laksawng a pek ko hna lai.” (1 Kor. 3:8; 4:1, 2) Caan saupi hmaikal a ṭuanmi unaunu pakhat nih hitin a ti: “Jehovah nih kan i zuamnak cungah thluachuah a kan pek ti ka hngalh caah kaa lawm tuk.”

7. Ezekiel nih a hmuhmi langhnak kong a ruah fatin zeitindah a um? (A phaw hmanthlak zoh.)

⁷ Ezekiel nih Pathian thiang thlarau cu zeitluk in dah a ṭhawn ti kha a hmuh. Langhnak ah Ezekiel nih a ṭhawngmi thilnung hna cung le a nganmi vancung leng kekual hna cungah thiang thlarau rian a ṭuan ning kha a hmuh. (Ezek. 1:20, 21) Ezekiel nih zeitindah a rak lehrulh? Thil sining kha hitin a langhter: “Cucu ka hmuh tikah ka bawk.” Ezekiel cu a khuaruah a har tuk caah vawlei ah a rak bawk. (Ezek. 1:28) A hnuah Ezekiel nih mah langhnak kong a ruah fatin Pathian thiang thlarau bawmhnak thawngin phungchim rian kha ka liim khawh lai timi a zumhnak cu a fek chin ko lai.

8-9. (a) Jehovah nih Ezekiel kha zei tuah awkah dah a fial? (b) Ezekiel nih a harmi lohmun ah phung a chim khawh nakhnga Jehovah nih zeitindah thazaang a pek?

⁸ Jehovah nih Ezekiel kha hitin a ti: “Mipa, . . . dir tuah, bia kaan ruah lai.” Mah bia in Pathian thiang thlarau nih Ezekiel kha vawlei in dir khawh awkah a herhmi thazaang a pek. Ezekiel nih hitin a ṭial: “Ka chungah thlarau kha a lut i ka ke in a ka dirter.” (Ezek. 2:1, 2) Mah hnu phungchim rian a ṭuan chung vialte Ezekiel cu Pathian “kut” nih lam a hruai, mah cu Pathian thiang thlarau kha a si. (Ezek. 3:22; 8:1; 33:22; 37:1; 40:1) Pathian thiang thlarau nih Ezekiel kha a hmuhmi rian ṭuan khawh awkah thazaang a pek—mah cu a lohmun i “ningzah hngal lomi le lung a hak i a ṭhawng hringhranmi” hna sin phungchim kha a si. (Ezek. 3:7) Jehovah nih Ezekiel kha hitin a ti: “Nangmah cu anmah he aa tluk ah kaan ser lai. Ningzah an hngalh lo tluk le an lung a khon tlukin nang zong kaan hahter ve lai i kaan khonter ve lai. Na cal cu ṭeklung nak hak deuh in ka ser lai. . . . Zeitikhmanh ah ṭih hna hlah, zeitikhmanh ah na thin in phanter hna  hlah seh.” (Ezek. 3:8, 9) Mah cu Jehovah nih Ezekiel kha hitin a timi bantuk a si: ‘Mi lungkhong hna ruangah na lungdong hlah. Thazaang kaan pek lai.’

⁹ Mah hnuah Pathian thiang tharau nih Ezekiel kha phungchim rian a ṭuannak lohmun ah a cawi. Ezekiel nih “BAWIPA kut cu ka cungah ṭhawng ngaiin a um” tiah a ti. Profet nih zumhnak he phung a chim khawh nakhnga a chim dingmi kong cawn awk le hngalhthiam awkah zarh khat chung caan a rak pek. (Ezek. 3:14, 15) Cun Jehovah nih Ezekiel kha ‘thlarau a chungah a rung luhnak’ nelrawn ah khan kal dingin a fial. (Ezek. 3:23, 24) Ezekiel cu phungchim rian thawk awkah timhcia a si cang.

10. Phungchim rian ṭuan khawh awkah zei bawmhnak dah kan herh, zeicah?

¹⁰ Phungchim rian ṭuan khawh awkah zeinihdah a kan bawmh? A phi hngalh awkah Ezekiel kong kha ruathmanh u. Phungchim rian a thawk taktak hlanah Pathian thiang thlarau nih a herhmi thazaang a rak pek. Tuchan zongah Ezekiel bantukin Pathian thiang thlarau bawmhnak thawng lawngin phungchim rian hi kan ṭuan khawh. Zeicah? Satan nih phungchim rian kan ngol nakhnga a kan doh caah a si. (Biat. 12:17) Mi tampi nih Satan cu a ṭhawn tuk caah kan tei kho lai lo tiah an ruah. Asinain phungchim rian kan ṭuannak thawngin kan tei khawh! (Biat. 12:9-11) Zeiti lam in dah? Phung kan chim tikah Satan ṭhihphaihnak kan ṭih lo ti kan langhtermi a si. Phung kan chim fatin Satan kan teimi a si. Ralchanhnak lakah phung kan chim khawh pengmi nih zeidah a langhter? Jehovah nih a thiang thlarau hmangin thazaang a kan pek ti le a mithmai ṭha kan hmu ti kha a langhter.—Matt. 5:10-12; 1 Pet. 4:14.

11. Pathian thiang thlarau nih zeidah a kan tuahpiak lai, zeitindah thiang thlarau kan hmuh peng khawh?

¹¹ Jehovah nih Ezekiel kha phungchim rian caah a herhmi thazaang a peknak kong kan ruah tikah a dang zeidah kan cawn khawh rih?  Pathian thiang thlarau nih phungchim rian ah kan ton khawhmi zei bantuk buaibainak paoh tei awkah kan herhmi thazaang a kan pek khawh. (2 Kor. 4:7-9) Pathian thiang thlarau hmuh peng awkah zeidah kan tuah khawh? Jehovah nih kan thlacamnak a ngaih lai timi zumhnak he thla kan cam zungzal a hau. Jesuh nih a zultu pawl kha hitin a cawnpiak hna: “Hal peng u, . . . kawl peng u, . . . king peng u.” Cutin a si ahcun Jehovah nih “Thiang Thlarau a halmi cu zeitluk in dah a pek chinchin hna lai.”—Luka 11:9, NW, 13; Lam. 1:14; 2:4.

12. Ezekiel 2:9–3:3 ningin cazual cu khoika in dah a rami a si i mah ah zeidah aa tel?

¹² Ezekiel cu Pathian thiang thlarau nih thazaang a ngeihter lawng si loin Pathian Bia zong nih a zumhnak a fehter. Ezekiel nih langhnak ah kut pakhat nih cazual pakhat aa putmi kha a hmuh. (Ezekiel 2:9–3:3 rel.) Cazual cu khoika in dah a rat? Mah ah zeidah aa tel? Mah nih Ezekiel kha zeitindah a zumhnak a fehter? Zohhmanh hna u sih. Mah cazual cu Pathian bawiṭhutdan in a rami a si. Ezekiel nih a hmasa ah a hmuhmi vancungmi pali lak i pakhat kha Jehovah nih a sinah cazual pek dingin a hmanmi a si kho men. (Ezek. 1:8; 10:7, 20) Mah cazual ah ralchanh hmangmi hna sin Ezekiel nih a thanh dingmi biaceihnak kong a simi, Pathian bia aa tel. (Ezek. 2:7) Mah kong cu cazual a hnu he, a hmai he a kaphnih in aa ṭial.

13. Jehovah nih cazual kha zeitin tuah awk ah dah Ezekiel kha a fial, zeicah cazual cu a thlum?

¹³ Jehovah nih a profet sinah cazual kha ei law “khim tein um tuah” tiah a ti. Ezekiel nih nawlngai in mah cazual kha a ei dih. Mah langhnak i a sullam cu zeidah a si? Ezekiel nih a thanh dingmi kong kha ṭha tein a hngalhthiam a herh. Mah kong kha a zumh lawnglawng ah chim dingin a forh lai. Mah hnuah khuaruahhar thil pakhat a rak cang. Ezekiel nih mah cazual cu “khuaihliti bantukin a thlum” ti kha a hun hngalh. (Ezek. 3:3) Zeicah? Ezekiel caah Jehovah aiawhtu sinak cu a thlummi asiloah a ṭha tukmi hmuhtonnak a si. (Salm 19:8-11) Jehovah nih a profet pakhat in rian a pek caah aa lawm tuk.

14. Ezekiel kha pek a simi rian ṭuan awkah timhcia a si nakhnga zeinihdah a bawmh?

¹⁴ A hnuah Jehovah nih Ezekiel kha hitin a ti: “Nangmah kaan chimhmi hi ṭha tein ngai law na lung chungah i cinken tuah.” (Ezek. 3:10) Mah lamhruainak ah Jehovah nih Ezekiel kha cazual ah aa ṭialmi kong hna i cinken awk le ṭha tein ruah awkah a fial. Ezekiel nih cutin a tuah caah a zumhnak cu a hung fek chin. Cun mi sinah mah kong kha thanh ding zongah thazaang a ngeihter. (Ezek. 3:11) Ezekiel nih Pathian bia kha ṭha tein a hngalhthiam i a zumh tikah pek a simi rian kha ṭuan awk le liim awkah timhcia a rak si.—Salm 19:14 he tahchunh.

15. Inkhawhnak ngeih awkah kan “lung chungah” zeidah i cinken a herh?

¹⁵ Phungchim rian ah inkhawhnak kan ngeih nakhnga Pathian bia in kan zumhnak fehter peng a hau. Jehovah nih a kan chimhmi vialte kha kan “lung chungah ah i cinken” a hau. Tuchan ah Jehovah nih a Bia, Baibal hmangin a kan chawnh. Pathian Bia kha kan ruahnak, kan intuarnak le kan lungthawhnak cungah zeitindah huham kan ngeihter peng khawh?

16. Pathian Bia kha zeitindah kan tuah awk a si i kan hngalhthiam nakhnga zeitindah kan tuah khawh?

¹⁶ Rawl kan ei i kan pawpi nih a rial tikah pumsalei thazaang kan ngeih bantukin  Pathian Bia hlathlainak le ṭha tein ruahnak nih thlaraulei thazaang a kan ngeihter. Mah cazual in kan cawn khawhmi kong kha kan i cinken. Jehovah nih a Bia in ‘khim tein umter’ a kan duh, mah cu a Bia ṭha tein hngalthiam hna seh ti a kan duhmi kha si. Thlacamnak, relnak le ṭha tein ruahnak thawngin cutin kan tuah khawh. Pakhatnak, Pathian ruahnak bantuk ngeih awkah kan lungthin i timhtuah dingin thla kan cam. Baibal kha kan rel i kan relmi kong kha ṭha tein le thukpi in kan ruah. A phichuak cu zeidah a si lai? Ṭha tein kan ruah deuhdeuh tikah Pathian Bia kha kan hngalhthiam deuhdeuh i mah nih kan zumhnak kha a fehter chin.

17. Baibal in kan relmi kong ṭha tein ruah cu zeicah a biapit?

¹⁷ Baibal rel le ṭha tein ruah cu zeicah a biapit? Cutin tuahnak nih atu ah Pennak kong chimnak ah a herhmi thazaang le hmailei ah a fakmi biaceihnak kong thanh awkah a herhmi thazaang a kan ngeihter lai. Jehovah i duh a nung tukmi a sining hna kong ṭha tein kan ruah tikah kan i pehtlaihnak zong a fek chin. Mah tikah a thlummi asiloah a ṭha tukmi—chunglei daihnak le lungsinak kha kan hmu lai.—Salm 119:103.

18. Kan lohmun ah a ummi hna nih zeidah an hun hngalh lai, zeicah?

¹⁸ Ezekiel bantukin mi sinah chimchungbia hna chim dingin rian pek kan si lo. Asinain Jehovah nih phungchim rian kha a za cang tiah a ti hlan tiang a Bia ah aa ṭialmi kong kha chim peng dingin bia kan khiah. Biaceihnak caan a phanh tikah kan lohmun ah a ummi, mi pawl nih ralrin peknak kan hmu lo asiloah Pathian nih zei ah a kan rel lo tiah chim khawhnak a ruang an ngei lai lo. (Ezek. 3:19; 18:23) Mah canah kan chimmi bia cu Pathian sinin a rami a si kha an hun hngalh lai.

19. Phungchim rian liim khawh awkah zeinihdah thazaang a kan ngeihter?

¹⁹ Phungchim rian liim khawh awkah zeinihdah thazaang a kan pek lai? Ezekiel thazaang a pemi a kong pathum nih a kan pek khawh ve. Jehovah thlahmi kan si, Pathian thiang thlarau nih thazaang a kan pek i Pathian Bia nih kan zumhnak a fehter ti kha kan hngalh caah phung kan chim peng. Jehovah bawmhnak nih phungchim rian ṭuan khawh awk le “a dongh tiangin” inkhawhnak ngeih awkah a kan bawmh.—Matt. 24:13.