1, 2. (a) Jesuh nunnak ah a biapi bikmi rian cu zeidah a si, zeicah? (b) “Pathian rian ṭuanti hawi” in hlawhtlinak hmuh awkah zeidah kan tuah a herh?

JESUH KHRIH cu lehtama pakhat a si i a hnuah phungchimtu a si. (Mar. 6:3; Rom 15:8) Mah rian pahnih kha ṭha tein a ṭuan. Lehtama pakhat in thing in thilri ser awkah hriamnam zeitindah hman ding ti kha a cawn. Cun phungchimtu pakhat in zaran mi nih Baibal biatak an hngalhthiam khawh nakhnga bawmh awkah Cathiang thukpi in a hngalhnak kha a hman. (Matt. 7:28; Luka 24:32, 45) Jesuh cu kum 30 a si tikah lehtama rian kha a ngol i phungchimtu pakhat a hung si, zeicahtiah mah rian cu a tuah khawhmi rian lakah a biapi bikmi a si ti kha a hngalh caah a si. Pathian Pennak kong thawngṭha chimnak rian cu Pathian nih vawlei ah a rak thlah hnawhchannak a ruang pakhat a si tiah a ti. (Matt. 20:28; Luka 3:23; 4:43) Jesuh nih thawngṭha chimnak rian kha a nunnak ah biapi tuk in a chiah i midang zong cutin tuahter a duh hna.—Matt. 9:35-38.

² Kan lakah tam deuh cu lehtama kan si lo nain kan dihlak in midang sinah thawngṭha a chimmi phungchimtu kan si. Mah rian ah Pathian zong aa tel ve caah a biapi tukmi a si.  Cucaah “Pathian rian ṭuanṭi hawi” tiah auh kan si. (1 Kor. 3:9, NW; 2 Kor. 6:4) Salm caṭialtu nih “na phunglam a chung muru cu biatak a si” tiah a timi kha kan hna a tla. (Salm 119:159, 160) Jehovah bia cu biatak a si. Cucaah “Pathian biatak hmaan tein mi a cawnpiaktu” si kan duh. (2 Timote 2:15 rel.) Jehovah, Jesuh le Pennak kong midang cawnpiaknak ah a biapi bikmi hriamnam a simi Baibal kha hmualngei tein hman thiam awkah kan i zuam. Phungchimnak ah hlawhtlinnak kan hmuh nakhnga Jehovah bupi nih a dang hriamnam tampi zong a kan pek i mah kha zeitindah kan hman lai ti zong hngalh a hau. Mah hriamnam pawl cu Cawnpiaknak Hriamnam chungah an i tel.

3. Phungchim rian ah zeidah biapi ah kan chiah awk a si, cutin tuah awkah Lamkaltu 13:48 nih zeitindah a kan bawmh khawh?

³ Mah kha Phungchimnak Hriamnam tiah auh loin Cawnpiaknak Hriamnam tiah zeicah kan auh ti kha na ruah men ko lai. “Phungchim” timi cu thawngṭha thanh timi sullam a ngeih caah a si. Asinain “cawnpiak” timi cu mi pakhat nih a theihmi kha a hngalhthiam i a hngalhmi ningin tuah awkah a forh nakhnga fianter timi sullam a ngei. Hi chan ṭhalo cu caan tawite lawng a tan cang caah Baibal hlathlainak tuah le midang zong Khrih zultu an si khawh nakhnga biatak cawnpiaknak kha biapi ah kan chiah a hau. Mah cu “zungzal nunnak hmu dingah thim a simi hna” kha lungtho tein kan kawl hna awk a si i annih nih Jehovah an hun biak nakhnga kan bawmh hna awk a si tinak a si.—Lamkaltu 13:44-48 rel.

4. “Zungzal nunnak hmu dingah thim a simi hna” kha zeitindah kan kawl khawh hna?

⁴ “Zungzal nunnak hmu dingah thim a simi hna” cu zeitindah kan hmuh khawh hna? Kumzabu pakhatnak i Khrihfa hna nih cu bantuk mi hna kha phung an chimnak thawng lawngin an hmuh hna. Jesuh nih “khuapi siseh, khuate siseh, nan phak tikah aa tlakmi kha kawl hna u” tiah a ti hna. (Matt. 10:11, NW) Tuchan zongah cutin kan tuah a hau. Mi pawl cu lungthin ṭha a ngei lomi, aa porhlawmi asiloah Pathian kong zei ah a rel lomi an si ahcun thawngṭha cohlan awkah an sinin kan i ruahchan lo ti cu a hman ko. Asinain lungthin ṭha a ngeimi, aa toidormi le biatak hngalh a duh taktakmi kha kan kawl hna. Mi kan kawl hna tikah Jesuh nih lehtama a si lio i a tuahmi he kan tahchunh khawh. Innchung thilri, innka, hngawngkual ti bantuk ser awkah zei thing dah ka hman lai ti kha a kawl hmasa. Mah hnuah a hriamnam kha a lak, a thiamnak kha a hman i mah thil hna kha a ser. Cu bantukin tuchan zongah lungthin ṭha a ngeimi kha kan kawl hmasa hna i zultu an hun si khawh nakhnga bawmhnak ah kan hriamnam le kan thiamnak kha kan hman khawh.

5. Cawnpiaknak Hriamnam he aa tlaiin zeidah kan hngalh a hau? Tahchunhnak pe. (A hramthawknak hmanthlak zoh.)

⁵ Hriamnam pakhat cio nih tinhnak an ngei. Tahchunhnak ah, lehtama pakhat in Jesuh nih a hmanmi hriamnam kong kha ruathmanh. * Jesuh nih tahnak, chingchiahnak, tannak, vihnak le thing muisam suainak, cun thingtan tete ser in hmunkhat  ah pehnak caah hriamnak hna kha a hman a hau. Cu bantukin Cawnpiaknak Hriamnam ah aa telmi hriamnam pakhat cio nih tinhnak an ngei. Cucaah mah a biapimi hriamnam pawl zeitindah hman ding a si ti kha hlathlai hna u sih.

6, 7. (a) Pehtlaihnak card kha zeitindah na hman khawh? (b) Khrihfabu pumhnak sawmnak kha zeicah kan hman?

⁶ Pehtlaihnak Card. Mah card cu a hmete nain hmual a ngei tuk, zeicahtiah mah nih aho kan si le kan website jw.org kha a langhter. Kan website in kan kong tam deuh an hngalh khawh i Baibal hlathlainak hmanh hal khawh a si. Jw.org in Baibal hlathlainak a halmi 400,000 leng an um i nifatin zakhat leng nih an hal peng. Pehtlaihnak card tlawmpal kha naa ken zungzal khawh i na tonmi hna biaruahnak ah na hman khawh.

⁷ Sawmnak. Pumh sawmnak catlap nih “kan in sawm, Jehovah Tehte Hna he Baibal hlathlaiṭi u” tiah a ti. Cun “pumhnak hna ah i pum ve” asiloah “Jehovah Tehte pakhatkhat he Baibal hlathlaiṭi u” ti zong in a ti. Cucaah mah sawmnak nih aho kan si kha a langhter i “thlarau ah mi chambau kan si ti aa hngalmi” hna kha kanmah he Baibal hlathlaiṭi awk zongah a sawm hna. (Matt. 5:3) Mi nih Baibal hlathlainak kha an cohlan zong, cohlan lo zongah pumhnak a rami kha ṭha tein kan conglawmh hna. Pumhnak an rat tikah Baibal kong tampi an cawn khawhmi kha an hngalh lai.

8. Kan pumhnak ah voikhat tal rak i pumh cu zeicah a biapit? Tahchunhnak pe.

⁸ Kan pumhnak ah voikhat tal an rak i pumh nakhnga mi pawl sawm zungzal cu a biapi. Zeicah? An rak i pumh tikah Jehovah Tehte Hna cu Baibal biatak mi a cawnpiakmi le a hmaan lomi biaknak nih an tuah lomi Pathian kong hngalh awkah mi a bawmmi an si ti kha an hmuh lai. (Isa. 65:13) Tahchunhnak ah, a luancia kum tlawmpal lioah United States ah a ummi Ray le Linda te nuva nih mah kha an hmuh. Annih cu Pathian a zummi an si i a kong tam deuh in hngalh an duh. Cucaah an khua ah a ummi church vialte ah i pumh ding le bu pakhat i an luh hlanah a kong pahnih kawl dingin bia an khiah. Pakhatnak, church in a kong pakhatkhat kan cawn khawh lai. Pahinhnak, Church chungah a ummi hna cu Pathian a biami hna bantukin an i hruk-aih lai. Church tampi a um caah kum tampi caan an lak. Asinain an lung a dong tuk. Church in zei kong hmanh an cawng kho lo i church chungah a ummi mi hna cu upatnak um loin, dawhcah loin thil an i hruk. An cazin chung i a hmanung bik church an kal hnuah Linda cu rianṭuannak leiah a kal i Ray cu inn leiah a ṭin. Inn a ṭinnak lam cu Jehovah Tehte Hna Biakinn lei a si. Mah tikah ‘ka va lut tuah lai i zeidah a lawh kha ka va zoh tuah lai’ tiah a ruah. Mah cu a ṭha bikmi a hmuhtonnak a si. Cuka i aa pummi dihlak cu an nun a nemmi le a hmai a panhmi an si i zohdawh tein thil an i hruk. Ray cu a hmai bik tlang ah a ṭhu i a hngalhmi kong hna kha a duh tuk. Lamkaltu Paul nih a langhtermi a voikhatnak pumhnak ah a ra i “nan sinah hin Pathian a um taktak” tiah a chimmi kong kha mah nih a kan hngalhter ṭhan. (1 Kor. 14:23-25) Mah hnu cun Ray cu Zarhpi Ni fatin a rak i pum. Cun zarhlai pumhnak  zong a hun i pum peng. Linda zong a hun i pum ve. Kum 70 leng an si cang ko nain Baibal an cawng i tipil an ing.

9, 10. (a) Cazual cu zeicah hman a fawi? (b) Pathian Pennak cu Zeidah a Si? timi cazual hmanning kha fianter.

⁹ Cazual. Kan hriamnam ah cazual pariat kan ngei. Hman awkah a fawi i biaruahnak thawknak ah a ṭha tuk. 2013 ah a voikhatnak an chuah i nuai nga hrawng chuah a si. Mah cazual pawl cu an muisam an i lo dih. Cucaah cazual lakah pakhat kha zeitindah hman ding a si ti na hngalh ahcun cazual dihlak in na hman khawh lai. Mi pakhat he biaruahnak thawk khawh awkah cazual kha zeitindah na hman khawh?

¹⁰ Pathian Pennak cu Zeidah a Si? timi cazual kha hman na duh ko lai. Cahmai pakhatnak i biahalnak kha hmuhsak law hitin hal: “Pathian Pennak cu zeidah a si ti kha na ruat bal maw? Zeitindah na ruah  . . ?” A phi pathum lak in pakhat kha thimter. A chimmi a phi cu a hmaan zong, a palh zongah a hnu cahmai kha kau law “Baibal Chimmi” timi tang i Daniel 2:44 le Isaiah 9:6 kha relpiak. Nan biaruahnak a dongh tikah a hnu bik cahmai i “Mah Hi Ruathmanh” timi biatlangpi tang i “Pathian Pennak nih a kan uk tikah zeitindah kan nun lai?” timi biahalnak kha hal. A hnu na len ṭhan tikah a phi kha na chimh khawh. Nan i ton ṭhan tikah cazual a hnu leiah langhtermi Pathian Sinin A Rami Thawngṭha! timi brochure, ṭhen 7nak kha na hman khawh. Mah brochure cu Baibal cawnpiaknak thawk khawhnak caah hriamnam pakhat a si ve.

11. Kan mekazin pawl cu zei caah dah chuah an si, mah kong he aa tlaiin zeidah kan hngalh awk a si?

¹¹ Mekazin. Vennak Innsang le I Hlau! cu vawleicung ah tam bik chuahmi le holh lehmi mekazin a si. Mah mekazin cu ram tampi i a ummi hna nih an relmi a si caah a phaw i a konglam cu hmun kip i a ummi hna an lungthin a lami phun in chuah a si. Mi nih an nunnak ah a biapi bikmi kong ah an lungthin an chiah khawh nakhnga bawmh awkah mah mekazin kha kan hman awk a si. Asinain zei mekazin hi dah ahote caah chuahmi a si ti kha kan hngalh hmasa a hau.

12. (a) I Hlau! cu ahote caah dah chuah a si, aa tinhnak cu zeidah a si? (b) Mah hriamnam in nai ah zei bantuk a ṭhami hmuhtonak dah na ngeih?

¹² I Hlau! cu Baibal kong tlawmte lawng a hngalmi asiloah a hngal bak lomi caah chuah a si. Annih cu Khrihfa cawnpiaknak kong zeihmanh an hngal men lai lo, biaknak kha an i bochan men lai lo asilaoh Baibal nih an nunnak ah a bawmh khawh hna ti kha an hngal men lai lo. I Hlau! i a bik in aa tinhnak cu careltu hna kha Pathian a um ti zumhter awkah a si. (Rom 1:20; Heb. 11:6) Cun Baibal cu ‘Pathian bia a si taktak’ ti an zumh nakhnga bawmh awk zongah a si. (1 Thes. 2:13) 2018 caah mah a kong pathum hi chuah a si: “Nuamhnak Hmuh Khawhnak Lam,” “Chungkhar Hlawhtlinnak Tawhfung 12,” “A Ngaih a Chiami Hna kha Bawm hna.”

13. (a) Mipi sin pekmi Vennak Innsang cu ahote caah dah chuah a si? (b) Mah hriamnam in nai ah zei bantuk a ṭhami hmuhtonak dah na ngeih?

¹³ Mipi ca chuahmi Vennak Innsang i a bik in aa tinhnak cu Pathian le Baibal kong tlawmpal a hngal cangmi hna Baibal cawnpiaknak  fianternak caah a si. Annih cu Baibal kong cheukhat an hngal men lai nain Baibal cawnpiakmi kha hmaan tein an hngalthiam lo. (Rom 10:2; 1 Tim. 2:3, 4) 2018 caah mah cauk pathum hi chuah a si: “Tuchan ah Baibal hi Hman awk a Tlak rih Maw?,” “Hmailei Ah Zeidah A Cang Lai?,” “Pathian Nih Aan Zohkhenh Maw?”

14. (a) Cawnpiaknak Hriamnam ah aa telmi video pali cu zei tinhnak in dah chuah a si? (b) Mah video pawl piahnak in zei bantuk a ṭhami hmuhtonnak dah na ngeih?

¹⁴ Video. Jesuh chan i lehtama pawl cu kut in hmanmi hriamnam lawng an ngei. Asinain atu ahcun lehtama pawl nih hluah, vihnak le thing milternak seh ti bantuk electric thilri pawl an ngei. Kannih zong phung kan chim tikah cauk chuahmi lengah mi pawl hmuhsak awkah video ṭhaṭha kan ngei. Kan hriamnam ah mah pali zong hi aa tel ve: Zeicah Baibal kan Cawn?, Baibal Cawnnak Zeitindah An Tuah?, Biakinn ah Zei Hna Dah An Tuah?, Jehovah Tehte Hna—Ahote Dah Kan Si? A voikhatnak kan len hna lioah minit pahnih nak tlawm video tawitete kha kan piahpiak khawh hna. A sau deuhmi video kha lennolh kan tuah tik le caan tam deuh a ngeimi hna sinah kan piahpiak khawh hna. Mah video nih mi pawl kha Baibal hlathlai awk le rak i pumh awkah a forh khawh hna caah a ṭha tukmi hriamnam an si.

15. Mi nih anmah holh tein video an zoh tikah zei ṭhatnak dah a chuak? Tahchunhnak pe.

¹⁵ Tahchunhnak ah, unaunu pakhat cu Micronesia in a rak i ṭhialmi nu pakhat he an i tong, mah nu nih a bik in a hmanmi holh cu Yapese a si. Cucaah unaunu nih Yapese holh in chuahmi Zeicah Baibal kan Cawn? timi video kha a hmuhsak. Video a hun piah tikah mah nu nih hitin a ti: “Kanmah holh pei a si hi. Ka zum kho lo. A aw cawi ning hi tikulh ah a ummi a si lai. Kanmah holh te bak a hman.” Mah hnuah jw.org ah taarmi ca pawl le video vialte kha ka zoh lai tiah a ti. (Lamkaltu 2:8, 11 he tahchunh.) A dang hmuhtonnak pakhat cu a dang lei ṭhen ah a tupa a ummi, United States i unaunu pakhat kong a si. Anmah holh in a ummi video link kha a tupa sinah a kuat. Mah video kha a zoh dih hnuah unaunu sinah hitin ca a kuat: “A ṭhalomi huham nih vawlei a uk timi zawn nih ka lung a ka suk tuk. Baibal cawnnak caah form ka phih.” Anih cu kan rianṭuannak khenkham a sinak ram ah a ummi a si caah mah cu lungthawh awk ngai a si.

16. Mah brochure pakhat cio i aa tinhnak kha fianter: (a) Pathian Bia Ngai law Zungzal in Nung. (b) Pathian Sinin A Rami Thawngṭha! (c) Tuchan ah Ahote nih dah Jehovah Duhnak an Tuah?

¹⁶ Brochure. Baibal hrambunhmi cauk pawl kha anmah holh in ṭha tein a rel kho lomi asiloah a ngei lomi hna kha zeitindah Baibal kan cawnpiak khawh hna? Pathian Bia Ngai law Zungzal in Nung timi brochure kha kan hman khawh. * Baibal cawnpiaknak thawknak ah a ṭha bikmi hriamnam cu Pathian Sinin A Rami Thawngṭha! timi brochure hi a si. A hnulei phaw ah a ummi a kong 14 kha na hmuhsak khawh i mah lakin hngalh a duh bikmi pakhat kha na hal khawh. Mah hnuah aa thimmi ṭhen in cawnnak kha na thawk khawh. Lennolh ah mah  kong kha na chim kho lai maw? Kan hriamnam lak in a pathumnak brochure cu Tuchan ah Ahote nih dah Jehovah Duhnak an Tuah? timi a si. Mah cu Baibal a cawngmi hna bupi kong cawnpiak awkah chuahmi a si. Mah brochure hmanning kha hngalh awkah 2017, March thla chuah, Khrihfa Nunning le Rianṭuannak Tuahchunhnak Cauk ah zoh.

17. (a) Baibal cawnnak cauk pakhat cio i aa tinhnak cu zeidah a si? (b) Tipil a ing dingmi vialte nih zeidah an tuah a herh, zeicah?

¹⁷ Cauk. Brochure pakhat hmangin Baibal cawnpiaknak na thawk hnuah Baibal Nih Zeidah A Kan Cawnpiak? timi cauk in zeitik paohah na thlen khawh. Mah hriamnam nih mi kha Baibal a hrampi cawnpiaknak hngalh awkah a bawmh khawh hna. Baibal na cawnpiakmi cu a ṭhangcho i mah cauk zong a dih tikah Pathian Dawtnak Chungah Hmunh Khawh Ning timi cauk kha nan cawn chap khawh. Mah hriamnam nih Baibal a cawngmi kha nitin a nunnak ah Baibal phunglam hman khawh ning kha a cawnpiak lai. Baibal a cawngmi cu tipil a in cang hmanhah mithar pakhat in mah cauk pahnih kha a dih tiang a hlathlai a hau. Mah nih Jehovah a zumhnak kha a fehter chin lai i zumhfek tein um awkah a bawmh lai.—Kolose 2:6, 7 rel.

18. (a) 1 Timote 4:16 nih biatak cawnpiaktu in zei tuah awkah dah a kan forh, a phichuak cu zeidah a si? (b) Cawnpiaknak Hriamnam kan hman tikah kan hmuitinh cu zeidah a si?

¹⁸ Jehovah Tehte a simi cu zungzal nunnak a hmuhter khomi, “bia hmaan taktak, thawngṭha bia” kha midang cawnpiak awkah rian kan ngei. (Kol. 1:5; 1 Timote 4:16 rel.) Cutin tuah khawh awkah kan herhmi Cawnpiaknak Hriamnam vialte kan ngei. (“ Cawnpiaknak Hriamnam” timi rinli kulh ah zoh.) Mah hriamnam hna kha kan si khawh chungin hmang hna u sih. Pakhat cio nih zei bantuk hriamnam hi zeitik ah dah ka hman lai ti kha biakhiahnak kan tuah khawh. Asinain kan hmuitinh cu cauk phawtzamh lawng a si lo i thawngṭha cungah lungthawhnak a ngei lomi cu kan pe hna lo ti kha i cinken. Kan hmuitinh cu lungthin ṭha a ngeimi, aa toidormi le “zungzal nunnak hmu dingah thim a simi” Pathian kong hngalh a duh taktakmi hna zultu siter kha a si.—Lam. 13:48; Matt. 28:19, 20.