1. Malakhi 3:16 ningin Jehovah nih zei cauk dah a ṭial i mah ah zeidah aa tel?

 KUM thong tampi chungah Jehovah nih a hleikhunmi cauk pakhat a ṭial. Mah cauk ah min cazin tampi aa tel i zumhfekmi Abel min in aa thawk. * (Luka 11:50, 51) Mah caan thawkin Jehovah nih mah cauk ah min tampi a bet chap lengmang i atu ahcun min nuai tampi a um cang. Baibal nih mah cauk kha “a hmaika i cazin,” “a nungmi hna cauk” le “nunnak cauk” tiah a auh. Hi capar ah mah cauk kha “nunnak cauk” in kan langhter lai.—Malakhi 3:16 rel; Biat. 3:5; 17:8.

2. Nunnak cauk ah ahote min dah ṭial a si, mah cauk ah zeitindah kan min kha kan telter khawh?

² Mah a hleikhunmi cauk ah Jehovah kha ṭihnak le upatnak he a biami hna le Jehovah min a sunsakmi hna i an min pawl aa tel. Annih cu zungzal nunnak hmuh awkah caanṭha an hmu lai. Tuchan ah a Fapa, Jesuh Khrih tlanhnak man cungah hrambunh in Jehovah he pehtlaihnak ṭha kan ngeih ahcun mah cauk ah kan min ṭial a si ve lai. (Johan 3:16, 36) Kan i ruahchannak cu van a si ah, vawlei a si ah kan dihlak in mah cauk ah kan min i ṭial seh ti kan duh.

3-4. (a) Nunnak cauk ah kan min ṭial a si ahcun zungzal in kan nung lai maw? Fianter. (b) Hi capar le a changtu capar ah zei kong dah kan i ruah hna lai?

³ Mah cauk ah an min ṭial a simi vialte cu zungzal nunnak  an hmu lai tiah aamahkhaan a si maw? A phi kha Exodus 32:33 ah langhtermi Jehovah nih Moses sin a chimmi bia ah kan hmuh. Jehovah nih hitin a ti: “Ka cauk chungin a min ka hloh ding cu ka cung i a sualmi kha a si ko lai.” Cucaah Jehovah nih min pawl kha khedan in a ṭial hmasami bantukin mah cauk ah ṭialmi min pawl cu hloh khawh asiloah hnawh khawh a si. (Biat. 3:5) Mah cauk ah kan min a um zungzal nakhnga cahang in ṭialmi bantuk kan siter a hau.

⁴ Mah nih biahalnak cheukhat a chuahter. Tahchunhnak ah, nunnak cauk ah an min ṭial a simi le a si lomi hna kong he aa tlaiin Baibal nih zeidah a chim? Mah cauk ah an min a taangmi hna nih zeitik ah dah zungzal nunnak an hmuh lai? Jehovah kong hngalhnak caanṭha hmuh bal lo in a thimi hna tah zeitin? Cauk ah an min khumh a si kho lai maw? Mah biahalnak kong kha hi capar ah le a changtu capar ah kan i ruah hna lai.

Cauk Ah Ahote Min Dah A Um?

5-6. (a) Filipi 4:3 ah langhtermi bantukin nunnak cauk ah ahote min dah ṭial a si? (b) Zeitik ah dah nunnak cauk ah an min cu zungzal in ṭial a si lai?

⁵ Nunnak cauk ah ahote min dah ṭial a si? A phi hngalh awkah aa lo lomi phu panga kong kan i ruah hna lai. Mah lakin cheukhat i an min cu nunnak cauk ah ṭial a si i cheukhat cu ṭial a si lo.

⁶ A pakhatnak phu cu vancung ah Jesuh he uktu ṭuan awkah thimmi hna in dirhmi kha a si. Nunnak cauk ah an min cu ṭial a si maw? A si. Lamkaltu Paul nih Filipi khua i a “ṭuanhawi” pawl sin a chimmi bia ningin Jesuh he uktu ṭuan dingin thim a simi, chiti thuhmi hna i an min cu atu ah nunnak cauk ah aa ṭial. (Filipi 4:3 rel.) Asinain nunnak cauk ah an min umter peng an duh ahcun zumhfek tein an um peng a hau. Hmanung bik hmelchunhnak khenh an si hnuah an min cu mah cauk  ah zungzal in ṭial a si lai. Mah cu an thih hlan asiloah harnak nganpi aa thawk hlanah a si lai.—Biat. 7:3.

7. Tuudang lak i mibu nganpi cu nunnak cauk ah an min zungzal in ṭial a si lainak caan he aa tlaiin Biathlam 7:16, 17 in zeidah kan hngalh?

⁷ A pahnihnak phu ah tuudang lak i mibu nganpi an i tel. Atu ah an min cu nunnak cauk ah ṭial a si cang maw? A si. Armageddon in an luat hnuah tah nunnak cauk ah an min cu a um rih lai maw? A um lai. (Biat. 7:14) Jesuh nih mah tuu hna cu “zungzal nunnak” ah an kal lai tiah a ti. (Matt. 25:46) Asinain Armageddon in a luatmi hna nih zungzal nunnak kha an hmu colh lai lo. An min cu nunnak cauk ah khedan in ṭialmi bantuk a si lai. Kum Thongkhat Uknak chungah Jesuh cu “an tuukhal a si lai i nunnak tiput cerhkam ah a kalpi hna lai.” Khrih lamhruainak a zulmi le hmanung bik biaceihnak ah Jehovah cungah zumhfek tein a ummi hna cu nunnak cauk ah an min zungzal in khumh a si lai.—Biathlam 7:16, 17 rel.

8. Nunnak cauk ah ahote min dah ṭial a si lo, annih nih zeidah an ton lai?

⁸ A pathumnak phu ah Armageddon ah hrawh a si dingmi meheh an i tel. Nunnak cauk ah an min a um lo. Jesuh nih annih cu “zungzal hremhmun ah khan kalter an si lai” tiah a ti. (Matt. 25:46) Thiang thlarau forhfialnak in Paul nih “annih cu zungzal rawhralnak dantatnak kha an huah lai” tiah a ti. (2 Thes. 1:9; 2 Pet. 2:9) Hramhram in thiang thlarau ralchanh in sualnak a tuahmi hna ca zongah cutin a si ve lai. Annih zong zungzal nunnak si loin zungzal hrawhnak kha an hmu lai. Annih cu an tho lai lo ti a fiang. (Matt. 12:32; Mar. 3:28, 29; Heb. 6:4-6) Vawlei ah a tho ṭhan dingmi phu pahnih kong kha a dikthliar deuh in atu i ruah hna u sih.

A Tho Ṭhan Dingmi Hna

9. Lamkaltu 24:15 ah langhtermi ningin zei phu pahnih dah vawleicung ah a tho ṭhan lai, mah phu pahnih an i thleidannak cu zeidah a si?

⁹ Baibal nih vawlei ah zungzal nunnak ruahchannak he a tho ṭhan dingmi phu pahnih kong a chim, annih cu “miṭha” le “miṭhalo” kha an si. (Lamkaltu 24:15 rel.) “Miṭha” timi cu an rak nun lioah zumhfek tein Jehovah a biami kha an si. Mah he i ralkah in, “miṭhalo” timi cu an thih hlanah Jehovah a bia lomi kha an si. A tak ti ahcun an tuahsernak cu miṭha he an i thleidang tuk. An phuhnih in an thawh ṭhan lai caah nunnak cauk ah an min ṭial a si tiah ti khawh a si maw? A phi hngalh awkah phu pakhat cio kong kha i ruah hna u sih.

10. Zeicah “miṭha” cu an thawh ṭhan lai i an lak i cheukhat nih zei bantuk tinvo sung dah an hmuh lai? (Vawleicung thawhṭhannak he aa tlaimi “Careltu Hna Sinin Biahalnak” timi zong zoh.)

¹⁰ “Miṭha” cu a palinak phu ah an i tel. An thih hlanah nunnak cauk ah an min ṭial a si. An thih tikah an min cu cauk in hloh a si maw? A si lo, zeicahtiah annih cu Jehovah lung chungah an “nung” rih. Jehovah “cu a nungmi hna Pathian a si i a thimi hna Pathian a si lo . . . , zeicahtiah annih cu amah sinah cun mi vialte kha an nung dih.” (Luka 20:38) Miṭha mi cu vawleicung i an thawh ṭhan tikah an min cu a hmasa ah “khedan” in ṭial a si ko nain nunnak cauk ah hmuh a si lai. (Luka 14:14) Mah a tho ṭhanmi hna lakin cheukhat nih “vawlei dihlak uktu” rian an hmu lai ti cu a fiang ko.—Salm 45:16.

11. Nunnak cauk ah an min ṭial khawh a si nakhnga “miṭhalo” hna nih zeidah an cawn a herh lai?

¹¹ A donghnak ah, a panganak phu asimi “miṭhalo” kong kha i ruah hna u sih. Jehovah nawlbia kha an hngalh lo caah an thih hlanah miṭha mi nunning in an nung lo. Cucaah  nunnak cauk ah an min cu ṭial a si lo. Asinain Pathian nih a thawhter ṭhan hnanak thawngin nunnak cauk ah an min ṭial a si nakhnga caanṭha a pek hna. Mah “miṭhalo” hna nih bawmhnak tampi an herh lai. An thih hlanah an lak i cheukhat cu thil ṭihnung le thilṭhalo taktak a tuahmi an si. Cucaah Jehovah i a dingmi a phunglam ningin nun awkah cawnpiak an hau lai. Cutin tuah khawh awkah Pathian Pennak nih minung tuanbia ah a ngan bikmi fimcawnnak program kha lam a hruai lai.

12. (a) Miṭhalo pawl kha ahote nih dah an cawnpiak hna lai? (b) An cawnmi ningin nun a duh lomi hna cungah zeidah a cang lai?

¹² Miṭhalo kha ahote nih dah an cawnpiak hna lai? Mibu nganpi le a tho ṭhanmi miṭha pawl nih an cawnpiak hna lai. Miṭhalo pawl cu nunnak cauk ah an min ṭial a si nakhnga Jehovah he pehtlaihnak ṭha an ngeih a hau lai i Pathian sinah an i pumpek a hau lai. Cawnpiak an simi kong an lehrulh ning kha Jesuh Khrih le chiti thuhmi hna nih vancung in ṭha tein an zoh hna lai. (Biat. 20:4) Cu bantuk bawmhnak a cohlang duh lomi paoh cu kum 100 an si hmanhah hrawh an si lai. (Isa. 65:20) Jehovah le Jesuh nih minung lungthin kha an hmuh khawh i vawlei thar ah zei bantuk rawhnak paoh a chuahter khomi ahohmanh kha an awnh hna lai lo.—Isa. 11:9; 60:18; 65:25; Johan 2:25.

Nunnak Ca Le Sualphawtnak Ca Thawhṭhannak

13-14. (a) Johan 5:29 i Jesuh bia kha a hlanah zeitindah kan rak hngalhthiam? (b) Mah bia he aa tlaiin zeidah kan i cinken awk a si?

¹³ Jesuh nih vawleicung ah a tho ṭhan dingmi hna kong zong a chim. Tahchunhnak ah, hitin a ti: “Thlan chung i a ummi mithi vialte nih a aw an theih lai caan kha a ra lio, cun an thlan khan an chuak lai i ṭhatnak a tuahmi kha an tho lai i an nung lai; ṭhatlonak a tuahmi kha an tho ve lai i sualphawt an si lai.” (Johan 5:28, 29) Jesuh nih zeidah a chim duhmi a si?

 ¹⁴ A hlanah Jesuh chimmi mah bia nih an thawh ṭhan hnuah an tuah laimi thil kha a chim duhmi a si tiah kan rak hngalhthiam; mi cheukhat cu an tho ṭhan lai i thilṭha an tuah lai nain cheukhat cu an tho ṭhan lai i thilṭhalo an tuah lai tiah kan rak ruah. Asinain Jesuh nih cinkenmi thlan in a chuakmi hna nih thilṭha an tuah lai asiloah thilṭhalo an tuah lai tiah a chim lo ti kha i cinken. A luanciami caan a langhtermi biafang kha a hman. “Ṭhatnak a tuahmi” le “ṭhatlonak a tuahmi” hna kong a chim. Mah nih an thih hlan i an tuahsernak kha a langhter. Mah cu aa tlakmi a si ko lo maw? Zeicahtiah vawlei thar ah ṭhatlonak tuah awkah ahohmanh awnh an si lai lo. Cucaah mah ṭhatlonak an tuahmi cu miṭhalo pawl nih an thih hlanah an tuahmi a si lai. Cu a si ah “an tho lai i an nung lai” timi le “an tho ve lai i sualphawt an si lai” timi Jesuh bia nih zeidah a chim duhmi a si?

15. Ahote dah “an tho lai i an nung lai,” zeicah?

¹⁵ An thih hlanah ṭhatnak a tuahmi, miṭha pawl cu nunnak cauk ah an min ṭial a si cang caah “an tho lai i an nung lai.” Mah cu Johan 5:29 ah langhtermi “ṭhatnak a tuahmi” i thawhṭhannak cu Lamkaltu 24:15 ah langhtermi “miṭha” i thawhṭhannak he aa khat tinak a si. Mah hngalhthiamnak cu Rom 6:7 ah langhtermi bia he aa tlak, hitin a ti: “Minung cu a thih tikah cun sual ṭhawnnak chung khan a luat.” Cucaah miṭha mi cu a thih tikah Jehovah nih a sualnak kha a ngaihthiam, asinain a nun lio i a zumhfehnak vialte kha Jehovah nih a philh lai lo. (Heb. 6:10) A tho ṭhanmi miṭha pawl nih nunnak cauk ah an min kha umter peng an duh ahcun zumhfek tein an um peng a hau lai.

16. “An tho ve lai i sualphawt an si lai” timi nih zeidah a chim duhmi a si?

¹⁶ An thih hlanah ṭhatlonak a tuahmi hna tah zeitin? An thih tikah an sualnak cu ngaihthiam a si nain an nun lioah Jehovah kha zumhfek tein an rak bia lo. Cucaah nunnak cauk ah an min ṭial a si lo. “Ṭhatlonak a tuahmi” i thawhṭhannak cu Lamkaltu 24:15 ah langhtermi “miṭhalo” i thawhṭhannak he aa khat. Annih cu “an tho ve lai i sualphawt an si lai.” * Mah cu Jesuh nih miṭhalo kha ṭha tein a zoh hna lai i bia a ceih hna lai a ti duhnak a si. (Luka 22:30) Nunnak cauk ah an min ṭial dingin an i tlak maw, tlak lo ti biakhiah awkah a caan pek a hau lai. Mah miṭhalo hna nih a hlan i a ṭhalomi an nunning kha an hlawt i Jehovah sin an i pumpek lawngah nunnak cauk ah an min ṭial a si lai.

17-18. Vawlei ah a tho ṭhanmi dihlak nih zeidah an tuah a herh lai, Biathlam 20:12, 13 i “an tuah ning” timi nih zeidah a chim duhmi a si?

¹⁷ A hlanah miṭha an si ah siseh, miṭhalo an si ah siseh, a tho ṭhanmi hna nih kum 1,000 chungah kau a si laimi cauk thar ah a ummi nawlbia hna kha an zulh a hau lai. Lamkaltu Johan nih a hmuhmi langhnak kha hitin a fianter: “Mithi mi kha a ngan he, a hme he bawiṭhutdan hmai i an ṭhut kha ka hmuh. Cauk kha an kau hna, cun a dang cauk pakhat, nunnak cauk zong kha an kau ve. Mithi cu an rak tuahmi cauk chung i aa ṭial ning khan an bia an ceih hna.”—Biat. 20:12, 13.

¹⁸ A tho ṭhanmi hna kha zei “an tuah ning” cungah dah hrambunh in biaceih an si lai? An thih hlan i an tuahsernak cung in maw? A si lo! An thih tikah a hlan an sualnak in an luat ti kha i cinken. Cucaah “an tuah ning” timi cu a hmasa an nunnak i an tuahsernak kha a si  kho lo. Mah canah vawlei thar ah cawnpiak an simi an lehrulh ning, an tuahsernak kha a chim duhmi a si lai. Noah, Samuel, David le Daniel ti bantuk zumhfekmi pa hna hmanh Jesuh Khrih kong an cawng lai i tlanhnak man cungah zumhnak an ngeih a hau lai. Mah pa hna hmanh nih tampi cawn an hauh ahcun miṭhalo mi chinchin nih cun tam deuh in an cawn a hau lai!

19. A ṭha tukmi caanṭha a cohlang duh lomi hna cungah zeidah a cang lai?

¹⁹ Mah caanṭha a cohlang duh lomi cungah zeidah a cang lai? Biathlam 20:15 nih hitin a ti: “Nunnak cauk chungah an min aa ṭial lomi paoh cu mei tili chungah cun an paih hna.” A si, annnih cu zungzal ca in hrawh an si lai. Cucaah nunnak cauk chungah kan min ṭial a si nakhnga le a um peng nakhnga i zuam cu a biapi tukmi a si!

20. Kum Thongkhat Uknak chungah lung cawlcangh awk ngai a simi zei rian dah ṭuan a si lai? (A phaw hmanthlak zoh.)

²⁰ Kum Thongkhat Uknak cu zeitluk in dah lung a cawlcangh lai! Mah ah vawleicung i a um balmi lakah a ngan bikmi fimcawnnak program aa tel lai. Asinain miṭha mi le miṭhalo mi i an tuahsernak he aa tlaiin biaceihnak caan zong a um lai. (Isa. 26:9; Lam. 17:31) Mah fimcawnnak program cu zeitindah ṭuan a si lai? Mah a ṭha tukmi timhtuahnak kha hngalhthiam awk le sunsak awkah a changtu capar nih a kan bawmh lai.