Paul nih 1 Korin 15:8 ah hitin a ti: “A hmanung bik ah ka sinah a lang ve. Cuti a langh cu hawi hrin kel ning in hrin si lo khi a lo.” Paul nih vancung sunparnak he langhnak in Jesuh a hmuhnak kong kha a chim duhmi a si lai tiah hlanah kan rak fianter. Thlarau nunnak in thawhṭhannak cu kumzabu tampi hnuah aa thawk ding a si ko nain mah thil sining ruangah Paul cu hawi ning kel loin tuan deuh ah hrinmi asiloah thawhtermi bantuk a si tiah kan rak fianter. Asinain mah cacaang kha tam deuh in kan hlathlai tikah mah cacaang fianternak cu thlen a haumi a lo.

Paul nih amah aa thlennak kong a chim duhmi a si ti cu a hmaan. Asinain ‘hawi hrin kel ningin hrin si lomi’ ka lo a ti tikah zeidah a chim duhmi a si? A si khomi a kong tampi a um.

Aa thlennak cu ruahlopi in le khuaruahhar in a si. Hawi hrin kel ning loin tuan deuh ah hrinmi cu khuaruahhar thil pakhat a si tawn. Saul (a hnuah Paul tiah hngalhmi) cu Damaskas khua i Khrihfa pawl hrem dingin a kal lioah a tho ṭhanmi Jesuh kha ruahlopi in langhnak in a hmuh. Paul thlennak cu amah ca lawngah si loin cuka khua i hrem a timhmi Khrihfa hna ca zongah khuaruahhar a si. Mah lengah a hmuhtonnak cu khuaruahhar tuk a si i chikkhat chung a mit khua a rak hmu lo.—Lam. 9:1-9, 17-19.

“A caan lopi ah” aa thleng. ‘Hawi hrin kel ningin hrin si lomi’ tiah lehmi a hrampi Greek biafang kha “a caan lopi ah hrinmi” ti zongin leh khawh a si. The Jerusalem Bible nih mah kha hitin a langhter: “Ahohmanh nih an i ruahchan lomi caan ah hrinmi bantuk khi ka si.” Paul aa thlen lioah Jesuh cu vancung ah a kir ṭhan cang. A hmasa cacaang ah Paul nih a langhtermi hna he i lo loin a tho ṭhanmi Jesuh kha van i a kai hlanah a rak hmu lo. (1 Kor. 15:4-8) “A caan lopi ah” a lo ko nain Jesuh nih a thawhṭhan hnuah ruahlopi in Paul kha amah hmuhnak caanṭha a rak pek.

Toidor tein amah kong kha a rak chim. Baibal lei mifim cheukhat chimmi ningin hika i Paul hmanmi biafang cu sualphawtnak bantuk a lo kho. Mah cu Paul aa tinhnak sullam a si ahcun lamkaltu si awkah kaa tlak lo ti kha a hngalh. A tak ti ahcun hitin a chim: “Pathian Khrihfabu kha ka rak hrem hna i cucah cun lamkaltu vialte hna lakah nauta bik ka si—a ngaingai ti ahcun lamkaltu ti awk hmanh kaa tlak hrimhrim lo. Sihmanhsehlaw Pathian vel thawngin a tu i ka sining hi ka si.”—1 Kor. 15:9, 10.

Cucaah Paul nih a sinah Jesuh ruahlopi in le khulrang in a langhmi, a caan lopi ah aa thlenmi asiloah cu bantuk khuaruahhar langhnak hmuh awkah kaa tlak lo ti kha a chim duhmi a si men lai. Zeitin a va si hmanhah mah hmuhtonnak cu Paul caah a sunglawi tukmi a si. Mah nih Jesuh cu thihnak in a tho ṭhan ti kha lunghrin lo awkah a bawmh. Jesuh thawhṭhannak kong midang sin a chim tikah a caan lopi ah hmuhmi mah hmuhtonnak kong a rak cherhchan lengmangmi cu khuaruahhar awk a si lo.—Lam. 22:6-11; 26:13-18.