1, 2. (a) Jehovah Tehte Hna nih Baibal kha zeitindah an hmuh? (b) Baibal chung i zei cauk kha dah na duh bik?

Jehovah Tehte Hna nih Baibal kha kan sunsak. Baibal nih hnemhnak, ruahchannak le zumhawktlakmi lamhruainak hna a kan pek. (Rom 15:4) Baibal cu minung ruahnak in ṭialmi cauk a si lo, “Pathian bia” a si.—1 Thes. 2:13.

² Kan dihlak in kan duh khunmi Baibal caang hna an um. Mi cheukhat nih Thawngṭha cauk kha an duh. Mah cauk nih Jesuh sinin a langmi Jehovah sining hna kha a langhter. (Johan 14:9) Cheukhat nih “a um zau dingmi thil” hna a langhtermi Biathlam ti bantuk chimchungbia cauk hna kha an duh. (Biat. 1:1) Cheukhat cu Salm cauk an rel tikah hnemhnak an hmu i cheukhat cu Phungthlukbia cauk chung i ruahnak cheuhnak hna rel kha an duh. Cucaah Baibal cu mi zapi caah a si ti kha fiang tein a lang.

3, 4. (a) Bupi chuahmi cauk hna kha zeitindah kan hmuh? (b) Ahote caah tiah a bikin ṭialmi zei bantuk cauk hna dah kan hmuh?

³ Baibal kha kan sunsak caah Baibal hrambunh in chuahmi cauk pawl zong kan sunsak. Brochure, mekazin le a dang cauk  hna cu Jehovah sinin kan hmuhmi thlarau rawl an si. Mah nih Jehovah he a ṭhami pehtlaihnak ngeih awk le kan zumhnak feh awkah a kan bawmh.—Titas 2:2.

⁴ Kan cauk tam deuh cu a bik in Jehovah Tehte Hna caah ṭialmi an si. Asinain mino caah, nulepa caah ti in a hleiin chuahmi ca zong a um. Website cungah taarmi capar le video tam deuh cu Jehovah Tehte a si lomi hna caah a hleiin timhtuahmi an si. Mi vialte kha lamhruainak ka pek hna lai timi a biakam ningin Jehovah nih a tuah ti kha cu bantuk thlarau rawl nih an langhter.—Isa. 25:6.

5. Jehovah nih zeidah a sunsak?

⁵ Kan lak i tam deuh nih Baibal le bupi chuahmi cauk pawl relnak caah caan tam deuh in ngeih kan duh. Hmaan tein Baibal relnak le pumpak hlathlainak tuahnak thawngin kan caan ṭha tein kan hman tikah Jehovah aa lawm lai ti kha kan zumh khawh. (Efe. 5:15, 16) Bupi chuahmi cauk kip rel awkah a caan aa khat tein kan pe kho lai lo ti cu a hmaan ko. Asinain kan i ralrin ding a simi thil ṭihnung pakhat a um. Mah cu zeidah a si?

6. Jehovah pekmi thlarau rawl in ṭhatnak hmuh lo awkah zeinihdah a kan umter khawh?

⁶ Baibal chung i cauk cheukhat asiloah bupi chuahmi cauk cheukhat cu kanmah he aa pehtlai lo tiah fawi tein kan ruah khawh men. Tahchunhnak ah, Baibal cauk cheukhat cu kan sining he aa tlak lomi a lo men lai. Asiloah cauk pakhat cu a hleiin kanmah caah chuahmi a si men lai lo. Mah tikah a konglam hna kha a phungmen in na rel maw asiloah rel loin maw na um? Cutin a si ahcun ṭhatnak a kan pe hngami, a sunglawimi a kong hna in ṭhatnak na hmu kho ti lai lo. Ṭih a nungmi mah sining kha zeitindah na hrial khawh? Kan hmuhmi a konglam vialte cu Jehovah sinin a rami an si ti kha kan i cinken awk a si. Baibal ah hitin kan hmuh: “Keimah cu BAWIPA nan Pathian, nan ca ṭhatnak cawnpiak aan duhtu hna le nan zulh awk hnga lam aan hmuhsaktu hna ka si.” (Isa. 48:17) Jehovah pekmi thlarau rawl dihlak in ṭhatnak kan hmuh khawh nakhnga a kan bawm hngami ruahnak cheuhnak pathum kha hi capar ah kan i ruah hna lai.

7. Baibal kan rel tikah zeicah kan lung innka kan hun a herh?

⁷ Na lung innka hung law rel. Baibal cauk cheukhat cu mi pakhat caah asiloah miphun phunkhat caah ṭialmi a si ti cu a hmaan ko. Asinain Baibal nih “Cathing hi a dihlak in Pathian thawchuah hnawhmi a si i . . . a ṭhahnemmi a si” tiah fiang tein a ti. (2 Tim. 3:16) Cucaah Baibal kan rel tikah kan lung innka kan hun a hau. Unaupa pakhat cu Baibal a rel tikah Baibal caang pakhat chungin cawn awk tampi kaa lak khawh ti kha i cinken dingin aa zuam. Mah nih kaupi in hngalhthiam awkah a bawmh. Cucaah Baibal kan rel hlanah kan lung innka hunpiak awk le Jehovah nih hngalhter a kan duhmi kong hna hngalhthiam awkah fimnak kan pe tiah thla kan cam awk a si.—Ezra 7:10; Jeim 1:5 rel.

8, 9. (a) Baibal kan rel tikah zei biahalnak hna dah kan i hal awk a si? (b) Khrihfa upa tlinh hngami sining hna nih Jehovah kong zeidah a kan cawnpiak?

⁸ Biahalnak tuah. Baibal caang pakhat na rel tikah chikkhat i dinta law hitin i hal:  ‘Mah Baibal caang nih Jehovah kong zeidah a ka cawnpiak? Mah kong hi ka nunnak ah zeitindah ka hman khawh? Midang bawmhnak caah tah zeitindah ka hman khawh?’ Mah biahalnak hna kha kan ruah ahcun Baibal relnak in ṭhatnak tling kan hmu lai. Tahchunhnak ah, Khrihfa upa nih an tlinh hngami sining pawl kha Baibal nih a langhter. (1 Timote 3:2-7 rel.) Kan lak i tam deuh cu Khrihfa upa kan si lo caah mah Baibal caang cu kanmah he aa pehtlai lo tiah kan ruah khawh men. Asinain mah Baibal caang ah langhtermi sining hna in zeitindah ṭhatnak hmuh khawh a si ti hngalh awkah a cunglei biahalnak pathum kha i ruah hna u sih.

⁹ “Mah Baibal caang nih Jehovah kong zeidah a ka cawnpiak?” Khrihfa upa nih an tlinh hngami sining pawl kha Jehovah nih a langhter. Mah nih a sangmi phunglam an zulh nakhnga le zohchunhawk ṭha an si nakhnga Jehovah nih an sinin aa ruahchan ti kha a langhter. Pathian nih a “Fapa thihnak thawngin” a cawkmi Khrihfabu an pehtlaih ningin biaceih an si lai. (Lam. 20:28) Jehovah nih Khrihfa upa pawl zohkhenhnak tangah him tein umter a kan duh. (Isa. 32:1, 2) Cucaah Khrihfa upa pawl tlinh hngami sining nih Jehovah nih zeitluk in dah kan zawn a kan ruah ti kha a kan hngalhter.

10, 11. (a) Khrihfa upa nih tlinh hngami sining pawl kha kan nunnak ah zeitindah kan hman khawh? (b) Midang bawmhnak ah mah sining hna kha zeitindah kan hman khawh?

 ¹⁰ “Mah kong hi ka nunnak ah zeitindah ka hman khawh?” Khrihfa upa pawl nih an tlinh dingmi sining hna kha atu le atu ruat ṭhan in ṭhancho awkah an i zuam awk a si. “Khrihfabu hruaitu si duhnak” lungput a ngeimi nih mah sining pawl tlinh awkah a si khawh chungin an i zuam awk a si. (1 Tim. 3:1) Asinain mah sining hna cu Khrihfa dihlak he aa pehtlaimi a si. Tahchunhnak ah, a tlarimi si awk le a dingfelmi si awkah Jehovah nih kan dihlak sinin aa ruahchan. (Fil. 4:5; 1 Pit. 4:7) Khrihfa upa pawl cu tuurun caah ‘zohchunh awk’ ṭha an si ahcun an sinin kan cawn khawh i ‘an zumhnak kha kan i cawn’ khawh.—1 Pit. 5:3; Heb. 13:7.

¹¹ “Midang bawmhnak caah tah zeitindah ka hman khawh?” Khrihfa upa nih tlinh hngami sining pawl kha Baibal kan cawnpiakmi hna le lungthawhnak a ngeimi hna kha kan chimh khawh hna. Cun Khrihfa upa le biaknaklei hruaitu pawl an i dannak hngalhthiam awkah kan bawmh khawh hna. Mah sining pawl tuaktannak nih kan caah Khrihfa upa pawl zeitluk in dah rian an i zuam ti kha hngalhthiam awkah a kan bawmh lai i kan hun upat chin hna lai. (1 Thes. 5:12) Kan upat deuhdeuh hna tikah an rianṭuannak ah an i nuam deuhdeuh ve lai.—Heb. 13:17.

12, 13. (a) Kan hmuh khawhmi hriamnam hna hmangin zei kong hna dah kan hlathlai khawh? (b) Hnulei sining kong hna nih a lang lomi kong hna kha hngalhthiam awkah a kan bawmh khawhning kha tahchunhnak in chim.

¹² Hlathlainak tuah. Kan hmuh khawhmi hriamnam kha hmangin a tanglei biahalnak hna hi kan hlathlai khawh:

• Mah Baibal cauk hi aho nih dah a ṭial?

• Khoika ah le zeitik ah dah a ṭial?

• Mah Baibal cauk ṭial a si lioah a biapimi zei thil hna dah a cang?

Cu bantuk a kong hna nih a lang lomi kong hna kha hngalhthiam awkah a kan bawmh khawh.

¹³ Tahchunhnak ah, Ezekiel 14:13, 14 nih hitin a ti: “‘Ram pakhatkhat nih ka cung i zumhawktlak loin a umnak thawngin a sual tikah ka kut kha ka samh lai i nifate a rawl kha ka ṭhumh lai. A cungah mangṭam ka tlunter lai i minung he saṭil he ka thah hna lai. Noah, Daniel le Job, kha mi pathum hna hmanh kha nung rih hna sehlaw, anmah nunnak dah ti lo cu an dinnak nih khan ahohmanh a khamh kho hlei hna lai lo.’ Mah hihi Bawipa PATHIAN bia hrimhrim a si.” Hlathlainak tuah tikah mah bia hi BC 612 hrawngah Ezekiel nih a rak ṭialmi a si ti kha kan hngalh. Noah le Job cu an thihnak kum tampi a si cang ko nain Jehovah nih an zumhfehnak kha aa cinken rih. Asinain Daniel tu cu a rak nung rih. Noah le Job bantukin miding a si tiah Jehovah nih a ti lioah Daniel cu kum 20 hrawng a si men lai.  Mah in zeidah kan hngalh? Jehovah nih mino pawl telin zumhfekmi a salle vialte kha a hngalh hna i a sunsak hna.—Salm 148:12-14.

14. Mino caah chuahmi ca hna nih mino pawl kha zeitindah a bawmh hna, mah ca hna in midang nih tah zeitindah ṭhatnak an hmuh khawh? (A hramthawknak hmanthlak zoh.)

¹⁴ Mino caah chuahmi cauk. Baibal cauk in ṭhatnak kan hmu kho ti kha kan hngalh cang. Cu bantukin bupi chuahmi cauk pawl zong in ṭhatnak kan hmu kho. Tahchunhnak cheukhat kha zohhmanh hna u sih. Nai kum hna ah Jehovah nih mino pawl caah ca tampi a timhpiak hna.  ^[1] Mah ca hna nih sianginn ah tonmi hneknak le nungak tlangval sika ah tonmi zuamcawhnak hna kha tawnghtham khawh awkah mino pawl kha a bawmh hna. Asinain mah ca hna in kan dihlak zeitindah ṭhatnak kan hmuh khawh? Mah ca hna kan rel tikah mino pawl tonmi buaibainak hna kha kan hun hngalh i anmah bawmh awk le thapek awkah timhcia kan hung si lai.

15. Mino caah chuahmi a konglam hna kha upa pawl zong nih zeicah hngalh an duh awk a si?

¹⁵ Upa pawl nih mino caah chuahmi ca pawl rel ding kha an i nautat awk a si lo. Mah capar hna ah langhtermi buaibainak hna cu kan zapi he aa pehtlaimi a si. Tahchunhnak ah, kan dihlak in kan zumhnak kilven awk, kan intuarnak i uk awk, ṭhilrual hneknak doh awk le a ṭhalomi hawikom le nuamhsaihnak hna hrial awkah a herh. Cucaah cauk cheukhat cu mino pawl caah chuahmi a si ko nain Baibal phunglam cungah hram aa bunhmi a si caah kan zapi in ṭhatnak kan hmu kho.

16. Bupi chuahmi cauk hna nih mino pawl kha zeiti lam zongin dah a bawmh hna?

¹⁶ Mino caah chuahmi ca hna nih Jehovah he an i pehtlaihnak fehter awk zongah mino pawl kha a bawmh hna. (Phungchimtu 12:1, 13 rel.) Mah ca hna in upa pawl zong ṭhatnak an hmu kho. Tahchunhnak ah, 2009, April thla chuahmi I Hlau! ah “Mino Biahalnak . . . Baibal Relnak kha Zeitindah A Nuammi Ka Siter Khawh” timi capar aa tel. Mah capar ah bawmtu a simi ruahnak cheuhnak tampi aa tel i hlathlainak i hman awkah, riam in i fim khawhmi rinli kulh zong aa tel. Mah capar in upa pawl nih tah ṭhatnak an hmu kho maw? Fa a ngei cangmi nu pakhat nih hitin a chim: “Baibal rel cu ka caah a har tuk. Asinain capar ah aa telmi ruahnak cheuhnak le rinli kulh kha ṭha tein ka hman caah atu cu Baibal rel lai caan kha kaa ngaih tuk cang. Baibal cauk pakhat le pakhat aa pehtlaihning kha ka hngalhthiam caah ka mitthlam ah an hung cuang. Baibal rel awkah atu bantukin ka lung a cawlcang bal lo.”

17, 18. Zapi caah chuahmi cauk pawl relnak in zeitindah ṭhatnak kan hmuh khawh? Tahchunhnak chim.

¹⁷ Zapi caah chuahmi cauk. 2008 thawkin chuahmi cawn awk Vennak Innsang cauk cu a bik in Jehovah Tehte Hna caah chuahmi  a si. Mah lengah zapi caah chuahmi mekazin zong a um rih. Mah cauk hna in zeitindah ṭhatnak kan hmuh khawh? Tahchunhnak pakhat kha zohhmanh hna u sih. Lungthawhnak a ngeimi pakhat kha pumh na sawm i aa rak i pumh tikah naa lawm tuk. Phungchimtu nih phung a chimmi kha amah dirhmun in naa umter i naa ngaih. Mah tikah a konglam hna cu a hlan nakin na hun hngalhthiam deuh.

¹⁸ Zapi caah chuahmi cauk pawl kha na rel tikah cutin na si ve men lai. Tahchunhnak ah, zapi caah chuahmi Vennak Innsang le jw.org ah taarmi Baibal kong hna cu Jehovah Tehte a si lomi nih an hngalhthiam hngami biafang pawl in ṭial a si. Mah a konglam hna kan rel tikah kan hngalh ciami Baibal biatak hna kha kan hun hngalhthiam chin i kan sunsak chin. Cun kan zumhnak kha phungchimnak ah zei bantuk lam in dah kan fianter lai ti kha kan hun hngalh khawh. I Hlau! mekazin zong nih Sertu a um timi kan zumhnak kha a fehter chin. Mah lengah kan zumhnak kilven awk zongah a kan bawmh.—1 Piter 3:15 rel.

19. Jehovah nih a kan pekmi thlarau rawl caah kan i lawmhnak kha zeitindah kan langhter khawh?

¹⁹ Jehovah nih kanmah ṭhatnak caah ruahnak cheuhnak le lamhruainak tampi a kan pek ti cu a fiang ko. (Matt. 5:3) Jehovah nih a kan timhpiakmi vialte kha rel hna u sihlaw hmang zungzal hna u sih. Cutin kan tuah ahcun ṭhatnak kan hmu lai i Jehovah nih a kan pekmi thlarau rawl vialte ca kan i lawmhnak zong kan langhter a si lai.—Isa. 48:17.