Israel mi cu Biakammi Ram ah an kir ṭhan lai i miphun pakhat in an i fonh ṭhan lai tiah profet Ezekiel hmangin Jehovah nih a chimchung. Mah chimchungbia nih donghnak caan ah Pathian miphun cu miphun pakhat in lungrual tein an um lai ti zong a langhter.

Jehovah nih Ezekiel kha fung pahnih cungah ca a ṭialter. Pakhat cungah “Judah le a hawikom Israel mi hna caah” tiah a ṭialter i a dang pakhat ah “Josef, (Efraim fung) le amah he aa kommi Israel chungkhar vialte caah” tiah a ṭialter. Mah fung pahnih kha “pakhat ah” an i can nakhnga Ezekiel nih a komh.—Ezek. 37:15-17.

 “Efraim” timi nih zeidah a aiawh? Efraim cu chaklei Israel phunhra pennak lakah a laar bikmi miphun a si. Mah pennak i a hmasa bik siangpahrang Jeroboam cu Efraim phun a si. (Deut. 33:13, 17; 1 Si. 11:26) Mah miphun cu Josef fapa Efraim tefa an si. (Nam. 1:32, 33) Josef cu a pa Jakob sinin thluachuah a hleiin a hmumi a si. Cucaah “Efraim fung” nih chaklei phunhra pennak kha a aiawh tiah ti cu aa tlak. Ezekiel nih mah chimchungbia a chim hlanpi, BC 740 ah Assiria nih chaklei Israel pennak kha a tei i mi kha sal ah a kalpi hna. (2 Si. 17:6) A hnuah Assiria kha Babilon nih a tei. Cucaah Ezekiel nih fung pahnih kong chimchungbia a chim lio caan ah Israel mi tam deuh cu Babilon Empire chungah an i ṭhenṭhek dih cang.

BC 607 ah Babilon nih thlanglei Judah phunhnih pennak kha a tei i mi kha sal ah a kalpi hna. Chaklei Israel pennak i a um rihmi hna zong kha a rak kalpi men hna lai. Thlanglei pennak i siangpahrang hna cu Judah phun an si. Tlangbawi cu Jerusalem biakinn ah rian an ṭuan caah Judah ah an um ve. (2 Chan. 11:13, 14; 34:30) Cucaah ‘Judah caah’ timi fung nih thlanglei phunhnih pennak kha a aiawh tiah ti cu aa tlak.

Mah fung pahnih cu zeitikah dah an i komh? Biakinn sak ṭhan awkah chaklei pennak le thlanglei pennak i mi hna sal sinak in Jerusalem ah an kirṭi caan BC 537 ah a si. Israel miphun cu an i ṭhencheu ti lo. Jehovah kha hmunkhatte ah an biakṭi ṭhan cang. (Ezek. 37:21, 22) Mah kong kha profet Isaiah le Jeremiah zong nih an rak chimchung.—Isa. 11:12, 13; Jer. 31:1, 6, 31.

Mah chimchungbia nih a hmaanmi biaknak he aa tlaiin zeidah a langhter? Jehovah nih amah a biatu hna kha miphun “pakhat” ah a ser hna lai ti a langhter. (Ezek. 37:18, 19) Mah chimchungbia cu tuchan ah a tling maw? 1919 thawkin a tling. Mah hlanah Satan nih Pathian miphun kha a zungzal in ṭhencheuter awkah aa zuam. Nain 1919 ah Pathian miphun cu duhsah in dirh ṭhan an si i komh an si.

Mah lio caan ah Pathian miphun tam deuh cu vancung ah Jesuh he siangpahrang le tlangbawi ṭuan awk ruahchannak a ngeimi an si. (Biat. 20:6) Annih cu ‘Judah caah fung’ an si. Asinain caan a hun liam tikah an sinah aa fonhmi vawlei ruahchannak a ngeimi an hun tam chin. (Zekh. 8:23) Annih cu ‘Josef fung’ bantuk an si.

Tuchan ah Siangpahrang Jesuh Khrih kuttang ah an phuhnih in Jehovah kha lungrual tein an biakṭi. Ezekiel chimchungbia ah Jesuh cu “ka sal David” tiah auh a si. (Ezek. 37:24, 25) Jesuh nih a zultu hna he aa tlaiin a Pa sinah hitin thla a cam: ‘Ka Pa, keimah cu nangmah chungah ka um i nangmah cu keimah chungah na um bantuk hin annih zong an dihlak in pakhat an si nakhnga thla ka cam.’ * (Johan 17:20, 21) Tuurun hmete a simi chiti thuhmi hna cu “tuu dang” he “tuurun runkhat” an si lai tiah Jesuh nih a chimchung. An dihlak in “tuukhal pakhat” hnu an zulh lai. (Johan 10:16) Jesuh nih a chim bantukin vancung ruahchannak a ngeimi an si ah, vawlei ruahchannak a ngeimi an si ah, tuchan Pathian miphun dihlak cu an lung aa rual.