1, 2. (a) Jesuh chimmi mitsur dum ngeitu bianabia kha chim. (b) Mah bianabia nih Pathian zaangfahnak le velngeihnak kong kha zeitindah a langhter?

MITSUR dum ngeitu cu zingkate ah dawr ah a kal i rianṭuantu ding kha a kawl hna. Rianṭuan man zeizat kaan pek hna lai tiah a ti i mah hna nih cun an cohlan. Asinain dum ngeitu nih rianṭuantu tam deuh a herh caah mah ni ah dawr ah a kal ṭhan lengmang i rianṭuantu ding a kawl hna. Anmah zong kha rianṭuan man a tawkzawn in kaan pek hna lai tiah a ti hna. Zanlei ah dum ngeitu nih rianṭuantu vialte kha ṭuan man pek awkah a pumh hna. Chun nitlak a ṭuanmi an si ah, suimilam pakhat lawng a ṭuanmi an si ah an dihlak in ṭuan man aa zat tein a pek hna. Chun nitlak a ṭuanmi hna an phunzai tikah dum ngeitu nih ‘cu zat kaan pek hna lai ka timi kha nan hna a tla, a si lo maw? Ka rianṭuantu hna kha ka duh zat in peknak nawl  ka ngei a si ko lo maw? Zaangfah a hmangmi ka si caah zeicah nan nah a chuah?’ tiah a ti hna.—Matt. 20:1-15.

² Jesuh chimmi bianabia nih Jehovah “vel” kong a kan cawnpiak. (2 Korin 6:1 rel.) Suimilam pakhat lawng rian a ṭuanmi hna cu rianṭuan man tling tein hmuh awkah aa tlak lomi an lo. Asinain dum ngeitu nih an cungah a hleikhunmi zaangfahnak a langhter. Baibal chung i “vel” timi biafang he aa tlaiin mifim pakhat nih hitin a ṭial: “Mah biafang cu mi pakhat nih hmuh awkah aa tlak lo buin le aa zuamnak ruangah si loin man loin a hmuhmi laksawng timi sullam a ngei.”

3, 4. Jehovah nih mi vialte cungah zeicah velngeihnak a langhter, zeitindah a langhter?

³ Baibal nih Pathian vel cu man loin hmuhmi “laksawng” a si tiah a ti. (Efe. 3:7) Jehovah nawl tling tein kan ngaih khawh lo caah a zaangfahnak hmuh awkah kan i tlak lo. Siangpahrang Solomon nih “ṭhatnak a tuah zungzal i a sual bal lomi miding pakhat hmanh vawleicung ah hin an um hrimhrim lo” tiah a ti. (Pct. 7:20) A hnuah lamkaltu Paul nih “mi vialte cu kan sual dih cio ko i Pathian sunparnak kha kan bau dih cio ko,” “sualnak man cu thihnak a si” tiah a ti. (Rom 3:23; 6:23a) Mah cu hmuh awkah kan i tlakmi a si.

⁴ Jehovah nih minung a kan dawt tuk caah kanmah ca i thih awkah “a Fapa ngeihchunte” kha a thlah. Mah cu Jehovah langhtermi a ngan bikmi vel a si. (Johan 3:16) Paul nih Jesuh he aa tlaiin hitin a chim: ‘Pathian vel thawngin mi vialte kan caah a thi. Cun thihnak a inmi ruangah khan atu cu sunparnak le upatnak kha luchin ah chinh a si cang.’ (Heb. 2:9) “Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si.”—Rom 6:23b.

5, 6. (a) Sualnak nih a kan uk tikah zeidah kan ton? (b) Pathian vel nih a kan uk tikah zei ṭhatnak dah kan hmuh?

⁵ Zeicah kan sual i kan thih? Baibal nih ‘mipa pakhat [Adam] sualnak thawngin thihnak nih khan minung cu uk hram a hun thawk hna’ tiah a ti. Kannih cu Adam tefa kan si caah mitling lo kan si i kan thihmi a si. (Rom 5:12, 14, 17) Asinain sualnak nih a kan uk nakhnga lo kan i thim khawh. Khrih tlanhnak man kha kan zumhnak thawngin Jehovah velngeihnak kha kan i ukter khawh. Mah cu zeitindah a si khawh? “Sualnak a karhnak hmun ah khan Pathian vel cu a karh chinchin ve. Cucaah sualnak nih cun thihnak kha hmangin a kan uk bantukin Pathian vel nih cun dinnak kha hmangin a kan uk i Jesuh Khrih kan Bawipa thawngin zungzal nunnak ah a kan kalpi.”—Rom 5:20, 21.

⁶ Misual kan si rih ko nain sualnak kha kan i ukter awk a si lo. Cucaah palhnak kan tuah tikah Jehovah ngaihthiamnak kan hal awk a si. “Sualnak nih cun in uk hrimhrim ti hna hlah seh, zeicahtiah nawlbia tangah nan um ti ṭung lo, Pathian vel tangah pei nan um cang  cu” tiah Paul nih ralrin a kan pek. (Rom 6:14) Cu a si ah Pathian vel thawngin zeitindah ṭhatnak kan hmuh khawh? Paul nih hitin a chim: “Pathian vel nih cun Pathian zeirel loin kan um tawnnak le hi vawleicung pumsa duhnak hlawt kha a kan cawnpiak i hi vawleicung ah hin mahle mah aa uk khomi si awk le ding tein nun le Pathian ṭihzah in um kha a kan forh.”—Tit. 2:11, 12.

7, 8. Jehovah vel cu ‘lam a phunphun in langhter’ a si timi cu zei sullam dah a ngeih? (A hramthawknak hmanthlak zoh.)

⁷ Lamkaltu Piter nih hitin a ṭial: ‘Lam a phunphun in langhtermi Pathian vel a hmumi, laksawng kengtu ṭha nan si bantukin nan hmuhmi laksawng kha midang ṭhatnak caah hmang cio u.’ (1 Pit. 4:10, NW) Jehovah vel cu ‘lam a phunphun in langhter’ a si timi cu zei sullam dah a ngeih? Kan nunnak ah zei bantuk harnak kan ton hmanhah inkhawh awkah Jehovah nih a kan bawmh lai tinak a si. (1 Pit. 1:6) Zei bantuk hneksaknak kan ton hmanhah kan tei khawh nakhnga Pathian nih kan herhmi te kha a kan pek zungzal lai.

⁸ Lamkaltu Johan nih hitin a ṭial: “A liam in a liammi a vel chung cun thluachuahnak kha pakhat hnu pakhat a kan pek lengmang.” (Johan 1:16) Jehovah nih a vel kha lam a phunphun in a langhter caah thluachuah tampi kan hmu. Cheukhat cu zeidah an si?

9. Jehovah vel in zeitindah ṭhatnak kan hmuh, mah caah kan i lawmh kha zeitindah kan langhter khawh?

⁹ Jehovah nih kan sualnak a kan ngaihthiam. Jehovah cu vel a ngeimi a si caah kan sualnak kha a kan ngaihthiam. Asinain kan i ngaihchih i sual tuah duhnak lungput kha kan doh peng lawngah a kan ngaihthiam lai. (1 Johan 1:8, 9 rel.) Jehovah nih sualnak zeitindah a ngaihthiam ti kha Paul nih a dang chiti thuhmi hna sinah hitin a fianter: “[Pathian] nih cun muihnak ṭhawnnak chung khan a kan chuah i a dawtmi a Fapa pennak chungah khan him tein a kan luhpi i a Fapa thawng cun luatnak kan hmu i kan sualnak cu ngaihthiam kan si.” (Kol. 1:13, 14) A zaangfahnak cungah kan i lawmh caah Pathian kha thangṭhat kan duh. Jehovah nih kan sualnak a kan ngaihthiam caah a dang thluachuah tampi zong kan hmu kho.

10. Pathian vel thawngin zei thluachuah dah kan hmuh?

¹⁰ Pathian he pehtlaihnak ṭha kan ngei kho. Mitlinglo kan si caah kan chuahka in Pathian ral kan si. Asinain Paul nih hitin a ti: “Kannih cu Pathian ral kan rak si, sihmanhsehlaw a Fapa thihnak thawngin a hawi ah a kan  ser cang.” (Rom 5:10) Tlanhnak man thawngin Pathian he remnak kan hmu, pehtlaihnak ṭha kan ngei i a hawi kan si kho. Mah cu Jehovah vel he zeitindah aa pehtlaih ti kha Paul nih hitin a fianter: “Atu cu zumhnak thawngin thiam coter kan si caah kan Bawipa Jesuh Khrih thawngin Pathian he kan i rem. Jesuh Khrih nih cun kan zumhnak thawngin Pathian velngeihnak chungah cun a kan luhpi i cu chungah cun atu hi kan um.” (Rom 5:1, 2) Jehovah he pehtlaihnak ṭha kan ngeihmi cu i lawmh awk taktak a si.

11. Chiti thuhmi hna nih “tuu dang” kha zeitindah lam ding ah an hruai hna?

¹¹ Pathian hmaiah miding kan si kho. Donghnak caan ah “hruaitu fim” a simi chiti thuhmi hna nih ‘mi tampi kha lam ding ah an hruai’ hna lai tiah profet Daniel nih a chimchung. (Daniel 12:3 rel.) Chiti thuhmi hna nih cutin zeitindah an tuah? Phungchimnak le cawnpiaknak thawngin “tuu dang” nuai tampi kha Jehovah hmaiah a dingmi si awkah an bawmh hna. (Johan 10:16) Asinain mah sining cu Jehovah vel ngeihnak thawng lawngin hmuh khawh a si. “Kannih a kan tlantu Jesuh Khrih thawngin Pathian nih a vel cu a lak tein a kan pek i amah Pathian he cun a kan remter” tiah Paul nih a fianter.—Rom 3:23, 24.

12. Thlacamnak cu Pathian vel he zeitindah aa pehtlaih?

¹² Thlacamnak in Pathian kan naih khawh. Jehovah velngeihnak thawngin a sinah thla kan cam khawh. Paul nih Jehovah bawiṭhutdan kha “vel a umnak Pathian bawiṭhutdan” tiah a auh i cuka  ah va “fuh” awkah a kan sawm. (Heb. 4:16a) Jesuh min in Jehovah sinah zeitik caan paohah thla kan cam khawh. Mah cu tinvo sung taktak a si. “Amah kan zumhnak thawngin Pathian umnak chungah ṭih lo tein luh ngamnak luatnak kan ngei.”—Efe. 3:12.

13. Pathian vel nih “kan herh lio caante ah” zeitindah a kan bawmh khawh?

¹³ Kan herh caante ah bawmhnak kan hmu kho. Bawmhnak kan herh tik caan paohah Jehovah sinah thlacam awkah Paul nih a kan forh. “Khika ah kan herh lio caante ah Pathian zaangfahnak le vel cu kan hmuh lai.” (Heb. 4:16b) Kan nunnak ah harnak kan ton tik caan paohah Jehovah sinah bawmhnak kan hal khawh. Jehovah cu kan thlacamnak leh awkah rian a ngei lo nain a kan leh. Unau pawl hmangin a kan bawmh khawh. Jehovah nih kan thlacamnak a kan leh caah “Bawipa cu a ka bawmtu a si, zeihmanh ka ṭih lai lo. Minung nih ka cungah zeidah an tuah khawh lai?” tiah ralṭha tein kan chim khawh.—Heb. 13:6.

14. Jehovah vel thawngin zeitindah ṭhatnak kan hmuh?

¹⁴ Hnemhnak kan hmu. Lungrethei awlokchong in kan um tik caan paohah Jehovah nih a kan hnemhmi cu thluachuah taktak a si. (Salm 51:17) Thesalon khua i Khrihfa hna hremnak an ton lioah Paul nih hitin ca a kuat hna: “Kannih a kan daw i vel a kan ngeih caah hnangamnak le ruahchannak a ṭhami a kan pe zungzaltu Bawipa Jesuh Khrih le Pathian kan Pa nih . . . ralṭhatnak in pe ko hna seh.” (2 Thes. 2:16, 17) Jehovah dawtnak le zohkhenhnak kan hmuhmi hi a velngeihnak thawngin a si ti kan hngalhmi cu hnangam awk taktak a si.

15. Pathian vel thawngin zei ruahchannak dah kan ngeih?

¹⁵ Zungzal nunnak ruahchannak kan ngei. Mitlinglo kan si caah Jehovah bawmhnak loin cun ruahchannak kan ngei kho lo. (Salm 49:7, 8 rel.) Asinain Jehovah nih a ṭha tukmi ruahchannak a kan pek. Mah cu zeidah a si? ‘Fapa kha a ka hmu i a ka zummi paohpaoh cu zungzal nunnak hmuhter kha ka Pa nih a duhmi cu a si’ tiah Jesuh nih a ti. (Johan 6:40, NW) Jehovah vel thawngin zungzal nunnak ruahchannak kan ngei. “Pathian nih a vel cu mi vialte khamhnak caah a phuan cang” tiah Paul nih a chim.—Tit. 2:11.

16. A hmasa Khrihfa hna nih Pathian vel kha zeitindah an nihsawh?

¹⁶ Jehovah vel thawngin thluachuah tampi kan hmu. Asinain Pathian vel kha ningcang loin, phundang cun sual thuhnak caah kan hman awk a si lo. A hmasa Khrihfa hna lakah ‘an ziaza ṭhalo thuhphenhnak caah Pathian vel kong a hmaan loin a chimmi’ cheukhat an rak um. (Judas 4) Mah zumhfek lomi Khrihfa hna nih sualnak kan tuah khawh i Jehovah nih a kan ngaihthiam zungzal lai tiah an ruah khawh men. Unau dang hmanh kha anmah bantukin tuah awkah  an leem hna. Tuchan zongah cutin a tuahmi hna cu ‘vel a ngeimi thlarau kha an nihsawhmi’ a si.—Heb. 10:29.

17. Piter nih zeitindah ralrin a kan pek?

¹⁷ Satan nih tuchan Khrihfa hna kha sualnak kan tuah khawh i Jehovah nih a kan ngaihthiam colh ko lai tiah ruah awkah a hlen hna. Jehovah nih sualnak aa ngaichihmi kha a ngaihthiam hna nain sual tuah duhnak lungthin kha fakpi in doh awkah kan sinin aa ruahchan. Jehovah nih Piter kha hitin ṭial awkah a forh: “Ka hawile hna, nannih nih cun hihi nan hngalh cang. Cucaah cun nawlbia zeihmanh ah a rel lomi pawl an palhnak nih khan a ping ah aan hruai sual hna nakhnga lo le him tein nan umnak hmun ah khan nan um i nan tlak sual nakhnga lo, ralring tein um ko u. Kan Bawipa le kan Khamhtu Jesuh Khrih vel le hngalhnak ah khan ṭhang ko u.”—2 Pit. 3:17, 18.

18. Jehovah vel ruangah zei rian hna dah kan ngeih?

¹⁸ Jehovah vel ruangah kan i lawm tuk. Cucaah kan hmuhmi laksawng kha Jehovah thangṭhatnak ca le midang bawmhnak ca i hman awkah rian kan ngei. Zeitindah kan hman khawh? Paul nih hitin a chim: “Cucaah laksawng phun dangdang kan hmuh ciomi cu Pathian nih a kan pekmi vel kan hmuhning cio in hmang hna u sih. Laksawng kan hmuhmi cu . . . midang ca rianṭuan kha a si ahcun, cuticun kan ṭuan awk a si; cawnpiak kha a si ahcun kan cawnpiak hna awk a si; midang thazaang pek kha a si ahcun kan pek hna awk a si, . . . midang zaangfah kha a si ahcun lunglawm tein kan zaangfah hna awk a si.” (Rom 12:6-8) Jehovah vel ruangah phungchim rian fakpi in ṭuan awk, Baibal cawnpiak awk, unau pawl thazaang pek awk le kan thin a kan huntermi hna kha ngaihthiam awkah rian kan ngei.

19. A hnu capar ah zei rian kong dah kan i ruah lai?

¹⁹ Kan hmuhmi Jehovah vel cungah kan i lawmh ahcun “Pathian velngeihnak thawngṭha chim” awkah kan si khawh chung i zuam dingin a kan forh lai. (Lam. 20:24) Mah rian kong kha a hnu capar ah kan i ruah lai.