Mah bia cu na hna a tla maw? Samantha bantukin kan dihlak in caan khatkhat paoh cu a harmi thil sining kan tong. A ding lomi thil a kan tuahter khomi thil sining kan lehrulhning nih zei bantuk phunglam dah kan i tlaih ti kha a langhter. Tahchunhnak ah, kan ning a zak sual lai, hmaichiatnak kan tong sual lai ti phan ah a ding loin thil tuah cu a palh lo tiah kan ruah men lai. Asinain a ding loin kan tuahmi thil nih a hnuah a ṭha lomi thil sining a chuahter. A tanglei kong hna hi ruathmanh.

Pehtlaihnak timi cu zumhnak in dirhmi a si. Pakhat le pakhat an i zumh tikah i bochannak le himnak a um. Asinain i zumhnak cu khulrang in a ṭhangmi a si lo. Mahzawn lawng ruat loin le dingfel tein caan saupi an i pehtlaih hnu lawngah zumhnak timi cu a hung um. Asinain a ding lomi tuahsernak pakhat ruangah an i zumhnak cu a rawk cikcek kho. An i zumhnak a rawh ahcun pakhat le pakhat i zumh ṭhan awkah a har tuk cang lai.

Hawikom ṭha tiah na ruahmi pakhat nih aan hleng bal maw? Aan hlen bal ahcun zeitindah na um? Na lung a fak tuk ko lai i a ka rawi ti hmanhin na ruah ko lai. Mah cu a phung a si ko. Kum tampi chung rak dirhmi pehtlaihnak cu dinfel lonak ruangah a rawk kho ti cu lunghrin awk a um lo.

California Sianghleiruun i chawlehnak kong a cawnpiaktu saya Robert Innes nih hlathlainak a tuahmi ah “dinfel lonak cu chawnh a fawi tuk” ti kha a hmuh. Dinfel lonak cu zawtnak rungrul bantukin chawnh a fawi tuk caah a dingfel lomi hna he naa pehtlaih deuhdeuh ahcun nangmah theng zong a ding lomi na hung si deuhdeuh ve lai.

Dinfel lonak rap i tlak lo awkah zeitindah na hrial khawh? Baibal nih aan bawmh khawh. Baibal phunglam cheukhat hi ruathmanh.