BAIBAL PHUNGLAM: “Nan nunnak ding . . . kong ah lungrethei awlokchong in va um hlah u.”—Matthai 6:25.

Zeidah a chim duhmi a si? Jesuh nih mah bia hi Tlangcung Cawnpiaknak ah a chimmi a si. Baibal dictionary pakhat nih “lungrethei” tiah lehmi Greek biafang nih “nifate tonmi sifahnak, mangṭam le a dang harnak hna ruangah a chuakmi intuarnak” kha a chimduhmi a si tiah a fianter. Hmailei ca i lungretheih zong hi lungretheihnak phunkhat a si ve. Khuasak tintuknak ca le kan dawtmi hna ṭhatnak caah lungretheih cu a phung a si ko. (Filipi 2:20) Asinain Jesuh nih a zultu pawl kha “lungrethei in um hlah ngat u” tiah a timi hna cu a hleihluat tuk in lungretheih lo awkah ruahnak a cheuhmi hna a si. Nihin an i lawmhnak tlau tiangin thaizing caah lungretheih tuk lo awkah a timi hna a si.—Matthai 6:31, 34.

Tuchan caah hman awk a tlak maw? Jesuh ruahnak cheuhnak zulh cu fim a si. Zeicah? A hleihluat tuk in lungretheih a hmangmi hna cu an pum chungah amah tein rian a ṭuanmi thahri (sympathetic nervous system) a kalning a ṭhat ti lo caah “hnai a khuarmi hma, lung zawtnak le khuhhrin zawtnak ti bantuk zawtnak an ngei kho” tiah cherhchanmi cauk cheukhat nih an ti.

A hleihluat tuk in lungretheihnak kan hrial awk a sinak a ruang kha Jesuh nih a chim. A hleihluat tuk in lungretheih cu san a tlai lo. “Nan lungre a theih le nan awlok a chon thawngin nan nunnak tlawmte tal a sauter kho deuhmi aho tal nan um maw?” tiah Jesuh nih a ti. (Matthai 6:27) Lungretheih tuknak nih kan nunnak kha second pakhat hmanh a sauter deuh lo i ngandam deuh awk zongah a tuah kho lo. Mah lengah thil sining kip ah kan lungre a theih tlukin a cang lomi thil a tam. Baibal lei mifim pakhat nih hitin a ti: “Hmailei kong ah lungretheih tuk cu san a tlai lo. Kan tonmi thil zong kan i ruah tlukin a chia lo.”

Lungretheihnak kha zeitindah kan hrial khawh? Pakhatnak ah, Pathian i bochan. Pathian nih va kha rawl a pek hna i pangpar kha dawh tein a thuamh hna ahcun an nunnak ah Pathian pakhatnak ah a chiami hna i an herhmi cu pe loin a um hnga maw? (Matthai 6:25, 26, 28-30) Pahnihnak ah, nikhat ca lawng ruat. Jesuh nih hitin a ti: “Thaizing kong ah lungrethei in um hlah u; thaizing nih cun lungretheihnak cu a za in aa ngeih ve ko lai. Nikhat nih a chuahpimi harnak cung i a dang chonh chih lengmang hi a herh lo.” Mah bia hi na hna a tla ve ko lo maw?—Matthai 6:34.

Jesuh ruahnak cheuhnak kan zulhnak thawngin kan pum a hnorsuang hngami thil kha kan hrial khawh. Mah lengah Baibal nih “Pathian daihnak” tiah a timi lungdaihnak zong kan hmu lai.—Filipi 4:6, 7.