1. Jehovah sin thlacamnak caanṭha kha zeitindah kan hmuh awk a si?

 VAN le vawlei Sertu nih thlacamnak in amah sin naih khawhnak tinvo sung a kan pek. Mah hi ruathmanh: Nawl hal hmasa hau loin zeitik caan paoh le zei holh paohin Jehovah sinah kan lung chung i a ummi kha kan phuan khawh. Siizung ihkhun cung in siseh, le thonginn chungin siseh thla kan cam kho i dawtnak a ngeimi kan Pa nih a kan ngaihpiak lai ti kha kan zumh khawh. Mah tinvo sung caah kan i lawm tuk.

2. Siangpahrang David nih thlacamnak tinvo sung a sunsak kha zeitindah a langhter?

² Siangpahrang David nih thlacamnak tinvo sung kha a sunsak tuk. Jehovah sinah hitin hla a sa: “Ka thlacamnak cu zihmui bangin ka cohlanpiak.” (Salm 141:1, 2) David chan ah tlangbawi pawl nih a hmaanmi biaknak caah an hmanmi a thiangmi zihmui cu ṭha tein timhtuah a si. (Ex. 30:34, 35) Zihmui sertu hna nih ṭha tein an timhtuah bantukin David nih Jehovah sin thla a cam tikah a chim dingmi kong kha ṭha tein ruah a duh. Kannih zong cutin tuah kan duh ve. Kan thlacamnak in Jehovah lung lawmhter kan duh.

3. Jehovah sin thla kan cam tikah zei bantuk lungput in dah kan cam awk a si i zeicah?

³ Jehovah sin thla kan cam tikah a hleiin upatnak kan langhter awk a si. Isaiah, Ezekiel, Daniel le Johan nih an hmuhmi langhnak kong kha ruathmanh. Mah langhnak hna cu pakhat le pakhat an i lo lo nain aa lomi thil pakhat a um. An dihlak in  Jehovah kha rumra a ngei tukmi Siangpahrang in an langhter. Isaiah nih ‘a sang i aa hlorhmi a bawiṭhutdan cungah a ṭhumi’ Jehovah kha a hmuh. (Isa. 6:1-3) Ezekiel nih Jehovah cu leng kekual cungah a ṭhu i “chuncha a chuah bantuk khin a velchum i a ceumi” kha a hmuh. (Ezek. 1:26-28) Daniel nih puan raang aa hrukmi le a bawiṭhutdan in meizik a chuakmi, “zungzal in a nungmi” kha a hmuh. (Dan. 7:9, 10) Cun Johan nih aa dawh tukmi, emaral lungvar mui a kengmi, chuncha aa zelmi bawiṭhutdan cungah a ṭhumi Jehovah kha a hmuh. (Biat. 4:2-4) Tluktu a ngei lomi Jehovah sunparnak kong kan ruah tikah thlacamnak in amah naih khawhnak cu tinvo sung tatak a si ti le upatnak he cutin tuah cu a biapi tukmi a si ti kha a kan hngalhter. Cu a si ah zeitindah thla kan cam awk a si?

4. Matthai 6:9, 10 ah hmuhmi Bawipa thlacamnak i a hramthawknak bia hna in zeidah kan cawn khawh?

⁴ Matthai 6:9, 10 rel. Tlang cung Cawnpiaknak ah Jesuh nih a zultu hna kha Pathian lung a tongmi lam in zeitindah thlacam awk a si ti kha a cawnpiak hna. “Hi bantuk hin thla cu nan cam awk a si” tiah a ti hnuah Jesuh nih Jehovah tinhnak he direct in aa tlaimi a biapimi kong hna kha a langhter hmasa: Mah cu a min thiang upatnak; Pathian ralchanhtu vialte kha a hrawk hngami Pennak tlunnak; vawlei le minung caah Pathian nih aa tinhmi hmailei thluachuah hna an si. Kan thlacamnak ah mah a kong hna kha kan telhnak thawngin Pathian duhnak cu kan caah a biapi tuk ti kha kan langhter.

5. Pumpak kong caah thlacam cu aa tlak maw?

⁵ Mah thlacamnak i a peh ah Jesuh nih pumpak kong caah thlacam cu aa tlak ti kha a langhter. Nifate kan herhmi rawl pek awk, kan sualnak ngaihthiam awk, tukforhnak in huhphenh awk le miṭhalo pa sinin khamh awkah Jehovah sin kan hal khawh. (Matt. 6:11-13) Jehovah sinah mah thil pawl kan halmi nih amah kan i bochanmi le a mithmai ṭha hmuh kan duh ti kha a langhter.

6. Bawipa thlacamnak i langhtermi a kong hna ca lawngah maw thla kan cam khawh? Fianter.

⁶ Jesuh nih Bawipa thlacamnak i biafang pawl ningin a dihlak in cam ṭhan awkah a  zultu pawl sinin aa ruahchan lo. Jesuh nih voidang a thlacamnak ah mah lio caan i a caah a biapimi a dang kong hna a chim. (Matt. 26:39, 42; Johan 17:1-26) Cu bantukin kannih zong kan lungre a kan theihtermi zei kong paoh kan cam khawh. Biakhiahnak tuah a herh tikah fimnak le hngalhthiamnak ngeih awkah kan cam khawh. (Salm 119:33, 34) A harmi rian kan thawk hlanah zeitindah kan tuah lai ti hngalh awkah bawmhnak kan hal khawh. (Ptb. 2:6) Nulepa nih fale caah thla an cam kho, fale nih nulepa caah thla an cam kho, cun kan dihlak in Baibal kan cawnpiakmi hna caah le phung kan chimhmi hna caah thla kan cam kho i kan cam awk zong a si. Asinain thla kan cam tikah bawmhnak halnak ca lawngah kan cam ding a si lo.

7. Thlacamnak ah Jehovah kha zeicah kan thangṭhat awk a si?

⁷ Thla kan cam tikah Jehovah thangṭhat ding kha kan philh awk a si lo. Kan Pathian nakin thangṭhat awkah aa tlak deuhmi ahohmanh an um lo. Pathian cu ‘a ṭha i ngaihthiamnak in a khat.’ ‘Zaangfahnak le dawtnak in a khatmi Pathian a si; thin a fual i zaangfahnak a ngei zungzal i zumhawktlak a si zungzalmi’ zong a si. (Salm 86:5, 15) A sining le a tuahmi thil ruangah Jehovah kha thangṭhat awkah a ruang ṭha kan ngei.

8. Zei bantuk thil hna ruangah dah Jehovah kha kan lawmh khawh? (Salm 104:12-15, 24)

⁸ Thlacamnak ah Jehovah kha kan thangṭhat lengah a kan pekmi khuaruahhar thil hna ca zongah kan lawmh awk a si. Tahchunhnak ah, a rong phunphun ummi pangpar pawl kan hmuh tik, rawl thaw a phunphun kan ei tik le dawtmi hawikom pawl sinin hrimhnak kan hmuh tikah kan lawmh khawh. Dawtnak a ngeimi kan Pa nih kan i nuamh nakhnga caah mah thil pawl le a dang thil tampi a kan pek. (Salm 104:12-15, 24 rel.) A biapi bikmi cu thlarau rawl tampi a kan pek ca le khuaruahhar a simi hmailei ruahchannak kan ngeih caah Jehovah cungah kan i lawm tuk.

9. Jehovah cung i lawmh awkah zeinihdah a kan bawmh lai? (1 Thesalon 5:17, 18)

⁹ A kan tuahpiakmi thil vialte caah Jehovah sin lawmhnak bia chim awkah kan philh kho men. Cucaah i cinken awkah zeinihdah a kan bawmh khawh? Cuset khaset tiah na halmi a  kong pawl kha cazin tuah law Jehovah nih aan leh ning kha hngalh awkah ruat ṭhan. Cun aan bawmhnak caah a sinah thlacamnak in lawmhnak bia chim. (1 Thesalon 5:17, 18 rel.) Mah hi ruathmanh: Midang nih kan cungah lawmhnak an langhter tikah kan i nuam i kan sunsak. Cu bantukin Jehovah nih kan thlacamnak a kan leh caah a sinah lawmhnak bia kan chim tikah aa lawm ve. (Kol. 3:15) Pathian kan lawmh awk a sinak a dang a biapimi a ruang pakhat cu zeidah a si?

10. Kuatkhat Peter 2:21 ningin vawlei ah Jesuh a thlah caah Jehovah kha zeicah kan lawmh awk a si?

¹⁰ Kuatkhat Peter 2:21 rel. Kanmah cawnpiak awkah a dawt tukmi a Fapa a thlah caah Jehovah kha kan lawmh ding a si. Jesuh nunning hlathlainak thawngin Jehovah kong le zeitindah a lung kan lawmhter khawh timi a kong tampi kan hngalh. Khrih tlanhnak cungah zumhnak kan ngeih ahcun Jehovah Pathian he pehtlaihnak ṭha kan ngei lai i Amah he kan i rem lai.—Rom 5:1. 

11. Zeicah Jesuh min in Jehovah sin thla kan cam?

¹¹ A Fapa thawngin Pathian sinah thla kan cam khawh caah Jehovah cungah kan i lawm. Jehovah nih kan halmi kha pek awkah Jesuh kha a hman. Jesuh min in kan halmi thlacamnak kha Jehovah nih a ngaih i a kan leh. Jesuh nih hitin a ti: “Pa sunparnak cu Fapa thawngin a langh khawh nakhnga, ka min in nan halmi paoh cu kaan tuahpiak hna lai.”—Johan 14:13, 14.

12. A Fapa caah Jehovah kan lawmh awk a sinak a dang a ruang pakhat cu zeidah a si?

¹² Jehovah nih Jesuh tlanhnak man cungah hrambunh in kan sualnak kha a kan ngaihthiam. Baibal nih Jesuh kha “vancung i a Lianngan Bik orhlei kam i a ṭhumi” tlangbawi ngan in a langhter. (Heb. 8:1) Jesuh cu “Pa sin i bia a kan chimpiaktu” a si. (1 Johan 2:1) Kan derthawmnak a hngalthiam i ‘a kan nawlpiaktu,’ zaangfahnak a ngeimi Tlangbawi Ngan a kan pek caah Jehovah cungah kan i lawm tuk! (Rom 8:34; Heb. 4:15) Mitlinglo kan si caah Jesuh tlanhnak man loin cun Jehovah sinah thlacamnak in kan naih kho lai lo. Jehovah nih a sunglawi tukmi laksawng—a dawt tukmi a Fapa kha laksawng a kan pek caah kan i lawm tuk lai ti cu a fiang ko!

13. Jesuh nih a thih lai zan ah a zultu pawl a dawt hna kha zeitindah a langhter?

¹³ Jesuh nih a thih lai zan ah a zultu pawl caah saupi thla a cam i a Pa kha “miṭhalo pa sin khan him tein chia ko hna” tiah a nawl. (Johan 17:15) Jesuh nih zeitluk in dah a dawt hna ti kha mah nih a langhter! Amah theng a harmi hneksaknak ka tong cang lai ti a hngalh ko nain a zultu pawl ca tu ah a lungre a thei. 

14. Unau pawl kan dawt hna kha zeitindah kan langhter khawh?

¹⁴ Jesuh kha kan i zohchunh i kanmah herhmi kong lawng kan ruat lo. Mah canah unau pawl caah hmaan tein thla kan cam. Cutin kan tuah tikah pakhat le pakhat i daw u timi Jesuh nawlbia kan zulhmi a si i zumtukhat unau pawl zeitluk in dah kan dawt hna ti kha Jehovah sinah kan langhtermi a si. (Johan 13:34) Kan unau pawl caah thla kan cammi cu a caan kan sawksammi a si lo. Baibal nih “miṭha mi thlacamnak cu ṭhawnnak a ngei” tiah a kan ti.—Jeim 5:16. 

15. Zumtukhat kan unau pawl nih kan thlacamnak kha zeicah an herh?

¹⁵ Zumtukhat kan unau pawl cu hneksaknak tampi an ton caah kan thlacamnak an herh. Damlonak, leiser ral, raldohnak, hremnak  le a dang harnak hna inkhawh awkah Jehovah sinah bawmhnak kan halpiak khawh hna. Har tongmi hna a bawmmi, mah ca ṭhatnak a hlawmi unau pawl ca zongah thla kan cam khawh. Cu bantuk harnak a tongmi unau cheukhat kha pumpak in na hngalh men hna lai. Na thlacamnak ah an min telh in na cam khawh. Inkhawhnak an ngeih nakhnga Jehovah sinah bawmhnak kan halpiak hnanak thawngin dawtnak taktak kha kan langhter.

16. Hruaitu unaupa pawl caah zeicah thla kan cam awk a si?

¹⁶ Khrihfabu hruaitu unau pawl nih an caah midang nih thla an campiakmi hna kha an sunsak tuk i mah in ṭhatnak an hmu. Mah cu a hmaan ti kha lamkaltu Paul kong nih a langhter. Hitin a ṭial: “Cun thla rak ka campiak ve u, bia ka chim tikah Pathian nih chim awk bia a ka pek nakhnga le ralṭha in ka chim nakhnga le thawngṭha biathli cu ka langhter khawh nakhnga, ka caah thla rak cam u.” (Efe. 6:19) Tuchan zongah rian aa zuammi hruaitu unaupa tampi kan ngei hna. An rianṭuannak cungah thluachuah pek dingin Jehovah sinah thla kan camnak thawngin kan dawt hnanak kha kan langhter.

17-18. Zei bantuk caan ah dah midang ca thlacam dingin an kan fial khawh, zeidah kan i cinken awk a si?

¹⁷ A caan ah midang ca thlacam dingin sawm kan si. Tahchunhnak ah, Baibal cawnpiaknak a tuahmi unaunu nih amah a zulmi unaunu kha thlacam dingin a fial men lai. Mah unaunu nih Baibal a cawngmi nu kong kha ṭha tein a hngal men lai lo, cucaah Baibal cawnnak a donghnak i thlacam kha a duh deuh men lai. Cuticun thla a cam tikah chim dingmi bia kha ṭha deuh in a hngalh khawh lai.

¹⁸ Unaupa pakhat cu lohmun tonnak ah asiloah Khrihfabu pumhnak ah thlacam dingin fial a si men lai. Thlacamnak tinvo a hmumi unaupa nih pumhnak i aa tinhnak kha aa cinken awk a si. Thlacamnak kha Khrihfabu chimhhrinhnak ca asiloah thawngthanhnak caah hman ding a si lo. Khrihfabu pumhnak tam deuh ah hla le thlacamnak caah minit panga caan pek a si, cucaah thla a cammi unaupa nih, a hleiin pumhnak a thawknak ah “bia tampi” a chim awk a si lo.—Matt. 6:7. 

19. Jehovah biaceihnak ni caah timhcia tein um awkah zeinihdah a kan bawmh lai?

¹⁹ Jehovah biaceihnak ni kan naih chin bantukin thlacamnak kha biapi ah kan chiah chinchin a hau. Mah he aa tlaiin Jesuh nih hitin a ti: “Hi a tlung hnga dingmi thil vialte hi him tein chuak lakin nan tan khawh nakhnga, thazaang nan ngeih nakhnga . . . ralring tein um u law thla va cam zungzal ko u.” (Luka 21:36) Thla kan cam peng ahcun kan zumhnak a fek chin lai i Pathian biaceihnak ni a phanh tikah timhcia kan si lai.

20. Zeitindah kan thlacamnak cu a hmui tukmi zihmui bantuk a si khawh?

²⁰ Zei kong hna dah kan i ruah? Thlacamnak tinvo sung kha kan sunsak tuk. Kan thlacamnak i a biapi bikmi cu Jehovah tinhnak he direct in aa pehtlaimi a si awk a si. Pathian Fapa le a Pennak uknak caah kan i lawmhnak kha kan langhter i zumtukhat unau pawl ca zongah thla kan campiak hna. Cun pumsalei le thlaraulei kan herhmi ca zongah thla kan cam khawh. Thlacamnak ah kan chim dingmi kong ṭha tein kan ruahmi nih mah a sunglawi tukmi tinvo sung kan sunsak ti kha a langhter. Kan bia cu Jehovah hmaiah a hmui tukmi zihmui bantukin “a lawmhmi a si” lai.—Ptb. 15:8.