Jesuh nih daihnak kong kha a thanh. Asinain voikhat cu lamkaltu pawl kha hitin a ti hna: “Vawleicung ah daihnak tlunter awkah a ra, tiah ka ruat hlah u, daihnak tlunter awkah ka ra lo, vainam tlunter awk tu ah ka ra. Ka ratnak chan cu fale hna le pale hna dohter awk, fanule hna le nule hna dohter awkah a si.” (Matt. 10:34, 35) Jesuh nih zeidah a chim duhmi a si?

Jesuh nih chungkharmi pakhat le pakhat an i ṭhencheumi kha a duh lo nain a cawnpiaknak ruangah chungkhar cheukhat cu an i ṭhencheu lai ti kha a hngalh. Cucaah Khrih zultu si a duh i tipil in a duhmi hna nih an biakhiahnak ruangah a chuak khomi thil sining kha an hngalh a hau. Zumlotu innchunghawi asiloah a dang chungkharmi sinin ralchanhnak an ton tikah Khrih cawnpiaknak ah zumhfek tein um peng ding cu zuamcawhnak a si kho.

Baibal nih Khrihfa hna kha “mi vialte he i rem” awkah a forh hna. (Rom 12:18) Asinain Jesuh cawnpiaknak cu chungkhar cheukhat caah “vainam” bantuk a si kho. Mah cu Jesuh cawnpiaknak kha chungkharmi a dang vialte nih an ralchanh lioah pakhat lawng nih a cohlan tikah a si. Cu bantuk thil sining ah biatak a cawngmi hna i an “ral ṭhalo bik” cu chungkharmi le rualchan pawl an si.—Matt. 10:36.

Biaknak aa khat lomi chungkhar sinah a ummi Khrih zultu hna cu a caan ah Jehovah le Jesuh an dawtnak a hneksakmi thil sining hna an tong. Tahchunhnak ah, zumlotu rualchan pawl nih biaknaklei puai ah i tel dingin an forh men hna lai. Mah tikah aho duhnak dah kan zulh lai ti kha biakhiahnak an tuah a hau. Jesuh nih hitin a ti: “Ahohmanh a nu siseh, a pa siseh, keimah nakin a daw deuhmi cu ka mi si awk aa tlak lo.” (Matt. 10:37) Jesuh nih amah zultu si awkah nulepa dawt a hau lo tiah a ti duhnak a si lo. Mah canah an nunnak ah a biapi bikmi cu zeidah a si ti biakhiah khawh awkah a cawnpiakmi hna a si. Zumlotu chungkharmi nih Jehovah kan biaknak kha an ralchanh tikah anmah cu kan dawt peng ko hna lai nain Pathian kan dawtnak kha pakhatnak ah chiah ding a si ti kha kan hngalh.

Chungkhar ralchanhnak nih kan lung a fahter tuk lai ti cu a fiang ko. Asinain Jesuh zultu a simi nih cun mah bia hi i cinken a hau: “Ahohmanh a vailam tahnak kha aa put i ka hnu in a ka zul lomi cu ka mi si awk aa tlak lo.” (Matt. 10:38) Phundang cun, Khrihfa hna nih chungkhar ralchanhnak cu Khrih zultu nih lunglawm tein cohlan dingmi harnak lakah aa telmi in an hmuh. Mah lengah a ṭhami an ziaza nih zumlotu chungkharmi hna kha an lung a nemter hna lai i Baibal kong cawn a duhter hna lai tiah an i ruahchan.—1 Pet. 3:1, 2.