Baibal cu siilei cauk a si lo nain mah ah zulh awk a tlakmi le ṭhatnak a pemi ruahnak cheuhnak tampi a um. Mah nih lungthinlei zawtnak a ngeimi kha a ṭhami ruahnak a cheuh khawh hna. Tahchunhnak cheukhat hi zohhmanh.

“A dammi nih cun siibawi an herh lo, a zawmi lawng nih khan an herh.”—MATTHAI 9:12.

Baibal nih siithlopnak kan herh ti kha a cohlan. Mi tampi cu an zawtnak he aa tlaiin a hmaanmi a konglam hna an hlathlainak thawngin le siibawi sinah an i piahnak thawngin bawmhnak an hmu.

“Pum cawlcanghnak nih ṭhatnak tlawmpal a chuahter.”—1 TIMOTE 4:8, NW.

Pumsalei ngandamnak caah na tuahmi thil hna nih lungthinlei ngandam awkah aan bawmh khawh. Mah ah exercise hmaan tein tuahnak, ngandamnak caah a bawmmi rawl einak le mitku vuai tein ihnak hna aa tel.

“Lungthin lawmh hi siiṭha asi, sihmanhsehlaw lungthin ngaihchia nih ruh kha a roter.”—PHUNGTHLUKBIA 17:22.

Thazaang a pemi Baibal caang hna relnak, aa tlakmi le phanh khawh dingmi hmuitinh hna chiahnak nih lungthin lawmh awkah a bawmh khawh. Na nunnak ah thilṭha cungah  lungthin na pek i hmailei ah thil sining hna cu a ṭha deuh te lai ti na zumh ahcun mah nih lungthinlei zawtnak kha tei khawh awkah aan bawmh lai.

“Mi toidorte i um a ṭha deuh.”—Phungthlukbia 11:2.

Nangmah na duh ningin thil vialte kha na tuah kho men lai lo, cucaah midang bawmhnak kha lunglawm tein cohlang. Na hawile le na chungkhar nih bawmh an in duh ko lai nain zeidah tuah ding ti kha an hngal men lai lo. Cucaah a hleiin na caah bawmtu a simi thil kha hngalhter hna. An sinin thil tampi i ruahchan hlah, cun an in pekmi bawmhnak cungah lawmhnak bia chim peng.

“Ka sining a hmaan lo tiah ka ruah caah siibawi sinah kaa piah. Mah siibawi nu nih ka zawtnak kha a hngalh. Mah nih ka sining taktak cohlang awk le ka ngandamnak kha ṭha tein i thlop awkah siilei kongkau hna hngalh awkah a ka bawmh.”—Lungdongh le lungthawh zawtnak a ngeimi Nicole. a

“Ka nupi he hmaan tein Baibal relnak nih nifate a ṭhami ruahnak he nithar thawk awkah a ka bawmh ti kha ka hngalh. Thil pakhatkhat tawnghtham kaa harh tikah Baibal caang pakhatkhat nih thazaang a ka pek tawn.”—Lungdongh zawtnak a ngeimi Peter.

“A ningzah a pang tukmi ka si caah midang kha ka zawtnak kong ka chim ngam hna lo. Asinain ka hawikom ṭha pakhat nih ka chimmi kha ṭha tein a ka ngaihpiak i ka intuarnak kha hngalhthiam awkah aa zuam. Amah nih ka sining a ṭhat deuh nakhnga a ka bawmh i keimah lawng ka si lo timi ruahnak a ka ngeihter.”—A rawl ei a hmaan lomi Ji-yoo.

“Rian le dinhnak kong he aa tlaiin Baibal nih a tlarimi hmuhnak ngeih awkah a ka bawmh. Mah nih a ka hnorsuangmi lungthinlei buaibainak hna kha tawnghtham khawh awkah a ka bawmh.”—Lungthin i uk khawh lonak zawtnak a ngeimi Timothy.