Baibal ah intuarnak a phunphun a ngeimi nu le pa hna i an tuanbia kong tampi a um. Mah an tuanbia hna kan rel tikah kanmah he kan intuarnak aa khatmi, Baibal ah an kong ṭialmi pakhatkhat kan hmuh men hna lai.

Kan dihlak in midang nih kan intuar ning an hngalhthiam ti kha kan hngalh a hau. Asinain a hleiin mah cu lungthinlei zawtnak kan ngeih tikah a si. Baibal kan rel tikah kanmah bantukin ruahnak le intuarnak a ngei vemi midang kong kha kan hngalh. Cucaah lungretheihnak le kan lungthin a hnorsuangmi thil hna kan ton tikah kanmah lawng kan si lo, midang zong kanmah bantukin an tong ve ti kha kan hngalh.

• Baibal ah bawmtu ka ngei lo ti in a lung a dongmi hna kong tampi a um. ‘Mah thil hi ka ing kho ti lo’ timi ruahnak na ngei bal maw? Moses, Elijah le David cu, cu bantuk ruahnak an rak ngei.—Nambar 11:14; 1 Siangpahrang 19:4; Salm 55:4.

• Hannah cu fa a ngeih khawh lo caah le amah a engtaitu a va nupi ruangah “a lungre a thei ngaingai” tiah Baibal nih a ti.—1 Samuel 1:6, 10.

• Baibal ah langhtermi Job he kan intuarmi aa khat men lai. Jehovah cungah a fekmi zumhnak a ngei ko nain a lungre a theih tuk caah voikhat cu hitin a ti: “Ka hnabei a dong, nun hi ka duh ti lo.”—Job 7:16.

Baibal ah an kong ṭialmi hna nih a ṭhalomi ruahnak an tei khawh ning kong hlathlainak thawngin kannih zong lungretheihnak hna tei khawh awkah kan herhmi thazaang kan hmu kho.