2 | ‘Cathiang Nih A Kan Pekmi Lungthin Ṭhawnnak’
BAIBAL CHIMMI: “Cathiang nih lungsaunak le lungthin ṭhawnnak a kan pekmi thawngin ruahchannak kha kan ngeih khawh nakhnga Cathiang chung i aa ṭialmi vialte cu kanmah cawnpiaknak caah a si.”—ROM 15:4.
A Sullam
A ṭhalomi ruahnak hna tei khawh awkah kan herhmi thazaang le inkhawhnak a pemi hnemhnak hna Baibal ah aa tel. A rauhhlan ah lungthinlei fahnak a um ti lai lo timi ruahchannak zong Baibal ah aa tel.
Bawmhnak Hmuh Khawh Ning
Kan dihlak in kan ngaih a chiat caan a um ko lai; asinain lungdonghnak asiloah lungretheihnak a ngeimi cu a zungzal in lungthinlei fahnak an tong men lai. Baibal nih zeitindah a bawmh khawh hna?
Baibal nih a ṭhalomi ruahnak a airolh khomi a ṭhami ruahnak tampi a langhter. (Filipi 4:8) Baibal nih kan intuarnak i uk khawh awkah a kan bawmmi hnemhnak le lungdaihnak a pemi ruahnak kha kan lungthin chungah a khahter khawh.—Salm 94:18, 19.
Baibal nih man ka ngei lo timi ruahnak kha hloh awkah a kan bawmh khawh.—Luka 12:6, 7.
Baibal caang tampi nih kanmah lawng kan si lo ti le Sertu Pathian nih kan intuarnak vialte a hngalhthiam dih ti kha a kan zumhter.—Salm 34:18; 1 Johan 3:19, 20.
Pathian nih kan philh khawh lomi kan lungfahnak vialte kha a hloh lai tiah Baibal nih bia a kan kamh. (Isaiah 65:17; Biathlam 21:4) Kan ruahnak le kan intuarnak a hnorsuangmi lungretheihnak kan ton tikah mah biakam hna nih inkhawhnak ngeih awkah thazaang a kan pekmi kha kan hmuh khawh.
Mah Kong Hna Zong Hi Na Duh Khawh Men
BAIBAL BIAHALNAK A PHI
Baibal Ah Hnemhnak Bia Ka Hmu Kho Maw?
Lungretheihnak le a harmi thil sining a tongmi hna kha Baibal nih a hnemh hna.
