Kan hawi pakhat nih lungthinlei zawtnak a ngeih tikah kan lungre a thei tuk kho men. Asinain lungthinlei zawtnak kha a tei khawh nakhnga kan bawmhnak thawngin zeitluk in dah a zawn kan ruah ti kha kan langhter khawh. Zeitin in dah?

“Bia theih duhnaklei ahcun a khul a rangmi si u.”—JEIM 1:19.

Na hawile bawmh awkah a ṭha bikmi lamkhat cu bia aan ruah tikah ṭha tein ngaihpiak kha a si. A chimmi kip leh a hau tiah ruat hlah. A bia ṭha tein na ngaihmi le a cungah siaherhnak na ngeihmi kha hngalhter. A intuar ning kha hngalhthiam awkah i zuam law sualphaw hlah. I tinh loin a hnuah aa ngaihchih dingmi bia hna a chim khawh ti kha i cinken.—Job 6:2, 3.

“A lung a dongmi kha hnem hna u.”—1 THESALON 5:14, NW.

Na hawikom cu a lungre a thei men lai asiloah man ka ngei lo timi ruahnak a ngei men lai. Zei bia dah chim ding ti na hngalh lo hmanhah a cungah zawnruahnak na langhternak thawngin hnemhnak le thazaang na pek khawh.

“Hawikom nih cun zeitik paohah dawt zungzal a si.”—PHUNGTHLUKBIA 17:17.

Hman awk a tlakmi bawmhnak pe. Zeitindah ka bawmh lai tiah ruah canah na tuah  khawhmi kha hal. Na hawikom nih a herhmi chimh awkah aa harh ahcun lamlenṭi ti bantuk hmunkhat ah nan tuah khawhmi pakhatkhat kha tuah awkah ruahnak cheu. Asiloah thil cawk, thianhhlimhnak tuah le a dang rian hna na bawmh khawh.—Galati 6:2.

“Lungsau thinfual in um u.”—1 THESALON 5:14.

Na hawikom cu bia i ruah awkah timhcia a si zungzal men lai lo. Biaruah aan duh tikah lungtho tein a bia ngaihpiak na duh kha hngalhter. A zawtnak ruangah na hawikom nih na lung aan fahtermi bia a chim men lai asiloah thil a tuah men lai. Tuah nan i timhmi thil kha a duh ṭhan men lai lo asiloah a huam ṭhan men lai lo. A herhmi bawmh awkah lungsau tein um law hngalhthiampiak i zuam.—Phungthlukbia 18:24.

“A caah a zungzal in bia a ruah khawhmi hawikom pakhat ka si tiah ka zumh. A tonmi buaibainak kha ka tawnghthampiak lo hmanhah a chimmi kha ṭha tein ngaihpiak awkah kaa zuam. A caan ah a chimmi ṭha tein ngaihpiaktu hawi pakhat a herh, mah nih a intuarnak kha a ṭhatter deuh.”—Einak le lungretheihnak he aa tlaiin lungdongh zawtnak a tuarmi hawikom a ngeimi Farrah. a

“Ka hawi pakhat cu zaangfahnak le a ṭhami hmuhnak a ngei tukmi a si. A inn ah rawl ei a ka sawm. Anih cu duh a nung tukmi a si i a sinah ka intuarnak kha fawi tein ka phuan ngam. Mah nih thazaang a ka ngeihter tuk!”—Lungdongh zawtnak a ngeimi Ha-eun.

“Lungsaunak cu a biapi tukmi a si. Ka nupi nih ka thin a huntermi thil pakhatkhat a tuah tikah a dam lo caah hitin a tuahmi a si tiah keimahle keimah ralrin kaa pe. Mah nih thinhun lo awk le a cungah zaangfahnak ngeih deuh awkah a ka bawmh.”—A nupi lungdongh zawtnak a ngeimi Jacob.

“Ka nupi cu ka caah khuaruahhar lam in bawmtu le hnemtu a si. Ka lungre a theih tuk tikah tuah ka duh lomi thil pakhatkhat kha tuah awkah a ka hnek bal lo. Mah cu a caan ah tuah a duhmi thil pakhatkhat kha a tuah kho lo tinak a si. Anih cu a siang tukmi le mahzawn lawng aa ruat lomi a si caah ka caah a sunglawi tukmi a si.”—Lungretheih zawtnak a ngeimi Enrico.