Vawleicung Pumpi Ah A Karhmi Lungthinlei Zawtnak
“A khaan chung i keimah lawngin ka ṭhut tik hmanhah ka lungre a thei peng.”
“Ka dam tuk tiah ka ruah lio hmanhah thinphannak ka hun ngei. Zeicahtiah kaa nuamh tuk tlawmpal ah ka ngaih a chiat tuk tawnmi kha ka hngalh caah a si.”
“Nifatin a cangmi thil cungah lungthin pek dingin kaa zuam. Asinain a caan ah a dang thil tampi kong ah ruahlopi in ka lungre a thei.”
Mah bia hna cu lungthinlei zawtnak a ngeimi nih an chimmi a si. Nangmah asiloah na zohkhenhmi pakhatkhat nih cutin nan ruat bal ve maw?
Nangmah lawng na si lo ti kha zum. Tuchan ah mi tampi cu anmah theng asiloah an dawtmi hna nih lungthinlei zawtnak an ngei.
Lungretheihnak a phunphun a chuahtermi “harnak caan” ah kan nung ti cu lunghrin awk a um lo. (2 Timote 3:1) Hlathlainak pakhat nih vawleicung pumpi ah minung pariat ah pakhat cu lungthinlei zawtnak an ngei tiah a ti. 2020 ah COVID-19 pulrai ruangah lungretheihnak a karh chin i zatuak 26 le 28 hrawng cu a zual tukmi lungdongh zawtnak an ngei.
Tuchan ah lungretheihnak le lungdonghnak ruangah mi pa zeizat nih dah harnak an ton ti hngalh cu a biapi. Asinain nangmah le na dawtmi hna nih zeitindah damnak nan hmuh khawh ti hngalh cu a biapi deuhmi a si.
Lungthinlei zawtnak timi cu zeidah a si?
Lungthinlei ah a ngan a dammi na si ahcun na lung a nuam lai i ṭha tein thil na tuah khawh lai. Lungretheihnak tete kha na tei khawh lai, ṭha tein rian na ṭuan khawh lai i na nunnak ah lungsinak na ngei lai.
Lungthinlei Ningcang Loin Umnak Cu . . .
-
Pumpak derthawmnak ruangah A SI LO.
-
Mi pakhat i ruahnak, intuarnak le umtu-ziaza fakpi in a hnorsuangmi siilei he aa tlaimi thil sining pakhat A SI.
-
Midang he pehtlaihnak ngeih awk le nifa nunnak ah a herhmi thil hna tawnghtham awkah a harter khawh.
-
Kumkhua, nunphung, ram, miphun, biaknak, fimcawnnak asiloah lahkhah ti bantuk hnulei sining aa khat lomi hna cungah huham a ngei kho.
Lungthinlei zawtnak caah bawmhnak hmuhnak
Mi pakhat cu ruahlopi in ih a hun duh tuk asiloah a it kho lo, voidang nakin tam deuh in a ei asiloah a ei kho lo, a lungre a thei tuk asiloah a ngaih a chia tuk ti bantukin phundangpi in a hung um. Cutin a si ahcun a ruang hngalh awk le i thlop khawh awkah siilei a thiammi sinah aa piah a hau men lai. Asinain khoika in dah bawmhnak a hmuh khawh lai?
A nung balmi lakah a fim bikmi Jesuh Khrih nih hitin a ti: “A dammi nih cun siibawi an herh lo, a zawmi lawng nih khan an herh.” (Matthai 9:12) An zawtnak ruangah aa tlakmi lam in sii aa thlopmi le sii a dingmi hna nih an zawtnak a dam deuh nakhnga thil tampi an tuah khawh i an nunnak ah nuamhnak le lungsinak an hmuh khawh. An zawtnak kha a zual tiang asiloah saupi tiang i thlop loin an um awk a si lo. a
Baibal cu siilei lamhruainak cauk a si lo nain mah ah lungthinlei kan ngandamnak caah ṭhatnak a pemi a kong tampi aa tel. Baibal nih lungthinlei zawtnak tawnghtham awkah a kan bawmh khawh ning a fiantermi a hnu capar hna kha hlathlai awkah kan in sawm.
a Vennak Innsang mekazin nih siithlopnak pakhatkhat kha a hlorhmi a si lo. Pakhat cio nih pumpak biakhiahnak tuah hlanah an duhnak kha ṭha tein an i dothlat awk a si.
Mah Kong Hna Zong Hi Na Duh Khawh Men
ESSENTIAL BIBLE TEACHINGS
Zeicah Pathian Nih Sifah Harnak Hi Umnak Nawl A Awnh?
Baibal nih lungsi hnangamnak le hnemhnak a pemi a phi a kan pek.
RALRING TEIN UM U!
Kumhra Fai Pawl Lungthinlei Ngandam Lonak A Karh Chinmi—Baibal Nih Zeidah A Chim?
Baibal nih lungthinlei in a ngan a dam lomi kumhra fai pawl kha zulh awk a tlakmi ruahnak cheuhnak a pek hna.
KAN KONG
Rak Len Dingin Halnak
Baibal biahalnak kong kha i ruah u asiloah Jehovah Tehte Hna kong kha tam deuh in hlathlai.
