Laksawng cheukhat cu nawlngeitu asiloah kan upat tukmi pakhatkhat nih an kan pekmi a si caah a sunglawi tuk. Laksawng cheukhat tu cu a man a fawimi a si ko nain kan dawtmi chungkhar asiloah kan i bochan tukmi hawikom pakhatkhat sinin kan hmuhmi a si caah kan sunsak tuk. Mah cu a hmasa capar ah langhtermi Russell nih Jordan a pekmi laksawng bantuk kha a si. Mah cu tlanhnak man laksawng he zeitindah aa pehtlai?

Pakhatnak ah, Baibal nih hitin a ti: “Pathian nih . . . a Fapa ngeihchun kha vawlei ah hin a run thlah i amah thawngin nunnak kan ngei lai.” (1 Johan 4:9) Cucaah mah laksawng cu a sunglawi tukmi a si. Pathian nakin nawl a ngei deuhmi ahohmanh an um lo. Salm cauk a ṭialtu Hebru mi pakhat nih Pathian kong he aa tlaiin hitin a rak ṭial: “Jehovah tiah min a ngeimi nangmah lawnglawng hi vawlei dihlak uktu Cungnung Bik na si kha mi nih hngal hna seh.” (Salm 83:18, NW) Tlanhnak man cu cungnung bik Pathian sinin kan hmuhmi laksawng a si.

Pahnihnnak ah, Pathian cu “kan Pa” a si. (Isaiah 63:16) Zeiti lam in dah? Pathian cu nunnak a kan petu a si. Mah lengah dawtnak a ngeimi pa bantukin Pathian nih a kan zohkhenh zungzal. Hlanlio ah a miphun a rak simi Efraim mi cheukhat he aa tlaiin Pathian nih hitin a chim: “Efraim, nangmah cu ka dawt bikmi fa na si. . . . Nangmah kha dawtnak in kaan ruat tawn. Nangmah cu ka lung nih aan ngai i na cungah zaangfahnak ka ngei lai.” (Jeremiah 31:20) Tuchan i amah a biami hna cung zongah Pathian cu, cu bantuk intuarnak a ngei. Pathian cu a ṭhawng bikmi Sertu a si lengah zumhawktlakmi kan Pa le kan Hawikom zong a si. A sinin kan hmuhmi laksawng hna cu an sunglawi tuk, a si ko lo maw?

Laksawng cheukhat cu pek awk a si ruangah si loin lungtak tein an kan dawt ruangah pekmi a si caah a sunglawi tuk. A hmaanmi lungput he a petu nih cun a tuahsernak he aa tlaiin pakhatkhat hmuh ṭhan ding kha aa ruahchan lo.

Pathian nih a kan dawt caah a Fapa a kan pek. “Pathian nih a kan dawtnak a langhter ning cu hitihin a si: a Fapa ngeihchun kha vawlei ah hin a run thlah” tiah Baibal nih a ti. Zeicah cutin a tuah? ‘Amah thawngin nunnak kan ngeih’ nakhnga caah a si. (1 Johan 4:9) Pathian nih cutin tuah awkah rian a ngei maw? A ngei lo. “A vel” thawngin Jesuh Khrih tlanhnak man kha Pathian nih a kan pekmi a si.—Rom 3:24.

Pathian nih “a vel” thawngin mah laksawng kha a kan pekmi a si tiah zeicah kan chim khawh? Baibal nih hitin a fianter: “Pathian nih cun zeitluk in dah a kan dawt kha hitihin a langhter: kannih cu misual kan si ko rih lioah hin Khrih cu kan caah a thi.” (Rom 5:8) Mahzawn ruat lo dawtnak ruangah Pathian nih a tha a der i bawmtu a ngei lomi, misual a simi minung pawl ṭhatnak caah rian a ṭuan. Mah dawtnak cu hmuh awkah kan i tlak lo i zeitikhmanh zongah kan cham kho lai lo. Mah laksawng cu Pathian dawtnak ngan bik a langhtertu a si.

Laksawng cheukhat cu a petu nih mahca ṭhatnak hlaw in a pekmi a si caah a sunglawi tuk. Mi pakhat nih a caah a sunglawi tukmi thil pakhat kha siang ngaiin a kan pek tikah mah laksawng cu a sunglawi khun.

Pathian nih “a Fapa ngeihchunte” kha a kan pek. (Johan 3:16) Pathian nih a dawt bikmi a Fapa kha a kan pekmi a si. Pathian nih van le vawlei a ser lio kum tampi chung Jesuh cu Pathian he rian an ṭuanṭi i Jesuh cu Pathian i “aa lawmhnak” a rak si. (Phungthlukbia 8:30) Jesuh cu Pathian ‘dawtmi Fapa’ le “hmuh khawh lomi Pathian mui a si.” (Kolose 1:13-15) Anmah bantukin aa tlaihchan i aa dawmi an um lo.

Asinain Pathian nih ‘a Fapa hrimhrim hmanh kha zuah loin’ a kan pek. (Rom 8:32) Jehovah nih kan caah a ṭha bikmi kha a kan pek. Mah nakin a sunglawi deuhmi laksawng a um lo.

Laksawng cheukhat cu kan herh taktakmi, atu lio i kan herhmi hmanh kha a tlinter khawh caah a sunglawi tuk. Tahchunhnak ah, na nunnak khamhnak caah siithlopnak ding tangka na pek khawh lomi kha pakhatkhat nih aan pekpiak ahcun zeitluk in dah naa lawmh lai. Mah laksawng cu a man a sung tukmi a si, a si ko lo maw?

“Adam he an i pehtlaihnak thawngin mi vialte cu an thih bantukin, Khrih he an i pehtlaihnak thawngin mi vialte cu nunnak ah thawhter an si lai.” (1 Korin 15:22) Adam tefa kan si caah kan dihlak in ‘thihnak’ kan tong. Zawtnak le thihnak in kan luat kho lo i Pathian mithmai ṭha hmuh awkah kanmah tein kan i tlan kho lo. Zeihmanh a si lomi minung kan si caah kanmah theng zong kan i nunter kho lo i midang zong kan nunter kho hna lo. Baibal nih hitin a ti: “Minung nih cun zeitikhmanh ah amahle amah aa tlan kho lo; a nunnak man kha Pathian a cham kho lo.” (Salm 49:7, 8) Kanmah nih tlanhnak man kan pek khawh lo caah bawmhnak kan herh tuk. Bawmhnak kan hmuh lo ahcun zei bantuk ruahchannak hmanh kan ngei lai lo.

Jehovah nih a nganmi a dawtnak ruangah Jesuh thawngin “mi vialte cu nunnak ah thawhter an si” nakhnga a herhmi nunnak a khamhmi thlopnak kha siang ngaiin a kan pek. Tlanhnak man nih zeitindah cutin a tuah khawh? “A Fapa Jesuh thi nih khan kan  sualnak vialte in a kan thenh.” Jesuh thletmi thisen zumhnak nih sual ngaihthiamnak le zungzal nunnak a kan hmuhter. (1 Johan 1:7; 5:13) Kan dawtmi a thimi hna caah tlanhnak man nih zeidah a tuah lai? “Thihnak cu mi pakhat thawngin a tlun bantukin thihnak in thawhṭhannak zong cu mi pakhat [Jesuh] thawngin a tlung ve.”—1 Korin 15:21. *

Jehovah nakin a cungnung deuhmi laksawng pe khotu an um lo. Jesuh tlanhnak man nakin dawtnak a langhter khotu laksawng zeihmanh a um lo. Kan caah Jehovah bantukin mahca ṭhatnak a hlawmi ahohmanh an um lo. Sualnak le thihnak in a kan luatter khotu tlanhnak man nakin kan herh deuhmi a dang laksawng zeihmanh a um lo. Cucaah tlanhnak man bantukin a sunglawimi laksawng zeihmanh a um lo.