“Mawṭaw cu kal khawh a si cang, asinain Taluk pa kha cu tangta.” Thlanglei America ram pahnih kar i ramri kan tan lio, mawṭaw cung ka ṭhut lioah cutin an chimmi kha ka theih tiah unaunu Alexandra nih a chim. Zeidah a cang ti hngalh awkah mawṭaw in a ṭum tikah Taluk mino pa pakhat nih a tonmi harnak kong kha Spain holh thiam setsai loin ramri a cawngtu pa a chimhmi kha a hmuh. Alexandra cu Jehovah Tehte Hna i Taluk holh hmannak Khrihfabu ah aa pummi a si caah mah Taluk pa kha holh a lehpiak khawh.

Mah Taluk pa nih anih cu phung ningin a ummi a si ko nain a tangka le a catlap pawl an firpiaknak kong kha a chimh. A hmasa ahcun mah bawipa nih a chimmi kha a zum lo i Alexandra hmanh kha mizuartu ah aa telmi in a ruah. A donghnak ah Taluk pa chimmi kha a cohlan, asinain catlap pawl a ngeih lo ruangah dan a tat. Mah pa nih tangka a ngeih lo caah Alexandra nih dollar 20 a cawih. Mah tikah aa lawm tuk i dollar 20 nak tam in kaan cham ṭhan lai tiah a ti. Alexandra nih laksawg hmuh ṭhan duh ah kaan bawmhmi a si lo, bawmhnak na herh lioah kaan bawmh khawh caah keimah zong kaa lawm ve tiah a ti. Cun Baibal hrambunhmi cauk tlawmpal kha a pek i Jehovah Tehte Hna he Baibal cawn awkah a forh.

Mising cungah cu bantukin siannak langhternak kong nih kan lung a kan lawmhter. Biaknak a ngeimi an si ah, a ngei lomi an si ah mi nih cu bantukin siannak an langhter tawn. Nang tah mahzawn lawng ruat loin cutin mi na bawm bal hna maw? Mah biahalnak cu lungthawh awk ngai a si. Jesuh nih hitin a chim: “Pek lei ah hin hmuh lei nakin lunglawmhnak a um deuh.” (Lamkaltu 20:35) Mah cu science lei zongin lungthawh awk ngai a si. Zeicatiah peknak nih a petu caah ṭhatnak a chuahter ti kha hlathlaitu pawl nih an hmuh caah a si. Zeiti lam in dah ṭhatnak a chuahter ti kha zohhmanh u sih.

Hmuhtonnak nih peknak le lawmhnak cu aa pehtlai ti kha a langhter. Lamkaltu Paul nih “lunglawm tein a thomi kha Pathian nih a dawt hna” tiah a ti. Mah cu harnak a tongmi zumtuhawi pawl sinah siang ngaiin a bawmmi Khrihfa hna kong a chimmi a si. (2 Korin 8:4; 9:7) An i lawmh caah an pekmi hna a si lo tiah Paul nih a chimmi a si. An pek khawh hna caah an i lawmhmi a si.

Hlathlainak pakhat nih peknak nih “nuamhnak, hawikomhnak le zumhnak hna he aa tlaimi thluak cheubang kha a cawlcanghter i lungsinak a chuahter” tiah a ti. A dang hlathlainak pakhat nih “tangka kha mah ca i hman nakin midang pek cu an pahnih caah lunglawmhnak a chuahter deuh” tiah a ti.

Na sining ruangah na lungduh tlukin ka pe kho hna lo tiah na ruat bal maw? A tak ti ahcun kan zapi in ‘lunglawm tein peknak’ thawngin lawmhnak kan hmu kho. A tlawm, a tam cu a biapimi a si lo, lungthin tu a biapimi a si. Jehovah Tehte a simi unaunu pakhat nih mah mekazin a chuahtu hna sinah thawhlawm a kuat hna i hitin ca a ṭial: “Kum tampi  chungah Biakinn ah thawhlawm tampi ka pe kho lo, tlawmpal te lawng ka pek khawh. Asinain ka pekmi nakin tam deuhpi Jehovah Pathian nih a ka pek ṭhan. Mah thawhlawm pek khawh dingin a ka bawmh caah kaa lawm tuk, mah nih hnangamnak a ka pek.”

Peknak ti tikah tangka pek lawng kha a si lo. Pek khawhnak lam tampi a um.

Baibal nih hitin a ti: “Zaangfah a thiammi na si tikah nangmahle nangmah ṭhatnak naa pek a si, cun na puar ahcun nangmah le nangmah harnak naa pe ko.” (Phungthlukbia 11:17) Dawt-zaangfahnak a ngeimi cu an siang, an caan le an thazaang ti bantuk kha siang ngaiin mi an pek hna. Cu bantuk siannak nih ṭhatnak tampi a chuahter, a hleiin an ngandamnak a ṭhatter.

Midang bawmh a hmangmi hna cu nganfahnak le lungdonghnak hna an ing theng lo i an ngan a dam deuh ti kha hlathlainak tampi nih an hmuh. Siang ngaiin peknak nih caan saupi chung thahri zawtnak asiloah HIV a ngeimi ti bantuk hna hmanh kha a damter deuh hna. Zu din ngol awkah aa zuammi hna nih midang an bawmh hna tikah lungdongh zawtnak an ngeihmi cu a zorter deuh i an siikel ah phanh ṭhan ti lo awkah a bawmh hna.

Cucaah “zaangfahnak, dawtnak le mi ca ṭhatnak tuahnak nih a ṭha lomi ruahnak kha a zorter” tiah an ti. Peknak nih lungretheihnak le thikai zawtnak hna zong kha a zorter khawh. An innchunghawile nih an thihtakmi hna nih midang an bawmh hna tikah lungdonghnak in an hun i hrim ṭhan kho colh.

Cucaah peknak nih ṭhatnak a chuahter ti cu lunghrin awk a um lo.

Jesuh nih a zultu pawl kha hitin a forh hna: “Midang kha thil va ṭhen hna u, nannih zong Pathian nih aan ṭhenh ve hna lai: liam thluahmah in, nan i chap khawh chungin, nan zawi khawh le khawh loin nan kut chungah aan thlet hna lai. Midang ca i nan hmanmi tahnak rel kha Pathian nih nanmah ca zongah a hman ve lai.” (Luka 6:38) Siang ngaiin na pek hna tikah a hmumi nih an i lawmhnak an langhter ṭhannak thawngin annih zong a siangmi an hung si kho. Peknak nih hawikomhnak le lungrual tein ṭuanṭi duhnak zong a karhter.

Minung pehtlaihnak kong a hlathlaimi hna nih “mi ca ṭhatnak a tuahtu hna cu midang kha anmah bantukin tuah ve awkah a forhtu an si” tiah an ti. Siang ngaiin mi a pechanmi hna kong relnak hmanh nih siannak lungput a kan ngeihter. Hlathlainak pakhat nih hitin a ti: “Mi pakhat cu mi tampi cungah huham a ngei kho, a hngalh bal lomi le a hmuh bal lomi cung hmanhah huham a ngei kho.” Phundang in cun, siang ngaiin thil tuahmi pakhat cu mi pakhat in mibu pakhat cung tiang hmanh huham a ngei kho. Cu bantuk mibu lakah tel na duh ve ko lo maw? Na duh ko lai, mi tampi nih cu bantukin siannak an langhter tikah ṭhatnak tampi a chuak.

 Cu bantuk ṭhatnak kha U.S.A, Florida khua i hmuhtonnak pakhat nih a langhter. Hurricane thlichia ruangah harnak a tongmi hna kha Jehovah Tehte phu pakhat nih an bawmh hna. Inn pakhat an remhnak ah a herhmi thilri pawl an hngah lioah cuka innpawng pa i a hau a rawhmi kha an hmuh. Cucaah remhpiak na duh maw tiah an hal i an remhpiak. A hnuah mah pa nih Jehovah Tehte Hna i zungpi ah hitin ca a ṭial: “Nan cungah a zungzal in kaa lawm. Ka ton balmi hna lakah a ṭha bikmi nan si.” A cung i an langhtermi ṭhatnak ruangah aa lawm tuk i Jehovah Tehte Hna rian caah ti in thawhlawm tampi a pek.

Science lei in cinken awk tlak an hmuhmi pakhat cu “midang bawmh duhnak lungput hi mi nih a hrampi in rak ngeih cio dawh a si” tiah an ti. Hlathlainak pakhat nih “ngakchia hi holh an thiam hlan hmanhin pek duhnak an ngei cang” tiah a ti. Zeicah? Baibal nih minung cu “Pathian he i loin” ser an si tiah a ti. Mah cu Pathian ngeihmi sining hna minung nih an ngei ve tinak a si.—Genesis 1:27.

Siannak cu a kan Sertu, Jehovah Pathian i a lang ngaimi sining pakhat a si. Nunnak a kan pek lengah kan i nuamh khawh nakhnga a herhmi vialte zong a kan pek. (Lamkaltu 14:17; 17:26-28) A Bia, Baibal kan hlathlainak thawngin vancung kan Pa he kan i naih kho deuh i kan caah dawtnak in a kan timhpiakmi zong kan hngalh khawh. Cun a kan timhpiakmi hmailei ruahchannak kong zong Baibal in kan hngalh khawh. * (1 Johan 4:9, 10) Siannak cu Jehovah Pathian sinin aa thawkmi a si i kannih cu amah he i loin ser kan si, cucaah Jehovah kha i zohchunh in siannak kan langhter tikah ṭhatnak kan hmu i Pathian mithmai ṭha zong kan hmu.—Hebru 13:16.

Hi capar a thawknak ah langhtermi Alexandra kha naa cinken ti maw? Zei hna dah a ton chap? Amah he khual a tlawngṭimi pakhat nih Alexandra kha na tangka cu na hmu ṭhan ti lai lo tiah a ti. Asinain khua pakhat an phanh tikah tangka a cawihmi pa nih a hawile kha a chawnh hna i mawṭaw dirnak ah dollar 20 kha a cham colh. Mah lengah Alexandra nih a chimh bantukin mah pa cu Baibal a hung cawng. Thlathum a rauh hnuah Peru ah Taluk holh in tuahmi Jehovah Tehte Hna i civui pakhat ah mah pa he an i ton ṭhan caah Alexandra cu aa lawm tuk. Mah Taluk pa nih Alexandra cung i aa lawmhnak langhter awkah Alexandra le a hawile kha a dawr ah rawl ei a sawm hna.

Midang peknak le bawmhnak nih lawmhnak a chuahter. Laksawng ṭha vialte a kan Petu Jehovah Pathian kong hngalh awkah mi kan bawmh hna ahcun kan i lawm chinchin lai. (Jeim 1:17) Cu bantuk peknak in ṭhatnak na hmu maw?