Jordan nih aa putmi, tilawng muisam a simi khedan zumnak cu a sawhsawh te a lo. Asinain mah cu a ngeihmi thil lakah a sunsak bikmi pakhat a si. Jordan nih “kan innchungkhar he aa kom tukmi, kum upa a simi Russell nih ka ngakchiat lioah a rak ka pekmi a si” tiah a chim. Russell cu a pu le a nu le a pa caah a biapi tukmi a si i harnak an ton caan ah a rak bawmtu hna a si ti kha Jordan nih Russell a thih hnuah a hngalh. Jordan nih hitin a chim: “Russell kong tam deuh in ka hngalh tikah mah laksawng hmete hi ka caah a sunglawi tukmi a hung si.”

Jordan kong nih a langhter bantukin laksawng pakhat cu midang mithmuh ah a hmemi te asiloah man a ngei lomi a lo men ko lai. Asinain a cohlangtu caah cun a sunglawi tukmi le a man khiah khawh lomi hmanh a si kho men. Baibal nih a sunglawi tukmi laksawng pakhat kong kha hitin a langhter: “Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.”—Johan 3:16.

Mah laksawng nih laksawng a hmutu kha zungzal nunnak a hmuhter khawh. Cucaah mah nakin a sunglawi deuhmi laksawng a um kho ti hnga maw? Mi cheukhat nih mah laksawng a sunlawi zia kha an hngal lo nain a hmaanmi Khrihfa hna nih cun mah laksawng kha ‘a sung tukmi’ in an cohlan. (Salm 49:8; 1 Peter 1:18, 19) Zeicah Pathian nih vawlei caah a Fapa nunnak kha laksawng in a kan pek?

Lamkaltu Paul nih a ruang kha hitin a fianter: “Sualnak cu mipa pakhat thawngin vawleicung ah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna.” (Rom 5:12) Hmasa bik mipa, Adam nih hramhram in Pathian nawl a ngaih lonak thawngin sualnak a tuah caah thih dantatnak a in. Adam ruangah a tefa vialte a simi, vawleicung mi vialte zong nih thihnak an in.

 “Sualnak man cu thihnak a si, sihmanhsehlaw Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si.” (Rom 6:23) Minung nih thih dantatnak in kan luat nakhnga Pathian nih a Fapa, Jesuh Khrih kha vawlei ah a rak thlah i a tlingmi a nunnak kha raithawinak caah a pekter. Tlanhnak man tiah timi mah raithawinak cungah hrambunh in Jesuh a zummi vialte cu zungzal nunnak an hmu lai.—Rom 3:24.

Pathian nih amah a biami hna kha Jesuh Khrih thawngin thluachuah a pekmi hna he aa tlaiin Paul nih “a sung tukmi a laksawng caah hin Pathian cu lawm ko u sih” tiah a ti. (2 Korin 9:15) Tlanhnak man cu khuaruahhar awktlak in a sunglawi tukmi laksawng a si. Pathian nih minung a kan pekmi laksawng vialte lakah tlanhnak man cu zeicah a hleikhunmi a si? Zeiti lam in dah a ṭha bikmi laksawng a si? * Mah laksawng kha zeitindah kan lehrulh awk a si? Mah biahalnak hna he aa tlaimi Baibal a phi kha a changtu capar pahnih ah rel dingin kan in sawm.