BAIBAL CU SCIENCE CAUK A SI LO NAIN BAIBAL CHIMMI CU CHAN HE AA TLAK. TAHCHUNHNAK CHEUKHAT HI ZOHHMANH U SIH.

Van le vawlei hi aa thawknak a um maw?

Van le vawlei hi aa thawknak a um lo tiah hlanlio minthangmi scientist pawl nih fek tein an rak zumh. Asinain atu ahcun aa thawknak a um ti kha an cohlan cang. Mah kong kha hlanliopi in Baibal nih fiang tein a rak chim cang.—Genesis 1:1.

Vawlei cu zei bantuk pungsan dah a ngeih?

Hlanlio chan ah mi tampi nih vawlei cu a per tiah an rak ruah. BC, kumzabu panganak ah Greek scientist pawl nih vawlei hi a pum tiah an ti. Asinain mah hlan BC, kumzabu pariat lioin Baibal ṭialtu Isaiah nih “vawlei pum” timi biafang kha a rak hman. —Isaiah 40:22, NW.

Vancung hi a rawk kho maw?

BC kumzabu palinak ah a nungmi Greek scientist Aristotle nih rawhnak timi cu vawleicung lawngah a um, arfi in a khatmi vancung ahcun zeitikhmanh ah thlennak le rawhnak a um kho lo tiah a ti. Kumzabu tampi chung cutin an rak ruah. Asinain kumzabu 19 ah scientist pawl nih ningcang tein umlonak timi ruahnak kha an langhter. Mah cu vancung ah siseh, vawleicung ah siseh thil vialte an rawk kho timi ruahnak kha a si. Mah ruahnak a cohlangmi scientist Lord Kelvin nih van le vawlei kong he aa tlaiin Baibal nih “puan bangin an ṭet lai” timi bia kha a cohlan. Pathian nih a sermi thil hna kha rawhnak in a kilven khawh timi Baibal cawnpiaknak kha Kelvin nih a zumh.—Phungchimtu 1:4.

Kan vawlei bantukin a dang vawlei pawl kha zeinihdah a tlaih?

Aristotle nih vancung ah a ummi vawlei [Jo] vialte cu thlalang bantukin a fim i a pummi chungah a dotdot in an um i vawlei hi a laifang ah a um tiah a ti. AD kumzabu 18 a phanh tikah scientist pawl nih arfi le vawlei hna cu vankawlawng ah i tlai loin anmah tein an um ti kha an cohlan. Asinain BC, kumzabu 15 lioah rak ṭialmi Job Baibal cauk ah Sertu nih “vawlei cu zeihmanhlo chungah a thlai” tiah a langhter.—Job 26:7.

BAIBAL CU SIILEI CAUK A SI LO NAIN CHAN HE AA TLAKMI, NGANDAMNAK HE AA TLAIMI LAMHRUAINAK HNA AA TEL.

Mizaw a dang tein chiahnak.

Moses Nawlbia nih thinghmui zawtnak a ngeimi hna kha a dang tein chiah awkah a fial hna. AD 500 in 1,500 hrawngah chawnh khawhmi zawtnak an ton hnu lawngah siibawi pawl nih mah phunglam zulh a herh kha an hngalh. Mah lamhruainak cu atu tiang hman awk a tlak rih.—Levitikas, dal 13 le 14.

Mithi ruak tawngh hnuah kut ṭawlnak.

Kumzabu 19 a donghlei tiang siibawi pawl nih mithi ruak an tawngh hnuah kut ṭawl loin mizaw an zoh tawn. Mah nih thihnak tampi a chuahter. Asinain Moses Nawlbia nih mithi ruak a tawngmi paoh cu a thiang lomi an si tiah a ti. Mithi ruak an tawngh hnuah ti kholh ding hmanhin lamhruainak a pek hna. Mah biaknaklei phunglam hna cu ngandamnak ca zongah ṭhatnak tampi a um.—Nambar 19:11, 19.

Ek fimtawlnak.

Kum fatin ngakchia sing nga leng hi chungtlik in an thi. Cutin an thihnak a biapi bikmi a ruang cu ningcang tein ek an fimtawl lo caah a si. Moses Nawlbia ah mi nih lamhla ah an ek an ee lai i vawlei in an khuh lai tiah a ti.—Deuteronomi 23:13.

Cuarpar tan caan.

Pathian Nawlbia ah pa ngakchia pakhat cu a chuah in a niriatnak ni ah cuarpar aa tan awk a si tiah a ti. (Levitikas 12:3) Ngakchia chuakka cu an chuah in zarhkhat hnu lawngah an thi a khal kho. Baibal chan ah zumhawktlakmi siilei thlopnak a um rih lo nain cuarpar tan dingin zarhkhat hngah cu a ṭhami huhphenhnak a si.

Thinlunglei le pumsalei ngandamnak cu aa pehtlai.

Siilei hlathlaitu le scientist pawl nih nuamhnak, ruahchannak, lawmhnak le ngaihthiam duhnak ti bantuk a ṭhami lungput nih ngan a damter tiah an ti. Baibal nih “lungthin lawmh hi sii ṭha a si, sihmanhsehlaw lungthin ngaihchia nih ruh kha a roter” tiah a ti.—Phungthlukbia 17:22.