CHEUKHAT NIH AA TLAK TI LO AN TI. Doctor pakhat nih lamhruainak hmuh awkah Baibal hman cu chemistry chimhnak caah 1920 hnuah rak chuahmi cauk hmannak he a tahchunh. Baibal zei i a rel lomi pakhat nih hmanung bik chuahmi computer hmanning hngalh awkah chan nih a kaltak cangmi computer hmanning cauk kha na hmang lai maw ti hmanhin aan hal khawh. Cheukhat nih Baibal cu chan nih a kaltak cangmi, hman awk a tlak ti lomi in an hmuh.

Fimthiamnak lei in a ṭhangcho tukmi tuchan vawlei ah chan nih a kaltak cangmi lamhruainak cauk kha zeicah an hman lai? Internet website ah hmanung bik ruahnak cheuhnak le lamhruainak tampi an langhter. Lungthinlei kong a hngalmi, nunning he aa tlaiin ruahnak cheuhnak a petu mifim le caṭialtu hna zong nih TV program in mi kha ruahnak an cheuh tawn hna. Cun cauk dawr zong nih lamhruainak a pemi cauk pawl cu an manh tuk caah tangka tampi an hmuh.

Minit pakhat ah a konglam tampi hngalh khawh a simi tuchan ah a luancia kum 2,000 hrawngah ṭial an liimmi Baibal cauk cu zeicah an hman ti lai? Baibal zei i a rel lomi hna nih lamhruainak hmuh awkah chan nih a kaltak cangmi chemistry cauk asiloah computer hmanning cauk hman he aa lo tiah an timi cu a hmaan maw? A tak ti ahcun a hmaan lo. Science le fimthiamnak hna cu khulrang in aa thleng ko nain minung nih a hrampi kan herhmi hna tah aa thleng maw? Mi nih nunnak sullam kha hngalh an duh rih. Cun nuamhnak le himnak, a nuammi chungkhar pehtlaihnak le hawikomhnak ti bantuk kha ngeih an duh rih.

Baibal cu a hlun tuk cang ko nain mah a herhmi thil hna hmuh khawhning kha a langhter. Pathian thiang thlarau lamhruainak in ṭialmi a si ti zongin a ti. Zei bantuk thil sining paohah lamhruainak a kan pek khawh i kan tonmi zuamcawhnak hna tawnghtham awk zongah a kan bawmh khawh. (2 Timote 3:16, 17) Cun a zungzal in hman awk a tlakmi, zeitikhmanh ah chan nih a kaltak lomi ruahnak cheuhnak zong an um. Baibal nih “Pathian bia cu a nung” tiah a ti.—Hebru 4:12.

Baibal bia hna cu a hmaan taktakmi an si maw? Baibal cu chan nih a kaltak cangmi asiloah tuchan he aa tlak i hman awk a tlakmi, a nungmi cauk a si maw? Mah biahalnak a phi kha hngalh awkah a hleiin chuahmi mah Vennak Innsang cauk nih aan bawmh lai.