Rosie nih “lungretheihnak kong kha ka ruat lengmang i thil sining a chia bik tiang ka ruah” tiah a ti. Zei Baibal caang nih dah a bawmh? Matthai 6:34 nih a bawmh. Mah ah “thaizing kong ah lungrethei in um hlah u; thaizing nih cun lungretheihnak cu a za in aa ngeih ve ko lai. Nikhat nih a chuahpimi harnak cung i a dang chonh chih lengmang hi a herh lo” tiah a ti. Rosie nih Jesuh chimmi mah bia nih thaizing kong kha ruat in lungretheih lo awkah a ka bawmh tiah a ti. Hiti zongin a ti chap: “Nihin ah ka tonmi buaibainak kong lawng kha ka ruah. A cang rih lomi thil le a cang khomi thil hna ruat in ka lungre a thei ti lo.”

Lungretheihnak nih a nenhmi Yasmine zong nih hitin a ti: “A caan ahcun a ṭap hmanh ka ṭap tawn i zan ah kaa hngilh kho lo. Lungretheihnak kong lawngte ka ruat.” Zei Baibal caang nih dah a bawmh? 1 Peter 5:7 i “amah [Pathian] nih aan zohkhenh hna caah nan lungretheihnak vialte kha amah cungah chia dih ko u” timi bia nih a bawmh. Yasmine nih hitin a chim: “Jehovah sinah thla ka cam zungzal i ka thlacamnak kha a ka ngaihpiak. Ka phorhmi thilrit a zaang dihmi bantukin ka intuar. A caan ahcun a ṭhalomi ruahnak hna ka ngei rih ko nain atu cu tawnghtham ning kha ka hngalh cang.”

Isabella timi mino nu pakhat nih hitin a ti: “A caan thawnnak cu cikor he aa pehtlaimi a si tiah ka ruah. Zeicahtiah ka pa cu mah zia kha a ngei. Kei zong dinhnak le TV zohnak caah a biapimi thil hna kha tuah loin a caan thawn ka hmang. Mah tikah ṭuan dingmi rian a tam i a phungmen in ka hun ṭuan caah cu bantuk zia cu a ṭha lo.” 2 Timote 2:15, NW i mah bia hi a caah bawmtu a si: ‘Pathian hnatlakpimi, a ṭuanmi rian hna ah zahpi awk a um lomi rianṭuantu in i pek awkah fakpi in i zuam.’ “A caan thawn ka hmanmi ruangah Jehovah ningzahter kha ka duh lo” tiah Isabella nih a ti. Atu cu a ṭhangcho tuk cang.

Kelsey zong cutin a si ve. Hitin a chim: “Amahle caan te ah dih dingmi rian hna kha ṭuan loin a caan ka thawn tawn. A caan a dih laite ah ka ṭuan caah ka lungre a thei i kaa hngilh kho ti lo. Cucaah ka ṭap tawn. Mah cu a ṭha lo. Phungthlukbia 13:16 cu Kelsey caah bawmtu a si. Hitin kan hmuh: “Mifim cu a fim i zeithil paoh kha a thuhphenh, Sihmanhsehlaw mihrut nih cun a hruhnak kha a zar in a zar.” Mah Baibal caang kha ṭha tein a ruah caah “hman awk a tlakmi lam hna kha a hlankan in kaa timtuah kho cang. Atu cu ka ṭuan dingmi rian hna kha cazin ka tuah i a caan a dih lai ah si loin amahle cazin ningin ka tuah khawh cang” tiah a ti.

Kirsten nih “ka vapa nih ka fale pali he a kan kaltak” tiah a ti. Zei Baibal phunglam dah a caah bawmtu a si? Phungthlukbia 17:17 hi a si. “Hawikom nih cun zeitik paohah dawt zungzal a si, ulenau cu harnak i hrawm awkah hrin kan si.” Kirsten nih amah bantukin Jehovah a biami hna sinah bawmhnak a hal hna. Zei bawmhnak dah a hmuh? Hitin a ti: “Ka hawile nih lam a phunphun in an ka bawmh. A cheu nih ka innka hram ah ei awk le pangpar hna an rak chiah. Voithum tiang inn kaa ṭhial lioah a phu ningin an ka bawmh. Mi pakhat nih rian a ka kawlpiak. Ka hawile cu keimah bawmh awkah timhcia an si zungzal.”

A hmasa ah langhtermi Delphine zong lilennak a tuarmi a si ve. Zeizong vialte a sungh dih hnuah “keimah le keimah kha midang he a umṭi lomi, amah lawng tein a ummi bantukin kaa hmu i ka li a leng tuk” tiah a ti. Salm 68:6 cu a caah bawmtu taktak a si. “[Pathian nih] lungleng le umhar in a ummi kha umnak inn a pek hna.” Hitin a ti: “Mah Baibal caang nih umnak inn taktak kha a chim duhmi a si kho lo. Mah canah Jehovah a dawmi hna he i hawikomh khawhnak hmun, Pathian pekmi a himmi thlaraulei hmun kha a chim duhmi a si ti kha ka hun hngalh. Asinain Jehovah he kan i naih hmasa lawngah midang he kan i naih kho lai. Cucaah Salm 37:4 i ‘BAWIPA kha i bochan u law nan lungthli tum kha aan pek hna lai’ timi bia cu bawmtu taktak a si.”

Hitin a chim chap: “Jehovah he i naih deuh ka herh ti kha ka hun hngalh. Amah cu a ṭha bikmi hawi a si. Jehovah a dawmi hna he kaa komh khawh nakhnga anmah he hmunkhat ah ka tuah khawh dingmi thil kha cazin ka tuah. Mah tikah an ṭhatnak kha ka hun hmuh i an tlinlonak kha ka hngalhthiampiak hna.

Pathian a biami hna cu mitling an si hlei lo. Jehovah Tehte Hna cu midang bantukin harnak an tong ve. Asinain Baibal cawnpiaknak ningin midang kha an si khawh chungin an bawmh hna. Cu bantuk mi hna he hawikom ser cu fim a si. Asinain atu ah tawnghtham khawh lomi caan saupi zawtnak, ngaihchiatnak ti bantuk buaibainak hna caah zei bantuk Baibal lamhruainak hna dah a um?