Rose nih “cikor zawtnak ruangah ka tak a fak peng. Cucaah zeihmanh ka tuah kho lo” tiah a ti. A poi bikmi cu Baibal hlathlainak le biaknak ah ṭha tein a lungthin a pe kho lo. Asinain Matthai 19:26 i “Pathian caah cun zeizong vialte hi a si kho ko” timi Jesuh bia cu a caah bawmtu taktak a si. Rose nih a dang lam zongin cawn khawh a si ti kha a hngalh. A tak a fah i ca a rel khawh lo ruangah Baibal le Baibal hrambunhmi ca hna kha awkhumhmi in a ngaih. * “Mah hna hi um hlah sehlaw Pathian he a ṭhami pehtlaihnak ngeih awkah a fawi lo” tiah a ti.

Rose nih hlanah a tuahmi thil hna atu a tuah khawh ti lo caah a ngaih a chia tuk. Asinain 2 Korin 8:12 bia in hnemhnak a hmu. “Pek duhnak lungthin nan ngeih ahcun nan ngeih lomi thil zoh in si loin nan ngeihmi thil zoh in Pathian nih nan laksawng cu aan cohlanpiak hna lai.” Mah bia nih a si khawh tawkin a tuahmi kha Pathian nih a duh ti a hngalhter.

A hmasa ah langhtermi Delphine nih hitin a ti: “Kum 18 a simi ka fanu a thih tikah ka lung a fak tuk i ka nung kho ti lai lo ti hmanhin ka ruah. Thil sining cu aa dang tuk cang. Asinain Salm 94:19 i “khuaruahhar vansang au in ka um tikah na ka hnemh i ka lung na ka lawmhter” timi salm caṭialtu pa bia in hnemhnak a hmu. “Hnemhnak a ka pemi thil hna ka tuah khawh nakhnga ka bawm tiah Jehovah sinah thla ka cam” tiah a ti.

Mah lungtho tein ṭuanmi rian ah aa pe. Khedan cu a kiah hmanhah hman khawh a si rih. Cu bantukin anih zong ngaihchia lungkuai in um hmanh sehlaw midang ka bawmh khawh rih ko hna ti kha a hngalh. Hitin a ti: “Baibal hmangin midang ka hnemh hna tikah keimah theng zong Jehovah sinin hnemhnak ka hmu.” Baibal chung i ngaihchiatnak a tongmi hna i an min kha a ṭial. “An dihlak in Jehovah sinah bochannak he thla a cammi an si. Baibal an rel lo ahcun an tei kho lai lo” ti zong a hun hngalh.

Delphine nih Baibal a hlathlai caah a luanciami thil kha si loin hmailei thil tu ah a lungthin a pek. Lamkaltu 24:15 bia in hnemhnak a hmu. “Minung hi miṭha he miṭhalo he thihnak in kan tho ṭhan dih lai.” Jehovah nih a fanu a thawhter ṭhan lai ti kha zeitluk in dah a zumh? Delphine nih hitin a ti: “Ka fanu a thawhṭhanmi kha ka mitthlam ah ka cuanter. Calendar ah i chingchiahmi bantukin ka fanu he kan i ton lai ni kha ka lung chungin chingchiahnak ka tuah cang. Ka fanu a chuah lioah ka rak dawt bantukin kan i ton ṭhan tik zongah a si lai.”