Mi tampi nih Pathian kan zumh tiah an ti. Asinain Pathian cu ahodah a si tiah na hal hna tikah a phunphun in an in leh men lai. Cheukhat nih Pathian cu zaangfahnak a ngei lomi biaceihtu, palhnak a tuahmi hna dantat a duhtu Pathian a si tiah an ti. Cheukhat nih cun zeithil kan tuah hmanhah Pathian cu dawtnak le ngaihthiamnak a langhter zungzaltu a si tiah an ti. A dang tu nih cun Pathian cu kan sinin a hlatpi ah a um i zei ah a kan rel lo tiah an zumh. Cu bantuk hmuhnak hna nih mi tampi kha Pathian cu ahodah a si ti hngalh awkah a si kho lo tiah a ruahter men hna lai.

Pathian hngalh cu a biapi maw? A biapi. Pathian kha a um taktakmi in na hngalh tikah na nunnak cu sullam a ngei deuh lai. (Lamkaltu 17:26-28) Pathian na naih deuhdeuh tikah Pathian nih aan dawt deuhdeuh ve lai i aan bawmh lai. (Jeim 4:8) Pathian kong ṭha tein na hun hngalh tikah mah nih zungzal nunnaklei ah aan hruai lai.—Johan 17:3.

Pathian kha zeitindah na hun hngalh khawh? Ṭha tein na hngalhmi na hawikom pakhat kong kha ruathmanh. Nan i hawikomhnak cu zeitindah a ṭhancho? A min, a sining, a duhmi le a duh lomi, a rak tuahmi le tuah aa timhmi thil hna le a dang a kong hna kha na hngalh men lai. Cu bantukin a kong na hngalhmi nih amah he aan naihter chin ko lai.

Cu bantukin a tanglei kong hna hngalhnak nih Pathian kha a kan hngalhter khawh:

• PATHIAN MIN CU AHODAH A SI?

• ZEI BANTUK PATHIAN DAH A SI?

• PATHIAN NIH ZEIDAH A RAK TUAH?

• PATHIAN NIH ZEIDAH A TUAH LAI?

• PATHIAN HNGALHNAK NIH ZEITINDAH ṬHATNAK AAN PEK KHAWH?

Hi mekazin cu mah biahalnak hna i Baibal a phi hngalhter awkah chuahmi a si. Mah capar hna nih Pathian cu ahodah a si timi kong lawng si loin Pathian he pehtlaihnak ṭha ngeihnak nih zeitindah ṭhatnak aan pek khawh timi kong zong hngalh awkah aan bawmh lai.