Pathian cu Ahodah a Si? timi biahalnak a phi hngalh awkah a kan bawmmi kong hna kha hi aa pehmi capar in kan hngalh cang hna. Pathian min cu Jehovah a si i a lang bikmi a sining cu dawtnak a si ti kha Baibal in kan hun hngalh. Minung ṭhatnak caah a rak tuahmi le a tuah laimi kong zong kan hngalh cang. Pathian kong cawn awk tampi a um, asinain cutin tuahnak nih zeitindah ṭhatnak a ka pek lai tiah na ruah khawh men.

Jehovah nih ‘nan ka kawl ahcun nan ka hmuh lai’ tiah bia aa kam. (1 Chanrelnak 28:9) Pathian na hun hngalh tikah a sunglawi tukmi “hawikom,” phundang cun Jehovah he pehtlaihnak ṭha na ngei lai. (Salm 25:14) Cu bantuk hawikomhnak nih zeitindah ṭhatnak aan pek khawh?

Nuamhnak taktak. Jehovah cu “aa nuammi Pathian” in langhter a si. (1 Timote 1:11) Amah he naih tein umnak le a lam i zohchunhnak nih nuamhnak taktak aan hmuhter lai, mah nih intuarnak lei, lungthinlei le pumsalei ah ṭhatnak aan pek khawh. (Salm 33:12) A ṭhalomi nunning hrialnak, ngandamnak ca a bawmmi tuahsernak le midang he pehtlaihnak ṭha ngeih awkah naa zuamnak thawngin a nuammi nunnak na ngei kho lai. Salm caṭialtu chimmi mah bia hi na hna a tla ve ko lai: “Pathian pawng um cu a va nuam hringhran dah!”—Salm 73:28.

Pumpak siaherhnak le zawnruahnak. Jehovah nih a salle sinah ‘Kaan cawnpiak hna lai i lungthin kaan cheuh hna lai’ tiah bia aa kam. (Salm 32:8) Jehovah cu a salle pakhat cio cungah pumpak siaherhnak a ngei i an herhmi te kha a pek hna tinak a si. (Salm 139:1, 2) Jehovah he pehtlaihnak ṭha na ngeih tikah na caah a um zungzalmi a si kha na hmuh lai.

A ṭha tukmi hmailei. Jehovah Pathian nih atu ah a nuammi le lungsinak a pemi nunnak ngeih dingin aan bawmh lengah a ṭha tukmi hmailei ruahchannak ngeih khawh awk zongah aan bawmh. (Isaiah 48:17, 18) Baibal nih hitin a ti: “Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si.” (Johan 17:3) Hi harnak caan ah Pathian pekmi ruahchannak nih “a fekmi le a ṭhawngmi thir cangai bantuk” si awkah a kan bawmh.—Hebru 6:19.

Mah hna cu Pathian kong ṭha tein hngalh awk le amah he pehtlaihnak ṭha ngeih awkah a biapitnak a ruang tampi lakah tlawmpal lawng an si. Hman awk tlakmi a kong tampi hngalh awkah Jehovah Tehte pakhatkhat he pehtlaihnak tuah awk asiloah jw.org/cnh zoh awkah kan in sawm.