Mi pakhat he theihhngalhnak na tuah tikah a hmasa bik ah “Na min ahodah a si?” tiah na hal men lai. Cu bantukin Pathian na hal ahcun zeitindah aan leh lai?

“Keimah cu Jehovah ka si. Cucu ka min a si.”—Isaiah 42:8, BAIBAL CATHIANG.

Amah Pathian thengte caah a min cu a biapi. Pathian min cu minung nih pekmi a si lo, amah tein aa thimmi a si. Jehovah nih hitin a ti: “Hihi a zungzal in ka min a si, hitihin hmailei chan vialte nih an ka auh lai.” (Exodus 3:15) Baibal ah Pathian min Jehovah timi cu Cungnung Bik, Pa, Bawipa asiloah Pathian ti bantuk a sining a langhtermi min hna nakin voi tam deuh a um. Cun Abraham, Moses, David asiloah Jesuh ti bantuk midang min nak zongin voi tam deuh a um. A biapi deuhmi cu Jehovah nih a min kha midang hngalhter a duhmi hna hi a si. Baibal nih hitin a ti: “Nangmah lawnglawng hi BAWIPA [Jehovah, NW] na si le vawlei dihlak uktu Cungnung Bik na si kha hngal hna seh!”—Salm 83:18.

Pathian min cu Jesuh caah a biapi. Bawipa Thlacamnak ah Jesuh nih a zultu pawl kha “Na min thiang cu upat si ko seh” tiah thla cam dingin a cawnpiak hna. (Matthai 6:9) Jesuh theng nih Pathian sinah “Ka Pa, na min cu upatnak pe ko” tiah thla a rak cam. (Johan 12:28) Jesuh nih a nunnak ah Pathian min upatnak kha biapi bik a chiah caah hitin thla a cam khawh: “Nangmah kong [‘na min,’ NW] cu annih kha ka hngalhter hna i ka hngalhter ṭhan lengmang ko hna lai.”—Johan 17:26.

Pathian min cu amah a hngalmi hna caah a biapi. Hlanlio Pathian salle nih huhphenhnak le khamhnak cu tluktu a ngei lomi Pathian min he aa pehtlai ti kha an hngalh. “BAWIPA min cu a fekmi innsang a si, miding cu khika ah khan an va tli i an him.” (Phungthlukbia 18:10) “Bawipa min a aumi paoh cu khamhnak an hmu lai.” (Lamkaltu  2:21) Pathian min nih amah a biami hna kha a thleidanter hna tiah Baibal nih a langhter. “Mi vialte hna cu anmahle an pathian min cio in an kal ko lai, Sihmanhsehlaw kannih cu BAWIPA kan Pathian min in a zungzal in kan kal lai.”—Mikah 4:5; Lamkaltu 15:14.

Mah min nih Pathian a sining kha a langhter. Baibal lei mifim tampi nih Jehovah timi min cu “A Hung Si” timi sullam a ngei tiah biachahnak an tuah. Jehovah Pathian nih Moses sinah mah bia a chimnak thawngin a min sullam kha a hngalhter: “Siter Ka Duhmi ningin Ka Hung Si lai.” (Exodus 3:14, NW) Cucaah Pathian min nih Pathian cu zeizong vialte Sertu a si timi nakin tam deuh a kan hngalhter. A min nih aa tinhnak tlinter awkah amah le a sermi thil hna kha a herh ning paohin a siter khawh hna ti kha a langhter. A sining a langhtermi min hna nih Pathian i a dirhmun, a nawlngeihnak asiloah a ṭhawnnak kha a langhter men lai. Asinian Jehovah timi min lawng nih Pathian cu zeizong vialte a si i zeipoah a hung si kho ti kha a langhter.

Pathian nih a kan siaherh kha a min nih a langhter. Pathian min sullam nih kanmah telin a sermi cungah Pathian cu dawtnak a ngei ti kha a langhter. Mah lengah Pathian nih a min a kan hngalhternak thawngin amah kha ka hngal hna seh ti a duh. Kanmah nih kan hal hlan hmanhin amah nih a min kha a kan chimh hmasa. Pathian nih amah kha a fiang setsai loin le a hlatpi in si loin naih khawh a simi, a um taktakmi in ka hmu hna seh ti a kan duh.—Salm 73:28.

Pathian min hmannak nih amah hngalh kan duh kha a langhter. Tahchunhnak ah, na hawi ah ser na timhmi pakhat kha ka min in rak ka au tiah na ti men ko lai. Mah pa nih na min auh kha a duh lo ahcun zeitindah na um lai? Mah tikah keimah he komh a duh taktak rua lo tiah na ruah men lai. Pathian zong cutin a si ve. Jehovah nih minung kha a min a kan chimh i mah kha hman awkah a kan forh. A min kan hman tikah Jehovah he naih tein um kan duh kha kan langhtermi a si. Cucaah “an lungchung in a min aa cinkenmi hna” kha Pathian nih a hngalh hna.—Malakhi 3:16.

Pathian min hngalhnak cu amah kong hngalhnak ah a biapimi, a hmasa bik kehlan a si. Asinain a min hngalhnak in kan i zat awk a si lo. A min hnulei ah a ummi Amah kha kan hngalh a hau. Zeibantuk Pathian dah a si ti kha kan hngalh a hau.