Mi pakhat kong kha ṭha tein hngalh na duh ahcun zeidah a rak tuah i zei zuamcawhnak hna dah a tei timi kong hna na hlathlai ahcun bawmtu a si lai. Cu bantukin Pathian kong ṭha tein hngalh na duh ahcun zeidah a rak tuah ti kha na hlathlai a hau. Cutin na tuah ahcun Pathian nih hlanah a rak tuahmi thil nih atu le hmailei ah zeitluk in dah ṭhatnak aan pek ti kha na hngalh lai i na khuaruah a har men ko lai.

Jehovah Pathian cu Lianngan Bik Sertu a si i “vawlei a ser hramthawk te khan Pathian nih cun hmuh khawh a si lomi a sining kha fiang tein a langhter.” (Rom 1:20) “Pathian nih vawlei hi a ṭhawnnak in a ser, Vawlei hi a fimnak in a umnak hmun ah hin a umter, Van khi a thiamnak in a samh hna.” (Jeremiah 10:12) Pathian nih kan zawn a kan ruah ti kha sermi thil zong nih an langhter.

Jehovah nih ‘amah he i lo in’ a kan sernak thawngin kan nunnak cu zeitluk ṭha in dah a ser ti kha ruathmanh. (Genesis 1:27) Mah cu Pathian i tahchunh khawh lomi a sining hna kha tlawmpal kan langhter khawh tinak a si. Pathian biak duhnak lungput ngeih awk asiloah a hmuhning le a phunglam hna hngalhthiam khawhnak a kan pek. Cutin nun kan i zuam tikah lawmhnak taktak le sullam a ngeimi nunnak kan hmu lai. A biapi deuhmi cu amah he pehtlaihnak ṭha ngeih khawhnak zong a kan pek.

Vawleicung i Pathian thil sermi hna kan zoh tikah Pathian nih a kan hmuhning kha kan hngalh khawh. Pathian nih ‘amah a um kha thilṭha a tuahmi in a langhter zungzal ko: van in ruah a kan pek i a caan hmaante ah thlaiti a kan pek; rawl kha a kan pek i lunglawmhnak in a kan khahter’ tiah lamkaltu Paul nih a ti. (Lamkaltu 14:17) Pathian nih kan nunnak caah a herhmi lengin a kan pek. Kan i nuamh khawh nakhnga Pathian nih thil a phunphun kha tampi in a kan pek. Mah vialte cu Pathian nih kan caah a kan timhpiakmi lakah tlawmpal lawng an si.

Jehovah nih vawlei cu minung nih zungzal in kan um khawh nakhnga caah a ser. Baibal ah hitin a ti: “Vawlei hi cu mi kha a pek hna” i “thetse ram,  ram pakpalawng ah a ser lo, minung umnak caah a ser.” (Salm 115:16; Isaiah 45:18) Ahote dah a um lai i zei can dah an um lai? “A dingmi cu ram chungah him tein an um lai i ram [vawlei, NW] cu zungzal in anmah ta a si lai.”—Salm 37:29.

Jehovah nih hmasa bik minu le mipa, Adam le Evi kha a ser hna. Cun vawlei paradis ah a chiah hna i annih nih mah kha ‘an zohkhenh awk le an ven awk’ a si. (Genesis 2:8, 15) Lungthawh awk ngai a simi rian pahnih zong a pek hna: “Tefa tampi in ngei u law nan tefa cu vawleicung khuazakip ah khat hna seh.” (Genesis 1:28) Cucaah Adam le Evi cu vawleicung ah zungzal nun ding ruahchannak an ngei. Ngaihchiat awk ngai a simi cu Pathian nawlngaih lo awkah an i thim i mah ruangah “a dingmi” nih ‘vawlei ro an co lai” timi ruahchannak kha an rak sung. Asinain an tuahsernak ruangah minung le vawlei ca i Jehovah tinhnak cu aa thleng lo ti kha kan hmuh. Asinain pakhatnak ah Pathian nih a rak tuahmi a dang pakhat kha zohhmanh hna u sih.

Baibal cu Pathian bia ti zongin hngalh a si. Jehovah nih zeicah Baibal a kan pek? A kong kan hngalh khawh nakhnga caah a si. (Phungthlukbia 2:1-5) Baibal ah Pathian kong he aa tlaiin kan hal khawhmi biahalnak kip i a phi cu a um lo. A dang cauk zongah a um lo. (Phungchimtu 3:11) Asinain Baibal ah aa ṭialmi kong hna nih Pathian kong hngalh awkah a kan bawmh. Pathian nih minung a kan pehtlaih ningin zei bantuk Pathian dah a si ti kha kan hngalh khawh. Zei bantuk minung dah a cohlan hna i zei bantuk dah a cohlan hna lo ti zong kan hngalh khawh. (Salm 15:1-5) Biaknak, ziazalei le thilri chawva a hmuhning zong kan hngalh khawh. Jehovah i a lang bikmi a sining hna kha a Fapa Jesuh Khrih i a biachim le a tuahsernak in Baibal nih a langhter.—Johan 14:9.

Jehovah nih a Bia, Baibal a kan peknak a dang a ruang pakhat cu a nuammi le sullam a ngeimi nunnak ngeih khawhning kan hngalh nakhnga caah a si. Jehovah nih Baibal hmangin a nuammi chungkhar ngeih khawhning, lungsinak ngeih khawhning le lungretheihnak hna tei khawhning kha a kan cawnpiak. Mah makezin nih a hnuah a fianter laimi a biapi tukmi biahalnak hna i a phi zong Baibal ah a um: Zeicah sifah harnak mah tlukin a tam? Hmailei ah zeidah a cang lai? Cun Pathian nih a hramthawk tein aa tinhmi kha tlinter awkah zeidah a tuah ti zong a fianter.

Baibal cu Pathian sinin a rami a si caah aa thleidang tuk ti a langhtermi lam tampi a um. Minung 40 hrawng nih kum 1,600 leng an ṭialmi a si ko nain a Ṭialtu Taktak cu Pathian a si caah a hrampi a kong cu aa khat dih. (2 Timote 3:16) A dang hlanlio ca pawl he i lo loin Baibal cu chankhat hnu chankhat hmaan tein ṭial a simi kha hlanlio kut in ṭialmi Baibal tampi nih an langhter. A biapi deuhmi cu Baibal kha holhleh, phawtzamh le rel awkah khenkham an i zuam ko nain a karh chinchin. Tuchan ah phawtzamh bikmi le holhleh a tam bikmi cu Baibal cauk a si. Baibal a ummi nih “Pathian bia cu zungzal in a hmun” ti kha a langhter.—Isaiah 40:8.

Pathian nih a kan tuahpiakmi a dang pakhat cu kan caah aa tinhnak ka tlinter lai timi aamah khaannak a si. Ahmasa ah langhtermi bantukin Pathian nih minung kha vawleicung ah zungzal um dingin a kan timhpiak. Asinain Adam nih Pathian nawlngaih lo awkah aa thim i sualnak a tuah caah amah theng zungzal nunnak a sungh lengah a tefa pawl zong a sunghter hna. “Sualnak cu mipa pakhat thawngin vawleicung ah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna.” (Rom 5:12) Adam nih Pathian nawl a ngaih lonak thawngin sualnak a tuah caah vawlei ca i Pathian tinhnak cu a tling ti lo dingmi a lo. Mah tikah Jehovah nih zeitindah a lehrulh?

Jehovah tuahsernak ah a sining hna kha an lang zungzal. A dinnak ruangah Adam le Evi kha an tuahsernak he aa tlaiin rian a lakter hna, asinain hmailei an tefa hna caah dawtnak in ruahchannak a timhpiak hna. Jehovah nih a fimnak hmangin  thil sining a tawnghthamning kha a langhter colh. (Genesis 3:15) Sualnak le thihnak in an luat nakhnga Pathian nih a Fapa, Jesuh Khrih kha a pek hna. Mah ah zeidah aa tel?

Adam ralchanhnak ruangah a chuakmi harnak in minung kha tlanh awkah Jehovah nih Jesuh kha vawlei ah a rak thlah. Mah cu mi pawl kha nunnak lam cawnpiak awk le ‘annih tlanhnak ca i a nunnak pek awkah’ a si. * (Matthai 20:28; Johan 14:6) Jesuh cu Adam bantukin a tlingmi a si caah tlanhnak man a pek khawh. Asinain Adam he i lo loin a thih tiang tling tein nawl a ngai. Jesuh cu thih awkah aa tlakmi a si lo caah Jehovah nih vancung nunnak in a thawhter ṭhan. Jesuh nih Adam nih a rak tuah khawh lomi thil kha a tuah khawh caah nawlngaimi minung kha zungzal nunnak ruahchanhnak a pek khawh hna. “Mipa pakhat nawl ngaihlo ruangah mi tampi kha misual i ser an si bantukin mipa pakhat nawl ngaih ruangah mi tampi cu miding ah ser an si lai.” (Rom 5:19) Jesuh tlanhnak man thawngin Pathian nih minung cu vawlei ah zungzal in an nung lai timi a biakam kha a tlinter lai.

Adam nawl ngaihlo ruangah a chuakmi harnak hna Pathian nih a tawnghthamning in a kong tampi kan cawn khawh. Jehovah nih a thawkmi rian liimnak ah zeihmanh nih a dawn kho lo ti le a bia cu “a tlam a tling lai” ti kha kan hmuh. (Isaiah 55:11) Jehovah nih zeitluk in dah a kan dawt ti zong kha kan hun hngalh. “Pathian nih a kan dawtnak a langhterning cu hiti hin a si: a Fapa ngeihchun kha vawlei ah hin a run thlah i amah thawngin nunnak kan ngei lai. Dawtnak ka timi cu, Pathian kan rak dawt hi a si lo, amah nih a kan dawt i kan sualnak ngaihthiamnak ding caah a Fapa kan sinah a run thlah hi a si.”—1 Johan 4:9, 10.

Pathian nih ‘a Fapa hrimhrim hmanh kha a zuah ṭung lo, kan dihlak caah a kan pek.’ Cucaah Pathian nih “thil vialte zong kaan pek hna lai’ timi a biakam kha kan zumh khawh. (Rom 8:32) Pathian nih kan caah zei tuah dingin dah bia aa kam? Rel.