Harnak na ton tikah na hawikom ṭha pakhat nih aan bawmh lai kha naa ruahchan ko lai. Cucaah mi cheukhat nih Pathian cu kan hawi a si lo tiah an ti, zeicahtiah harnak an ton tikah Pathian nih a kan bawm lo tiah an ruah caah a si. A tak ti ahcun Pathian nih kanmah ṭhatnak caah thil tampi a tuah cang i atu kan tonmi buaibainak le harnak vialte zong hi a kan tawnghthampiak lai. Pathian nih zeidah a tuah lai?

Pathian nih ṭhatlonak a chuahtertu a hrampi kha a hrawhnak thawngin ṭhatlonak vialte a donghter lai. Baibal nih mah a hrampi kong kha hitin a langhter: “Vawlei hi a pumpi in miṭhalo pa kut tangah a um.” (1 Johan 5:19) Mah “miṭhalo pa” cu Jesuh nih “hi vawlei uktu” tiah a auhmi Satan Khuachia kha a si. (Johan 12:31) Vawleicung ah ṭhatlonak a karhnak a ruang cu Satan nih hi vawlei hi a uk caah a si. Cucaah Pathian nih zeidah a tuah lai?

Jehovah Pathian nih a rauhhlan ah a Fapa, Jesuh Khrih kha hmangin “thihnak cung i nawl a ngeitu Khuachia kha, a thihnak thawng cun a hrawh” lai. (Hebru 2:14; 1 Johan 3:8) Amah Khuachia thengte nih hrawh a si hlanah “caan tawite lawnglawng ka ngei ti kha a hngalh” tiah Baibal nih a ti. (Biathlam 12:12) Pathian nih ṭhatlonak vialte kha a donghter lai i ṭhatlonak a tuahmi vialte zong kha a hrawh hna lai.—Salm 37:9; Phungthlukbia 2:22.

Vawleicung in ṭhatlonak vialte hloh dih a si tikah Sertu nih minung le vawlei ca i aa tinhnak kha tlinter awkah rian a ṭuan cang lai. Zeidah kan i ngaih khawh?

A hmunmi daihnak le himnak. “Mi toi ah aa dormi cu ram chungah hin him tein an um lai i daihnak kha tlamtling tein an hmuh lai.”—Salm 37:11.

Rawl tampi. “Ram chungah rawl tampi in um ko seh; Lebanon tlang i a ummi rawl kung ṭha bantuk nih tlang vialte cu tuam dih hna seh.”—Salm 72:16.

Inn ṭha le lungsinak a pemi rian. “Mi nih inn an i sak lai i an umnak hna lai, . . . Mitsur dum kha an i ser lai i a mitsurhang kha an din hna lai, . . . An ṭuanmi chungin an hmuhmi theitlai kha tlamtling tein an hman hna lai.”—Isaiah 65:21, 22.

Cu bantuk thil sining hna kha hmuh lai na ngaih ko lo maw? A rauhhlan ah mah vialte kha nifate kan hmuh cang lai.

Tuchan ah mikip nih zawtnak le thihnak ton a si, asinain a rauhhlan ah an um ti lai lo. Pathian nih Jesuh tlanhnak man nih a chuahtermi ṭhatnak kha a hman cang lai. Cucaah “amah a zummi paoh cu an thi lai lo, zungzal nunnak an ngei lai.” (Johan 3:16) A phichuak cu zeidah a si lai?

Zawtnak vialte hloh a si cang lai. “Kan ram i a ummi cu ka zaw tiah an zai ti lai lo i an sualnak vialte cu ngaihthiam an si lai.”—Isaiah 33:24.

Minung cu an thi ti lai lo. “BAWIPA nih thihnak cu zungzal ca in a hrawh lai. Mi vialte cu an mitthli a hnawh hna lai.”—Isaiah 25:8.

Minung cu zungzal in an nung cang lai. “Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si.”—Rom 6:23.

A thimi hna cu an nung ṭhan lai. “Minung hi miṭha he, miṭhalo he thihnak in kan tho ṭhan dih lai.” (Lamkaltu 24:15) Tlanhnak man thawngin a thimi hna cu an tho ṭhan lai.

Pathian nih mah vialte hi zeitindah a tlinter lai?

Pathian nih minung le vawlei ca i aa tinhnak kha Jesuh Khrih Ukmi vancung cozah hmangin a tlinter lai. (Salm 110:1, 2) Mah cu Jesuh nih a zultu pawl thlacam a cawnpiak hna lio i a chimmi cozah asiloah pennak kha a si: “Vancung khua i a um kan Pa, . . . Na Pennak cu rung tlung ko seh.”—Matthai 6:9, 10.

Pathian Pennak nih vawleicung pumpi kha a uk cang lai i vawleicung ah a ummi ṭhatlonak le harnak vialte kha a donghter dih cang lai. Mah Pennak cu minung caah a ṭha bikmi cozah a si. Cucaah amah Jesuh thengte nih vawleicung i phungchim rian a ṭuan lioah “Pennak Thawngṭha Bia” kha teima tein a rak thanh. Cun a zultu pawl zong cutin tuah ve awkah a forh hna.—Matthai 4:23; 24:14.

Jehovah Pathian nih a sermi minung caah dawtnak in mah a ṭha tukmi thil vialte kha tuahpiak dingin bia aa kam. Mah nih Jehovah kong hngalh duh awk le a sin naih awkah aan forh ko lo maw? Cutin tuah awkah naa thim ahcun zeitindah ṭhatnak na hmuh lai? A hnu capar nih a fianter lai.